Te aumihi, o te aravihi ïa ia taa i te huru aau aore ra huru tupuraa o te hoê taata ma te feruri ahiri o tatou tera e faaruru ra hoê â tupuraa. Ua parau te hoê taote i te pae o te feruriraa, o Rick Hanson to ˈna iˈoa: “Ua fanauhia tatou e te aravihi ia faaite i te aumihi ia vetahi ê.”

A FERURI NA: No te aha o tatou anaˈe te nehenehe e faaite i te aumihi e aita i itehia tera huru aau i rotopu i te tahi atu mau poieteraa? Te faataa ra te Bibilia e ua poiete te Atua i te taata ia au i to ˈna iho huru. (Genese 1:26) E nehenehe hoi tatou e pee i to te Atua huru e e rave i te maraa ra ia tatou no te faatupu hoê â mau huru maitatai e to ˈna. No reira, ia faatupu te taata i te aumihi ma te tauturu ia vetahi ê, te pee ra oia i te aumihi o to ˈna Atua poiete î i te aroha, o Iehova.—Maseli 14:31.

Te taa ra te Atua i to tatou huru mau e mea riri na ˈna ia ite e te mauiui ra tatou. Te parau ra te Bibilia no nia i te nunaa Iseraela i tahito, tei faaruru i te faatîtîraa ino a to Aiphiti e te tereraa fifi mau i roto i te medebara 40 matahiti i te maoro: “Ua haapao maira oia i to ratou ati, ia ite oia i to ratou pii.” (Salamo 106:44) A tapao na aita te Atua i ite noa i to ratou fifi. Ua mauiui atoa oia no ratou. Ua parau oia: “Ua ite hoi au i to ratou oto.” (Exodo 3:7) Te na ô ra te Atua: “O te faatiaia ˈtu ia outou ra, ua faatiaia ïa i tana orio mata nei.” (Zekaria 2:8) Ia haamauiui vetahi ia tatou, e mauiui to tatou aau, oia atoa to te Atua.

Te haapapu mai ra te Bibilia e noa ˈtu no tatou mea ino tatou e eita e tano ia fanaˈo tatou i te aumihi o te Atua, “mea rahi aˈe te Atua i to tatou aau e ua ite o ˈna i te mau mea atoa.” (Ioane 1, 3:19, 20) Mea ite maitai aˈe te Atua o vai mau na tatou. Ua taa maitai ia ˈna to tatou mau huru tupuraa atoa, to tatou mau manaˈo e huru aau. Te faatupu ra oia i te aumihi ia tatou.

 Te haapapu mai ra te Bibilia

• “E parau oe i reira, e na Iehova e parau mai; na oe e tiaoro, e na ˈna e parau mai e, Inaha, teie Au!”—ISAIA 58:9.

• “Ua ite hoi au i te opua ta ˈu i opua ia outou nei, te parau maira Iehova. E opuaraa hau ïa, e ere i to te ino; ia horoa ˈtu vau i ta outou i tiaturi ra, i to outou hopea. E riro outou i te tiaoro mai ia ˈu, e haere hoi outou e pure mai ia ˈu, e na ˈu e faaroo atu ia outou.”—IEREMIA 29:11, 12.

• “A tuu na oe i to ˈu nei roimata i roto i ta oe ra farii: aita anei i roto atoa i ta oe ra parau?”—SALAMO 56:8.

A ite ai te faatupu ra te Atua i te aumihi ia tatou, te tauturu ra anei te reira ia tatou ia faaruru i te fifi? A hiˈo na i ta Maria i faaruru:

“Ua pohe ta ˈu tamaiti e 18 matahiti to ˈna i muri aˈe i to ˈna faaoromairaa i te maˈi mariri ai taata e piti matahiti i te maoro. I muri aˈe i tera tupuraa mauiui mau, ua manaˈo vau e mea fifi e mea tano ore te oraraa. Ua riri roa vau ia Iehova no te mea aita oia i ohipa no te faaora ia ˈna!”

“E ono matahiti i muri iho, ua farerei au i te hoê hoa î i te here e te aroha o te amuiraa e ua faaroo maitai oia ia ˈu a faaite atu ai au e no ˈu aita Iehova e here ra ia ˈu. Ua faaroo oia ia ˈu e rave rahi hora ma te ore e paraparau. I muri iho, ua faahiti oia i te hoê irava Bibilia tei haaputapû i to ˈu aau. O te Ioane 1, 3:19, 20 o te parau ra: ‘E rahi te Atua i to tatou aau, e ua ite oia i te mau mea atoa nei.’ Ua faataa mai oia e te taa ra Iehova i te mau ati ta tatou e faaruru ra.”

“Noa ˈtu râ, mea fifi noa â no ˈu ia faaore i to ˈu riri! Taio atura vau i te Salamo 94:19 o te parau ra: ‘I rotopu i to ˈu nei manaˈo tapitapi i roto ia ˈu nei, na to haamahanahana e faaoaoa mai i tau varua.’ E au ra e ua papaihia teie irava no ˈu! I muri iho, ua oaoa vau no te mea ua nehenehe au e paraparau ia Iehova no nia i to ˈu ati e ua papu ia ˈu te faaroo e te taa ra oia ia ˈu.”

Mea tamahanahana mau ia ite e te taa e te tâuˈa ra te Atua ia tatou, e ere anei? No te aha râ e rave rahi tupuraa mauiui mau? No te mea anei te faautua ra te Atua ia tatou no to tatou mau hara? E ohipa anei te Atua no te faaore roa i te mau mauiui atoa? E pahonohia teie mau uiraa i roto i to muri mai mau tumu parau.