A FERURI na eaha te mahana oaoa roa ˈˈe o to oe oraraa. A faaipoipohia ˈi oe aore ra a fanau mai ai oe i ta oe tamarii matamua? Aore ra i te mahana a bapetizohia ˈi oe? Mea papu, o te mahana faufaa roa ˈˈe e te oaoa roa ˈˈe te reira o to oe oraraa. E i tera mahana, eaha ra te mau taeae e tuahine i te oaoa i te iteraa ia oe i te haapapuraa i to oe here i te Atua ma to aau, ora, manaˈo e puai atoa!—Mar. 12:30.

Aita e ore, ua ite oe i te oaoa rahi i te taviniraa ia Iehova mai te taime a bapetizohia ˈi oe. Tera râ, ua iti mai te oaoa o te tahi mau taata poro. No te aha? Eaha te tumu e tamau ai tatou i te tavini ia Iehova ma te oaoa?

E hopoi mai te poroi o te Basileia i te oaoa rahi. No te aha? No te mea ua fafau Iehova e e fatata te Basileia i te haamou i teie ao ino e e fanaˈo tatou i te ao apî a te Atua. Te parau ra te Zephania 1:14: “Ua fatata te mahana rahi o Iehova, te fatata maira, te peepee maira i te haere.” Ia manaˈo râ tatou e e maoro atu â te tiairaa, e nehenehe tatou e ere i te oaoa ta tatou i ite na. E nehenehe te reira e faataere ia tatou i roto i ta tatou taviniraa i te Atua.—Mas. 13:12.

Ia rave tatou i te taime e to tatou mau taeae e tuahine, e itoitohia tatou i te tavini noa ia Iehova ma te oaoa. Peneiaˈe na te haerea maitai o te nunaa o Iehova i aratai ia tatou i te haamoriraa mau e i tauturu ia tatou ia haamata i te tavini i te Atua ma te oaoa. (Pet. 1, 2:12) Eaha râ te tupu ia aˈohia hoê o to tatou mau taeae e tuahine no te mea aita o ˈna i faaroo i te mau faaueraa a te Atua? E nehenehe te reira e haaparuparu vetahi o te amuiraa e e faaere i to ratou here.

E nehenehe atoa te taoˈa materia e faaere i to tatou oaoa. Mea nafea ïa? Te turai nei te ao a Satani ia tatou ia hoo i te mau mea aita tatou e hinaaro mau ra. A haamanaˈo ïa i te mau parau a Iesu: “E ore te taata e tia ia faaroo i te fatu toopiti; e riro oia i te au ore atu i te hoê, e te hinaaro atu i te tahi; e aore ra, e riro i te au atu i te hoê, e te faarue taue i te tahi. O outou nei hoi, e ore e tia ia faaroo i te Atua e te Mamona [aore ra taoˈa].” (Mat. 6:24) Eita ta tatou e nehenehe e tavini ia Iehova ma te oaoa e e tamata i te hoê â taime ia noaa mai te mau mea atoa ta teie nei ao e horoa mai.

No te feia e here ra ia Iehova, e ere i te mea teimaha ia tavini ia ˈna. (Ioa. 1, 5:3) A haamanaˈo na i ta Iesu i parau: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora. A rave mai i tau zugo i nia ia outou, e ia haapiihia outou e au, te mǎrû nei hoi au e te haehaa o te aau: e e noaa hoi te ora i to outou varua. Te mărû nei hoi ta ˈu zugo e te mâmâ nei  ta ˈu hopoia.” (Mat. 11:28-30) Mea faaitoito mau ia riro mai ei Kerisetiano mau e e hopoi mai te reira i te oaoa. Mea papu, e rave rahi tumu maitatai e oaoa ˈi tatou i te tavini ia Iehova. E hiˈopoa mai tatou e toru o te reira.—Hab. 3:18.

Te tavini nei tatou i te Atua oaoa, te Tumu o te ora. (Ohi. 17:28; Tim. 1, 1:11) Te taa ra ia tatou e no ǒ mai to tatou ora i te Atua poiete ra. E tamau noa anaˈe ïa i te tavini ia ˈna ma te oaoa, noa ˈtu ehia matahiti i mairi i te taime a bapetizohia ˈi tatou.

A hiˈo na ia Héctor, e 40 matahiti i to ˈna taviniraa ia Iehova ei tiaau ratere. “Noa ˈtu i te paariraa ra,” te au noa ra oia i te tavini ia Iehova. (Sal. 92:12-14) Ua faaiti te maˈi o ta ˈna vahine i ta ˈna taviniraa ia Iehova, aita râ te reira i faaere ia ˈna i to ˈna oaoa. Te parau ra oia: “Noa ˈtu mea mauiui ia ite e te ino noa ˈtura te maˈi o ta ˈu vahine e mea fifi roa ia haapao ia ˈna, aita vau i vaiiho na teie tupuraa e faaere ia ˈu i to ˈu oaoa no te tavini i te Atua mau. Ma te ite e no ǒ mai to ˈu ora ia Iehova ra e e tumu i poiete ai oia i te taata, ua navai noa te reira no te here roa e no te tavini ia ˈna ma to ˈu aau atoa. Ua tutava noa vau i roto i te ohipa pororaa e i te tapea noa i te tiaturiraa o te Basileia na mua roa i roto i to ˈu feruriraa ia ore au e ere i to ˈu oaoa.”

