1, 2. (a) Maoti te aha e upootia ˈi te feia apî i nia ia Satani e te mau demoni? (A hiˈo i te hohoˈa matamua.) (b) Eaha ta tatou e hiˈopoa mai?

 UA FAAAU te aposetolo Paulo i te Kerisetiano i te faehau. Tei roto tatou i te hoê tamaˈi e mea mau to tatou mau enemi! E ere te taata ta tatou e aro ra, o Satani râ e te mau demoni. Ehia tausani matahiti to ratou aroraa, mea mataro maitai ïa ratou i te tamaˈi! Ia hiˈohia, e au ra eita tatou e upootia, mai te peu iho â râ e taurearea tatou. E nehenehe anei te feia apî e upootia i nia i tera mau enemi puai? E, mea rahi te upootia nei maoti te puai no ǒ mai ia Iehova! E mai te mau faehau faaineine-maitai-hia, ua ahu mai ratou i “te haana tamaˈi taatoa no ǒ mai i te Atua” ia ineine ratou no te aroraa.—A taio i te Ephesia 6:10-12.

² Ia Paulo i horoa ˈi i tera faahohoˈaraa, ua manaˈo paha oia i te haana tamaˈi o te faehau Roma. (Ohi. 28:16) I roto i teie haapiiraa, e hiˈopoa tatou i tera faahohoˈaraa maitai roa. E hiˈo atoa mai tatou eaha te mau fifi e te mau maitai ta te feia  apî i ite i to ratou ahuraa i te tuhaa tataitahi o te haana tamaˈi pae varua.

3, 4. No te aha te parau mau no roto mai i te Bibilia e au ai i te hatua o te faehau Roma?

³ A taio i te Ephesia 6:14. E hatua auri to te faehau Roma, e paruru te reira i to ˈna opu e e mau maitai ïa to ˈna tapoˈi ouma teiaha. I nia iho i te tahi mau hatua, te vai atoa ra te mau tapea paari maitai no te tuu atu i te ˈoˈe e te hoê tipi nainai. Mea vî maitai anaˈe to ˈna hatua, eita te faehau e taiâ i roto i te aroraa.

⁴ Mai te hatua, e paruruhia tatou i te mau haapiiraa hape maoti ta tatou i haapii i roto i te Parau a te Atua. (Ioa. 8:31, 32; Ioa. 1, 4:1) Rahi atu â tatou i te hinaaro i te pue parau mau Bibilia, ohie atu â tatou i te ora ia au i te mau ture aveia a te Atua. I tera taime, te oomo ra ïa tatou i to tatou “tapoˈi ouma.” (Sal. 111:7, 8; Ioa. 1, 5:3) Ua taa maitai anaˈe ia tatou i te pue parau mau Bibilia, e aravihi atu â tatou i te paturu i te reira i mua i te enemi.—Pet. 1, 3:15.

5. No te aha e tia ia tatou ia faaite noa i te parau mau?

⁵ No tatou, mea faufaa te mau haapiiraa no roto mai i te Bibilia. No reira tatou e haapao ai i ta te Bibilia e parau ra e e faaite noa ˈi i te parau mau. O te haavare hoê o te mau mauhaa tamaˈi a Satani e te manuïa rahi ra oia na roto i te reira. E haamauiui te parau haavare i te taata o tei faahiti i te reira, oia atoa râ i tei tiaturi atu. (Ioa. 8:44) No reira, noa ˈtu e taata tia ore tatou, e tutava anaˈe i te haapae roa i te haavare. (Eph. 4:25) E ere râ i te mea ohie! A hiˈo na i ta Abigail, 18 matahiti, e parau ra: “I te tahi taime, e au ra e eita e hoona ia faaite i te parau mau, mai te peu iho â râ e ape tatou i te hoê fifi a haavare ai.” No te aha ïa o ˈna i tutava noa ˈi i te faaite i te parau mau? Te na ô ra o ˈna: “Ma te faaite i te parau mau, e manaˈo haava maitai to ˈu i te aro o Iehova. E ua ite to ˈu mau metua e hoa, e nehenehe ratou e tiaturi ia ˈu.” Te na ô ra Victoria, 23 matahiti: “Ia faaite oe i te parau mau e ia paturu oe i ta oe e tiaturi ra, e faainohia paha oe. Mea papu râ e haamaitairaa to muri mai. E faaea oe i te taiâ, e piri atu â oe ia Iehova e e faatura mai te feia e here ra ia oe.” Te ite ra anei oe i te faufaaraa ia oomo noa i “te hatua o te parau mau”?

