1. Noa ˈtu e haamata te faaipoiporaa ma te oaoa, eaha ta te feia faaipoipo e farerei i muri aˈe? (A hiˈo i te hohoˈa matamua.)

 IA ITE te tane faaipoipo i ta ˈna vahine haviti mau i te mahana faaipoiporaa, e oaoa roa na hoa faaipoipo. A haamatau ai raua ia raua, ua rahi roa mai to raua here te tahi i te tahi, hinaaro roa ˈtura raua e faaipoipo. Euhe atura raua e vai taiva ore te tahi i te tahi. I muri aˈe i te faaipoiporaa, e titauhia ia raua ia rave i te mau tauiraa ia vai hoê noa raua. Te hinaaro ra Iehova te Tumu o te faaipoiporaa, ia oaoa e ia manuïa te oraraa ei feia faaipoipo, ua horoa ïa oia i te mau aˈoraa î i te paari i roto i ta ˈna Parau, te Bibilia. (Mas. 18:22) Noa ˈtu râ, te parau ra te Bibilia e e farerei te mau taata tia ore o te faaipoipo, i te mau fifi aore ra i te “ati . . . i te tino nei.” (Kor. 1, 7:28) E nafea te mau hoa faaipoipo e nehenehe ai e faaiti i teie mau fifi? E e nafea te mau Kerisetiano ia manuïa te faaipoiporaa?

2. Eaha te huru here e tia i te mau hoa faaipoipo ia faaite?

² Te haapii mai ra te Bibilia e e huru maitai faufaa roa te here. Ua rau râ te huru here e titauhia ia faatupu te tane e te  vahine i roto i te faaipoiporaa. Ei hiˈoraa, mea titauhia ia faatupu te tahi e te tahi i te here taeae. Oia atoa râ i te here i roto i te tane e te vahine. E ia tamariihia raua, e itehia ïa te here i roto i te mau mero o te utuafare. Te vai ra râ te here o tei niuhia i nia i te mau faaueraa tumu e ite ai raua i te oaoa mau i roto i te faaipoiporaa. Te faataa ra Paulo i tera here a parau ai oia: “E aroha . . . te taata atoa i tana iho vahine, mai te aroha ia ˈna ihora, e te vahine ra ia auraro oia i tana tane.”—Eph. 5:33.

3. Mai te aha te puai o te here i roto i te faaipoiporaa?

³ Ua papai Paulo: “E te mau tane ra, e aroha outou i ta outou mau vahine, mai te Mesia atoa i aroha i te ekalesia, e ua horoa ia ˈna iho ei taui.” (Eph. 5:25) Te pee ra te mau Kerisetiano i teie mahana i to Iesu hiˈoraa ma te here te tahi i te tahi mai ta Iesu i here i ta ˈna mau pǐpǐ. (A taio i te Ioane 13:34, 35; 15:12, 13.) No te rahi o te here ta te hoê tane Kerisetiano e ta ˈna vahine faaipoipo e faaite te tahi i te tahi, ua ineine ïa te tahi i te pohe no te tahi. Ia tupu râ te fifi rahi i roto i te faaipoiporaa, e manaˈo paha vetahi e e ere to ratou here i te mea puai roa. Eaha te nehenehe e tauturu ia ratou? O te here ïa niuhia i nia i te mau faaueraa tumu e “tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra.” E ore roa tera huru here “e mou.” (Kor. 1, 13:7, 8) Mea tia ia haamanaˈo te hoê tane e ta ˈna vahine faaipoipo e ua euhe raua. Ua euhe raua e here te tahi i te tahi ma te ore e taiva. E turai te haamanaˈoraa i te reira i te mau hoa faaipoipo Kerisetiano ia imi i ta Iehova tauturu e ia ohipa amui no te faatitiaifaro i te mau fifi atoa.

4, 5. (a) Eaha te hopoia a te tane ei upoo utuafare? (b) Eaha te tia i te hoê vahine faaipoipo ia rave? (c) Eaha te mau faatanoraa ta te hoê tane e ta ˈna vahine faaipoipo i titauhia ia rave?

