1-3. (a) Ia au i te Salamo 5:4-6, eaha to Iehova manaˈo i te ino? (b) No te aha te rave-ino-raa i te tamarii e patoi ai i te “ture a te Mesia”?

 MEA au ore roa na Iehova i te mau ohipa ino atoa, mea faufau atu â ïa na ˈna ia rave-ino-hia te tamarii! (A taio i te Salamo 5:4-6 i roto i te nota. *) Mai ia Iehova, mea au ore atoa na tatou i tera peu e eita te reira e fariihia i roto i te amuiraa Kerisetiano.—Roma 12:9; Heb. 12:15, 16.

² Mai ta tatou i haapii i roto i to na mua ˈtu haapiiraa, o te here te niu o te ture a te Mesia, oia hoi te mau mea atoa ta Iesu i haapii na roto i te parau e te ohipa. E faatupu atoa te ture a te Mesia i te parau-tia. Ia haapao te mau Kerisetiano i tera ture, e oaoa te tamarii. Area te rave-ino-raa i te tamarii, e haamauiui ïa. Te patoi ra tera ohipa ino e te miimii i te “ture a te Mesia”!—Gal. 6:2.

³ Te peapea nei te mau Kerisetiano mau i te ite ua rahi roa te tamarii o te rave-ino-hia nei na te ao. E tamata atoa vetahi “feia ino e te feia haavare” i te riro ei mero o te amuiraa. (Tim. 2, 3:13) Ua faatupu atoa vetahi faahua Kerisetiano i te hinaaro tia ore o to ratou tino e  ua rave ino atoa i te tamarii. E hiˈopoa anaˈe no te aha e hara rahi mau ia rave ino i te tamarii. I muri iho, e ite mai tatou e nafea te mau matahiapo ia rave te tahi i te hara rahi mau mai te rave-ino-raa i te tamarii e e nafea te mau metua ia paruru i ta ratou tamarii. *

4-5. No te aha e hara i te taata iho te rave-ino-raa i te tamarii?

⁴ E faatupu te rave-ino-raa i te tamarii i te mauiui rahi. E ere noa te feia i rave-ino-hia te mauiui, te feia atoa râ e here ra ia ratou mai to ratou utuafare e te mau taeae e tuahine Kerisetiano. E hara rahi mau te rave-ino-raa i te tamarii.

⁵ E hara i te taata iho. * E titauhia ia paruru i te mau tamarii i te feia rave ino. Mai ta tatou e ite i roto i to mua ˈtu tumu parau haapiiraa, e tuino roa te taata rave ino i te tamarii iho. E faaea te tamarii i te tiaturi ia ˈna iho e e vai noa o ˈna i roto i te mǎtaˈu. Ma te tia ore, e faatupu te rave-ino-raa i te tamarii i te oto e te mauiui. Mea faufaa atoa ïa ia tamahanahana e ia tauturu i tei rave-ino-hia.—Tes. 1, 5:14.

6-7. No te aha e hara i te amuiraa e i te feia mana te rave-ino-raa i te tamarii?

⁶ E hara i te amuiraa. E ino te roo o te amuiraa ua rave ino anaˈe te hoê Kerisetiano i te tamarii. (Mat. 5:16; Pet. 1, 2:12) E ere i te mea tano, te tamau ra hoi e mirioni Kerisetiano i te “aro uˈana no te faaroo”! (Iuda 3) Eita roa tatou e farii i rotopu ia tatou te feia tatarahapa ore o te tuino i te roo o te amuiraa.

⁷ E hara i te feia mana. E auraro te mau Kerisetiano i “te feia mana” ma te faatura i te mau ture a te faatereraa o to ratou fenua. (Roma 13:1) Ia ofati te tahi Kerisetiano i te hoê ture ma te rave ino i te tamarii, ua hara oia i te feia mana. (A hiˈo atoa i te Ohipa 25:8.) Aita e tiaraa mana to te mau matahiapo no te faautua, eita râ ratou e huna ia rave ino te hoê i te tamarii. (Roma 13:4) E ooti iho â taua taata rave ino ra i ta ˈna i ueue.—Gal. 6:7.

