1, 2. Eaha ta te Diabolo ravea i faaohipa no te tuino i te oraraa o te huitaata?

 MEA rahi te mau mea hamanihia e te taata o te faaohie ra i to tatou oraraa, mai te niuniu paraparau, te pereoo e te faatoetoeraa. I te tahi aˈe râ pae, te vai atoa ra te tahi mau mea atâta mai te pupuhi, te avaava e te paura atomi. Hoê râ mea tei tuino roa i te oraraa o te taata e tei haamauiui mau ia tatou, o te haavare ïa. Eaha te haavare? O te faahitiraa ïa i te hoê parau e ere i te mea mau no te haamauiui i te tahi taata. Na vai i faahiti i te haavare matamua? Na te Diabolo, ua parau Iesu o ˈna “te metua no te haavare.”—A taio i te Ioane 8:44.

² I roto i te ô i Edene, e oraraa oaoa mau to Adamu raua Eva. Ua parau te Atua eiaha raua ia amu “i to te raau e ite ai i te maitai e te ino” a pohe hoi raua. Haere maira Satani, faaohipa ˈtura i te hoê ophi no te parau ia Eva: “E ore roa orua e pohe.” I tera taime i faahitihia ˈi te haavare matamua. Ua na ô â Satani: “Ua ite hoi te Atua e, ua amu anaˈe orua i to reira, e araara ïa to orua mata, e e  riro orua mai te atua ra te huru, i te ite i te maitai e te ino.”—Gen. 2:15-17; 3:1-5.

3. Na te aha e faaite ra e opuaraa ino ta Satani a haavare ai ia Eva, e eaha tei tupu i muri aˈe?

³ E opuaraa ino ta Satani a haavare ai o ˈna ia Eva. Ua ite hoi oia e pohe Adamu raua Eva ia ofati raua i te faaueraa a te Atua. Ua pohe iho â anei na hoa faaipoipo matamua mai ta te Atua i faahiti? E. (Gen. 3:6; 5:5) Te mea ino roa ˈtu, no te hara a Adamu “ua raea roa ïa te mau taata atoa i te pohe.” Mana mai nei te pohe “ei arii i nia . . . i te feia aita i hara mai ia Adamu i faaroo ore.” (Roma 5:12, 14) Roohia ihora tatou paatoa i te huru tia ore, ere atura i te ora mure ore ta te Atua i opua i te horoa mai. Ehia ˈtura maororaa tatou e ora ˈi? “E hitu ïa ahuru i te matahiti, e ia tae i te vau i te ahuru i te matahiti i te etaeta,” e riro te oraraa “ei rohirohi e ei taiâraa.” (Sal. 90:10) Eaha te tumu? No te haavare a Satani!

4. (a) Eaha te mau uiraa e titauhia ia pahono? (b) Ia au i te Salamo 15:1, 2, o vai noa te feia e fanaˈo i te farii maitai a Iehova?

⁴ Mai ta Iesu i faaite, “aita [Satani] i mau papu i roto i te parau mau, no te mea aita te parau mau i roto ia ˈna.” Ua taui anei Satani? Aita, tae roa mai i teie mahana, te haavare nei oia “i to te ao atoa nei.” (Apo. 12:9) Ia ore tatou ia haavarehia e Satani, e titauhia ia pahono i na uiraa e toru nei: Eaha ta Satani mau raveraa no te haavare i te taata? No te aha te rahiraa e haavare ai? Eaha te tauturu mai ia faaite noa i te parau mau ia ore tatou e ere i te farii maitai a Iehova mai ia Adamu raua Eva?—A taio i te Salamo 15:1, 2.

