1, 2. Eaha ta te taata e rave no te titau i te tiamâraa e eaha te faahopearaa?

 I TEIE mahana, ua riro te tiaraa o te taata e to ratou tiamâraa ei haapeapearaa ati aˈe i teie nei ao. Te hinaaro ra vetahi e tiamâ mai i te mau ohipa tia ore mai te hamani-ino-raa, te hiˈo-ê-raa i te taata e te veve. Te titau ra te tahi atu i to ratou tiamâraa ia parau, ia maiti e ia ora mai ta ratou e hinaaro. Pauroa ïa te taata e hinaaro i te tiamâraa.

² No reira te taata e tia ˈi no te titau i to ratou tiamâraa e tae roa i te faatupu i te orureraa hau. Ua manuïa anei ratou? Aita, e pinepine te taata i te mauiui atu â e te tahi atu ua pohe roa. Ua tano mau ta te arii Solomona i parau: “Ta te taata nei faaheporaa ˈtu i te taata e pohe atura ei pohe no ˈna iho.”—Koh. 8:9.

3. Eaha te titauhia ia rave no te fanaˈo i te oaoa e te mauruuru mau?

³ Te faaite ra te Bibilia eaha te titauhia ia rave no te fanaˈo i te oaoa e te mauruuru mau. Ua na ô te pǐpǐ ra o Iakobo: “Te taata râ o te hiˈo maite i roto i te ture tia roa e noaa ˈi  te tiamâraa e o te tamau noa i te na reira . . . E oaoa oia i ta ˈna e rave.” (Iak. 1:25) No ǒ mai ia Iehova te ture tia roa, o ˈna te mea ite roa ˈˈe e nafea te taata ia oaoa e ia mauruuru roa. Ua horoa o Iehova ia Adamu raua Eva i te tiamâraa mau e te mau mea atoa e oaoa ˈi raua.

4. Mai te aha te tiamâraa o Adamu raua Eva? (A hiˈo i te hohoˈa matamua.)

⁴ I roto i te Genese pene 1 e 2, te faaitehia ra ua fanaˈo na Adamu raua Eva i te tiamâraa ta te taata e moemoeâ nei i teie mahana. Te vai ra ia raua te mau mea atoa, aita atoa e tumu e mǎtaˈu ai raua e aita e ohipa tia ore! Aita raua i haapeapea noa ˈˈe no te maa, te ohipa, te maˈi e te pohe. (Gen. 1:27-29; 2:8, 9, 15) Te auraa anei aita e otia to to raua tiamâraa? E hiˈopoa anaˈe i te reira.

5. Noa ˈtu e ere mai tera ta te rahiraa e manaˈo ra, no te aha mea titauhia te taotiaraa?

⁵ No te rahiraa, te tiamâraa mau, o te raveraa ïa i ta ratou e hinaaro ma te ore e tâuˈa i te tupu i muri aˈe. Ia au i te tahi buka îite, te tiamâraa o “te neheneheraa ïa e rave e e faatupu i ta tatou iho faaotiraa.” (The World Book Encyclopedia) Te faataa atoa ra râ, e tiamâ te taata ia ore te faatereraa e haamau i te taotiaraa tano ore, faufaa ore e te etaeta. Mea titauhia te taotiaraa ia ore vetahi e ere i to ratou tiamâraa. Tei ia vai râ te tiaraa ia parau mea tano, mea faufaa e mea au noa te tahi taotiaraa?

6. (a) Eaha te tumu o Iehova anaˈe te fanaˈo ra i te tiamâraa tia roa? (b) Mai te aha te tiamâraa o te taata e no te aha?