8. Eaha to Iehova manaˈo ia rave te hoê i te hara i nia i te tahi atu taata?

⁸ Te mea ino roa ˈtu â, e hara i te Atua. (Sal. 51:4) Ia rave te hoê i te hara i nia i te tahi atu taata, ua hara atoa oia i te Atua ra o Iehova. I raro aˈe i te ture ta te Atua i horoa i to Iseraela, ia eiâ aore ra ia taviri te hoê i to ˈna taata tupu, “ua hara oia ia Iehova.” (Lev. 6:2-4) Hoê â atoa ïa no te hoê Kerisetiano o te rave ino i te tamarii, ua eiâ oia, aore ra ua faaere, i te tamarii i to ˈna tiaturi ia ˈna iho. I tera taime, ua hara tera Kerisetiano ia Iehova. Mea tano ia faautuahia te taata e tuino i te roo o Iehova.

9. I te roaraa o te mau matahiti, eaha ta te faanahonahoraa a Iehova i horoa e eaha te tumu?

⁹ I te roaraa o te mau matahiti, ua  horoa ta Iehova faanahonahoraa e rave rahi manaˈo Bibilia no nia i te rave-ino-raa i te tamarii. Ua faaite te mau tumu parau o Te Pare Tiairaa e A ara mai na! eaha te tauturu i te feia i rave-ino-hia, e nafea ia faaitoito ia ratou e eaha te titauhia i te mau metua ia rave no te paruru i ta ratou tamarii. Ua faaineine-maitai-hia te mau matahiapo ia tupu noa ˈtu te ohipa rave-ino-raa tamarii. Te hiˈopoa tamau ra te faanahonahoraa mai te peu te haapao maite ra te mau amuiraa i te mau faaueraa i roto i tera tupuraa. Eaha te tumu? Ia haapao noa te mau matahiapo i te ture a te Mesia.

10-12. (a) Eaha ta te mau matahiapo e haamanaˈo ia rave te hoê i te hara rahi e eaha ta ratou haapeapearaa? (b) Ia au i te Iakobo 5:14, 15, eaha ta te mau matahiapo e rave?

¹⁰ Ia rave te hoê i te hara rahi, e haamanaˈo te mau matahiapo i te ture a te Mesia no te aupuru ma te here i te nǎnǎ e no te rave i te mea tia i te aro o te Atua. E rave rahi ïa tuhaa ta ratou e feruri. O te moˈaraa o te iˈoa o te Atua te haapeapearaa matamua a te mau matahiapo. (Lev. 22:31, 32; Mat. 6:9) E haapao maitai atoa ratou i te maitai o te mau taeae e tuahine o te amuiraa e e tauturu atoa i tei mauiui no te hara i ravehia.

¹¹ Mai te peu e Kerisetiano tei hara, e tamata te mau matahiapo i te tauturu ia ˈna. (A taio i te Iakobo 5:14, 15.) E maˈi pae varua to te Kerisetiano i faatupu i te hinaaro tia ore e tei hara. E ere to ˈna auhoaraa e o Iehova i te mea maitai faahou. * E au te mau matahiapo i te taote pae varua. E tauturu ratou ia “maitai mai te taata maˈi,” oia hoi te taata i hara. Ia tatarahapa mau e ia farii taua Kerisetiano ra i te mau aˈoraa Bibilia a te mau matahiapo, e nehenehe oia e riro faahou ei hoa no te Atua.—Ohi. 3:19; Kor. 2, 2:5-10.

¹² E hopoia rahi mau â ta te mau matahiapo. E aupuru maite ratou i te nǎnǎ a te Atua e e paruru atoa i te mau taeae e tuahine o te amuiraa. (Pet. 1, 5:1-3) No reira ratou e haa oioi ai ia parihia te hoê Kerisetiano i te hara rahi mau mai te rave-ino-raa i te tamarii. A rave na i te taime no te feruri i te mau uiraa e faahitihia i te omuaraa o te  paratarafa 13,  15, e  17.