⁴ Ua faataa Paulo i te mau hopoia a na hoa faaipoipo tataitahi a parau ai oia: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia.” (Eph. 5:22, 23) E ere te auraa e mea maitai aˈe te tane i ta ˈna vahine faaipoipo. Ua faahiti Iehova i te tiaraa faufaa o te hoê vahine faaipoipo a parau ai oia: “E ere ïa i te mea maitai ia parahi noa Adamu oia anaˈe ra; e hamani au i te tahi tauturu au na ˈna ra.” (Gen. 2:18) E tia i te hoê vahine faaipoipo ia tauturu i ta ˈna tane ia riro mai oia ei upoo utuafare maitai. E mea titauhia i te hoê tane ia pee i te here o Iesu, te upoo o te amuiraa. Ia na reira te hoê tane, e ite ta ˈna vahine faaipoipo i ta ˈna paruru e e riro ei mea ohie aˈe no ˈna i te faatura e i te turu ia ˈna.

⁵ Te faˈi ra o Cathy, o tei faaipoipo ia Fred: “I to ˈu faaea-taa-noa-raa, i haapao noa na vau ia ˈu iho, o vau anaˈe to ˈu oraraa. Ua riro te faaipoiporaa ei faatanoraa no ˈu, inaha ua haapii au i te tiaturi i ta ˈu tane. Aita te reira i riro ei mea ohie, ua piri atu â râ mâua ma te rave mai ta Iehova e hinaaro ra.” ^[1] Te parau ra o Fred: “Aita roa ˈtu i riro ei mea ohie no ˈu ia rave i te mau faaotiraa. I roto i te faaipoiporaa, e tautooraa te feruriraa no e piti taata. Ma te imi râ i ta Iehova aratairaa na roto i te pure e ma te faaroo maite i te manaˈo o ta  ˈu vahine, e ohie roa te reira i te mau mahana atoa. No ˈu, ua tu to mâua manaˈo!”

6. E nafea te here e riro ai ei “tatua nehenehe roa” ia tupu te fifi i roto i te faaipoiporaa?

⁶ E puaihia te mau faaipoiporaa ia tamau te mau hoa faaipoipo i te “faaoromai te tahi i te tahi, e e faaore te tahi i ta te tahi hapa.” No te mea e taata tia ore raua, e hape iho â te tane e ta ˈna vahine faaipoipo. Ia tupu noa ˈtu te reira, e nehenehe raua e huti mai i te haapiiraa i to raua mau hape, e haapii i te faaore i ta te tahi hapa e e faaite raua i te here niuhia i nia i te mau faaueraa tumu. E “tatua nehenehe roa” teie here. (Kol. 3:13, 14) E nehenehe te mau hoa faaipoipo e faatupu i teie here ma te faaoromai, ma te faaite i te mǎrû e ma te ore “e manaˈo ino.” (Kor. 1, 13:4, 5) Ia tupu te tahi mau peapea, e tutava te tane e ta ˈna vahine faaipoipo i te faaafaro oioi i te reira. (Eph. 4:26, 27) Mea titauhia te haehaa e te itoito no te parau “Te tatarahapa nei au no to ˈu haamauiuiraa ia oe.” E tauturu râ te reira ia faaafaro i te mau fifi e e piri atu â na hoa faaipoipo.

7, 8. (a) Eaha te aˈoraa ta te Bibilia e horoa ra no nia i te taotoraa i to ˈna apiti i roto i te faaipoiporaa? (b) No te aha mea titauhia i te mau hoa faaipoipo ia faaite i te mǎrû?

