1. Eaha te tahi hiˈoraa o te mau ture Bibilia, e e nafea tatou e faufaahia ˈi i te auraroraa i te reira?

 I ROTO i te Bibilia, ua horoa mai Iehova i te tahi mau ture o te faataa maitai ra i ta ˈna e hinaaro ra ia rave tatou. Ei hiˈoraa, te parau mai ra oia ia tatou eiaha e haamori i te mau idolo, e eiâ, e taero i te ava aore ra e rave i te mau peu taotoraa tia ore. (Kor. 1, 6:9, 10) E ua horoa te Tamaiti a Iehova, o Iesu, i te mau faaueraa taa maitai i ta ˈna mau pǐpǐ: “E haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te Varua Maitai; ma te haapii atu ia ratou i te haapao i te mau mea atoa ta ˈu i parau atu ia outou na: e inaha, tei pihai atoa iho ïa vau ia outou, e tae noa ˈtu i te hopea o teie nei ao.” (Mat. 28:19, 20) Te mau mea atoa ta Iehova e Iesu e parau mai, no to tatou iho ïa maitai. Te haapii mai ra te mau ture a Iehova e nafea tatou e aupuru ia tatou iho e to tatou utuafare. E tauturu atoa te reira ia tatou ia fanaˈo i te hoê ea maitai aˈe e ia oaoa. Te mea faufaa roa ˈtu â, ia auraro tatou i ta Iehova mau faaueraa, oia atoa te faaueraa e  haere e poro, e faaoaoa tatou ia ˈna e e haamaitai mai oia.

2, 3. (a) No te aha aita te Bibilia e horoa mai i te mau aratairaa no te mau tupuraa atoa o te oraraa? (b) Eaha te mau uiraa te hiˈopoahia i roto i teie tumu parau? (A hiˈo i te hohoˈa matamua.)

² Aita atoa râ te Bibilia e horoa mai ra i te mau ture no nia i te mau tupuraa atoa o te oraraa. Ei hiˈoraa, aita e faaueraa taa maitai i roto i te Bibilia no nia i to tatou huru faaahuraa. Te faaite ra te reira i to Iehova paari. Noa ˈtu e mea taa ê te faaahuraa o te mau taata na te ao nei, e te taui noa ra te huru faaahuraa i te roaraa o te tau, mea tano noa iho â te Bibilia. Oia atoa, aita e itehia i roto i te Bibilia te mau ture e rave rahi no nia i te mau ohipa aore ra faaanaanataeraa o te tia ia tatou ia maiti aore ra eaha mau na te tia ia rave ia maitai noa to tatou ea. E vaiiho Iehova ia tatou taitahi e te upoo o te utuafare ia rave i te mau faaotiraa no nia i teie mau ohipa.

³ No reira, ia rave tatou i te hoê faaotiraa faufaa o te faataui i to tatou oraraa e aita e ture no nia i te reira i roto i te Bibilia, a uiui: ‘Te haapao mai ra anei Iehova i te faaotiraa ta ˈu e rave ra? E oaoa anei oia i ta ˈu e maiti i te rave mai te peu e aita te reira e ofati ra i te hoê ture o te Bibilia? E nafea e papu ai ia ˈu e e oaoa oia i te mau maitiraa ta ˈu e rave?’

4, 5. E nafea ta tatou mau faaotiraa e ohipa ˈi i nia ia tatou iho e ia vetahi ê?

⁴ Te manaˈo ra te tahi mau taata e e nehenehe ta ratou e rave mai ta ratou e hinaaro. E hinaaro râ tatou e rave i te ohipa e oaoa ˈi Iehova. No reira, ia rave tatou i te hoê faaotiraa, mea tia ia feruri tatou i ta te Bibilia e parau ra e ia auraro i te reira. Ei hiˈoraa, te parau mai ra te Bibilia eaha to te Atua manaˈo no nia i te faaohiparaa i te toto, e pee ïa tatou i te reira. (Gen. 9:4; Ohi. 15:28, 29) E nehenehe tatou e pure ia Iehova no te tauturu mai ia rave i te mau faaotiraa o te faaoaoa ia ˈna.

⁵ E ohipa ta tatou mau faaotiraa i nia ia tatou. E nehenehe te hoê faaotiraa maitai e tauturu ia tatou ia haafatata ˈtu â ia Iehova. Ia rave tatou i te hoê faaotiraa tano ore, e nehenehe te reira e haafifi i to tatou auhoaraa e o ˈna. E nehenehe atoa ta tatou mau faaotiraa e ohipa i nia i te tahi atu mau taata. Eita tatou e hinaaro e rave i te tahi mea o te faahuru ê i to tatou mau taeae aore ra o te haaparuparu i to ratou faaroo. Eita atoa tatou e hinaaro e faatupu i te fifi i rotopu i te mau taeae o te amuiraa. No reira, mea faufaa ia rave tatou i te mau faaotiraa maitatai.—A taio i te Roma 14:19; Galatia 6:7.

