1-3. (a) No te aha tatou e papu ai e e nehenehe tatou e riro ei hoa no te Atua? (b) Eaha ta tatou taitahi e hiˈopoa mai i roto i teie tumu parau?

 I ROTO i te Bibilia, ua piihia Aberahama hoa no te Atua. (Par. 2, 20:7; Isa. 41:8; Iak. 2:23) O Aberahama anaˈe te taata ta te Bibilia i pii, hoa o te Atua. Te auraa ïa e o Aberahama noa anaˈe te taata o te riro mai ei hoa no Iehova? Aita. Te faaite ra te Bibilia e e nehenehe tatou pauroa e fanaˈo i te reira.

² I roto i te Parau a te Atua, e rave rahi aamu o te mau tane e vahine taiva ore o tei mǎtaˈu ia Iehova, o tei tiaturi ia ˈna e o tei riro mai ei hoa piri roa no ˈna. (A taio i te Salamo 25:14 i roto i te nota.) ^[1] Tei roto atoa ratou i te ‘nahoa rahi ite’ ta Paulo i faataa. Pauroa teie mau taata taitahi, e mau hoa anaˈe no te Atua.—Heb. 12:1.

³ E hiˈo anaˈe e toru hoa o Iehova o ta te Bibilia e faahiti ra: (1) Ruta, te hoê vahine ivi taiva ore no Moabi, (2) Hezekia, te hoê arii taiva ore no Iuda, e (3) Maria, te metua vahine o Iesu o tei faaite i te haehaa. Eaha ta tatou e haapii mai i ta ratou i rave no te riro mai ei hoa no te Atua?

4, 5. Eaha te mau faaotiraa fifi ta Ruta i rave, e no te aha mea fifi no ˈna ia na reira? (A hiˈo i te hohoˈa matamua.)

⁴ E vahi atea ta Naomi e ta ˈna na hunoa vahine, o Ruta raua Oraphe, e haere ra mai Moabi e tae atu i Iseraela. A haere noa ˈi ratou, ua faaoti o Oraphe e hoˈi i te fare i Moabi. O Naomi râ, ua faaoti oia e hoˈi i Iseraela, to ˈna iho fenua. Eaha ta Ruta i faaoti i te rave? Ua titauhia ia ˈna ia rave i te hoê faaotiraa fifi mau. E hoˈi anei oia i te fare i Moabi i to ˈna utuafare aore ra e faaea anei oia i pihaiiho ia Naomi, to ˈna metua vahine hoovai, no te haere i Betelehema?—Ruta 1:1-8, 14.

⁵ Te ora ra te utuafare o Ruta i Moabi. E nehenehe ta ˈna e hoˈi i ǒ ratou e na ratou paha e aupuru ia ˈna. Ua matau oia i te taata, te reo e te peu tumu i Moabi. Eita ta Naomi e nehenehe e haapapu ia Ruta i te tahi noa ˈˈe o teie mau mea i Betelehema. E ua mǎtaˈu Naomi e eita Ruta e ite mai i te hoê tane aore ra i te hoê fare no ˈna. Parau atura Naomi ia ˈna ia hoˈi i Moabi. Mai ta tatou i ite, ua ‘hoˈi Oraphe i to ˈna ra taata, e i to ˈna ra mau atua.’ (Ruta 1:9-15) Ua faaoti o Ruta e eita roa ˈtu oia e hoˈi i roto i to ˈna nunaa e e haamori i to ratou mau atua hape.

6. (a) Eaha te maitiraa î i te paari ta Ruta i rave? (b) No te aha Boaza i parau ai no Ruta e te imi ra o ˈna i te haapuraa i raro aˈe i to Iehova pererau?