⁷ Te horoa ra te Bibilia i te aˈoraa maitai o te nehenehe e tauturu i te mau hoa faaipoipo ia faaite i te huru feruriraa tano no nia i te taotoraa i to ˈna apiti i roto i te faaipoiporaa. (A taio i te Korinetia 1, 7:3-5.) Mea faufaa ia haapao te hoê tane e ta ˈna vahine faaipoipo i to te tahi e te tahi huru aau e hinaaro. Aita anaˈe te tane e faaite i te mǎrû i ta ˈna vahine, eita paha ïa o ˈna e au e taoto i ta ˈna tane. E tia i te mau tane ia haapao i ta ratou vahine “ma te ite.” (Pet. 1, 3:7) Eiaha te hoê hoa faaipoipo e faahepo aore ra e onoono i to ˈna apiti e taoto ia ˈna. E tia ia vaiiho i tera hinaaro ia haere noa mai mai tera. E pinepine aˈe te hoê tane i te hinaaro e taoto i ta ˈna vahine i te vahine iho. E tia râ ia tiai i te taime au no te tane e no ta ˈna vahine faaipoipo.

⁸ Aita te Bibilia e horoa ra i te tahi mau ture taa maitai no nia i te mau huru faaiteraa i te here a te hoê tane e ta ˈna vahine faaipoipo, oia atoa no te mau taotiaraa. Te faahiti nei râ te Bibilia i te tahi mau hiˈoraa no nia i te faaiteraa i te here. (Sire 1:2; 2:6) E tia i te mau hoa faaipoipo ia faaite i te mǎrû te tahi i te tahi.

9. No te aha eita e fariihia te hinaaro e taoto i te tahi apiti e ere to tatou iho hoa faaipoipo?

⁹ Ia puai to tatou here no te Atua e no te taata tupu, eita roa ˈtu tatou e vaiiho te tahi taata aore ra hoê noa ˈˈe mea e haafifi i to tatou faaipoiporaa. Ua haaparuparu vetahi e ua tuino roa atoa i to ratou faaipoiporaa ma te mataitai-tamau-raa i te hohoˈa faufau. Mea tia ia patoi tatou i te mau mea atoa o te aratai ia tatou ia mataitai i te hohoˈa faufau aore ra ia hinaaro e taoto i te tahi apiti e ere to tatou iho hoa faaipoipo. Hau atu â, e titau-atoa-hia ia ape tatou i te mau haerea atoa o te faaite ra paha e te faahinaaro ra tatou i te tahi taata e ere i to tatou iho hoa faaipoipo. Mea ino te raveraa i tera mau peu. Ia haamanaˈo tatou e ua  ite Iehova i to tatou mau manaˈo e haaraa atoa. E tauturu te reira ia tatou ia haapuai i to tatou hinaaro e faaoaoa ia ˈna e e vai taiva ore i to tatou apiti.—A taio i te Mataio 5:27, 28; Hebera 4:13.

10, 11. (a) Eaha te faito o te feia e faataa ra? (b) Eaha ta te Bibilia e parau no nia i te faataa-ê-raa? (c) Na te aha e tauturu i te hoê hoa faaipoipo ia ore e faataa ê oioi i to ˈna apiti?

¹⁰ Aita anaˈe te mau fifi rahi e faaafarohia, e faaoti paha te tahi mau hoa faaipoipo e faataa ê aore ra e faataa roa. I te tahi mau fenua, ua hau atu i te afaraa o te mau hoa faaipoipo te faataa ra. Mea papu, e ere teie tupuraa i te mea matauhia i roto i te amuiraa Kerisetiano. Tera râ, te rahi noa ˈtu ra te feia faaipoipo Kerisetiano e faaruru ra i te mau fifi rahi i roto i to ratou faaipoiporaa.

