1, 2. (a) Eaha ta Iesu i haafaufaa e eaha te tumu? (b) E nafea tatou ia riro ei ‘hoa ohipa no te Atua’?

 I TE fenua nei, ua riro Iesu Mesia ei tamuta e ei orometua e ua rave oia i na ohipa ma te tia roa. (Mar. 6:3; Ioa. 13:13) Ei tamuta, e mauhaa ta ˈna no te hamani e rave rahi taihaa raau. Ei orometua, ua faaohipa maite oia i te mau Papai no te haapii i te taata i te parau mau. (Mat. 7:28; Luka 24:32, 45) I te 30raa o to ˈna matahiti, ua vaiiho oia i te ohipa tamuta no te poro i te parau apî oaoa o te Faatereraa arii a te Atua. Tera hoi te tumu i tono mai ai te Atua ia ˈna i te fenua nei. (Mat. 20:28; Luka 3:23; 4:43) I roto i to ˈna oraraa, ua haafaufaa Iesu i te pororaa i te parau apî oaoa e ua faaitoito ia vetahi ê ia na reira atoa.—Mat. 9:35-38.

² Noa ˈtu e ere tatou i te tamuta, e feia haapii i te parau apî oaoa râ tatou pauroa. Ei ‘hoa ohipa no te Atua,’ e faaite tatou i te parau mau no nia ia ˈNa. (Kor. 1, 3:9; Kor. 2, 6:4) Hoê â manaˈo to tatou e to te papai salamo tei na ô: “E parau mau ta oe mai te matamua mai â.” (Sal. 119:159, 160) I roto i te taviniraa, e  hinaaro tatou e “faaohipa maitai i te parau o te parau mau.” (A taio i te Timoteo 2, 2:15.) E tutava anaˈe ia aravihi atu â tatou i te faaohipa i te Bibilia, tera hoi ta tatou mauhaa matamua no te haapii i te taata no nia ia Iehova, ia Iesu e te Faatereraa arii. Ua horoa atoa mai râ ta Iehova faanahonahoraa i te tahi atu mau mauhaa o te tauturu mai i roto i te taviniraa. E hiˈo anaˈe ïa e nafea ia faaohipa i te reira.

3. E nafea te Ohipa 13:48 e tauturu mai ai ia ite i te ohipa ru e tia ia rave?

³ I roto i te pororaa, e faaitoito tatou i te imi i “te taata aau farii i te ora mure ore.” Ta tatou fa, ia riro ratou ei pǐpǐ na te Mesia. Fatata roa te faanahoraa o teie ao i te mou e ua poto roa te taime e toe nei. E mea ru ïa ia haamata i te mau haapiiraa Bibilia ia ite te taata i te parau mau. E faaohipa ïa ratou i ta ratou e haapii ra a tavini roa ˈtu ai ia Iehova.—A taio i te Ohipa 13:44-48.

4. Eaha te titauhia ia rave no te ite mai i “te taata aau farii i te ora mure ore”?

⁴ Ua faaue Iesu i ta ˈna mau pǐpǐ: “I te mau oire aore ra oire rii e tomo ai outou, a imi i te feia e farii ia outou.” (Mat. 10:11) Mai te mau Kerisetiano matamua, e titauhia ia poro no te ite mai i “te taata aau farii i te ora mure ore.” O vai ma ratou? E feia aau tae e haehaa ratou o te hinaaro e ite i te parau mau. Ei tamuta, ua maiti maitai na mua Iesu i te raau e tano. I muri iho, ua faaohipa o ˈna i ta ˈna mau mauhaa e to ˈna aravihi no te hamani i te tahi mau taihaa, mai te opani, te afata, te zugo e te vai ra ˈtu â. I teie atoa mahana, mea titauhia ia imi na mua i te feia aau haavare ore. I muri iho, e faaohipa anaˈe ma te aravihi i ta tatou mau mauhaa no te taviniraa ia riro te taata ei pǐpǐ na te Mesia.—Mat. 28:19, 20.

5. Eaha te titauhia ia ite no nia i ta tatou mau mauhaa no te taviniraa? A faataa. (A hiˈo i te mau hohoˈa matamua.)

⁵ I roto i ta ˈna afata taihaa, ua rau te mauhaa a te tamuta e e faaohiparaa taa maitai to tera e tera mauhaa. a Papu, e mauhaa ta Iesu no te metera, no te tapao, no te ee, no te hou, no te faaafaro e no te tapiri i te raau. I roto i ta tatou mau mauhaa no te taviniraa, e faaohiparaa taa maitai atoa to tera e tera mauhaa. E hiˈo anaˈe e nafea tatou ia faaohipa maitai i te reira.