6, 7. No te aha te parau-tia e faahohoˈahia ˈi i te hoê tapoˈi ouma?

⁶ No te hamani i te tapoˈi ouma o te faehau Roma, e pinepine te mau auri i te faataravahia ia ati te taatoaraa o te ouma. E ahu iri puaa to roto mai o te tamauhia i nia i te auri tataitahi o te tapoˈi ouma maoti te mau tapea e tarou auri. E tapoˈihia to ˈna na tapono i te mau auri o te tamau-atoa-hia i nia i te ahu iri puaa. Eita te faehau e nehenehe e hautiuti maitai ia oomo oia i to ˈna tapoˈi ouma. Mea titau-atoa-hia ia hiˈopoa tamau oia te afaro noa  ra anei te mau auri o to ˈna tapoˈi ouma. Na te reira râ e paruru i to ˈna mafatu e te tahi atu mau mero i te ˈoˈe aore ra te teˈa.

⁷ Ua riro te mau ture aveia a Iehova no nia i te mea maitai ei tapoˈi ouma o te paruru i to tatou “aau,” to tatou ïa huru o roto. (Mas. 4:23) Eita roa te hoê faehau e mono i to ˈna tapoˈi ouma auri i te hoê e ere i te mea paari. Eita atoa ïa tatou e tuu i te hiti i te mau ture aveia a Iehova a rave atu ai i ta tatou iho e manaˈo ra mea maitai. Aore ia tatou ra te paari no te paruru i to tatou iho aau! (Mas. 3:5, 6) Mea titauhia ïa ia hiˈopoa tamau i to tatou “tapoˈi ouma” no te ite te paruru noa ra anei te reira i to tatou aau.

8. No te aha e tia ia haapao i te mau ture aveia a Iehova?

⁸ Ua manaˈo ê na anei oe eita ta oe e nehenehe e rave mai ta oe e hinaaro no te mau ture aveia a Iehova? Te na ô ra Daniel, 21 matahiti: “Ua faaooo mai te mau orometua e hoa haapiiraa no te mea te haapao ra vau i te mau ture aveia a te Atua. Ua haamata vau i te taiâ e te hepohepo.” Mai te aha to ˈna huru i teie nei? Te pahono ra oia: “I muri mai râ, ua ite au i te mau maitai ia ora ia au i ta Iehova mau ture aveia. Ua haamata hoi te tahi mau hoa haapiiraa i te rave i te raau taero e te tahi atu, ua faarue i te haapiiraa. Mea peapea roa ia ite te fifi ra to ratou oraraa i teie nei. Te paruru mau ra o Iehova ia tatou!” Te na ô atoa ra Madison, 15 matahiti: “E ere i te mea ohie ia haapao noa i te mau ture aveia a Iehova e ia haapae i te rave i te mau mea e auhia e te rahiraa o te mau tamarii.” Eaha ïa ta ˈna e rave? Te faataa ra Madison: “E haamanaˈo vau te amo ra vau i te iˈoa o Iehova e e faahemaraa noa tera na Satani no te tairi ia ˈu. E mauruuru roa vau ua noaa anaˈe ia ˈu i te mau papu.”

9-11. (a) Eaha te tiaa pae varua ta te mau Kerisetiano e oomo? (b) Eaha te tauturu mai ia ore e taiâ i te poro?

⁹ A taio i te Ephesia 6:15. Eita te faehau Roma e nehenehe e haere i te tamaˈi aita anaˈe to ˈna e tiaa. Mea hamanihia te tiaa e te iri puaa e e toru tuhaa to te reira, mea paari maitai ïa. Mea au maitai atoa no te hahaere e eita te faehau e hee.

¹⁰ E tauturu te tiaa o te mau faehau Roma ia upootia i te tamaˈi. Area te tiaa ta tatou e oomo, e tauturu mai ïa ia “poro i te parau apî oaoa o te hau.” (Isa. 52:7; Roma 10:15) E titauhia râ te itoito rahi no te poro. Te na ô ra Bo, 20 matahiti: “Mea riaria roa na ˈu ia poro i to ˈu mau hoa haapiiraa. I to ˈu manaˈo, ua taiâ vau. A feruri ai râ i teie nei, aita e tumu papu ia taiâ. I teie mahana, te oaoa nei au i te poro i te tahi atu mau taurearea.”

