1, 2. Eaha te tautooraa ta Iepheta raua ta ˈna tamahine i faaruru?

 TE HORO ra te hoê tamahine e farerei i to ˈna papa. Ua oaoa roa oia i te ite ia ˈna i te hoˈiraa mai mai te tamaˈi mai e aita oia i pêpê noa ˈˈe. No ta ˈna upootiaraa rahi i himene e i ori ai ta ˈna tamahine ma te oaoa. Eaha râ ta to ˈna papa i rave e i parau i muri iho i maere ai o ˈna? Ua hahae Iepheta i to ˈna mau ahu e ua tuô: “Auê oe, e tau tamahine e! ua haehaa roa iho nei au ia oe e!” I muri iho, ua na ô Iepheta ia ˈna e ua euhe oia ia Iehova, te hoê euhe o tei taui i te oraraa o ta ˈna tamahine. Te auraa ïa e eita roa ˈtu oia e nehenehe e faaipoipo e e fanau i te tamarii. Oioi roa râ oia i te horoa i te hoê pahonoraa nehenehe o tei faaitoito i to ˈna papa ia tapea i ta ˈna i euhe ia Iehova. Ua faaite ta ˈna pahonoraa e ua tiaturi maite oia e noa ˈtu eaha ta Iehova e ani, e mea maitai anaˈe. (Tav. 11:34-37) Ua oaoa roa te papa a faaite ai ta ˈna tamahine i te faaroo, ua ite oia e e faaoaoa te faaotiraa ta ˈna e rave ia Iehova.

 ² Ua tiaturi maite Iepheta e ta ˈna tamahine ia Iehova e i ta ˈna huru raveraa i te mau ohipa. Ua faaite raua i te taiva ore noa ˈtu e e ere i te mea ohie no raua. Ua hinaaro raua i ta Iehova farii maitai e ua hoona ïa i te raveraa i te mau haapaeraa atoa.

3. No te aha e faufaahia ˈi tatou i te hiˈoraa o Iepheta raua ta ˈna tamahine i teie mahana?

³ E ere iho â i te mea ohie ia taiva ore ia Iehova. Mea titauhia ia tatou “ia mârô maite atu i te faaroo.” (Iuda 3) No te tauturu ia tatou ia na reira, e haapii anaˈe i ta Iepheta raua ta ˈna tamahine i faaruru i roto i to raua oraraa. Mea nafea raua i te vai taiva-ore-raa ia Iehova?

4, 5. (a) Eaha te faaueraa ta Iehova i horoa i te mau Iseraela a tomo ai ratou i te Fenua tǎpǔhia? (b) Ia au i te Salamo 106, eaha tei tupu no te mau Iseraela no to ratou faaroo-ore-raa?

⁴ I te mau mahana atoa, e haamanaˈo Iepheta raua ta ˈna tamahine i te faahopearaa o te faaroo ore o te mau Iseraela ia Iehova. Fatata 300 matahiti na mua ˈtu, ua faaue Iehova i te mau Iseraela ia haapohe i te feia haamori haavare atoa i te Fenua tǎpǔhia, aita râ ratou i faaroo. (Deut. 7:1-4) E rave rahi Iseraela o tei haamata i te pee i te feia no Kanaana o te haamori ra i te mau atua haavare e e oraraa morare ore to ratou.—A taio i te Salamo 106:34-39.

⁵ No te faaroo-ore-raa te mau Iseraela, aita Iehova i paruru ia ratou i to ratou mau enemi. (Tav. 2:1-3, 11-15; Sal. 106:40-43) Eita e ore e mea fifi roa no te mau utuafare o tei here ia Iehova ia vai taiva ore i tera roaraa matahiti fifi mau. Ua faahiti râ te Bibilia e te vai ra te feia taiva ore, mai ia Iepheta raua ta ˈna tamahine, oia atoa ia Elikana raua Hana e Samuela. Ua faaoti ratou e faaoaoa ia Iehova.—Sam. 1, 1:20-28; 2:26.

6. Eaha te mau hinaaro o teie nei ao e itehia ra i teie mahana, e eaha te tia ia tatou ia rave?

⁶ I to tatou tau, te manaˈo e te haa ra te taata mai te feia no Kanaana. Ua niu ratou i to ratou oraraa i nia i te mau peu taotoraa tia ore, te haavîraa uˈana e te moni. Ua horoa mai râ Iehova i te mau faaararaa papu. Te hinaaro ra oia e paruru ia tatou mai ta ˈna i hinaaro e paruru i te mau Iseraela i tera mau hiˈoraa ino. Eaha ta tatou e haapii mai i to ratou mau hape? (Kor. 1, 10:6-11) E tia ia rave tatou i tei nehenehe ia tatou no te ape i te mau manaˈo o teie nei ao. (Roma 12:2) E tutava anei tatou i te na reira?