6, 7. (a) Mea nafea outou i te faaohiparaa i te mau tareta? (b) No te aha tatou e faaohipa ˈi i te mau titau-manihini-raa?

⁶ Tareta: Noa ˈtu to ˈna nainai, e ravea maitai roa te tareta no te faaite o vai tatou e no te aratai i te taata i nia i ta tatou reni jw.org. E nehenehe te taata e ani i te hoê haapiiraa Bibilia e e rave rahi tei na reira. Ua hau atu i te 400 000 taata tei ani i te haapiiraa Bibilia e e tausani â te na reira nei i te  mau mahana atoa! E nehenehe outou e rave tau tareta i roto i ta outou pute a pûpû atu ai i te taata ta outou e farerei i te roaraa o te mahana.

⁷ Titau-manihini-raa: E titauhia te taata ia putuputu aore ra ia haapii i te Bibilia e te mau Ite no Iehova. E faaite ïa te titau-manihini-raa o vai tatou e e faaitoito atoa i “te feia e hiaai ra i te mau mea pae varua” ia haapii i te Bibilia. (Mat. 5:3) E fariihia te taata atoa ia haere mai i ta tatou mau putuputuraa noa ˈtu aita ratou e haapii ra i te Bibilia e te mau Ite no Iehova. E ite ïa te taata mea rahi ta ratou e haapii mai maoti te Bibilia.

8. No te aha mea faufaa ia titau manihini i te taata ia haere mai i te hoê noa ˈˈe o ta tatou mau putuputuraa? A horoa i te hiˈoraa.

⁸ Mea faufaa roa ia faaohipa tamau i teie mauhaa no te titau manihini i te taata i te hoê noa ˈˈe o ta tatou mau putuputuraa. Eaha te tumu? Ia itehia e mea taa ê tatou i te mau haapaoraa hape! E haapii hoi te mau Ite no Iehova i te parau mau maoti te Bibilia e e tauturu atoa ratou ia vetahi ê ia ite o vai te Atua. (Isa. 65:13) Tera tei tupu i nia i te tahi na hoa faaipoipo i Marite. E na taata tiaturi i te Atua o Ray raua Linda e ua hinaaro raua e haapii atu â no nia ia ˈNa. E piti râ tuhaa ta raua i hiˈopoa hou a tahoê atu ai e te hoê haapaoraa. A tahi, ia haapii raua i te tahi mea i te fare pure. A piti, ia faaahu mai te taata o tera haapaoraa mai tei au i te tavini o te Atua. Fafa ˈtura raua i roto i te mau haapaoraa atoa o to raua oire. Aita râ raua i haapii noa ˈˈe i te tahi mea, e ere atoa te faaahuraa o te mau mero o tera e tera haapaoraa i te mea tura. No te rahi o te mau haapaoraa, ua mairi tau matahiti. Ua fafa raua i te haapaoraa hopea o ta raua tapura e haere atura Linda i te ohipa. Area Ray, ua hoˈi ïa i te fare. A tere noa ˈi na nia i to ˈna pereoo, ua na mua ˈtu Ray i te hoê Piha a te Basileia. Tamata ˈtura o ˈna i te haere e hiˈo eaha te tupu ra i roto. Aita roa oia i tatarahapa! Mea maitai te feia atoa ta ˈna i farerei i roto i te Piha a te Basileia e e faaahuraa tura atoa to ratou. Ua haere Ray e parahi i mua roa e ua au roa o ˈna i ta ˈna i haapii mai! Mai ta te aposetolo Paulo i faataa, e nehenehe te tahi taata e haere i ta tatou putuputuraa e na ô: “Tei rotopu mau te Atua ia outou.” (Kor. 1, 14:23-25) Ua tamau Ray i te haere i te putuputuraa i te mau Tapati atoa. I muri mai, ua tia atoa ˈtu no te putuputuraa o te hebedoma e ua apee Linda ia ˈna i muri aˈe! Noa ˈtu e 70 tiahapa matahiti to raua, ua farii na hoa faaipoipo i te haapii i te Bibilia e bapetizohia ˈtura i muri aˈe.

9, 10. (a) No te aha e mea ohie ia faaohipa i te mau api parau? (b) A faataa e nafea ia faaohipa i te api parau Eaha te Basileia o te Atua?

⁹ Api parau: Mea ohie roa ia faaohipa i ta tatou na api parau e vaˈu e  e ravea maitai atoa no te haamata i te hoê aparauraa. Mai 2013, ua neneihia hau atu i te pae miria api parau! Hoê â faanahoraa no na api parau e vaˈu. Ua ite anaˈe outou i te faaohipa hoê, ohie roa ïa no te toea! E nafea ia faaohipa i te api parau no te haamata i te hoê aparauraa?