5. Mea nafea Satani ia haavare i te taata i teie mahana?

⁵ E nehenehe te mau Kerisetiano e ore e noaa ia Satani no te mea ua parau te aposetolo Paulo, “ua ite hoi tatou i ta ˈna mau raveraa.” Ua papu ïa ia tatou tei raro aˈe to te ao atoa i te mana o Satani. (Kor. 2, 2:11) Na ˈna atoa ïa e faatere ra i te mau tia o te mau haapaoraa hape, o te mau faatereraa piˈo e o te ao tapihoo. (Ioa. 1, 5:19) E ere ïa i te mea maere na Satani e ta ˈna mau demoni e turai ra i teie mau tia ia haavare. (Tim. 1, 4:1, 2) A hiˈo na i te mau ona o te faatianiani i te taata ia hoo i ta ratou mau taoˈa ma te huna e nehenehe te reira e haafifi i te taata. E haavare ratou no te faaî noa i to ratou pute.

6, 7. (a) No te aha e taparahi taata atoa te mau tia haapaoraa? (b) Eaha te mau haapiiraa hape ta outou i faaroo na roto i te mau tia haapaoraa?

⁶ I to ˈna tau, ua faahapa Iesu i te mau tia haapaoraa i te haavareraa i te taata. Ma te mǎtaˈu ore, ua na ô oia ia ratou: “Ua ati outou te mau papai parau e te mau Pharisea, haavarevare ma, no te mea te tere nei outou na te tai e na te fenua ia noaa mai te hoê taata o te farii i te haapaoraa ati Iuda. Ia farii oia, mea ino roa ˈtu â ïa oia ia outou. Mai te peu e mea tano ia haere outou i Gehena, o ˈna atoa ïa.” (Mat. 23:15) Ua parau Iesu te rave ra tera  mau tia faaroo i te hinaaro o to ratou metua, “e taparahi taata,” oia hoi te Diabolo. (Ioa. 8:44) E tano atoa tera parau no te mau tia haapaoraa o teie tau. Eaha te tumu? Na roto hoi i ta ratou mau haapiiraa hape, e rave te taata i te mau mea ta te Atua e ore e au a haamouhia ˈtu ai ratou e a muri noa ˈtu!—Hos. 4:9.

⁷ Mai te mau Pharisea, e rave rahi orometua, perepitero e rabi o te ore e haapii i te parau mau o te Bibilia. “Ua maiti ratou e tiaturi i te haavare eiaha râ i te parau mau a te Atua.” (Roma 1:18, 25) Te haaparare nei teie mau tia faaroo i te haapiiraa hape o te po auahi, aore ra e ora ˈtu te tahi mea ia pohe te taata, aore ra e farii te Atua i te feia e rave ra i te peu mahu.

8. Eaha te haavare ta tatou e fatata i te faaroo mai roto mai i te vaha o te feia mana faatere e eaha to tatou huru e tia ˈi?

⁸ Te haavare atoa nei vetahi feia mana i te taata. Fatata tatou i te faaroo i te haavare rahi roa ˈˈe a te feia mana faatere, e parau hoi ratou, “E hau, e aita e ino!” Eiaha ïa tatou e vare e maitai mai te tupuraa o teie ao. Te na ô ra te Bibilia: “Ei reira ra ratou e roohia-noa-hia mai ai e te pohe oioi.” Area tatou nei, “ua ite papu . . . e te haere maira taua mahana o te Fatu ra, mai te haerea mai o te eiâ i te po ra.”—Tes. 1, 5:1-4.

9, 10. (a) No te aha te taata e haavare ai e eaha te faahopearaa o te haavare? (b) Ia haamanaˈo tatou i te aha no nia ia Iehova?

⁹ E ere râ te mau tia mana anaˈe o te haavare. Ia au i te tahi taata papai buka, “ua aˈa roa te haavare i roto i te taata.” No reira te rahiraa e manaˈo ai e ere i te mea ino ia haavare. Ia au noa â i tera buka, eita vetahi e haama i te haavare “i te taata ta ratou i ore i matau, i te hoa ohipa, i te hoa piri e i te feia herehia.” E pinepine te taata i te haavare ia ore ratou ia faautuahia, peneiaˈe ua hape ratou aore ra ua ofati i te ture. E na reira atoa vetahi ia onahia aore ra ia faufaahia ratou.