⁶ Mea faufaa ia haamanaˈo o Iehova anaˈe te fanaˈo ra i te tiamâraa tia roa e te otia ore. Eaha te tumu? Na ˈna i poiete i te mau mea atoa e o ˈna te Arii hau ê o te ao taatoa. (Tim. 1, 1:17; Apo. 4:11) Ua faahiti te arii Davida i te mau parau nehenehe no te faataa i te tiaraa teitei o Iehova. (A taio i te Paraleipomeno 1, 29:11, 12.) Area to te raˈi e to te fenua, e otia ïa to to ratou tiamâraa. Te hinaaro ra te Atua ra o Iehova ia taa ia tatou tei ia ˈna anaˈe te tiaraa ia faaoti mea tia, mea faufaa e mea au noa te tahi taotiaraa. Mai te matamua mai â to ˈna haamauraa i te otia no te mau mea ta ˈna i poiete.

7. Eaha te tahi mau mea o te titauhia ia rave noa ˈtu e taotiaraa te reira?

⁷ Noa ˈtu e tiamâraa rahi to Adamu raua Eva i te haamataraa, e otia atoa to raua. Te vai ra te mau taotiaraa o tei ore i riro ei mea teimaha no raua. Mai te hutiraa i te aho, te amuraa i te maa e te taotoraa. Te auraa anei, ua ere raua i te tiamâraa? Aita, ua haapao o Iehova ia oaoa e ia mauruuru raua i te raveraa i te reira. (Sal. 104:14, 15; Koh. 3:12, 13) I to tatou manaˈo, ua ere anei tatou i te tiamâraa ia huti i te aho haumârû, ia amu i te maa monamona e ia taoto maitai i te po? Aita, te oaoa mau ra tatou paatoa i te na reira noa ˈtu e taotiaraa anaˈe tera! Hoê â huru atoa no Adamu raua Eva na mua ˈˈe.

8. Eaha te faaueraa taa maitai ta te Atua i horoa ia Adamu raua Eva e eaha te tumu?

⁸ Ua horoa o Iehova ia Adamu raua Eva i te hoê faaueraa taa maitai. Ua parau atu oia ia fanau i te tamarii, ia faaî i te fenua e ia haapao i te reira. (Gen.  1:28) Ua ere anei raua i te tiamâraa no tera faaueraa? Aita roa ˈtu, na roto hoi i te reira e nehenehe ai raua e faariro i te fenua taatoa ei paradaiso. Ei nohoraa no raua e ta raua mau tamarii tia roa e a muri noa ˈtu. Tera te opuaraa a te Atua. (Isa. 45:18) Ia ore te taata e faaipoipo e e fanau i te tamarii, te ofati ra anei ratou i tera faaueraa? Aita. Mea rahi râ tei maiti i te faaipoipo e te fanau i te tamarii noa ˈtu e farerei ratou i te fifi. (Kor. 1, 7:36-38) Eaha te tumu? Te hinaaro ra ratou e fanaˈo i te oaoa e te mauruuru ia riro ei metua. (Sal. 127:3) Ahiri Adamu raua Eva i faaroo ia Iehova, ua fanaˈo ïa raua i te hoê oraraa utuafare oaoa e a muri noa ˈtu!

9. No te aha e ere te faaueraa a te Atua i roto i te Genese 2:17 i te mea tano ore, faufaa ore e te etaeta?

⁹ Ua horoa o Iehova ia Adamu raua Eva i te tahi atu faaueraa e ua parau maitai atu oia eaha te tupu ia ore raua e faaroo. Ua na ô te Atua: “Area i to te raau e ite ai i te maitai e te ino, eiaha oe e amu i te reira; ei te mahana e amu ai oe i te reira, e pohe ïa oe.” (Gen. 2:17) E faaueraa tano ore, faufaa ore e te etaeta anei tera? Ua ere anei Adamu e Eva i to raua tiamâraa? Aita roa ˈtu! Mea rahi te mau aivanaa hiˈopoa Bibilia o te manaˈo ra e faaueraa î i te paari e te tano roa ta te Atua. Ua faataa hoê i rotopu ia ratou, e haapii mai te reira o te Atua anaˈe tei ite eaha te mea maitai e te mea ino no te taata. No te ite i te mea maitai, e tia i te taata ia tiaturi i te Atua e ia faaroo ia ˈna. Ia faaroo ore ratou, te auraa ra ïa na ratou iho e faaoti ra eaha te mea maitai e te mea ino. Mea fifi roa râ no te taata ia ite eaha te mea maitai.

