1, 2. (a) E nafea te mau tauiraa manaˈo-ore-hia e ohipa ˈi i nia ia tatou? (A hiˈo i te hohoˈa matamua.) (b) Ia au i te Salamo 131, e nafea ia fanaˈo i te hau o te feruriraa?

 UA TAVINI o Lloyd raua Alexandra e 25 matahiti e hau atu i te Betela. I muri aˈe ua titauhia raua ia rave i te tahi atu taviniraa: poro i roto i te tuhaa fenua. E manaˈo hepohepo to raua i te omuaraa. I muri aˈe râ i to raua feruriraa i te mau tumu o tera tauiraa, ua farii e ua mauruuru raua, noa ˈtu ua faariro Lloyd i ta ˈna taviniraa i te Betela ei oraraa no ˈna. Te na ô ra oia: “I te mau hebedoma e avaˈe i muri aˈe, ua tae roa vau i te manaˈo e aita to ˈu e faufaaraa.” I te tahi taime e maitai mai te huru feruriraa o Lloyd, i te tahi atu râ taime e topatopa roa ïa.

² E faaruru iho â tatou i te tahi mau tauiraa manaˈo-ore-hia i roto i te oraraa, e oto e e piˈo atoa to tatou aau. (Mas. 12:25) Eaha te tauturu ia tatou ia vai hau noa a farii e a faatano atu ai i to tatou feruriraa ia taui noa ˈtu te  tupuraa. (A taio i te Salamo 131:1-3.) E hiˈo anaˈe mea nafea to vetahi mau tavini i tahito e i teie tau, fanaˈoraa i te hau o te feruriraa a taui taue ai to ratou oraraa.

3. Mea nafea te oraraa o Iosepha i taui taue ai?

³ I roto i ta ˈna mau tamarii atoa, o Iosepha te tamaiti ta Iakoba i here roa ˈˈe. I te 17raa o to Iosepha matahiti, ua hoo atu to ˈna mau taeae ia ˈna ei tîtî no to ratou pohehae. (Gen. 37:2-4, 23-28) I to ˈna hopoiraahia i Aiphiti, ua atea ê Iosepha i to ˈna papa here ra. Ua mauiui oia 13 matahiti i te maoro na mua roa ei tîtî e i muri iho ei mau auri. Ua nehenehe paha tera tupuraa e faaere ia ˈna i to ˈna tiaturiraa e e faatupu i te inoino, aita râ. Na te aha hoi i tauturu ia ˈna?

4. (a) Eaha ta Iosepha i rave i roto i te fare tapearaa? (b) Eaha ta Iehova i haapapu atu?

⁴ I roto i te fare tapearaa, ua imi Iosepha i te tauturu a Iehova. (Gen. 39:21; Sal. 105:17-19) Ua manaˈonaˈo atoa paha o ˈna i ta ˈna moemoeâ i to ˈna apîraa e ua tiaturi tei pihai iho noa Iehova ia ˈna. (Gen. 37:5-11) Mea papu ua pure pinepine oia ia Iehova e ua faaite atu i te mea e vai ra i roto i to ˈna aau. (Sal. 145:18) E ua haapapu Iehova ia Iosepha e “tei pihai iho” oia ia ˈna noa ˈtu eaha te ohipa e tupu.—Ohi. 7:9, 10. a

5. E nafea “te hau o te Atua” ia tauturu mai ia tavini hau atu â ia Iehova?

⁵ Noa ˈtu eaha te fifi farereihia, e nehenehe “te hau o te Atua” e tamǎrû e e paruru i to tatou feruriraa. (A taio i te Philipi 4:6, 7.) Ia hepohepo tatou, e faaitoito mai “te hau o te Atua” ia tamau i te tavini ia Iehova e ia ore e tuu. E haapii mai tatou na roto i te hiˈoraa o te tahi mau taeae e tuahine o teie tau tei faaruru na i te ahoaho.

6, 7. E nafea te pure e tauturu mai ai ia fanaˈo faahou i te hau o te feruriraa? A horoa i te hiˈoraa.

⁶ Ua hepohepo roa Ryan raua Juliette a hope ai ta raua taviniraa ei pionie taa ê taime poto. Te parau ra Ryan: “Ua pure mâua ia Iehova ma te ite e ravea maitai tera no te faaite i to mâua tiaturi ia ˈna. E rave rahi mero i roto i te amuiraa mea apî i roto i te parau mau, ua pure mâua ia tauturu mai Iehova ia faaite noa i te faaroo puai ia nehenehe ratou e huti i te hiˈoraa maitai.”

⁷ Ua pahono anei Iehova i ta raua pure? Te na ô ra Ryan: “I muri iti noa ˈˈe i ta ˈu pure, ua moˈe taue te mau haapeapearaa e te inoino. Ua taa ihora ia mâua e ua tiai te hau o te Atua i to mâua aau e feruriraa. Ua faaite mâua i te haerea maitai e ua tamau noa i te tavini ia Iehova.”

