1, 2. (a) No te aha ua riro te tiamâraa ei haapeapearaa na te taata i te tau o te aposetolo Paulo? (b) Ia au i ta Paulo i papai, na vai e horoa i te tiamâraa mau?

 I ORA na te mau Kerisetiano matamua i raro aˈe i te hau Roma. E teoteoraa na to Roma ta ratou mau ture e tiripuna haavaraa, oia atoa to ratou tiamâraa. Tera râ, na te mau tîtî e rave na i te ohipa rahi a teie faatereraa puai. Ua tae roa i te faito 1 taata i nia e 3, e tîtî ïa. Eita e ore, ua riro te tiamâraa ei haapeapearaa na te taata, oia atoa no te mau Kerisetiano.

² Ua papai pinepine te aposetolo Paulo no nia i te tiamâraa. Aita râ oia i hinaaro e faatitiaifaro i te mau fifi o to ˈna tau mai ta te rahiraa i opua e rave. Ua faaitoito râ Paulo e to ˈna mau hoa Kerisetiano i roto i te ohipa pororaa i te parau apî oaoa o te Faatereraa arii. Ua tauturu atoa ratou ia vetahi ê ia taa i te faufaaraa o te hoo, te tusia o Iesu Mesia. Ua faaite Paulo i to ˈna mau hoa Kerisetiano  na vai e horoa i te tiamâraa mau. Teie ta ˈna i papai: “O Iehova te Varua, e i te vahi tei reira te varua o Iehova, tei reira atoa ïa te tiamâraa.”—Kor. 2, 3:17.

3, 4. (a) Eaha ta Paulo i faataa hou a faahiti ai i te parauhia ra i roto i te Korinetia 2, 3:17? (b) Eaha te tia ia rave no te fanaˈo i te tiamâraa no ǒ mai ia Iehova?

³ I roto i te piti o ta ˈna rata i to Korinetia, ua faahiti Paulo i tei tupu a fa mai ai te hoê melahi a Iehova ia Mose ra. A pou mai ai i te mouˈa Sinai, ua anaana roa te hohoˈa mata o Mose! Ua mǎtaˈu roa te mau Iseraela i te iteraa ˈtu ia ˈna, tapoˈi ihora oia i to ˈna hohoˈa i te ahu paruru. (Exo. 34:29, 30, 33; Kor. 2, 3:7, 13) Teie ta Paulo i faataa: “Ia fariu râ te tahi taata ia Iehova, e tatarahia ïa te ahu paruru.” (Kor. 2, 3:16) Eaha ta ˈna i hinaaro e parau?

⁴ I te haapiiraa na mua ˈtu, ua ite mai tatou o Iehova anaˈe te fanaˈo ra i te tiamâraa tia roa e te otia ore no te mea na ˈna i poiete i te mau mea atoa. Te auraa, no ǒ mai ia ˈNa te tiamâraa e e itehia te reira “i te vahi tei reira te varua o Iehova.” Tera râ, ua parau Paulo ia hinaaro tatou i tera tiamâraa, e tia ia fariu atu ia Iehova. E titauhia ïa te hoê auhoaraa piri e o ˈna. I roto i te medebara, aita te mau Iseraela i tiaturi i te manaˈo o Iehova, ua haapao râ i to ratou. Mai te huru ra ua tapoˈihia to ratou feruriraa e aau i te hoê ahu paruru. No faaora-noa-hia ˈtura to Iseraela mai Aiphiti mai, ua hinaaro râ ratou e faaohipa i to ratou tiamâraa no te haamâha i to ratou iho mau hinaaro.—Heb. 3:8-10.

5. (a) Eaha te tiamâraa ta te varua moˈa e horoa mai? (b) E nehenehe anei te tîtî aore ra tei tapeahia e fanaˈo i tera tiamâraa? (c) Eaha na uiraa e piti o ta tatou e hiˈopoa?