7. (a) Eaha ta to Iepheta iho nunaa i rave i nia ia ˈna? (b) Eaha ta Iepheta i rave?

⁷ I te tau o Iepheta, ua haavîhia te mau Iseraela na te mau Philiseti e na te feia no Amona, no te mea ua faaroo ore te mau Iseraela ia Iehova. (Tav. 10:7, 8) Hau atu â i te mau nunaa enemi, ua faaruru atoa Iepheta i te patoiraa o to ˈna iho mau taeae e te mau aratai no Iseraela. No te pohehae o to ˈna iho mau taeae e te au ore ia ˈna, ua faahepo ratou ia ˈna ia faarue i te fenua ta ˈna iho i fatu. (Tav. 11:1-3) Aita Iepheta i vaiiho i to ratou haerea ino ia haafifi ia ˈna. Mea nafea tatou i te iteraa i te reira? A taparu ai te mau tavana o te nunaa i ta ˈna tauturu, ua farii oioi oia i te tauturu atu. (Tav. 11:4-11) Na te aha i turai ia Iepheta ia na reira?

8, 9. (a) Eaha te mau faaueraa tumu i roto i te ture a Mose o tei tauturu paha ia Iepheta? (b) Eaha te mea faufaa roa ˈˈe no Iepheta?

 ⁸ E raatira puai o Iepheta, e mea ite oia i te aamu o Iseraela e te ture a Mose. No te mau huru raveraa a Iehova i nia i to ˈNa nunaa, ua haapii te reira ia ˈna i te mau ture aveia a te Atua no nia i te mea maitai e te mea ino. (Tav. 11:12-27) Ua faaohipa Iepheta i teie ite i roto i to ˈna oraraa a rave ai oia i te tahi mau faaotiraa. Ua ite maitai oia eaha to Iehova manaˈo no nia i te riri e te tahoo e e eaha ta te Atua e titau ra ia rave to ˈNa nunaa no te faaite i te here te tahi i te tahi. Hau atu â, ua haapii te ture a Mose ia ˈna e nafea oia i nia ia vetahi ê, te feia iho â râ e au ore ra ia ˈna.—A taio i te Exodo 23:5; Levitiko 19:17, 18.

⁹ E au ra e ua tauturu te hiˈoraa o Iosepha ia Iepheta. Aita e ore e ua haapii oia i te aroha hamani maitai o ta Iosepha i faaite i to ˈna mau taeae noa ˈtu e mea au ore na ratou ia ˈna. (Gen. 37:4; 45:4, 5) Ma te haamanaˈo i teie hiˈoraa, ua tauturu paha te reira ia Iepheta ia faaite i te hoê haerea o te faaoaoa ia Iehova. Ua haamauiui mau â te ohipa ta te mau taeae o Iepheta i rave i nia ia ˈna. Te aroraa râ no te iˈoa o Iehova e no to ˈna nunaa te mea faufaa aˈe no Iepheta eiaha râ i to ˈna iho mau huru aau. (Tav. 11:9) Ua faaoti oia i te taiva ore ia Iehova. No to ˈna huru feruriraa, ua haamaitai Iehova ia ˈna e i te mau Iseraela.—Heb. 11:32, 33.

10. E nafea te mau faaueraa tumu a te Atua e tauturu mai ai ia haa mai te mau Kerisetiano i teie mahana?

¹⁰ Eaha ta tatou e haapii mai i te hiˈoraa o Iepheta? Eaha ta tatou e rave ia haapeapea mai te mau taeae aore ra ia manaˈo tatou e ere ratou i te mea maitai i nia ia tatou? Eiaha roa ˈtu e vaiiho i te mau manaˈo o te haamamae ia tatou ia haafifi i ta tatou taviniraa ia Iehova. Eiaha roa ˈtu e faaea i te haere i te mau putuputuraa Kerisetiano aore ra i te rave i te taime e te amuiraa. E pee anaˈe i te hiˈoraa o Iepheta e e faaroo anaˈe ia Iehova. E tauturu te reira ia tatou ia faaruru i te mau tupuraa fifi ia nehenehe tatou e riro mai ei hiˈoraa maitai.—Roma 12:20, 21; Kol. 3:13.