¹¹ Mea rahi te feia apî Kerisetiano o tei ite mea ohie aˈe ia poro ia faaineine atea ratou. Eaha ïa te rave? Te na ô ra Julia, 16 matahiti: “E tuu vau i ta tatou mau papai i roto i ta ˈu pute no te haapiiraa. E  faaroo vau i to ˈu mau hoa haapiiraa no te ite eaha to ratou manaˈo e ta ratou e tiaturi ra. I muri iho, e taa ia ˈu eaha te tauturu atu. Ua ineine anaˈe au, e nehenehe ta ˈu e parau atu eaha te tauturu mau ia ratou.” Area Makenzie, 23 matahiti, te na ô ra ïa: “Ia hamani maitai oe ia vetahi ê e ia faaroo maite oe ia ratou, e taa ia oe to ratou tupuraa. E taio vau i te mau mea atoa e piahia no te feia apî. I muri aˈe, e nehenehe ïa vau e faaite eaha te tauturu ia ratou ma te faaohipa i te Bibilia aore ra te reni jw.org.” Ma te faaineine maitai no te poro, te oomo ra ïa tatou i “te tiaa” o te tano maitai i to tatou avae!

12, 13. Eaha te tahi o “te mau teˈa auahi” a Satani?

¹² A taio i te Ephesia 6:16. E paruru rahi ta te faehau Roma. E tapoˈi te reira i to ˈna tapono e haere roa i te turi e e paruru atoa ia ˈna ia faaohipa te enemi i te ˈoˈe, te patia e te teˈa.

¹³ Eaha “te mau teˈa auahi” a Satani? Peneiaˈe, e tairi o ˈna ia oe na roto i te  mau parau haavare no nia ia Iehova. Te hinaaro ra Satani ia manaˈo oe aita o Iehova e here e e tâuˈa mai ra ia oe. Te na ô ra Ida, 19 matahiti: “Pinepine au i te manaˈo e ere o Iehova i te mea piri ia ˈu e eita o ˈna e hinaaro e riro ei hoa no ˈu.” Eaha ta ˈna e rave? Te pahono ra Ida: “Ua riro te mau putuputuraa ei raau faahiahia no te haapuai i to ˈu faaroo. I matau na vau i te parahi noa e te ore e horoa i te pahonoraa no te mea eita paha te taata e hinaaro e faaroo i ta ˈu e parau. I teie nei râ, e faaineine au ia ˈu no te mau putuputuraa. E tutava atoa vau i te horoa e piti aore ra e toru pahonoraa. E ere i te mea ohie, e oaoa roa râ vau i muri aˈe. Mea maitai roa te mau taeae e tuahine, e faaitoito mai hoi ratou. I muri aˈe i te mau putuputuraa atoa, ua papu ia ˈu mea here na Iehova ia ˈu.”

14. Eaha ta te tupuraa o Ida e faaite mai ra?

¹⁴ Eita te faito o te paruru a te faehau e taui. Area to tatou faaroo, mea taa ê roa ïa mai ta te tupuraa o Ida e faaite mai ra. E nehenehe hoi te faaroo e rahi e aore ra e iti mai, e nehenehe e puai e aore ra e paruparu mai. Tei ia tatou noa ˈtura ïa! (Mat. 14:31; Tes. 2, 1:3) Ia faufaahia tatou i “te paruru rahi o te faaroo,” mea titauhia i te taata tataitahi ia faarahi e ia haapuai noa ˈtu â i to ˈna iho faaroo!

15, 16. No te aha to tatou tiaturiraa e au ai i te hoê taupoo?

¹⁵ A taio i te Ephesia 6:17. E tuu te faehau Roma i te hoê taupoo no te paruru i to ˈna upoo, aˈî e hohoˈa. I te tahi taime, e tapearaa to nia iho i te taupoo ia nehenehe te faehau e tapea i te reira i roto i te rima.

¹⁶ Mai te taupoo o te paruru i te roro o te faehau, e paruru atoa to tatou “tiaturiraa i te faaoraraa” i to tatou feruriraa. (Tes. 1, 5:8; Mas. 3:21) E tauturu mai te tiaturiraa ia tiatonu i nia i te mau parau fafau a te Atua e ia ore e paruparu no te mau fifi. (Sal. 27:1, 14; Ohi. 24:15) Ia paruru mau râ te reira ia tatou, e tia ia riro to tatou tiaturiraa ei mea mau no tatou. E tuu anaˈe i te “taupoo” i nia i to tatou upoo, eiaha râ e tapea i roto i to tatou rima!

17, 18. (a) Eaha ta Satani raveraa no te turai mai ia tatara i to tatou taupoo? (b) E nafea ia faaite aita i noaa ia Satani i te haavare ia tatou?

