1. No te aha te aposetolo Paulo i parau ai i te mau Kerisetiano Hebera “ia rahi atu â” ratou i te faaitoito te tahi i te tahi?

 I TE senekele matamua, ua horoa te aposetolo Paulo i teie aˈoraa i te mau Kerisetiano Hebera: “E manaˈo anaˈe te tahi i te tahi, a turai atu ai te tahi i te tahi ia faaite i te here e ia rave i te mau ohipa maitai roa, eiaha e faarue i ta tatou mau putuputuraa, mai ta vetahi i matau, ia faaitoito râ te tahi i te tahi, e ia rahi atu â a ite ai outou i taua mahana ra e fatata mai ra.” (Heb. 10:24, 25) Ua uiui paha te mau taeae no te aha Paulo i parau atu ai ia rahi atu â ratou i te faaitoito te tahi i te tahi. Aita râ i mairi e pae matahiti i muri aˈe, ua taa ia ratou te tumu o tera aˈoraa. Ua papu atura ua fatata te mahana faautuaraa a Iehova i nia ia Ierusalema. Ua haamanaˈo e titauhia ia faarue i te oire e ia horo mai ta Iesu i parau. (Luka 21:20-22; Ohi. 2:19, 20) Ua tae mai te mahana o Iehova i te matahiti 70, i te taime a haamou ai to Roma ia Ierusalema.

2. No te aha ia manaˈo atu â tatou ia faaitoito te tahi i te tahi i teie mahana?

 ² Hoê â tupuraa i teie tau. Ua fatata roa mai te mahana “rahi; e te riaria rahi” o Iehova. (Ioe. 2:11) E tano atoa te mau parau a te peropheta Zephania no teie tau: “Ua fatata te mahana rahi o Iehova, te fatata maira, te peepee maira.” (Zeph. 1:14) No reira, “e haapeapea anaˈe no te tahi e te tahi, a turai atu ai te tahi i te tahi ia faaite i te here e ia rave i te mau ohipa maitai roa.” (Heb. 10:24, nota) E titauhia ia tâuˈa ˈtu â tatou i to tatou mau taeae no te faaitoito ia ratou i te taime e hinaarohia ˈi te reira.

3. Eaha ta te aposetolo Paulo i parau no nia i te faaitoitoraa? (A hiˈo i te hohoˈa matamua.)

³ “E oto tei te aau o te taata ra, e piˈo ïa i raro; hoê roa râ parau maitai ra, oaoa aˈera ïa.” (Mas. 12:25) E hinaaro tatou paatoa i te faaitoitoraa. Ua haapapu Paulo e hinaaro atoa te feia na ratou te hopoia e faaitoito ia vetahi ê i te faaitoitoraa. Ua hinaaro atoa te aposetolo Paulo i te faaitoitoraa i te tahi taime. No reira oia i papai ai i to ˈna mau taeae i Roma: “Te hinaaro roa nei hoi au e ite atu ia outou no te horoa ˈtu i te tahi mau ô pae varua ia mau papu outou, aore ra ia nehenehe outou e faaitoito mai ia ˈu i to outou faaroo e ia nehenehe atoa vau e faaitoito ia outou i to ˈu faaroo.”—Roma 1:11, 12; a taio i te Roma 15:30-32.

4, 5. O vai ma ta tatou e nehenehe e faaitoito e no te aha?

⁴ I teie mahana, o vai ma ta tatou e nehenehe e faaitoito? Te feia o te tavini ra ia Iehova ma te taime taatoa mai te mau pionie taiva ore. E rave rahi o ratou o tei rave i te mau haapaeraa no te riro ei pionie. Te vai atoa ra te mau mitionare, te mau mero o te Betela, te mau tiaau haaati e ta ratou vahine e te mau Kerisetiano e ohipa ra i te mau piha huriraa. Te rave ra hoi ratou pauroa i te mau haapaeraa no te tavini atu â ia Iehova, e hinaaro mau ïa ratou i te faaitoitoraa. Hoê â huru no tei faaea i te taviniraa taime taatoa no to ratou tupuraa.

