E taahia ia au i te tupuraa e te faahiti ra Paulo i te poroi a te Atua no nia i ta ˈna opuaraa, mai tei papaihia i roto i te Bibilia.

E pinepine te Hebera 4:12 i te faaohipahia i roto i ta matou mau papai no te faaite e e nehenehe te Bibilia e faataui i te oraraa o te taata, e mea tano atoa. Mea maitai râ ia taa no te aha Paulo i faahiti ai te reira a papai ai i teie irava. Te faaitoito ra oia i te mau Kerisetiano Hebera ia paturu i ta te Atua mau opuaraa. E rave rahi opuaraa tei itehia i roto i te mau parau moˈa. Ua rave Paulo te hiˈoraa o te mau Iseraela ta te Atua i faaora mai Aiphiti mai. E tiaturiraa to ratou e ora i te “fenua e pihaa noa mai te û e te meli” ta Iehova i tǎpǔ, i reira ratou e ite ai i te faafaaearaa mau.—Exo. 3:8; Deut. 12:9, 10.

Tera te opuaraa a te Atua. Ua patoi râ te mau Iseraela i ta Iehova aratairaa, aita atoa i faatupu i te faaroo. No reira aita te rahiraa o ratou i ô atu i tera vahi faafaaearaa. (Num. 14:30; Ios. 14:6-10) Ua faataa râ Paulo e te vai faahou ra te tahi “parau fafau e ô i roto i to [te Atua] vahi faafaaearaa.” (Heb. 3:16-19; 4:1, New World Translation) Tera “parau fafau,” e tuhaa ïa o te opuaraa a te Atua. Mai te mau Kerisetiano Hebera, e nehenehe tatou e taio no nia i tera opuaraa a paturu atu ai i te reira. No te haapapu e ua niuhia teie parau fafau i nia te mau Papai, ua faahiti Paulo te Genese 2:2 e te Salamo 95:11.

E putapû te aau ia ite e “te toe ra te parau fafau e ô i roto i to [te Atua] vahi faafaaearaa.” Te tiaturi nei matou e e tupu mau ta te Bibilia e haapii ra no nia i te ôraa ˈtu i roto i to te Atua vahi faafaaearaa, ua haa atoa no te ô atu i reira. Eita matou e na reira ma te pee i te ture a Mose aore ra ma te rave i te mea maitai no te fanaˈo i ta Iehova farii maitai. No to matou râ faaroo i te Atua e tamau ai matou i te paturu i ta ˈna opuaraa ma te oaoa. E tausani atoa taata na te ao nei tei haamata i te haapii i te Bibilia e i te haapii no nia i ta ˈna opuaraa. Ua turai te reira i e rave rahi ia rave i te mau tauiraa i roto i to ratou oraraa, faatupu i te faaroo e faaoti e bapetizo ia ratou. E haapapuraa te tauiraa itehia i nia ia ratou e “mea ora . . . te parau a te Atua, e te puai rahi.” Ua taui to matou oraraa maoti te mau parau ta te Atua i faaite i roto i te Bibilia, e e tamau â te reira i te haa ma te puai rahi i roto i to matou oraraa.