10. No te aha mea taa ê te tiamâraa ia maiti i te tiaraa ia faaoti eaha te mea maitai e te mea ino?

¹⁰ Te manaˈo ra vetahi aita o Iehova i horoa ia Adamu te tiamâraa ia rave i ta ˈna i hinaaro. Tera râ, aita ratou i taa mea taa ê te tiamâraa ia maiti, mea taa ê te tiaraa ia faaoti eaha te mea maitai e te mea ino. E tiamâraa to Adamu raua Eva ia maiti i te faaroo i te Atua e aore ra aita. Tei ia Iehova anaˈe râ te tiaraa ia faaoti eaha te mea maitai e te mea ino. Ua riro “te raau e ite ai i te maitai e te ino” ei haapapuraa. (Gen. 2:9) Mea pinepine tatou i te ore e ite i te faahopearaa o ta tatou mau faaotiraa. Aita atoa tatou i papu e maitai te noaa mai. No reira e ite-pinepine-hia ˈi e manaˈo maitai to vetahi a rave ai i te tahi faaotiraa, e mauiui, e fifi e e ati râ tei tupu i muri aˈe. (Mas. 14:12) E otia ïa to te taata. Ma te faaue ia Adamu raua Eva eiaha e amu i to te raau ta ˈna i faahiti, ua haapii atu o Iehova e titauhia ia faaroo ia ˈna no te fanaˈo i te tiamâraa mau. Eaha ta Adamu e Eva i maiti i te rave?

11, 12. No te aha ua tupu te ati na roto i ta Adamu raua Eva faaotiraa? A horoa i te tahi hiˈoraa.

 ¹¹ Ma te peapea mau, ua maiti Adamu e Eva i te faaroo ore ia Iehova. Ua faaoti Eva i te tiaturi i ta Satani parau a na ô ai oia: “E araara ïa to orua mata, e e riro orua mai te atua ra te huru, i te ite i te maitai e te ino.” (Gen. 3:5) Ua fanaˈo anei Adamu e Eva i te tiamâraa rahi aˈe mai ta Satani i parau? Aita roa. Ua taa ia Adamu e Eva i muri iho i te tahi haapiiraa faufaa roa, e ati te tupu ia ore te taata e farii i te aratairaa a Iehova. (Gen. 3:16-19) No te aha mai tera ˈi? No te mea aita o Iehova i horoa i te taata i te tiamâraa ia faaoti eaha te mea maitai e te mea ino.—A taio i te Maseli 20:24 e te Ieremia 10:23.

¹² E rave anaˈe i te hiˈoraa o te pairati manureva. Ia ore te fifi ia tupu e ia tapae te manureva i te vahi hinaarohia, e pee maite o ˈna i te reni faataahia no to ˈna tere, e haapao i te mau matini aratai o te manureva e te mau parau a te feia i roto i te pare hiˈopoaraa. Ia ore râ te pairati e pee i te mau aratairaa e ia faatere noa oia i te manureva mai ta ˈna e hinaaro, e ati te tupu! Mai te hoê pairati faaroo ore, ua opua Adamu e Eva e rave mai ta raua i hinaaro. Ua patoi ihora i te aratairaa a te Atua. E ati rahi mau tei tupu! Na roto i ta raua faaotiraa, ua raea raua e ta raua huaai i te hara e te pohe. (Roma 5:12) Ma te faaoti i te mea maitai e te mea ino no raua iho, ua rahi mai anei to Adamu e Eva  tiamâraa? Aita roa ˈtu, ua ere râ i te tiamâraa mau ta Iehova i horoa ˈtu!

13, 14. E nafea ia fanaˈo i te tiamâraa mau?