⁵ O vai atu â ta tatou e nehenehe e faaitoito? Te mau taeae e tuahine o tei faaoti i te faaea taa noa no te mea te hinaaro ra ratou e auraro ia Iehova e e faaipoipo “i roto noa râ i te Fatu.” (Kor. 1, 7:39) E faaitoito atoa te mau tane i ta ratou vahine ma te haamauruuru atu no te ohipa ta ratou e rave ra e ma te haapapu atoa mea here-roa-hia ratou. (Mas. 31:28, 31) E hinaaro atoa te mau Kerisetiano o te faaruru ra i te hamani-ino-raa aore ra tei roohia i te maˈi i te faaitoitoraa. (Tes. 2, 1:3-5) Te fanaˈo ra tera mau Kerisetiano taiva ore atoa i te faaitoitoraa a Iehova e ta Iesu.—A taio i te Tesalonia 2, 2:16, 17.

6. Eaha ta te Isaia 32:1, 2 e haapii mai ra no nia i te hopoia a te mau matahiapo?

⁶ A taio i te Isaia 32:1, 2. Mea fifi te oraraa i teie tau e mea ohie roa ïa ia mauiui e ia paruparu. Te faaohipa ra Iesu Mesia i to ˈna mau taeae faatavaihia e te mau matahiapo taiva ore o te “pǔpǔ arii” no roto mai i te mau mamoe ê atu no te faaitoito ia tatou. E ere ratou i “te fatu” o to tatou faaroo, “e hoa ohipa  noa râ” no to tatou oaoa. Te hinaaro ra ratou ia oaoa tatou e ia mau papu te faaroo.—Kor. 2, 1:24.

7, 8. E nafea te mau matahiapo ia faaitoito na roto i ta ratou mau parau e ohipa?

⁷ Ma te tamau i te faaitoito i to ratou mau taeae, te pee ra te mau matahiapo i te hiˈoraa o te aposetolo Paulo. Teie ta ˈna i papai i te mau Kerisetiano i Tesalonia o tei faaruru i te hamani-ino-raa: “No te rahi o to matou here ia outou, ua faaoti papu matou e faaite atu i te parau apî oaoa a te Atua e e horoa atoa i to matou ora no te tauturu atu, no te mea ua here roa matou ia outou.”—Tes. 1, 2:8.

⁸ E nehenehe te mau matahiapo e faaitoito na roto i ta ratou mau parau. E navai râ anei? Teie ta Paulo i faahiti i te mau matahiapo no Ephesia: “E tauturu . . . outou i tei paruparu, a haamanaˈo atoa ˈi i ta te Fatu ra o Iesu i parau: ‘E rahi aˈe te oaoa ia horoa ˈtu i te horoahia mai.’” (Ohi. 20:35) Ua na ô atoa Paulo: “Ua ineine au i te horoa i to ˈu puai atoa e ia hope roa no outou.” Na roto i ta ˈna mau ohipa, ua haapapu Paulo ua ineine oia i te rave i te maraa ia ˈna no te maitai o to ˈna mau taeae. (Kor. 2, 12:15) Mai ia ˈna, e tia i te mau matahiapo ia faaitoito e ia tamahanahana na roto i ta ratou mau parau e ohipa. E haapapu te reira, te tâuˈa ra ratou i to ratou mau taeae.—Kor. 1, 14:3.

9. E nafea te mau matahiapo ia horoa i te aˈoraa ma te faaitoito mau?

⁹ I te tahi taime, e titauhia i te mau matahiapo ia horoa i te aˈoraa no te faaitoito i te mau taeae. E nehenehe ratou e haapii mai i roto i te Bibilia e nafea ia na reira. Ua faaite Iesu i te hiˈoraa maitai a horoa ˈi i te poroi i te mau amuiraa i Asia Iti i muri aˈe i to ˈna tia-faahou-raa. Ua horoa oia i te tahi mau aˈoraa papu i te mau amuiraa i Ephesia, Peregamo e Tuatira. Hou râ a horoa ˈi i te aˈoraa, ua haapopou atu Iesu no te mau ohipa maitatai ta ratou e rave ra. (Apo. 2:1-5, 12, 13, 18, 19) Ua na ô Iesu i te amuiraa i Laodikea: “Te feia atoa mea here na ˈu, e faaite au i ta ratou hapa e e aˈo vau ia ratou. No reira, a haa ma te itoito rahi e a tatarahapa.” (Apo. 3:19) E tutava te mau matahiapo i te horoa i te aˈoraa mai ta te Mesia i rave.