8-10. (a) E nafea te varua moˈa o te Atua ia tauturu mai a hepohepo ai tatou? (b) E nafea Iehova e tauturu mai ai ia tiatonu tatou i nia i te taviniraa ia ˈna?

⁸ E haapii te varua moˈa o te Atua ia  tatou ia vai hau noa e ia ite atoa i te mau irava Bibilia o te tauturu mai ia taa eaha te mea faufaa roa ˈˈe i roto i te oraraa. (A taio i te Ioane 14:26, 27.) E na hoa faaipoipo Philip raua Mary. Ua rohi raua i te Betela fatata e 25 matahiti te maoro. I roto noa e maha avaˈe, ua pohe to raua na mama e te tahi atoa fetii. Hau atu â, ua titauhia raua ia haapao i te papa o Mary tei maamaahia.

⁹ Te parau ra Philip: “Ua manaˈo vau e nehenehe au e faaruru i te reira, ua moˈe râ ia ˈu te tahi mea. Parau mau, ua faaoromai au, eiaha râ mai tei titauhia. I roto i te hoê tumu parau o Te Pare Tiairaa, ua taio vau i te Kolosa 1:11. Te na ô ra te irava ‘ia nehenehe outou ia faaruru maite na roto i te faaoromai e te oaoa.’ Ua haamanaˈo mai te reira, aita to ˈu oaoa i niuhia i nia i te huru o te tupuraa, i nia râ i te ohiparaa a te varua o te Atua i roto i to ˈu oraraa.”

¹⁰ No to raua tiatonu-noa-raa i nia i te taviniraa a Iehova, ua haamaitai-rahi-hia raua. E rave rahi piahi ta raua i haapii i te Bibilia. Ua haere maitai ratou i mua i te pae varua e ua hinaaro atoa e haapii e rave rahi taime i te hebedoma hoê. Te na ô ra Mary: “Ua riro ratou ei oaoaraa no mâua e ei ravea atoa e parau mai ai Iehova e maitai mai te mau mea atoa.”

11, 12. (a) Eaha ta Iosepha i rave i nehenehe ai Iehova e haamaitai ia ˈna? (b) E mea nafea Iehova i te haamaitairaa ia ˈna?

¹¹ Ia tupu te tahi mau tauiraa manaˈo-ore-hia i roto i te oraraa, e nehenehe tatou e hepohepo roa a faaea noa ˈi i nia i to tatou mau fifi. Ua farerei Iosepha i tera tupuraa. Aita râ oia i hiˈo noa i te fifi, ua rave o ˈna i tei titauhia ia rave. Ua haapao maitai o ˈna i ta ˈna ohipa a tavini ai ia Potiphara. Ua pee maite atoa oia i te mau faaueraa a te tiai o taua fare tapearaa ra.—Gen. 39:21-23.

¹² Ua faauehia Iosepha i te hoê mahana ia tiai e piti tavini a Pharao e ua  hamani maitai noa oia ia raua. Aita na taata i taiâ i te faataa i ta raua e haapeapea ra e te moemoeâ huru ê ta raua i ite i te po na mua ˈtu. (Gen. 40:5-8) Aita â Iosepha i ite e tauturu tera aparauraa ia ˈna ia tiamâ. E piti matahiti i muri aˈe, ua matara oia mai te fare tapearaa e ua riro mai ei tiaau rahi i Aiphiti. O Pharao noa to nia aˈe ia ˈna!—Gen. 41:1, 14-16, 39-41.

13. Noa ˈtu eaha te tupuraa, eaha te titauhia ia rave tatou e haamaitai mai ai Iehova?

¹³ Mai ia Iosepha, e topa atoa paha tatou i roto i te hoê tupuraa eita e vî ia tatou. Ia faaoromai râ tatou a rave ai i te mea maitai, e haamaitai mai Iehova. (Sal. 37:5) A feaa e a hepohepo atoa ˈi tatou, e ‘itea te tahi faaoraraa.’ (Kor. 2, 4:8; nota) Tei pihai iho noa Iehova ia tatou, a tiatonu maite ai tatou i nia i ta tatou taviniraa ia ˈna.

14-16. Mea nafea to Philipa tiatonu-noa-raa i nia i ta ˈna taviniraa noa ˈtu te mau tauiraa i roto i to ˈna oraraa?

¹⁴ E hiˈoraa maitai roa to te taata poro evanelia ra o Philipa. Noa ˈtu ua tupu te tahi mau tauiraa i roto i to ˈna oraraa, ua tiatonu noa o ˈna i nia i ta ˈna taviniraa. I te hoê taime, ua tonohia o ˈna i Ierusalema. (Ohi. 6:1-6) Ua taui taue râ te tupuraa. Ua haapohehia Setephano e tupu atura te hoê hamani-ino-raa rahi i nia i te mau Kerisetiano e horo ê ihora ratou i Ierusalema. Ua hinaaro râ Philipa e tamau i te poro, haere atura oia i Samaria, mea rahi hoi te feia i ǒ tei ineine i te faaroo i te parau apî oaoa.—Mat. 10:5; Ohi. 8:1, 5.