⁵ Mea hau aˈe te tiamâraa ta te varua moˈa e horoa mai. E faaorahia tatou i te faatîtîraa a te hara e te pohe, oia atoa i te haapaoraa hape e ta ratou mau peu. (Roma 6:23; 8:2) Mea faahiahia e eita roa te taata e horoa mai i te tiamâraa mai tera te huru! E nehenehe te tîtî aore ra tei tapeahia e fanaˈo i tera tiamâraa. (Gen. 39:20-23) Ua mau tuahine Nancy Yuen e taeae Harold King i te fare auri e rave rahi matahiti no to raua faaroo. Ua fanaˈo râ toopiti atoa i tera tiamâraa. E nehenehe e mataitai i ta raua faatiaraa i nia JW Haapurororaa teata. (A pata i nia UIUIRAA MANAˈO E FAATIARAA > FAAOROMAI I ROTO I TE MAU TAMATARAA.) I teie nei, e piti uiraa ta tatou e hiˈopoa. E nafea ia faaite mea faufaa roa to tatou tiamâraa? E nafea ia faaohipa i te reira ma te paari?

6. Eaha te haapapu ra aita to Iseraela i mauruuru i te tiamâraa ta Iehova i horoa ˈtu?

⁶ E tupu mai te mauruuru ia rave te  tahi i te hoê mea no tatou, e ere anei? Aita roa ˈtu râ to Iseraela i na reira a faatiamâ ˈi Iehova ia ratou. Te tahi noa avaˈe i muri aˈe i te faatiamâraahia mai, ua manaˈonaˈo ratou i te maa e te inu ta ratou i fanaˈo na i Aiphiti. Ua mutamuta no te mâna, te maa ta Iehova i horoa ˈtu. Ua tae roa ratou i te hinaaro e hoˈi i Aiphiti! No ratou, mea faufaa aˈe ‘te iˈa, te tutama, e te meleni, e te hezira, e te oniani, e te sumi’ i te tiamâraa ta Iehova i horoa no te haamori ia ˈna. Ua riri roa o Iehova ia ratou. (Num. 11:5, 6, 10; 14:3, 4) E haapiiraa ta tatou e huti mai.

7. Mea nafea Paulo i te faaohiparaa i te aˈoraa ta ˈna i horoa i roto i te Korinetia 2, 6:1 e e nafea ia pee i to ˈna hiˈoraa?

⁷ Ua faaara Paulo i te mau Kerisetiano eiaha ia haafaufaa ore i te tiamâraa ta Iehova e horoa na roto i ta ˈna Tamaiti o Iesu Mesia. (A taio i te Korinetia 2, 6:1.) E taata tia ore Paulo, e tîtî ïa na te hara e te pohe e e tupuraa fifi roa ta ˈna i faaruru. Noa ˈtu râ, ua na ô oia: “Ia haamauruuruhia te Atua na roto ia Iesu Mesia to tatou Fatu!” Eaha te tumu? Teie ta Paulo i faataa i to ˈna mau hoa Kerisetiano: “Te ture a te varua o te Atua o te horoa i te ora na roto i te Mesia ra o Iesu, ua faatiamâ ïa ia outou i te ture a te hara e a te pohe.” (Roma 7:24, 25; 8:2) Mai ia Paulo, e haamanaˈo anaˈe ua faatiamâ o Iehova ia tatou i te hara e te pohe. Maoti te hoo, e nehenehe tatou e tavini i te Atua ma te manaˈo haava maitai a oaoa ˈtu ai.—Sal. 40:8.

8, 9. (a) Eaha ta te aposetolo Petero i faaara no nia i te faaohiparaa o to tatou tiamâraa? (b) E nafea te tahi e faaohipa hape ai i to ˈna tiamâraa?

⁸ Eita e navai ia parau ua mauruuru tatou ia Iehova, e tia atoa ia ara eiaha  ia faaohipa hape i to tatou tiamâraa. Ua faaara te aposetolo Petero eiaha ia faaohipa i to tatou tiamâraa no te rave i te ohipa ino. (A taio i te Petero 1, 2:16.) Te haamanaˈo mai ra te reira i tei tupu no te mau Iseraela i roto i te medebara. Mea tano atoa tera faaararaa i teie mahana e peneiaˈe, mea faufaa roa ˈtu â. Na roto i ta ˈna ao, mea rahi te mau taoˈa ta Satani e pûpû mai ra, te ahu anei, te maa, te inu e te faaanaanataeraa. Mea feruri-maitai-hia te mau poroi faatianiani, e faaohipahia te taata nehenehe no te turai ia tatou ia hoo mai i te taoˈa aita hoi tatou i hinaaro mau. Mea ohie roa ïa ia faaohipa hape i to tatou tiamâraa.