10. E nafea tatou paatoa ia faaitoito te tahi i te tahi?

¹⁰ E ere râ te mau matahiapo anaˈe te nehenehe e faaitoito. Teie te aˈoraa a Paulo i te mau Kerisetiano atoa: “Ei parau maitai noa râ no te patu i te taime e au, a faufaahia ˈtu ai te feia e faaroo ra.” (Eph. 4:29) E tia ia tatou tataitahi ia feruri eaha ta tatou e nehenehe e rave no te tauturu ia vetahi ê. Teie ta Paulo i papai i te mau Kerisetiano Hebera: “A faaetaeta i te mau rima e tautau ra e te turi paruparu, e a haamanina noa i te mau eˈa no to outou avae, ia ore hoi te avae o te piriˈoˈi e maˈoˈi, ia ora râ.” (Heb. 12:12, 13) E nehenehe tatou paatoa e faaitoito te tahi i te tahi na roto i ta tatou mau parau noa ˈtu mea apî roa tatou.

11. Eaha tei tauturu ia Marthe i to ˈna hepoheporaa?

¹¹ Ua topa te tahi tuahine o Marthe te iˈoa i roto i te hoê tau hepohepo. * Teie ta ˈna i papai: “I te hoê mahana, ua ani  au na roto i te pure ia faaitoitohia vau. Ua farerei ihora vau i te hoê tuahine paari o tei tamahanahana ia ˈu e tei faaite mai i te aumihi, ta ˈu ïa i hinaaro mau i tera taime. Ua faatia atoa mai te tuahine ua faaruru oia i te hoê â tupuraa. Ua faaea aˈera vau i te manaˈo o vau anaˈe tei farerei i tera fifi.” Ma te ore e ite, ua faaitoito mau te mau parau a tera tuahine ia Marthe!

12, 13. E nafea ia pee i te aˈoraa i roto i te Philipi 2:1-4?

¹² Ua papai Paulo i te mau Kerisetiano i Philipi: “Mai te peu e te vai ra i rotopu ia outou maa faaitoitoraa no to outou hoêraa e te Mesia, maa tamahanahanaraa na roto i te here, maa haapeapearaa te tahi i te tahi, maa here rahi e te aumihi, a faahope roa mai i to ˈu oaoa ma te faaite i te hoê â huru feruriraa, ma te here te tahi i te tahi e ia tahoê-maite-hia outou i te hoê â manaˈo. Eiaha roa e rave i te tahi noa ˈˈe mea ma te mârô aore ra ma te faateitei. Ma te haehaa râ, a haamanaˈo e mea hau aˈe vetahi ê ia outou, a imi atoa ˈi i to vetahi ê maitai, eiaha noa râ i to outou iho.”—Phil. 2:1-4.

¹³ E tia ïa ia imi i te mau ravea no te tauturu te tahi i te tahi. E nehenehe tatou e horoa “maa tamahanahanaraa na roto i te here, maa haapeapearaa te tahi i te tahi, maa here rahi e te aumihi” no te faaitoito i to tatou mau taeae e tuahine.

14. Eaha te tahi ravea no te faaitoito ia vetahi ê?

¹⁴ E oaoa tatou ia ite te tamau ra te feia ta tatou i tauturu i te tavini i te Atua ma te taiva ore. Ua papai te aposetolo Ioane: “Aita to ˈu e oaoa rahi aˈe i teie,  ia faaroo vau e te pee noa ra ta ˈu mau tamarii i te parau mau.” (Ioa. 3, 4) Auê te mau pionie i te oaoa ia ite te tamau noa ra te feia ta ratou i haapii i te tavini ia Iehova ma te taiva ore. Peneiaˈe, ua riro atoa mai vetahi ei pionie! No reira, ia toaruaru te hoê pionie, a haamanaˈo atu i te mau ohipa maitatai ta ˈna i rave no te tauturu i te taata.