¹³ Te manaˈo ra vetahi mea maitai aˈe eiaha te tiamâraa o te taata ia taotiahia. Tera anei te tiamâraa mau? A feruri na eaha te huru o te oraraa aita anaˈe e otia a rave atu ai te taata mai ta ratou e hinaaro. Ia au i te buka îite faahitihia ˈtu, e ere i te mea ohie ia haamau i te ture ia naho te oraraa o te huiraatira. E tia ia ratou ia paruru i te tiamâraa o te taata e i te hoê â taime ia taotia i te reira. Te tamata ra te mau paruru e te mau haava i te faataa no te aha tera mau rahiraa ture e no te aha e tia ia faatura i te reira.

¹⁴ Ua faataa Iesu Mesia eaha te rave no te fanaˈo i te tiamâraa mau. Ua na ô oia: “Ia haapao noa outou i ta ˈu parau, e pǐpǐ mau ïa outou na ˈu, e e ite outou i te parau mau e na te parau mau e faatiamâ ia outou.” (Ioa. 8:31, 32) No te fanaˈo i te tiamâraa mau, e piti titauraa. A tahi, e farii i te parau mau ta Iesu i haapii. Te piti, e riro ei pǐpǐ na ˈna. No te aha râ tatou e hinaaro ai i te tiamâraa mau? Ua faataa Iesu: “Te taata atoa e rave i te hara, e tîtî ïa no te hara.” I muri iho, ua na ô â oia: “Ia faatiamâ te Tamaiti ia outou, e tiamâ mau â outou.”—Ioa. 8:34, 36.

15. No te aha “e tiamâ mau â” tatou na roto i te tiamâraa ta Iesu i fafau mai?

¹⁵ Mea hau aˈe te tiamâraa ta Iesu i fafau  i ta ˈna mau pǐpǐ i te tiamâraa ta te rahiraa e titau nei! A na ô ai, “Ia faatiamâ te Tamaiti ia outou, e tiamâ mau â outou,” eaha ta Iesu i hinaaro e parau? Te manaˈo ra o ˈna i te tiamâraa mai i te hara, tera te faatîtîraa ino roa ˈˈe no te taata. E tîtî tatou na te hara no te mea na te reira e turai mai ia rave i te mea ino. Noa ˈtu ua ite tatou eaha te mea maitai, e tapea atoa mai te hara ia rave i te reira. Eaha te faahopearaa? Te mauruuru ore, te oto, te mauiui e te pohe. (Roma 6:23) Ua ite roa te aposetolo Paulo i te ahoaho rahi ia riro ei tîtî na te hara. (A taio i te Roma 7:21-25.) Ia faaore-roa-hia te hara, i reira noa tatou e ite ai i te tiamâraa mau ta Adamu e Eva i fanaˈo na.

16. Eaha te rave ia tiamâ mau â tatou?

¹⁶ A na ô ai, “Ia haapao noa outou i ta ˈu parau,” ua faaite Iesu e tuhaa ta tatou no te tiamâ mau â. Ei Kerisetiano pûpûhia i te Atua, ua haapae tatou ia tatou iho e ua farii atoa i te mau taotiaraa ta Iesu i horoa no ta ˈna mau pǐpǐ. (Mat. 16:24) Mai ta Iesu i fafau, a muri aˈe e noaa mai te tiamâraa mau ia fanaˈo tatou i te mau maitai atoa o te hoo.

17. (a) Eaha te tia ia rave no te ite i te oaoa e te mauruuru mau? (b) Eaha ta tatou e hiˈo mai i roto i to mua ˈtu haapiiraa?

¹⁷ Mai ta ˈna mau pǐpǐ, e tia ia tatou ia haapao i te mau haapiiraa a Iesu no te ite i te oaoa e te mauruuru mau. I reira noa tatou e tiamâ roa ˈi i te faatîtîraa a te hara e te pohe. (A taio i te Roma 8:1, 2, 20, 21.) I roto i to mua ˈtu haapiiraa, e hiˈo mai tatou e nafea ia faaohipa ma te paari i te tiamâraa ta tatou e fanaˈo nei. E nehenehe ïa tatou e faateitei ia Iehova, te Atua o te tiamâraa mau, e a muri noa ˈtu!