⁹ E tano atoa te aˈoraa a Petero i roto i te mau tuhaa faufaa ˈtu â mai te haapiiraa e te toroa ta tatou e maiti. I teie mahana, te faahepohia ra te feia apî ia faaô i roto i te mau fare haapiiraa teitei maitai roa. Mea rahi te parau, mea na reira e noaa mai ai te ohipa aufau-maitai-hia e te fanaˈo. E faaite atoa paha ratou i te tahi mau mea ia manaˈo iho â te feia apî mea rahi aˈe tei taoˈahia no te mea ua haere ratou i te haapiiraa teitei. I mua i te faaotiraa, e tiaturi mau ïa te feia apî mea maitai aˈe ia haere i te haapiiraa teitei no to ratou ananahi. Eaha râ ta ratou e ta to ratou metua e tia ia haamanaˈo?

10. Eaha te tia ia haamanaˈo noa ˈtu e tiamâraa to tatou ia rave i ta tatou iho faaotiraa?

¹⁰ E manaˈo paha vetahi mai teie, ‘Na ˈu iho e rave i ta ˈu faaotiraa, e tiamâraa to ˈu ia rave i ta ˈu e hinaaro e aita to ˈu manaˈo haava e hauti ra!’ E faahiti atoa paha ratou i ta Paulo i parau a na ô ai oia: “No te aha hoi no te manaˈo haava o te tahi atu e faahapahia ˈi to ˈu tiamâraa?” (Kor. 1, 10:29) Noa ˈtu râ e tiamâraa to tatou no te maiti i te haapiiraa e te toroa, e tia ia haamanaˈo e otia to te tiamâraa e e faahopearaa to te mau faaotiraa atoa. No reira Paulo i na ô ai: “E mea tia anaˈe te mau mea atoa, eita râ te taata e faufaahia i te mau mea atoa. E mea tia anaˈe te mau mea atoa, eita râ te taata e itoitohia i te mau mea atoa.” (Kor. 1, 10:23) Noa ˈtu ïa e tiamâraa to tatou ia maiti, e ere to tatou hinaaro i te mea faufaa roa ˈˈe.

11. Eaha te tumu i faatiamâ ˈi Iehova ia tatou?

¹¹ Aita noa Petero i faaara mai eiaha ia faaohipa hape i to tatou tiamâraa. Ua faaite atoa mai oia i te ravea no te faaohipa i te reira ma te tano, oia hoi no te tavini i te Atua. Tera te tumu i faatiamâ ˈi Iehova ia tatou i te hara e te pohe na roto ia Iesu, ia faaohipa tatou i to tatou ora no te tavini ia ˈna.

12. Eaha te hiˈoraa ta Noa e to ˈna utuafare i vaiiho mai?

¹² Te ravea maitai roa ˈˈe no te faaohipa i to tatou tiamâraa, o te horoaraa i to tatou taime e puai no te tavini ia Iehova anaˈe. Eita ïa tatou e haafaufaa rahi i te mau fa a teie nei ao e te mau hinaaro tia ore. (Gal. 5:16) A feruri na ia Noa e to ˈna utuafare. I ora na ratou i roto i te hoê ao ino e te faatura ore i te mau ture aveia a te Atua. Aita râ ratou  i faaô i roto i te mau opuaraa e te mau ohipa a te feia i haaati ia ratou. Ua faaoti ratou i te tiatonu i nia i te ohipa ta Iehova i horoa ˈtu. Ua hamani i te araka, ua haaputu i te maa e te mau animara e ua faaara ia vetahi ê e tupu te hoê diluvi. “Ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite.” (Gen. 6:22) Maoti te reira, ua faaorahia Noa e to ˈna utuafare a haamouhia ˈi tera ao.—Heb. 11:7.

13. Eaha ta Iehova i faaue mai ia rave?

¹³ Eaha ta Iehova i faaue mai ia rave i teie mahana? Ei pǐpǐ na Iesu, ua faaue mai te Atua ia poro. (A taio i te Luka 4:18, 19.) I teie mahana, ua haapoiri Satani i te feruriraa o te rahiraa ia ore ratou ia taa e tîtî ratou na te haapaoraa hape, na te taoˈa materia e na te faanahoraa o teie nei ao. (Kor. 2, 4:4) Mai ia Iesu, e nehenehe tatou e tauturu i te taata ia ite o vai o Iehova e ia haamori ia ˈna, te Atua o te tiamâraa. (Mat. 28:19, 20) E ere râ i te mea ohie ia poro. I te tahi mau vahi, eita te taata e tâuˈa i te Atua. Area vetahi, e riri roa ïa ia poro atu tatou. Mea papu râ ta Iehova i faaue mai, mea tano ïa ia uiui, ‘E nehenehe anei au e faaohipa i to ˈu tiamâraa no te poro atu â?’