¹⁰ Eaha te faahopearaa o te haavare? Eita ˈtura te taata e tiaturi faahou i te tahi e te tahi. A feruri na i te mauiui o te hoê tane o te ite e ua huna ta ˈna vahine ua taoto oia i te tahi atu tane. E te oto o te vahine ia hamani ino ta ˈna tane ia ˈna e ta raua mau tamarii i te fare. Area i mua i te taata, e faahua ïa i te faaite i te here e te mǎrû. E noaa i te feia haavarevare ia haavare i te taata, eiaha râ ia Iehova! Te parau ra hoi te Bibilia, “e mea mahora hoi te mau mea atoa e te ite-maitai-hia e ana.”—Heb. 4:13.

11. Eaha ta te hiˈoraa o Anania raua Saphira e haapii mai ra? (A hiˈo i te hohoˈa matamua.)

¹¹ Te faaite ra te Bibilia ua turai Satani i te tahi na hoa faaipoipo Kerisetiano ia haavare i te Atua e i te mau  aposetolo. Ua hoo Anania raua Saphira i te hoê fenua e ua horoa i te hoê noa tuhaa o te moni i noaa mai. Ua hinaaro Anania e Saphira ia itehia raua i roto i te amuiraa, haavare atura ua horoa raua i te taatoaraa o te moni. Ua ite râ Iehova i te tupuraa mau e ua faautua oia ia raua.—Ohi. 5:1-10.

12. Eaha te hopearaa o te feia haavare o te ore e tatarahapa, e eaha te tumu?

¹² Mai ia Satani, e hurihia te feia haavare atoa o te ore e tatarahapa i raro “i te roto auahi.” Te auraa, e haamouhia ïa ratou e a muri noa ˈtu! (Apo. 20:10; 21:8; Sal. 5:6) Eaha te tumu? Aita te feia haavare i huru ê atu i “te feia e rave ra i te mau mea faufau i te aro o te Atua.”—Apo. 22:15; nota.

13. Mai te aha te huru o Iehova e eaha ïa te titauhia ia tatou ia rave?

¹³ “E ere te Atua i te taata, a haavare mai ai oia” e “e ore atoa e tia i te Atua ia haavare.” (Num. 23:19; Heb. 6:18) E ere ïa i te mea maere e mea au ore roa na Iehova i “te arero haavare.” (Mas. 6:16, 17) Ia auhia mai tatou e te Atua, mea titauhia ia faaite i te parau mau. No reira, “eiaha e haavare te tahi i te tahi.”—Kol. 3:9.

14. (a) A faataa na i te faaueraa tumu o te Luka 6:45. (b) Na te aha e haapapu e mea taa ê tatou i te feia o te mau haapaoraa hape?

¹⁴ Ua faaite Iesu, “no te î hoi o to ˈna aau” e parau ai te vaha o te tahi taata. (Luka 6:45) E faaite te taata haavare ore i te parau mau. Eita ïa o ˈna e haavare i te feia ta ˈna i ore i matau, i te mau hoa ohipa, i te mau hoa piri e i te feia herehia. Na te aha ïa e haapapu e  mea taa ê tatou i te feia o te mau haapaoraa hape? E faaite te Kerisetiano mau i te parau mau. (A taio i te Zekaria 8:16, 17.) Ua na ô Paulo: “E faaite matou e e tavini matou na te Atua . . . na roto i te parau mau.” (Kor. 2, 6:4, 7) E hiˈo anaˈe e nafea ia faaite i te haavare ore i roto i te mau tuhaa atoa.

15. (a) No te aha mea ino ia faaite e piti huru taata? (b) Eaha te tauturu i te feia apî ia mau papu i mua i te faaheporaa? (A hiˈo i te nota.)