¹¹ Te horoa ra te Bibilia i teie mau faaueraa: “Eiaha te vahine e faataa ê i tana tane. Ia faataa ê râ oia ra, e parahi noa oia eiaha e faaipoipo, e e faite hoi oia i tana tane; e eiaha te tane e tuu ê atu i tana vahine.” (Kor. 1, 7:10, 11) E manaˈo paha te tahi mau hoa faaipoipo e no te rahi o to ratou mau fifi, e titauhia ia ratou e faataa ê. Tera râ, ua faaite Iesu e e ere te faataa-ê-raa i te ohipa hauti a faahiti ai oia i ta te Atua i parau i te omuaraa no nia i te faaipoiporaa: “Ta te Atua i taati ra, eiaha te taata e faataa ê atu.” (Mat. 19:3-6; Gen. 2:24) Ma teie mau parau, ua hinaaro Iehova ia vai hoê te mau tane e te mau vahine faaipoipo. (Kor. 1, 7:39) Mea titauhia ia tatou pauroa ia haamanaˈo e e hopoia ta tatou no ta tatou mau haaraa i mua ia Iehova. E nehenehe te reira e tauturu ia tatou ia faaafaro oioi i te mau fifi hou a rahi roa mai ai te reira.

12. Na te aha paha e aratai i te hoê hoa faaipoipo ia feruri i te faataa-ê-raa?

¹² No te aha te tahi feia faaipoipo e faaruru ai i te mau fifi rahi? Mea taa ê roa te tupuraa ta vetahi e farerei i ta ratou i manaˈo na a faaipoipo ai ratou, e ua inoino aore ra ua riri ratou. E pinepine te mau fifi i te tupu mai no te mau taa-ê-raa i roto i te huru haapiiraa ta te mau taata i fanaˈo a paari mai ai ratou. Oia atoa no to ratou mau huru aau i mua i te tahi tupuraa. E nehenehe atoa te mau peapea e te mau metua hoovai e haafifi i na hoa faaipoipo. Oia atoa no te mau peapea no nia i te huru haamâuˈaraa i te moni aore ra te aupururaa i te mau tamarii. Mea maitai râ ia ite e e rave rahi hoa faaipoipo Kerisetiano tei ite i te mau ravea no te faaafaro i to ratou mau fifi no te mea te vaiiho nei ratou i te Atua ia aratai ia ratou.

13. Eaha te mau tumu faufaa e tano ai ia faataa ê te mau hoa faaipoipo?

¹³ Te vai ra paha te mau tumu faufaa e faataa ê ai te mau hoa faaipoipo. Te tahi mau tumu i faaoti ai vetahi e faataa ê, no te mau tupuraa ino mau ïa, mai te oreraa e hinaaro e aupuru i te utuafare, te hamani-ino-raa  uˈana e te haafifiraa i te oraraa pae varua o te hoê Kerisetiano. Ia tupu te mau fifi rahi, e tia i te feia faaipoipo ia ani i te tauturu a te mau matahiapo. E ite rahi to teie mau taeae e e nehenehe ratou e tauturu i te feia faaipoipo ia pee i te aˈoraa a te Atua i roto i to ratou oraraa. E ia ani te mau hoa faaipoipo ia Iehova i to ˈna varua moˈa, e nehenehe te reira e tauturu ia ratou ia pee i te mau faaueraa tumu Bibilia e ia faatupu i te mau huru maitatai Kerisetiano. (Gal. 5:22, 23) ^[2]

14. Eaha ta te Bibilia e parau ra no te mau hoa faaipoipo Kerisetiano e ere to ratou hoa faaipoipo i te Ite no Iehova?

¹⁴ Te faaite ra te Bibilia e te vai ra te mau tumu maitatai ia faaea noa na hoa faaipoipo, noa ˈtu aita hoê o raua e haamori ra ia Iehova. (A taio i te Korinetia 1, 7:12-14.) E “moˈa” te hoa faaipoipo e ere i te Ite no Iehova no te mea ua faaipoipo oia i te hoê tavini a te Atua. E “moˈa” atoa te mau tamarii apî o na hoa faaipoipo, e tei raro aˈe atoa ïa ratou i ta te Atua paruru. Ua faaitoito Paulo i te mau hoa faaipoipo Kerisetiano: “Eaha hoi oe i ite ai, e tera ra vahine, e eita to tane e ora ia oe? e eaha hoi oe i ite ai, e tera tane, e eita to vahine e ora ia oe?” (Kor. 1, 7:16) E rave rahi hiˈoraa maitatai o te mau tane e vahine faaipoipo Kerisetiano tei tauturu i to ratou hoa faaipoipo ia riro mai ei tavini a Iehova.