13-14. E titauhia anei ia faaara te mau matahiapo i te feia mana ia pari te tahi ua rave-ino-hia te hoê tamarii? A faataa.

 ¹³ E titauhia anei ia faaara te mau matahiapo i te feia mana ia pari te tahi ua rave-ino-hia te hoê tamarii? E. I te mau fenua te vai ra tera ture, e titauhia i te mau matahiapo ia faaara oioi i te feia mana. (Roma 13:1) Aita tera ture e ofati ra i ta te Atua. (Ohi. 5:28, 29) Ia faarooroo ratou i te reira, e imi oioi te mau matahiapo i te aratairaa no te ite e nafea ratou ia haapao i te ture a te feia mana i roto i tera tupuraa.

¹⁴ E faataa te mau matahiapo i te tamarii i rave-ino-hia, i to ˈna mau metua e i te feia i ite i te tupuraa, e nehenehe ratou e faaara i te feia mana. E mai te peu e Kerisetiano tei rave i tera peu e  ua ite te taata i te reira, e titauhia anei ia faaara i te feia mana noa ˈtu e tuino te reira i te roo o Iehova? E manaˈo paha te Kerisetiano i faaara i te feia mana no ˈna te hape i ino ai te roo o Iehova. Eiaha roa râ, na te Kerisetiano hoi i rave i te hara i faaino i te iˈoa o Iehova!

15-16. (a) Ia au i te Timoteo 1, 5:19, no te aha e titauhia e piti aˈe ite no te haamau i te hoê tomite haavaraa? (b) Eaha ta te mau matahiapo e rave ia parihia ua rave ino te hoê Kerisetiano i te tamarii?

 ¹⁵ I roto i te amuiraa, no te aha e titauhia e piti aˈe ite no te haamau i te hoê tomite haavaraa? No te mea e titauraa Bibilia te reira no te faatupu i te parau-tia. Ia ore tei parihia e faaî i ta ˈna hara, e titauhia e piti ite no te haapapu i te pariraa a haamauhia ˈtu ai te hoê tomite haavaraa. (Deut. 19:15; Mat. 18:16; a taio i te Timoteo 1, 5:19.) E titau-atoa-hia anei e piti ite no te faaara i te feia mana ua rave-ino-hia te hoê tamarii? Eita. E matahiapo anei aore ra aita, eita e titauhia e piti ite no te faaara ua ofatihia te ture.

¹⁶ Ia parihia ua rave ino te hoê mero o te amuiraa i te tamarii, e faaara na mua te mau matahiapo i te feia mana. I muri iho, e haapao ratou i te mau aratairaa Bibilia no te titorotoro no nia i tei tupu. Ia ore te taata i parihia e faaî i ta ˈna hara, e ani te mau matahiapo i te haapapuraa a na ite e piti. Te ite matamua, o te taata ïa i pari e te piti, e taata ê atu ïa o te nehenehe e haapapu ua rave ino iho â taua Kerisetiano ra i tera aore ra i te tahi atu tamarii. Ua noaa mai anaˈe i te mau matahiapo te mau haapapuraa, e faaoti ratou i te haamau i te hoê tomite haavaraa. * Aita anaˈe e piti ite, e ere te auraa mea hape te pariraa. Peneiaˈe, e hara rahi mau iho â tei ravehia. E rave ïa te mau matahiapo i te faanahoraa no te tauturu i te feia e mauiui ra. Hau atu â, e vai ara noa te mau matahiapo i te taata i parihia no te paruru i te amuiraa.—Ohi. 20:28.

17-18. A faataa na eaha te tuhaa a te hoê tomite haavaraa.