¹⁷ Eaha ta Satani raveraa no te turai mai ia tatara i to tatou taupoo? A feruri na i ta ˈna i tamata i te rave i nia ia Iesu. Ua ite Satani e faatere Iesu i te huitaata i te hoê mahana. E titauhia râ na mua ia mauiui, ia pohe e ia tiai Iesu i te taime ta Iehova i faataa no te faaarii ia ˈna. Eaha ta Satani i rave? Ua pûpû atu ïa i te ravea no te riro oioi ei faatere! Ua parau atu ïa, ia haamori Iesu ia ˈna hoê noa taime, i reira iho â oia e riro ai ei faatere no te ao. (Luka 4:5-7) Ua ite atoa Satani ua fafau o Iehova i te faatupu i te mau mea faahiahia i roto i te ao apî. Hou râ te reira a tupu ai, e farerei paha tatou i te fifi. Eaha ïa ta Satani e rave nei? Te pûpû mai ra oia i te ravea ia noaa ia tatou te oraraa fanaˈo i teie nei â! Te hinaaro ra oia ia tuuhia to tatou maitai na mua ˈˈe i te Faatereraa arii a te Atua.—Mat. 6:31-33.

¹⁸ Aita râ i noaa ia Satani i te haavare e rave rahi feia apî Kerisetiano! A hiˈo na ia Kiana, 20 matahiti, o te na ô ra: “Ua ite au o te Faatereraa arii anaˈe te ravea hoê roa no te faaafaro i to tatou mau fifi atoa.” Ua ohipa to ˈna tiaturiraa i nia i to  ˈna feruriraa e oraraa. Maoti hoi te reira, e haamanaˈo noa Kiana no te hoê taime poto noa te mau mea i roto i teie nei ao. Aita ïa o ˈna e titau ra i te hoê toroa faahiahia i roto i te faanahoraa o teie nei ao. Te faaohipa nei râ Kiana i to ˈna taime e puai no te tavini ia Iehova!

19, 20. E nafea ia aravihi atu â i te faaohipa i te Parau a te Atua?

¹⁹ E 50 tenetimetera te roa o te ˈoˈe a te mau faehau Roma. Mea aravihi roa ratou i te faaohipa i te reira no te mea e haamataro ratou ia ratou i te mau mahana atoa.

²⁰ Ua faaau te aposetolo Paulo i te Parau a te Atua i te hoê ˈoˈe. No ǒ mai ia Iehova te reira. Mea titauhia râ ia haapii i te faaohipa i te Parau a te Atua ma te aravihi no te paturu i ta tatou e tiaturi ra e no te faatitiaifaro i to tatou manaˈo. (Kor. 2, 10:4, 5; Tim. 2, 2:15) E nafea ia aravihi atu â i roto i tera tuhaa? Te na ô ra Sebastien, 21 matahiti: “I roto i ta ˈu taioraa Bibilia, e tapao vau hoê irava no roto mai i te pene tataitahi. E tapura ta ˈu no te mau irava ta ˈu e au roa ˈˈe.” Na te reira e tauturu ia Sebastien ia taa maitai atu â i to Iehova manaˈo. Area Daniel, te parau ra ïa: “A rave ai i ta ˈu taioraa Bibilia, e maiti au i te mau irava o ta ˈu e manaˈo ra e tauturu i te feia i roto i te pororaa. Ia ˈu i hiˈo, e farii maitai mai te taata ia ite ratou mea au na oe te Bibilia e te rave ra oe i te maraa no te tauturu atu.”

21. No te aha eiaha tatou ia riaria ia Satani e te mau demoni?

²¹ Mai ta te mau hiˈoraa o te feia apî i faaite mai, eiaha tatou ia riaria ia Satani e te mau demoni. Mea puai iho â to tatou mau enemi, o Iehova râ te mea puai roa ˈˈe ia ratou. Hau atu â, eita to tatou mau enemi e ora e a muri noa ˈtu. E hurihia hoi ratou i roto i te tapearaa, eita e roaa faahou ia ratou ia haamauiui ia vetahi ê i te roaraa o te Faatereraa tausani matahiti a te Mesia. E i te hopearaa, e haamou-roa-hia ratou. (Apo. 20:1-3, 7-10) Ua ite tatou i te parau mau no nia i to tatou enemi, ta ˈna mau raveraa e opuaraa. Maoti te tauturu a Iehova, e nehenehe tatou e mau papu i mua i te enemi!