⁶ E au ra e ua haapii o Ruta no nia ia Iehova maoti ta ˈna tane aore ra ia Naomi. Ua haapii oia e ere Iehova mai te mau atua no Moabi. Ua here Ruta ia Iehova. Ua ite oia e ua tia ia Iehova ia fanaˈo i to ˈna here e ia haamori oia ia ˈNa. Ua rave Ruta i te hoê maitiraa î i te paari. Ua parau oia ia Naomi: “To oe ra nunaa, o to ˈu atoa ïa nunaa; e to oe ra Atua, o to ˈu atoa ïa Atua.” (Ruta 1:16) E putapû to tatou aau ia feruri tatou i nia i to Ruta here no Naomi. Te mea faahiahia roa râ, o te here ïa o Ruta no Iehova. Ua faahiahia atoa o Boaza i te reira, i muri aˈe, ua haapopou oia ia ˈna no to ˈna ‘imiraa i te haapuraa i raro aˈe i to Iehova pererau.’ (A taio i te Ruta 2:12.) Te haamanaˈo mai ra te mau taˈo ta Boaza i faaohipa e e nafea te manu iti e imi ai i te paruru i raro aˈe i te pererau o to ˈna metua. (Sal. 36:7; 91:1-4) Hoê â huru, ua horoa Iehova ia Ruta i te hoê paruru î i te here e ua haamaitaihia oia no to ˈna faaroo. Aita hoê aˈe tumu i tatarahapa ˈi Ruta i ta ˈna faaotiraa.

7. Eaha te nehenehe e tauturu i te feia o te taiâ ra i te pûpû i to ratou ora ia Iehova?

⁷ E rave rahi taata o te haapii ra no nia ia Iehova, aita râ ratou e maiti ia ˈna ei haapuraa no ratou. Te taiâ nei ratou i te pûpû i to ratou ora ia ˈna e i te bapetizo ia ratou. Ia manaˈo oe mai tera, a feruri no te aha oe i taiâ ˈi. Pauroa te taata e haamori i te hoê atua aore ra i te tahi atu. (Ios. 24:15) E te maitiraa î i te paari te rave, o te taviniraa ïa i te Atua mau. Ia pûpû oe ia oe ia Iehova, te faaite ra oe i to oe tiaturiraa e o ˈna to oe haapuraa. E tauturu oia ia oe ia tavini noa ia ˈna noa ˈtu te fifi e rave rau ta oe e farerei. Tera ta Iehova i rave no Ruta.

8. A faataa i te tupuraa o Hezekia.

⁸ Mea taa ê roa te tupuraa o Hezekia i to Ruta. No roto mai oia i te hoê nunaa o tei pûpû ia ratou i te Atua. Aita râ te taatoaraa o te mau Iseraela i vai taiva ore. E arii ino mau Ahaza, te metua tane o Hezekia. Ua  faaite oia i te faatura ore i te hiero o te Atua e ua turai i te nunaa ia haamori i te tahi atu mau atua. Ua tutui oraora noa Ahaza i te tahi o te mau tuaane o Hezekia i roto i te auahi ei tusia no te hoê atua haavare. E oraraa riaria mau to Hezekia mai to ˈna tamariiriiraa!—Arii 2, 16:2-4, 10-17; Par. 2, 28:1-3.

9, 10. (a) No te aha i nehenehe ai Hezekia e inoino? (b) No te aha eiaha ˈi tatou e inoino i te Atua? (c) No te aha eiaha ˈi tatou e manaˈo e na to tatou tupuraa e faaoti i te huru taata ta tatou e riro mai?

⁹ Ua nehenehe te hiˈoraa ino o Ahaza e turai i ta ˈna tamaiti ra o Hezekia e inoino aore ra e riri ia Iehova. I teie mahana, mea iti ta te tahi atu mau taata e faaruru ra i ta Hezekia, e ua manaˈo ratou e e tumu papu i ‘riri ai ratou ia Iehova’ aore ra i inoino ai i ta ˈna faanahonahoraa. (Mas. 19:3) No vetahi, te manaˈo ra ratou e e nehenehe to ratou oraraa utuafare ino e turai ia ratou ia pee i teie huru oraraa ino aore ra ia rave atoa i te hoê â hape a to ratou mau metua. (Ezk. 18:2, 3) Mea tano anei râ teie mau manaˈo?

¹⁰ Ei pahonoraa i teie uiraa, ua haapapu to Hezekia oraraa e e ere i te reira! Aita roa ˈtu hoê tumu papu e riri ai ia Iehova. Eita oia e faatupu i te mau mea ino i nia i te taata. (Ioba 34:10) Mea papu, e nehenehe te mau metua e haapii i ta ratou mau tamarii ia rave i te mea maitai aore ra i te mea ino. (Mas. 22:6; Kol. 3:21) E ere râ te auraa e e turai to tatou huru oraraa ia faaoti i te huru taata ta tatou e riro mai. No te aha? No te mea ua horoa mai Iehova ei ô te tiamâraa e maiti, te auraa ïa e e nehenehe ta tatou e maiti i te mea maitai aore ra i te mea ino. (Deut. 30:19) Mea nafea Hezekia i te faaohiparaa i teie ô faufaa mau?