14, 15. Ua faaoti e rave rahi Ite no Iehova i te aha? (A hiˈo i te hohoˈa matamua.)

¹⁴ Mea faaitoito mau ia ite e rave rahi Ite no Iehova tei taa ua piri roa mai te hopea o teie faanahoraa o te ao. No reira ratou i faaoti ai i te ore e titau i te oraraa fanaˈo e ua rave atura i te taviniraa pionie. (Kor. 1, 9:19, 23) Ua faaea noa vetahi pionie i to ratou oire, area te tahi atu ua haere ïa e turu i te mau amuiraa o tei hinaaro i te tauturu. I na pae matahiti i mairi, ua hau atu i te 250 000 Kerisetiano tei riro mai ei pionie. I teie nei, ua hau atu i te 1 100 000 pionie tamau. Auê te faahiahia ia faaohipa e rave rahi i to ratou tiamâraa no te tavini ia Iehova mai tera!—Sal. 110:3.

¹⁵ Eaha tei tauturu atu ia faaohipa i to ratou tiamâraa ma te paari? A hiˈo na ia John e Judith. Ua tavini raua 30 matahiti te maoro i roto e rave rau fenua. Ua faataa raua, i te Haapiiraa no te mau pionie matamua i 1977, ua faaitoitohia ratou ia reva e ia tavini i te vahi e hinaaro-rahi-hia te tauturu. No te ore e titau i te oraraa fanaˈo, ua taui pinepine John i ta ˈna ohipa. I muri aˈe, ua tere raua i te fenua ê no te poro. Eaha tei tauturu atu ia haapii i te reo apî e ia faaau i te peu tumu e te huru o te reva i tera mau fenua? Ua pure raua e ua tiaturi papu e tauturu mai iho â Iehova. Eaha to raua manaˈo i ta raua taviniraa ia Iehova i tera mau rahiraa matahiti? Ua na ô John: “Ua haa rahi au i roto i  te ohipa maitai roa ˈˈe. Ua piri roa ˈtu â vau ia Iehova, e metua î i te here oia no ˈu. I teie nei, ua taa maitai ia ˈu te auraa o te Iakobo 4:8: ‘A faafatata ˈtu i te Atua, e e faafatata mai oia ia outou.’ Ua itehia mai ia ˈu ta ˈu i imi noa na, te hoê fa papu i roto i te oraraa.”

16. Mea nafea e rave rahi i te faaohiparaa i to ratou tiamâraa ma te paari?

¹⁶ Ua nehenehe vetahi mai ia John raua Judith e tavini maoro ei pionie. Area te tahi atu, no to ratou tupuraa, ua na reira ïa no te hoê taime noa. E rave rahi atoa râ tei turu i te ohipa paturaa na te ao nei. Hau atu i te 27 000 taeae e tuahine tei riro ei rima tauturu no te paturaa i ta tatou pu rahi i Warwick, New York. Ua faaea ˈtu vetahi e piti hebedoma, te tahi tau avaˈe e te tahi atu hoê matahiti aore ra hau atu. Mea rahi i rotopu ia ratou tei rave i te mau haapaeraa. Ua riro ratou paatoa ei hiˈoraa nehenehe mau, ua faaohipa hoi i to ratou tiamâraa no te faahanahana e no te faateitei ia Iehova, te Atua o te tiamâraa!

17. Ia faaohipa tatou i te tiamâraa ma te paari i teie mahana, eaha te haamaitairaa e tiai mai ra?

¹⁷ Auê tatou i te mauruuru i te ite o vai o Iehova e te fanaˈo i te tiamâraa ia tavini ia ˈna. E faaite anaˈe na roto i ta tatou mau faaotiraa mea faufaa tera tiamâraa no tatou. E faaohipa anaˈe i te reira no te tavini atu â ia Iehova, eiaha râ no te rave i te mea ino. I reira tatou e fanaˈo ai i te mau haamaitairaa ta Iehova i fafau mai. E ite roa tatou i te tupuraa o teie parau tohu: “E faaorahia te mau mea i poietehia i te faatîtîraa o te hara e te pohe ia roaa ia ratou te tiamâraa hanahana o te mau tamarii a te Atua.”—Roma 8:21.