¹⁰ E rave anaˈe i te api parau Eaha te Basileia o te Atua? A faahiti i te uiraa i te api matamua e a ani i te taata ia maiti hoê o na pahonoraa e toru. Noa ˈtu aita ta ˈna pahonoraa i tano, a huri i te api e a faaite i te tuhaa “Ta te Bibilia e parau ra.” A taio i te Daniela 2:44 e te Isaia 9:6. Ia oti, a faahiti i te uiraa i te api hopea i raro aˈe i te tuhaa “A feruri na” e a ani atu: Mai te aha te huru o te oraraa i raro aˈe i te faatereraa o te Basileia o te Atua? E nehenehe outou e pahono i tera uiraa i to mua ˈtu farereiraa. I te piti o te farereiraa, a faaohipa i te haapiiraa 7 o te buka rairai Parau apî oaoa a te Atua, hoê o ta tatou mau mauhaa no te haamata i te hoê haapiiraa Bibilia.

11. Eaha te fa o ta tatou mau vea e mea faufaa ia ite tatou i te aha?

¹¹ Vea: O Te Pare Tiairaa e te A ara mai na! te vea opere e huri-roa ˈˈe-hia na te ao nei! Ua faaineinehia te tumu parau matamua o teie na vea ia anaanatae te feia atoa noa ˈtu no teihea fenua ratou. E tauturu na vea ia taa eaha te titauhia ia haafaufaa i teie mahana. Na mua râ, mea faufaa ia ite no vai ma i faaineinehia ˈi tera e tera vea.

12. No vai ma i faaineinehia ˈi te A ara mai na! e eaha te fa o tera vea?

¹² Ua faaineinehia te A ara mai na! no te feia e uiui ra no nia i te mau haapaoraa, te Atua e te Bibilia. Aita teie nei feia i ite e nehenehe ratou e faufaahia i ta te Bibilia e haapii ra. O te haapapuraa i te vai-mau-raa o te Atua te fa matamua a te A ara mai na! (Roma 1:20; Heb. 11:6) E tauturu atoa te reira i te taata ia tiaturi o te Bibilia te parau a te Atua. (Tes. 1, 2:13) I 2018, teie te manaˈo tumu o na toru vea A ara mai na! na roto i te reo Farani: “E nafea ia oaoa mau?,” “12 ravea ia oaoa te utuafare” e “Tauturu no te feia ua pohe tei herehia.”

13. (a) No te aha i faaineinehia ˈi Te Pare Tiairaa no te taata atoa? (b) Eaha te tahi mau tupuraa maitai ta outou i farerei i te faaohiparaa i teie vea?

¹³ Te fa matamua o Te Pare Tiairaa no te taata atoa, o te faataaraa ïa i te mau haapiiraa Bibilia i te feia atoa i faaite ê na i te tahi faatura i te Atua e te Bibilia. Ua ite paha ratou i te tahi mea no nia i te Bibilia aita râ i taa papu roa i tei haapiihia ra. (Roma 10:2; Tim. 1, 2:3, 4) Teie te manaˈo tumu o na toru vea Te Pare Tiairaa i 2018: “E tano anei te Bibilia no teie tau?,” “Eaha te tupu a muri aˈe?” e “Te tâuˈa mai ra anei te Atua ia oe?”

14. (a) Eaha na video e maha i roto i ta tatou afata mauhaa no te taviniraa? (b) Eaha te tahi mau tupuraa maitai ta outou i farerei i te faaiteraa i te mau video?

¹⁴ Video: I te tau o Iesu e faaohipa na te tamuta i te mau mauhaa rima. I teie râ mahana, e faaohipahia te mau matini uira no te ee, hou e haamanina. Taa ê atu i te mau papai neneihia, e faaohipa atoa tatou i te mau video nehenehe mau no te poro i te taata. E maha video i roto i ta tatou afata mauhaa: No te aha e haapii ai i te Bibilia?, Eaha te ravehia i te hoê haapiiraa Bibilia?, Eaha te ravehia i te hoê Piha a te Basileia? e Ite no Iehova: O vai matou? E nehenehe te reira e patahia i te farereiraa matamua, e piti minuti aore ra iti aˈe te maoro o te video tataitahi. E no te mau video roroa ˈˈe, e faaohipahia ïa no te mau farerei-faahou-raa e no te feia e taime to ratou. E mauhaa faahiahia mau tera mau video, e nehenehe hoi te reira e faaitoito i te taata ia haapii i te Bibilia e ia apiti mai i ta tatou mau putuputuraa.