Ua horoa mai Iehova i te tusia taraehara, maoti te reira e ite ai tatou i te oaoa i roto i te oraraa. Oia mau, “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioa. 3:16) Mea papu, e nehenehe ta tatou mau hara e faaorehia a fanaˈo atu ai tatou i te ora mure ore ia faaite tatou i te faaroo i te ô o te hoo î i te here a te Atua. Teie iho â te tumu maitai e faaite ai i te mauruuru! E na to tatou mauruuru no te hoo e turai ia tatou ia tavini ia Iehova ma te oaoa.

Ua parau te hoê taeae o Jesús te iˈoa e o tei ora ra i Mehiko: “Ta ˈu ohipa, o ta ˈu ïa manaˈonaˈoraa. I te tahi mau taime, e nehenehe ta ˈu e tataipae i te hora ohipa ma te ore e faaea, noa ˈtu aita vau e faahepohia ia na reira. E ohipa hau atu â râ vau ia noaa hau atu â moni. I muri iho, ua haapii au no nia ia Iehova e e mea nafea oia i te horoaraa i ta ˈna Tamaiti here no te huitaata. E hinaaro rahi to ˈu i te tavini ia ˈna. Ua pûpû ïa vau i to ˈu ora ia Iehova e i muri aˈe e 28 matahiti i te ohiparaa no tera taiete, ua faaoti au e faarue i ta ˈu ohipa e ua rave au i te taviniraa taime taatoa.” Mea na reira to Jesús haamataraa i te tavini ia Iehova ma te oaoa.

E ite tatou i te oaoa ia ora tatou i te hoê oraraa viivii ore i te pae morare. Te haamanaˈo ra anei outou mai teihea to outou oraraa hou outou a ite ai o vai Iehova? Ua haamanaˈo te aposetolo  Paulo i te mau Kerisetiano no Roma e ua ‘faatiamâhia ratou i te ino’ e ua riro mai ratou “ei tavini no te parau-tia.” No te mea e oraraa mâ to ratou, te tiai ru nei ratou i te ora mure ore. (Roma 6:17-22) Te pee atoa ra tatou i te mau ture aveia teitei a Iehova, ua tiamâ mai ïa tatou i te oto o te haerea morare ore aore ra i te ino o te oraraa. Auê ïa oaoa!

A hiˈo na ia Jaime, e taata moto teie e aita oia e tiaturi e te vai mau ra te Atua e e taata e tiaturi ra i te tauiuiraa o te mau mea ora. Ua haamata Jaime i te apiti i te mau putuputuraa Kerisetiano e ua putapû roa oia i te here e itehia ra i ǒ. No te faarue i to ˈna oraraa i na mua ˈˈe, ua ani oia ia Iehova ia tauturu ia ˈna ia tiaturi oia ia ˈNa. Te parau ra o Jaime, “Ua taa riirii ia ˈu e te vai mau ra te hoê Metua î i te here e e Atua aroha hamani maitai atoa oia. Ua riro te haafaufaaraa i te mau ture aveia tia a Iehova ei paruru no ˈu. Ahani au aita i taui, ua pohe atura paha ïa vau, mai vetahi o to ˈu mau hoa, e taata moto atoa ratou. Te mau matahiti oaoa roa ˈˈe o to ˈu oraraa, o te mau matahiti ïa i tavini ai au ia Iehova.”

Eaha to tatou huru a tiai noa ˈi i te hopea o teie nei ao ino? A haamanaˈo, te rave nei tatou i to te Atua hinaaro e te tiai ru nei tatou i te ora mure ore. “E eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.” (Gal. 6:8, 9) Maoti ta Iehova tauturu, e faaoromai tatou, e haa rahi tatou no te faatupu i te mau huru maitatai hinaarohia e tatou no te ora i “te ati rahi” e ia tamau i te tavini ia Iehova ma te oaoa.—Apo. 7:9, 13, 14; Iak. 1:2-4.

Ua papu ia tatou e e haamaitai mai Iehova no to tatou faaoromai. Ua ite oia i te ohipa o ta tatou e rave ra e te here o ta tatou e faaite ra no ˈna e no to ˈna iˈoa. Ia tamau tatou i te tavini ia ˈna ma te oaoa, e au tatou i ta Davida i parau: “Ua tuu vau ia Iehova ei muâ ia ˈu; tei tau rima atau oia, e ore au e aueue. I oaoa ˈi tau aau, e te oaoa nei tau varua; e taoto atoa tau tino nei ma te tiai.”—Sal. 16:8, 9.