¹⁵ Ua farii Philipa i te haere i te vahi e tono ai te varua o te Atua ia ˈna. Ua poro oia i te mau vahi aita â te taata i faaroo atura i te parau mau. Ua hiˈo ino e rave rahi ati Iuda i to Samaria. Aita Philipa i pee i to ratou hiˈoraa, ua poro oia i to Samaria e “haapao maitai aˈera ratou pauroa” i ta ˈna i faaite atu.—Ohi. 8:6-8.

¹⁶ I muri iho ua turai te varua o te Atua ia poro Philipa i Asadoda e i Kaisarea, mea rahi hoi te feia nunaa ěê i tera na oire. (Ohi. 8:39, 40) Ua tupu faahou râ te tahi tauiraa i roto i te oraraa o Philipa, fanau mai nei hoi ta ˈna e maha tamahine. Ua haa noa râ Philipa i roto i ta ˈna taviniraa e ua tamau Iehova i te haamaitai ia ˈna e to ˈna utuafare.—Ohi. 21:8, 9.

17, 18. I mua i te tauiuiraa, e nafea te tiatonu-noa-raa i nia i te taviniraa e tauturu ai ia tatou?

¹⁷ Te na ô ra e rave rahi tavini taime  taatoa o tei tiatonu noa i nia i ta ratou taviniraa, ua tauturu te reira ia ratou ia oaoa e ia tapea noa i te feruriraa tano i mua i te tauiuiraa. A faarue ai Osborne raua Polite no Afirika apatoa i te Betela, ua manaˈo raua e mea ohie ia noaa mai te hoê ohipa afa mahana e te nohoraa. Teie râ ta Osborne i parau: “Ma te peapea, aita te mau mea i tupu mai tei manaˈohia.” Area Polite te na ô ra ïa: “Ua fifi-mau-hia mâua, e toru avaˈe aita e ohipa e aita atoa e moni haaputu.”

¹⁸ Mea nafea Osborne raua Polite i te faarururaa i teie tupuraa hepohepo mau? Ua parau Osborne: “Ua tauturu mai te pororaa e te amuiraa ia tapea noa i te feruriraa tano.” Aita raua i parahi noa i te fare a haapeapea noa ˈi, ua faaoti râ e haa i roto i te taviniraa. E ua oaoa mau raua! Te parau faahou ra Osborne: “I muri aˈe i to mâua imi-maite-raa, ua itehia mai te ohipa.”

19-21. (a) Eaha te tauturu mai ia tapea i te hau o te feruriraa? (b) Eaha te maitai e noaa mai ia mau papu tatou noa ˈtu eaha te tupuraa?

¹⁹ Ia tutava tatou i te rave i te mea maitai roa ˈˈe e te tiaturi ia Iehova, e nehenehe iho â tatou e tapea i te hau o te feruriraa noa ˈtu eaha te tupuraa. (A taio i te Mika 7:7.) E piri atu â to tatou auhoaraa e o Iehova no te mea ua mau papu tatou noa ˈtu eaha te tupuraa. Ua haapii mai Polite na roto i to raua tupuraa te faufaaraa ia turui i nia ia Iehova noa ˈtu eaha te fifi. Te na ô ra oia: “Ua puai roa ˈtu â to ˈu auhoaraa e o Iehova.”

²⁰ Area Mary, te haapao ra o ˈna i to  ˈna papa ruhiruhia a tavini noa ˈi ei pionie. Te faataa ra oia: “Ia ahoaho vau, e titauhia ia tiai, ia pure e ia vai hau noa. Te haapiiraa rahi roa ˈˈe ta ˈu i huti mai, o te vaiihoraa ïa i te mau mea atoa i roto i te rima o Iehova. Tera atoa te titauhia ia rave i mua nei.”

²¹ Ua faˈi Lloyd raua Alexandra ua tamata te tauiraa ta raua i faaruru i to raua faaroo ma te manaˈo-ore-hia. Ua tauturu râ tera tauiraa ia raua. I teie mahana, maoti to raua faaroo tei tamatahia e faaruru ohie raua i te fifi e, i to raua manaˈo e taata maitai aˈe raua i teie nei.

22. Ia haa maitai tatou ia au i to tatou tupuraa, eaha ta tatou e fanaˈo?

²² I roto i teie ao, e nehenehe te oraraa e taui taue. E rave paha tatou i te tahi atu huru taviniraa, e tupu paha te fifi i te pae o te ea, aore ra e titauhia paha ia aupuru taa ê i te utuafare. Noa ˈtu eaha te tupu mai, e tiaturi tatou e haapao mai iho â Iehova e e tauturu mai oia i te taime au. (Heb. 4:16; Pet. 1, 5:6, 7) I teie nei â, a pure i to outou Metua, Iehova, e a haapii i te turui roa i nia iho ia ˈna. A haa maitai ia au i to outou tupuraa. E fanaˈo hoi outou i te hau o te feruriraa no ǒ mai ia Iehova ra.