15, 16. (a) Eaha te aˈoraa ta te Bibilia e horoa ra na te mau vahine faaipoipo Kerisetiano e ere to ratou hoa faaipoipo i te tavini a te Atua? (b) Eaha te tiaraa o te hoê Kerisetiano ia maiti to ˈna hoa faaipoipo aita i roto i te faaroo e “haere ê”?

¹⁵ Te aˈo ra te aposetolo Petero i te mau vahine Kerisetiano ia auraro i ta ratou mau tane “e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau; i te hiˈoraa mai ratou i ta outou haapaoraa viivii ore i apiti-atoa-hia i te mǎtaˈu.” Aita te hoê vahine e paraparau i te mau taime atoa no nia i ta ˈna mau tiaturiraa, e tauturu râ  oia i ta ˈna tane ia farii i te parau mau ia faaite oia i “te aau mǎrû e te mamahu, o te mea taoˈa rahi ïa i mua i te aro o te Atua.”—Pet. 1, 3:1-4.

¹⁶ E mai te peu e e maiti te hoê hoa faaipoipo aita i roto i te faaroo i te faataa ê? Te parau ra te Bibilia: “Ia haere ê . . . tei ore i faaroo ra [aore ra te hoa faaipoipo aita i roto i te faaroo], haere noa ˈtu ïa, e ore te taeae e te tuahine e fifi i te reira. Ua haapaohia râ tatou e te Atua, ei hau ta tatou.” (Kor. 1, 7:15) Noa ˈtu e hopoi mai te faataa-ê-raa i te tahi hau, aita e tiaraa to te hoa faaipoipo Kerisetiano no te faaipoipo faahou ia au i te Bibilia. Eita râ e titauhia ia ˈna ia faahepo i to ˈna apiti ia faaea mai. A mairi ai te tau, e faaoti paha te hoa faaipoipo aita i roto i te faaroo e hoˈi mai, a hinaaro ai ia maitai faahou mai to raua faaipoiporaa. E i muri aˈe, e riro roa mai paha oia ei tavini a Iehova.

17. Eaha ta te mau hoa faaipoipo Kerisetiano e tuu i te parahiraa matamua?

¹⁷ No te mea te ora nei tatou i te pae hopea o te “anotau hopea,” te faaruru nei tatou i te “ati rahi.” (Tim. 2, 3:1-5) No reira, mea titauhia te paruru o te hoê auhoaraa puai e o Iehova. Ua papai Paulo: “Te poto nei te taime: e au i te feia tara vahine ra, ia riro mai te mea e, aore . . . e te feia i rave i to teie nei ao ra, mai te mea e aore i rave.” (Kor. 1, 7:29-31) Aita Paulo e parau ra e eiaha te hoa faaipoipo e haapao i to ˈna apiti. No te mea râ te ora nei tatou i te anotau hopea, mea titauhia ia tuu tatou i te parahiraa matamua ta tatou haamoriraa ia Iehova.—Mat. 6:33.

18. No te aha e nehenehe ai te mau Kerisetiano e ite i te hoê faaipoiporaa oaoa e te manuïa?

¹⁸ I teie tau fifi mau, e rave rahi faaipoiporaa tei ore i manuïa. E nehenehe anei te mau Kerisetiano e ite i te hoê faaipoiporaa oaoa e te manuïa? E, ia vai piri noa tatou ia Iehova e i to ˈna nunaa, ia pee tatou i te mau faaueraa tumu Bibilia e ia farii tatou i te aratairaa a te varua moˈa o Iehova. Ia na reira tatou, e haafaufaa tatou i “ta te Atua i taati.”—Mar. 10:9.