11, 12. Eaha ta Iepheta i euhe, e eaha ta te reira i titau?

¹¹ Ua ite Iepheta e mea titauhia ia ˈna i ta te Atua tauturu no te faatiamâ mai ia Iseraela i te ati Amona mai. Ua euhe oia ia Iehova e ia upootia mai oia, e horoa oia mai te hoê “tusia taauahi” na ˈNa te taata matamua o tei haere mai i rapae i to ˈna fare ia hoˈi atu oia mai te tamaˈi mai. (Tav. 11:30, 31) Eaha ïa te auraa?

¹² Mea riri na Iehova ia faatusiahia te taata. Ua ite ïa tatou e aita Iepheta i faatusia i ta ˈna tamahine. (Deut. 18:9, 10) I raro aˈe i te ture a Mose, te tusia taauahi, e ô taa ê te reira o ta te taata e horoa  taatoa na Iehova. Te auraa no Iepheta, te taata ta ˈna e horoa na Iehova e tavini ïa oia i te sekene no te toea o to ˈna oraraa. Ua faaroo Iehova ia Iepheta e ua tauturu oia ia ˈna ia upootia mai. (Tav. 11:32, 33) O vai râ ta Iepheta i horoa na Iehova?

13, 14. Eaha ta te mau parau a Iepheta i roto i Te mau tavana 11:35 e haapapu ra no nia i to ˈna faaroo?

¹³ A feruri na i tei faahitihia i te omuaraa o teie tumu parau. A hoˈi mai ai o Iepheta mai te tamaˈi mai, te taata matamua o tei haere mai ia ˈna ra, o ta ˈna ïa tamahine here, ta ˈna tamahine otahi! E tapea anei Iepheta i ta ˈna i euhe? E horoa anei oia i ta ˈna tamahine na Iehova no te tavini i te sekene no te toea o to ˈna oraraa?

¹⁴ Ua tauturu faahou â te mau faaueraa tumu o te Ture a te Atua ia Iepheta ia rave i te maitiraa maitai. Peneiaˈe ua haamanaˈo oia i te mau parau o te Exodo 23:19, o te faaue ra i te nunaa o te Atua i te horoa ma te aau tae i te mea maitai roa ˈˈe na Iehova. Ua parau atoa te Ture e ia euhe te hoê taata ia Iehova, “eiaha roa oia e tahemo i ta ˈna parau; e rave oia i te mau mea atoa ta to ˈna vaha i parau ra.” (Num. 30:2) Noa ˈtu ua ite oia eaha te auraa o te reira no ta ˈna tamahine e no ˈna iho, ua tapea Iepheta i ta ˈna i euhe, mai te vahine haapao maitai ra o Hana, o tei ora atoa paha i te tau o Iepheta. No te mea e tavini ta ˈna tamahine i te sekene, eita roa ˈtu ïa ta ˈna e nehenehe e fanau mai i te tamarii. Aita roa ˈtu ïa e taata e amo i te iˈoa o Iepheta  e e fanaˈo i to ˈna fenua. (Tav. 11:34) Noa ˈtu râ, ua parau Iepheta ma te taiva ore: “Ua parau hoi tau vaha ia Iehova, e ore hoi e tia ia faaore.” (Tav. 11:35) Ua farii Iehova i te haapaeraa rahi ta Iepheta i rave e ua haamaitai oia ia ˈna. Ahani o oe tera, e taiva ore anei oe mai ia Iepheta?

15. Eaha te euhe ta te rahiraa o tatou i rave, e nafea tatou e nehenehe ai e faaite i te taiva ore?

¹⁵ A pûpû ai tatou i to tatou ora ia Iehova, ua euhe tatou i te rave i to ˈna hinaaro i roto te mau tupuraa atoa. Ua ite tatou e ere i te mea ohie ia tapea i tera euhe. Eaha râ to tatou huru ia anihia mai tatou ia rave i te tahi ohipa o ta tatou e ore e au? Ia upootia tatou i nia i to tatou mau huru aau e ia faaroo tatou ma te aau tae i te Atua, e haapapuraa ïa te reira o to tatou taiva ore i ta tatou i euhe. Peneiaˈe mea mauiui te mau haapaeraa ta tatou e rave, e rahi aˈe râ te mau haamaitairaa a Iehova. (Mal. 3:10) E no te tamahine a Iepheta, eaha to ˈna huru i ta to ˈna metua i euhe?

