MEA faufaa roa ta tatou taviniraa. Aita râ te taata o ta tatou e poro ra e taa ra i te reira. Noa ˈtu e e faaite te taata i te anaanatae i ta te Bibilia e parau ra, e pinepine, e manaˈo ratou e ere i te mea faufaa ia haapii i te Parau a te Atua e o tatou.

A rave na i te hiˈoraa o Gavin. I apiti noa na oia i te mau putuputuraa i te Piha a te Basileia, aita râ oia i hinaaro e haapii i te Bibilia. Te faataa ra o Gavin e mea iti roa to ˈna ite i te Bibilia e aita o ˈna i hinaaro ia ite te taata. Ua mǎtaˈu oia ahani o ˈna e anihia ˈi ia faaô i roto i te hoê haapaoraa e aita oia i hinaaro ia haavarehia o ˈna. Eaha to oe manaˈo? E nehenehe anei te reira e tauturu ia Gavin? A feruri na i te ohipa maitai ta te mau haapiiraa o te Bibilia e faatupu i nia i te hoê taata. Ua parau Iehova i te mau Iseraela: “E tau reo mai te hau [aore ra hupe] e tohua ra; mai te tuâ ûa i nia i te raau rii tupu ra.” (Deut. 31:19, 30; 32:2) E haapii anaˈe no nia i te hupe e e faaau anaˈe i ta tatou taviniraa i te reira ia nehenehe tatou e tauturu i “te taata atoa ia ora.”—Tim. 1, 2:3, 4.

Mea au te hupe. Te hupe, o te haumi ïa o te reva o te riro mai ei topata pape. E nafea te mau parau a Iehova e riro ai “mai te hau [aore ra hupe] e tohua ra”? Ua paraparau oia i to ˈna nunaa ma te mǎrû e te haapao maitai. E pee tatou i to ˈna hiˈoraa ia faaite tatou i te faatura i ta vetahi ê e tiaturi ra. E faaitoito tatou ia ratou ia feruri no ratou iho e ia rave i ta ratou iho mau faaotiraa. Ia faaite tatou i te anaanatae i te taata taitahi, e ohie ïa ratou i te farii i ta tatou e parau ra e e maitaihia ta tatou taviniraa.

Mea haumǎrû te hupe. E riro ta tatou taviniraa ei mea haumǎrû no vetahi ê ia feruri tatou e nafea e tauturu ia ratou ia ite atu â i te parau mau. Aita te hoê taeae o Chris te iˈoa, i faahepo ia Gavin ia farii i te hoê haapiiraa Bibilia i to ˈna aniraa ˈtu i te omuaraa ra e e hinaaro anei o ˈna e haapii. Ua imi râ oia i te tahi mau ravea ia au atu â Gavin e paraparau no nia i te Bibilia. Ua parau Chris ia Gavin e te vai ra te hoê poroi faufaa e faataahia i roto i te Bibilia e e tauturu te haapiiraa i teie poroi ia ˈna ia taa maitai atu â i te mau putuputuraa. I muri iho, ua faataa Chris e maoti te mau parau tohu Bibilia i papu ai ia ˈna e mea mau ta te Bibilia e parau ra. Ua aparau atura raua e rave rahi taime no nia i te tupuraa o te mau parau tohu. Ua riro teie mau aparauraa ei mea haumǎrû no Gavin, e i te pae hopea, ua farii oia i te hoê haapiiraa Bibilia.

Mea faufaa te hupe no te ora. I te tau veavea e mǎrô i Iseraela, eita te ûa e topa e rave rahi avaˈe. Aita anaˈe te haumi o te hupe, e mǎrô e e pohe te mau raau hotu. Ua tohu Iehova e i to tatou tau, e itehia te paˈurâ, oia hoi, e poihâ te taata i “te faaroo . . . i te parau a Iehova.” (Am. 8:11) Ua fafau oia e e riro te feia faatavaihia “mai te [hupe] no ǒ ia Iehova ra” a poro ai ratou i te parau apî oaoa o te Basileia, turuhia e te mau “mamoe ê atu.” (Mika 5:7; Ioa. 10:16) Te poroi ta tatou e poro ra, e faanahoraa tera a Iehova o te horoa i te ora no te feia e hinaaro ra e ite i te parau mau. Te haafaufaa ra anei tatou i teie poroi?

E haamaitairaa te hupe no ǒ mai ia Iehova ra. (Deut. 33:13) E nehenehe ta tatou taviniraa e riro ei haamaitairaa aore ra e ô no te feia e farii mai ra. E haamaitairaa te haapiiraa Bibilia no Gavin no te mea ua tauturu te reira ia ˈna ia imi i te mau pahonoraa o te taatoaraa o ta ˈna mau uiraa. Ua haere oioi oia i mua i te pae varua, ua bapetizohia oia e te oaoa nei oia i teie mahana i te poro i te parau apî oaoa o te Basileia e ta ˈna vahine, Joyce.

E nehenehe te faaauraa o ta tatou ohipa pororaa i te hupe e tauturu ia tatou ia taa e mea faufaa te mau tutavaraa ta te taata taitahi e rave ra i roto i te taviniraa. E nafea? Mea iti roa te maitai ta te tahi noa mau topata hupe e hopoi mai. Mai te peu râ e e mirioni topata hupe, e rari roa te fenua i te haumi. Hoê â huru, e manaˈo paha tatou e mea iti roa ta tatou e rave ra i roto i te taviniraa. Ia amuihia râ te mau tutavaraa a e mirioni tavini a Iehova, e ati roa ïa “te mau fenua atoa” i te porohia. (Mat. 24:14) E riro anei ta tatou taviniraa ei haamaitairaa no ǒ mai ia Iehova ra no vetahi ê? E, e au ïa ta tatou poroi i te hupe, oia hoi, ei mea mǎrû, haumǎrû e mea faufaa no te ora!