¹⁵ E hinaaro te feia apî ia fariihia ratou e te mau hoa, te tumu ïa vetahi e faaite ai e piti huru taata. I te fare e i roto i te amuiraa, e haerea tura to ratou. I nia râ i te mau reni faahoaraa aore ra ia amuimui ratou i te feia o te ore e tavini ra ia Iehova, mea ê roa ïa to ratou huru. E faahiti ratou i te mau parau tano ore, e maiti i te faaahuraa tura ore, e faaroo i te mau pehe hairiiri, e inu i te ava, e rave i te raau taero, e faahoa i te tamahine aore ra te tamaroa e te vai ra ˈtu â. Te haavare ra ratou i to ratou mau metua, i to ratou mau taeae e tuahine Kerisetiano e ia Iehova! (Sal. 26:4, 5) Ua ite râ o Iehova i to tatou huru o roto noa ˈtu te faahua ra tatou i mua i te taata a rave noa ˈi i te mau mea ta ˈna e ore e au. (Mar. 7:6) Mea maitai aˈe ïa ia haapao i ta te Maseli 23:17 e parau ra: “Eiaha to aau ia feii [aore ra faahinaaro] i te feia rave hara; ia tamau râ oe i te mǎtaˈu ia Iehova eiaha ei mahana tuua.” a

16. E nafea tatou ia pahono i te parau aniraa no te tahi taviniraa taime taatoa?

¹⁶ A faaî ai i te parau aniraa no te rave i te taviniraa pionie tamau, aore ra i roto i te tahi atu tuhaa mai te Betela, e titauhia ia pahono i te tahi mau uiraa. Mea faufaa roa eiaha ia huna i te parau no nia i to oe ea, ta oe mau faaanaanataeraa e ta oe mau peu. (Heb. 13:18) Ua rave anaˈe oe i te tahi mea ta Iehova e ore e au aore ra ua teimaha to oe manaˈo haava, eiaha e taiâ i te farerei i te mau matahiapo. A farii i ta ratou tauturu ia tamau oe i te tavini ia Iehova ma te manaˈo haava mâ.—Roma 9:1; Gal. 6:1.

17. E nafea ia uiuihia tatou e te feia opuaraa ino?

¹⁷ A feruri na i teie tupuraa. I te hoê mahana, e opanihia ta tatou ohipa e e tapeahia oe a uiuihia ˈtu ai no nia i to oe mau taeae. E nafea oe i tera taime? E pahono anei oe i te mau uiraa atoa?  Ua faaite mai Iesu i te hiˈoraa a uiui ai te tavana Roma ra o Pilato ia ˈna. Ua haapao ïa Iesu i te faaueraa tumu, “e taime to te mamû noa, e taime to te parau.” (Koh. 3:1, 7; Mat. 27:11-14) Ia farerei noa ˈtu tatou i te hoê tupuraa mai tera te huru, e titauhia te paari e te haapao maitai ia ore to tatou mau taeae ia fifi.—Mas. 10:19; 11:12.

18. Eaha te titauhia ia rave ia uiui mai te mau matahiapo no nia i te hara a te tahi Kerisetiano?

¹⁸ E ara te mau matahiapo eiaha te amuiraa ia viivii. Ua ite anaˈe oe ua hara te tahi Kerisetiano, e uiui atu paha te mau matahiapo ia oe. E nafea oe mai te peu iho â râ e hoa piri aore ra e fetii te Kerisetiano i hara? Te parau ra te Bibilia: “O tei parau i te parau mau ra, e faaite mai ïa i te parau-tia.” (Mas. 12:17; 21:28) E titauhia ia faaite i te parau mau i te mau matahiapo ma te ore e huna i te tahi noa ˈˈe tuhaa. Mea tano ia na reira, o te mau matahiapo hoi tei ite i te ravea maitai roa ˈˈe no te tauturu i tera Kerisetiano ia piri faahou ia Iehova.—Iak. 5:14, 15.

19. Eaha ta tatou e hiˈo i roto i to mua ˈtu haapiiraa?

¹⁹ E hiˈo Iehova i roto i to tatou aau. Ua ite Davida i te reira i na ô ai oia ia Iehova: “O te parau mau no roto ra ta oe e hinaaro!” (Sal. 51:6) I te mau taime atoa, e faaite te Kerisetiano mau i te parau mau te tahi i te tahi. I roto i to mua ˈtu haapiiraa, e hiˈo tatou i te tahi atu ravea no te faaite e mea taa ê tatou i te feia o te mau haapaoraa hape. I roto i ta tatou taviniraa, e haapii hoi tatou i te parau mau maoti te Bibilia.