16. Eaha te huru o te tamahine a Iepheta i te euhe a to ˈna metua tane? (A hiˈo i te hohoˈa matamua.)

¹⁶ Mea taa ê te euhe a Iepheta i ta Hana. Ua euhe Hana e horoa i ta ˈna tamaiti ia Samuela no te tavini i te sekene ei Nazira (Sam. 1, 1:11) E fariihia te hoê Nazira ia faaipoipo e ia fanaˈo i te hoê utuafare. No te tamahine râ a Iepheta, ua horoahia oia ei “tusia taauahi,” eita ïa oia e ite te oaoa ei vahine faaipoipo e ei metua vahine. (Tav. 11:37-40) A feruri na, e nehenehe ta ˈna e faaipoipo i te tane maitai roa ˈˈe o to ˈna fenua, i te mea hoi e o to ˈna papa te raatira i Iseraela. I teie nei râ, e riro mai ïa oia ei tavini haehaa i te sekene. Ua aha ïa teie vahine? Ua faaite oia e o te taviniraa ia Iehova te mea faufaa roa ˈˈe ma te parau i to ˈna papa: “E na reira mai oe ia ˈu mai ta to vaha i parau ra.” (Tav. 11:36) Ua rave oia i te mau haapaeraa o to ˈna iho mau hinaaro e faaipoipo e ia fanau i te tamarii no te tavini ia Iehova. E nafea tatou e pee ai i to ˈna huru feruriraa haapae?

17. (a) E nafea tatou e pee ai i te faaroo o Iepheta raua ta ˈna tamahine? (b) E nafea te mau parau o te Hebera 6:10-12 e faaitoito ai ia oe ia rave i te mau haapaeraa?

 ¹⁷ E tausani tane e e vahine Kerisetiano apî o te rave ra i te mau haapaeraa eiaha e faaipoipo aore ra o te maiti ra eiaha e fanau i te tamarii, no te hoê aˈe taime. No te aha? No te mea te hinaaro ra ratou e tavini hau atu â ia Iehova. E rave rahi atoa feia paari o tei rave i te mau haapaeraa ma te faaiti i te taime no ta ratou tamarii aore ra mootua. Ma te na reira, e nehenehe ratou e horoa rahi atu â taime e puai no Iehova. Te ohipa ra vetahi o ratou i roto i te mau paturaa aore ra te apiti ra i te Haapiiraa no te feia poro i te parau apî oaoa o te Basileia a haere atu ai i roto i te hoê amuiraa e hinaaro-rahi-hia te feia poro. E rave atoa vetahi i te mau faanahoraa no te faarahi atu â i ta ratou taviniraa ia Iehova i te tau o te Oroa haamanaˈoraa. Eita roa oia e haamoe i te mau haapaeraa î i te here ta teie feia taiva ore atoa i rave. (A taio i te Hebera 6:10-12.) E no oe? E nehenehe anei ta oe e rave i te mau haapaeraa no te tavini rahi atu â ia Iehova?

18, 19. Eaha ta tatou i haapii mai i te aamu Bibilia no nia ia Iepheta raua ta ˈna tamahine, e nafea tatou e nehenehe ai e pee i to raua hiˈoraa?

¹⁸ Na te aha i tauturu ia Iepheta ia faaruru i to ˈna mau fifi e rave rahi? Ua vaiiho oia ia Iehova ia aratai i ta ˈna mau maitiraa i roto i to ˈna oraraa. Ua maiti oia eiaha e pee i te haerea o te mau taata e haaati ra ia ˈna. E ua vai taiva ore oia noa ˈtu ua haapeapea vetahi ê ia ˈna. Ua haamaitai Iehova ia Iepheta e ta ˈna tamahine no te mau haapaeraa ta raua i rave ma te aau tae e ua faaohipa Iehova ia raua no te turu i te haamoriraa mau. Noa ˈtu ua faaea vetahi i te rave i te mea tano, ua vai taiva ore Iepheta raua ta ˈna tamahine ia Iehova.

¹⁹ Te parau ra te Bibilia: “[A] pee . . . i te feia i noaa tei parauhia maira i te faaroo e te faaoromai.” (Heb. 6:12) E pee anaˈe i te hiˈoraa o Iepheta raua ta ˈna tamahine. Ua ite tatou e ia vai taiva ore tatou, e haamaitai mai Iehova.