11. Eaha ta Hezekia hoê o te arii maitai roa ˈˈe no Iuda i rave?

¹¹ Noa ˈtu o to ˈna metua tane hoê o te mau arii ino roa ˈˈe i Iuda, e taata maitai roa râ o Hezekia. (A taio i Te mau arii 2, 18:5, 6.) Ua maiti oia eiaha e pee i te hiˈoraa ino o to ˈna metua tane. E ua maiti oia e faaroo maite i te mau peropheta a Iehova, mai ia Isaia, Mika e Hosea. Ua haapao maite oia i ta ratou aˈoraa. Ua turai te reira ia ˈna ia faaafaro e rave rahi fifi ta to ˈna metua tane i faatupu. Ua tamâ ïa oia i te hiero a ani atu ai i te Atua  ia faaore i te hara a te mau taata e a faaore ai i te mau idolo i tera fenua. (Par. 2, 29:1-11, 18-24; 31:1) I muri iho, i te hinaaroraa te arii Senakeriba no Asura e aro ia Ierusalema, ua faaite Hezekia i te itoito rahi e te faaroo. Ua tiaturi oia i ta Iehova paruru e ua faaitoito oia i te nunaa. (Par. 2, 32:7, 8) I te hoê taime, ua riro mai Hezekia ei taata teoteo. A aˈo ai râ Iehova ia ˈna, ua faaite oia i te haehaa. (Par. 2, 32:24-26) Te mea papu, e hiˈoraa faahiahia mau o Hezekia no tatou. Aita oia i vaiiho i te huru oraraa o to ˈna utuafare e haafifi i to ˈna oraraa. Ua faaite râ oia e e hoa oia no Iehova.

12. Mai ia Hezekia, mea nafea e rave rahi i teie mahana i haapapu ai e e hoa ratou no Iehova?

¹² Mea ino e mea aroha ore teie ao. E rave rahi tamarii o tei paari mai e aita te mau metua e here e e haapao ia ratou. (Tim. 2, 3:1-5) Noa ˈtu e i teie mahana, no roto mai e rave rahi Kerisetiano i te mau utuafare fifi mau, ua maiti ratou e faatupu i te hoê auhoaraa e o Iehova. Mai ia Hezekia, ua faaite ratou e ere na to ratou huru oraraa utuafare e faaoti i te huru taata ta ratou e riro mai i muri aˈe. Ua horoa mai te Atua i te ô o te tiamâraa, e nehenehe tatou e maiti i te tavini e i te faahanahana ia Iehova mai ia Hezekia.

13, 14. No te aha e au ra e mea fifi atoa te hopoia a Maria, e mea nafea râ oia i te fariiraa i ta Gaberiela mau parau?

¹³ E rave rahi matahiti i muri aˈe i te tau o Hezekia, te vai ra te hoê vahine apî e te haehaa, o Maria to ˈna iˈoa. E auhoaraa taa ê mau â to ˈna e o Iehova e e hopoia otahi ta ˈna. E hapû mai oia, e fanau atoa mai e e aupuru oia i te Tamaiti a te Atua! Mea papu e ua here e ua tiaturi Iehova ia Maria, inaha, ua horoa ˈtu oia i te hoê fanaˈoraa taa ê faahiahia mau mai teie. Eaha râ to Maria huru na mua a faaroo ai oia no nia i teie hopoia?

¹⁴ E pinepine tatou i te paraparau no nia i te haamaitairaa rahi i horoahia ia Maria. Eaha râ te tahi o to ˈna mau mǎtaˈu? Ei hiˈoraa, ua parau te melahi ra o Gaberiela e e hapû mai oia ma te ore râ te hoê taata e taoto ia ˈna. Aita râ o Gaberiela i faataa i to Maria utuafare e te mau hoa e nafea o ˈna e hapû mai ai. Eaha ta ratou e manaˈo? E nafea oia e haapapu ai ia Iosepha e aita oia i taiva ia ˈna? Hau atu â, e hopoia rahi mau ta ˈna no te aupuru i te Tamaiti a te Atua mai te hoê taata! Aita tatou i ite i te taatoaraa o ta Maria mau haapeapearaa. Ua ite râ tatou eaha ta ˈna i rave i muri aˈe i to Gaberiela paraparauraa ia ˈna. Ua na ô oia: “Inaha ei tavini au no te Fatu, ia na reirahia mai au mai ta oe i parau na.”—Luka 1:26-38.