 ¹⁷ Eaha te tuhaa a te hoê tomite haavaraa? Ia faahitihia te parau haavaraa, e ere te auraa e haava te mau matahiapo no te faaoti e titauhia anei ia faautua te ture i te Kerisetiano i hara. E vaiiho ratou i tera tiaraa i te feia mana. (Roma 13:2-4; Tito 3:1) E haava râ te mau matahiapo no te faaoti e farii-noa-hia anei taua Kerisetiano ra i roto i te amuiraa.

¹⁸ E haapao noa te mau matahiapo o te hoê tomite haavaraa i te tuhaa pae varua. E faaohipa ratou i te Bibilia no te ite ua tatarahapa anei te taata hara. Ia ore, e tiavaruhia oia e e faaarahia te amuiraa. (Kor. 1, 5:11-13) Ua tatarahapa anaˈe te Kerisetiano i hara, eita o ˈna e tiavaruhia. Tera râ, e faaara ˈtu te mau matahiapo eita roa paha o ˈna e fanaˈo i te tahi hopoia i roto i te amuiraa. E farerei atoa te mau matahiapo i te mau metua no te faaara ia haapao maitai eiaha ta ratou tamarii ia tapiri atu i tera Kerisetiano. E ara atoa te mau matahiapo eiaha e faaite i te iˈoa o te feia ta ˈna i rave ino aˈenei.

19-22. E nafea te mau metua ia paruru i ta ratou tamarii? (A hiˈo i te hohoˈa i te api matamua.)

¹⁹ E te mau metua, “e tufaa” no ǒ mai ia Iehova ra ta outou tamarii. (Sal. 127:3) Na outou ïa te hopoia ia paruru i tei tuuhia mai i roto i to outou rima. * E nafea outou ia paruru ia ratou i te feia rave ino?

²⁰ A tahi, a haamaramarama ia outou no nia i te rave-ino-raa i te tamarii. A hiˈo teihea huru taata te rave i tera peu e eaha ta ratou mau ravea haavarevare. A ara maitai i te mau taata aore ra tupuraa atâta. (Mas. 22:3; 24:3) A haamanaˈo e i te rahiraa o te taime, te taata rave ino, e taata matau e te tiaturihia e te tamarii.

²¹ A piti, ia tupu noa te aparauraa i rotopu ia outou e ta outou tamarii. (Deut. 6:6, 7) Ia ineine atoa ïa outou i te faaroo maite atu. (Iak. 1:19) E taiâ te tamarii i te faaite ua rave-ino-hia ratou ma te manaˈo eita paha te taata e tiaturi i ta ratou parau. Aore ra ua faahepo te taata rave ino eiaha ia faaite i tei tupu. Ua haroˈaroˈa anaˈe outou e ohipa tei tupu, a faaohipa maite i te mau uiraa ia haamahora mǎrû noa te tamarii i to ˈna aau e a faaroo ma te faaoromai i ta ˈna e parau.

²² A toru, a haapii i ta outou tamarii. Ia au i to ˈna faito matahiti, a faataa i te tamarii i te titauhia ia ˈna ia ite no nia i te mau mero taatiraa. A haapii ia ˈna eaha te parau e eaha te rave ia tamata te hoê taata i te rave i te tahi mea tano ore i nia ia ˈna. A faaohipa i tei piahia e te faanahonahoraa a te Atua no te paruru i ta outou tamarii.—A hiˈo i te tumu parau “ A haapii ia outou iho e i ta outou tamarii.”

23. Eaha to tatou manaˈo i te peu rave-ino-raa i te tamarii e eaha te uiraa e pahonohia i roto i to mua ˈtu haapiiraa?

²³ No tatou, e hara rahi e te ino mau te rave-ino-raa i te tamarii. Ma te arataihia e te ture a te Mesia, eita te mau Ite no Iehova e farii i te feia e rave ino i te tamarii i roto i ta ratou mau amuiraa. Eaha râ ta tatou e nehenehe e rave no te tauturu i tei rave-ino-hia? E pahonohia tera uiraa i roto i to mua ˈtu haapiiraa.