15. Eaha te tahi mea ta tatou e nehenehe e rave no te faaitoito i te tavini ra ia Iehova ma te taiva ore?

¹⁵ E rave rahi tiaau haaati e ta ratou vahine tei faaitoitohia na roto i te tahi api parau haamauruuru. Hoê â atoa no te mau matahiapo, mitionare, pionie e mero o te Betela. Te tavini ra ratou pauroa ia Iehova ma te taiva ore. Ma te haamauruuru atu, e faaitoito roa tatou ia ratou, rahi aˈe i ta tatou e manaˈo.

16. Eaha te tahi ohipa rii te nehenehe e rave no te faaitoito ia vetahi ê?

¹⁶ E mai te peu e hinaaro tatou e faaitoito ia vetahi ê, e ere râ i te mea ohie ia faaite i to tatou manaˈo? A tamata na i te faaite i te mata oaoa i nia i te tahi atu. Ia ore tera taata ia ata mai, tapao faaite paha e fifi to ˈna e te hinaaro ra oia e paraparau. E nehenehe oe e faaitoito atu ma te faaroo noa ia ˈna.—Iak. 1:19.

17. Eaha tei faaitoito i te tahi taeae apî?

¹⁷ Ua oti roa te tahi taeae apî o Henri te iˈoa i te faaearaa vetahi o to ˈna utuafare i te tavini ia Iehova. To ˈna metua tane te tahi, e matahiapo oia na mua ˈˈe. Ua tapao te tiaau haaati te peapea ra Henri e ua ani atu oia ia haere raua e inu maa taofe i te tahi vahi. Ua faaroo maite  te tiaau a haamahora ˈi Henri i to ˈna aau. I muri aˈe i te aparauraa, ua taa ia Henri hoê anaˈe ravea no te tauturu i to ˈna utuafare ia hoˈi mai, o te tamauraa ïa i te tavini ia Iehova ma te taiva ore. Ua noaa atoa ia ˈna te tamahanahanaraa ma te taio i te Salamo 46, te Zephania 3:17 e te Mareko 10:29, 30.

18. (a) Eaha ta te arii Solomona i faahiti no nia i te faaitoitoraa? (b) Eaha ta te aposetolo Paulo i parau atoa?

¹⁸ Eaha te haapii mai i te tupuraa o Marthe e to Henri? E nehenehe tatou paatoa e tamahanahana e e faaitoito i te hoê taeae e tuahine o te hinaaro i te tauturu. Teie te tahi mau parau ta te arii Solomona i faahiti no nia i te faaitoitoraa: “E au te parau maitai i te topata rii meli ra; e momona i te taata nei, e ora hoi to te ivi.” Ua na ô atoa: “Mai te lemoni auro i roto i te vairaa ario ra, o te parau ïa ia parauhia i te taime mau ra.” (Mas. 16:24; 25:11) Te manaˈo ra anei oe i te hoê o te toaruaru aore ra peapea ra? No te aha e ore ai e taio atu i te tahi tumu parau no roto mai i Te Pare Tiairaa aore ra ta tatou reni Internet? Ua parau atoa Paulo e itoito-atoa-hia tatou ia himene i te mau pehe o te Basileia. Teie ta ˈna i papai: “A tamau i te haapii e i te faaitoito te tahi i te tahi ma te salamo, te arueraa i te Atua, te himene haamoriraa himenehia ma te mauruuru, ma te himene i roto i to outou aau no Iehova.”—Kol. 3:16; Ohi. 16:25.

19. No te aha mea faufaa roa ˈtu â ia faaitoito te tahi i te tahi e eaha te tia ia rave?

¹⁹ A piri noa mai ai te mahana o Iehova, mea faufaa roa ˈtu â no tatou ia faaitoito te tahi i te tahi. (Heb. 10:25) E oaoa tatou ma te pee i teie aˈoraa a Paulo: “A tamau i te faaitoito e te tauturu te tahi i te tahi, mai ta outou hoi e rave nei.”—Tes. 1, 5:11.