15. Eaha te huru o vetahi a mataitai ai i ta tatou video na roto i to ratou iho reo? A horoa i te hiˈoraa.

¹⁵ Ei hiˈoraa, ua farerei te tahi tuahine i te hoê vahine no Micronésie o te paraparau ra i te reo Yap. Ua faaite atu te tuahine i te video No te aha e haapii ai i te Bibilia? na roto i te reo Yap. A patahia ˈi te video, ua na ô tera vahine: “To ˈu reo tera! No to ˈu fenua tera taˈiraa reo!” I muri iho, parau maira oia e haere o ˈna e hiˈo i te mau mea atoa e vai ra na roto i to ˈna reo i nia i te jw.org. (A hiˈo atoa i te Ohipa 2:8, 11.) Na roto i te roro uira, ua hapono atoa te hoê tuahine i Marite i te hoê â video i to ˈna tamaiti fetii e ora ra i te tahi atu fenua. Ua mataitai oia i te reira e ua papai mai: “Ua maere roa vau i te parauraahia na te hoê varua ino e faatere ra i te ao. Ua ani au i te hoê haapiiraa Bibilia.” E hiˈoraa anaanatae mau tera no te mea te opanihia ra ta tatou ohipa i reira!

16. No te aha teie mau buka rairai i faaineinehia ˈi? (a) Faaroo i te Atua no te ora e a muri noa ˈtu (b) Parau apî oaoa a te Atua. (c) O vai te rave nei i to Iehova hinaaro i teie mahana?

¹⁶ Buka rairai: No te haapii i te parau mau i te feia o te ore e taio maitai aore ra aita e papai na roto i to ratou reo, ua faaineinehia te buka rairai Faaroo i te Atua no te ora e a muri noa ˈtu. b Te tahi atu mauhaa maitai no te haamata i te haapiiraa, o te buka rairai Parau apî oaoa a te Atua. I te api hopea, a vaiiho i te taata ia maiti hoê o na 14 haapiiraa. I muri iho, a haamata i te haapiiraa ia au i te tumu parau ta ˈna i anaanatae. No te aha e ore ai e tamata i tera raveraa a hoˈi ai e farerei i te feia ta outou i  poro? Te toru o te buka rairai, O vai te rave nei i to Iehova hinaaro i teie mahana?, no te faataa ïa i ta tatou faanahonahoraa i te piahi. A hiˈo i te Faaineineraa no te putuputuraa Oraraa e taviniraa Kerisetiano Mati 2017 no te ite e nafea ia faaohipa i tera buka rairai i te mau taime atoa e faatere ai tatou i te hoê haapiiraa.

17. (a) Eaha te fa taa ê o na buka tataitahi? (b) Eaha te titauhia i te feia atoa e bapetizohia, e no te aha?

¹⁷ Buka: Ia faatere outou i te hoê haapiiraa Bibilia e te tahi buka rairai, na outou e faaoti afea e faahaere ai i nia i te buka Eaha ta te Bibilia e haapii mai? I roto i tera buka te piahi e ite ai i te mau haapiiraa tumu Bibilia. Ua haere anaˈe teie piahi i mua i roto i ta ˈna haapiiraa, mea titauhia ia haapii oia i te buka Rave noa i te mau mea e here mai ai te Atua. E ite ïa te piahi e nafea ia vaiiho i te mau faaueraa tumu ia aratai i to ˈna oraraa. A haamanaˈo e noa ˈtu ua bapetizohia oia, e titauhia ia faahope roa na buka e piti. E mau papu ïa to ˈna faaroo e eita oia e taiva ia Iehova.—A taio i te Kolosa 2:6, 7.

18. (a) Ia au i te Timoteo 1, 4:16 eaha te titauhia ia tatou ia rave e no te aha mea faufaa? (b) No te aha i horoahia mai ai te mau mauhaa no te taviniraa?

¹⁸ Ei Ite no Iehova, e titauhia ia haapii tatou i te taata i “te poroi o te parau mau, oia hoi te parau apî oaoa” e aratai ia ratou i te ora mure ore. (Kol. 1:5; a taio i te Timoteo 1, 4:16.) Eita tatou e opere hanoa i ta tatou mau papai i te feia aita e anaanatae ra. E imi anaˈe râ i te feia aau tae, haehaa e “aau farii i te ora mure” ia riro ratou ei pǐpǐ na te Atua. (Ohi. 13:48; Mat. 28:19, 20) No te amo i ta tatou hopoia, ua horoahia mai te mau mauhaa no te taviniraa. (A hiˈo i te tumu parau “ Mauhaa no te taviniraa.”) E faaohipa maitai anaˈe ïa i tera mau mauhaa. Tei ia tatou noa te faaotiraa eaha e afea e faaohipa ˈi i tera e tera mauhaa.