15. No te aha e faaroo faahiahia to Maria?

 ¹⁵ E faaroo faahiahia to Maria! Ua ineine oia i te rave i te mau mea atoa e anihia ia ˈna ia rave mai te hoê tavini. Ua tiaturi oia e aupuru e e paruru Iehova ia ˈna. E nafea Maria e faaite ai i teie huru faaroo puai? Aita tatou i fanauhia mai e te faaroo. E nehenehe râ tatou e fanaˈo i te faaroo ia faatupu tatou i te reira e ia ani i te Atua ia haamaitai mai i ta tatou mau tutavaraa. (Gal. 5:22; Eph. 2:8) Ua haa rahi o Maria no te haapuai i to ˈna faaroo. Mea nafea tatou i te iteraa i te reira? E hiˈo mai ïa tatou mea nafea oia i te faarooraa e eaha ta Maria i parau.

16. Na te aha e haapapu e ua faaroo maite Maria?

¹⁶ Mea nafea Maria i te faarooraa. Te parau ra te Bibilia e ia ‘ru tatou i te faaroo, ia haere maine i te parau.’ (Iak. 1:19) Ua faaroo maite Maria. Te faaite ra te Bibilia e mea haapao roa oia i te mau mea atoa o ta ˈna i faaroo, te mau mea iho â râ no nia ia Iehova. Ua rave oia i te taime no te feruri maite i nia i te mau mea faufaa atoa. Hoê hiˈoraa o te reira, o te mahana ïa a fanauhia ˈi Iesu, a parau ai te mau tiai mamoe ia Maria no nia i te hoê poroi no ǒ mai i te hoê melahi ra. I muri aˈe, i te 12raa o to Iesu matahiti, ua maere roa o Maria i to Iesu faahitiraa i te hoê parau. I roto i na tupuraa e piti, ua faaroo Maria, ua haamanaˈo e ua feruri maite oia i ta ˈna i faaroo.—A taio i te Luka 2:16-19, 49, 51.

17. E nafea tatou e haapii ai no nia ia Maria na roto i ta ˈna i parau?

¹⁷ Eaha ta Maria i parau. Aita te Bibilia e faahiti roa ra no nia i ta Maria i parau. Tei roto te Luka 1:46-55 te paraparauraa roa ˈˈe a Maria. Te faaite ra teie mau parau e mea ite roa oia i te mau Papai Hebera. E nafea tatou e ite ai? Ua tuea noa te mau parau a Maria i te mau parau o te pure a Hana, te metua vahine o Samuela. (Sam. 1, 2:1-10) E au ra e ua faahiti o Maria i te mau Papai e 20 taime i roto i ta ˈna paraparauraa. Mea papu, mea au roa na ˈna e paraparau no nia i ta ˈna i haapii no ǒ mai i to ˈna Hoa rahi ra o Iehova.

18. E nafea tatou e nehenehe ai e pee i to Maria faaroo?

¹⁸ Mai ia Maria, i te tahi mau taime, e horoahia mai te tahi mau hopoia no ǒ mai ia Iehova ra o ta tatou e manaˈo e mea fifi roa no tatou. A pee i to ˈna hiˈoraa, a farii ma te haehaa i te hopoia e a tiaturi i ta Iehova tauturu. E nehenehe atoa tatou e pee i to Maria faaroo ma te faaroo maite ia Iehova e ma te feruri maite i ta ˈna e haapii mai ra no nia ia ˈna e i ta ˈna mau opuaraa. E nehenehe ïa tatou e faaite ma te oaoa ia vetahi ê eaha ta tatou i haapii.—Sal. 77:11, 12; Luka 8:18; Roma 10:15.

19. Eaha tei papu ia tatou ia pee tatou i te mau hiˈoraa Bibilia faahiahia mau o te faaroo?

¹⁹ Mea papu e hoa o Ruta, Hezekia e Maria no Iehova, mai ia Aberahama. E ‘nahoa rahi ite’ ratou o tei riro mai ei hoa no te Atua. E tamau anaˈe i te pee i teie mau hiˈoraa faahiahia mau o te faaroo. (Heb. 6:11, 12) Ia na reira tatou, e nehenehe tatou e fanaˈo i te haamaitairaa e riro mai ei hoa no Iehova e a muri noa ˈtu!