6. Na te aha e aratai i ta tatou mau faaotiraa?

⁶ Aita anaˈe te Bibilia e faataa maitai ra eaha te tia ia tatou ia rave, e nafea tatou e rave ai i te mau faaotiraa maitatai? Eita tatou e rave noa i ta tatou e au aˈe, e mea tia râ ia feruri maitai i to tatou iho tupuraa e ia rave i te hoê faaotiraa o te faaoaoa ia Iehova. E papu ïa ia tatou e e tauturu mai oia ia manuïa te reira.—A taio i te Salamo 37:5.

7. Mai te peu e aita e ture Bibilia, e nafea tatou e ite ai eaha ta Iehova e hinaaro ra ia rave tatou i roto i te tahi tupuraa?

⁷ E nafea râ tatou e ite ai eaha te faaoaoa  ia Iehova? Te parau mai ra te Ephesia 5:17: “Ia ite . . . outou i to te Fatu [Iehova] ra hinaaro.” Mai te peu e aita e ture taa maitai i roto i te Bibilia, mea titauhia ia ite aore ra ia taa i ta Iehova e hinaaro ra ia rave tatou i roto i to tatou tupuraa. E nafea tatou e na reira ˈi? Mea titauhia ia tatou ia pure ia ˈna e ia vaiiho i to ˈna varua moˈa ia aratai ia tatou.

8. Mea nafea Iesu e ite ai i ta Iehova e hinaaro ia rave o ˈna? A horoa i te hoê hiˈoraa.

⁸ Ua ite noa Iesu i ta Iehova e hinaaro ia rave o ˈna. Ei hiˈoraa, e piti taime a poia ˈi te nahoa taata, ua pure Iesu e ua faaamu oia ia ratou maoti te hoê semeio. (Mat. 14:17-20; 15:34-37) A poia ˈi râ oia i roto i te medebara e a hinaaro ai te Diabolo ia taui oia i te mau ofai ei maa, ua patoi Iesu. (A taio i te Mataio 4:2-4.) Ua matau maitai oia i to ˈna Metua, ua ite ïa oia e aita Iehova e hinaaro ia faaohipa oia i te varua moˈa no to ˈna iho mau hinaaro. Ua papu ia ˈna e e aratai to ˈna Metua ia ˈna e e horoa i te maa ia hinaaro oia i te reira.

9, 10. Eaha te tauturu ia tatou ia rave tatou i te mau faaotiraa î i te paari? A faataa.

⁹ Mai ia Iesu, e nehenehe tatou e rave i te mau faaotiraa maitatai ia tiaturi tatou ia Iehova no te aratai ia tatou. Te parau ra te Bibilia: “E tiaturi ia Iehova ma to aau atoa ra; eiaha râ e tiaturi i to oe ihora haapao. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea. Eiaha oe ia paari i to oe iho manaˈoraa; o Iehova ra ta oe e mǎtaˈu, a faarue ai i te ino.” (Mas. 3:5-7) Ia haapii tatou i te Bibilia e ia ite tatou no nia i to Iehova manaˈo, e taa ia tatou eaha ta ˈna e hinaaro ia rave tatou i roto i te hoê tupuraa taa maitai. E rahi atu â tatou i te haapii no nia i to Iehova manaˈo, e ohie atu â ïa tatou i te rave i te mau faaotiraa o te faaoaoa ia ˈna. Ma te na reira, e haapao maitai atu â tatou i ta te Atua aratairaa.—Ezk. 11:19.

¹⁰ A feruri na e te hoohoo haere ra te hoê vahine faaipoipo e te ite ra oia i te hoê tiaa nehenehe. Mea moni roa râ. Noa ˈtu e aita ta ˈna tane i pihaiiho ia ˈna, ua ite oia i to ˈna manaˈo ia faaohipa oia i tera faito moni. Mea nafea oia i te iteraa? E tau taime to raua faaipoiporaa, ua ite ïa o ˈna e nafea ta ˈna tane e hinaaro ia faaohipahia ta raua moni. Hoê â huru, ia haapii tatou no nia i to Iehova manaˈo e i ta ˈna i rave i tahito ra, e taa ia tatou eaha ta ˈna e hinaaro ia rave tatou i roto i te mau tupuraa taa ê.

11. Eaha te mau uiraa ta tatou e nehenehe e uiui ia taio aore ra ia haapii tatou i te Bibilia? (A hiˈo i te tumu parau tarenihia “ A haapii ai oe i te Bibilia, a uiui.”)

¹¹ E nafea tatou e ite ai i to Iehova manaˈo? Te ohipa faufaa roa ˈˈe ta tatou e nehenehe e rave, o te taio-tamau-raa e te haapii-tamau-raa ïa i te Bibilia. A na reira  ˈi tatou, e nehenehe tatou e uiui: ‘Eaha ta te reira e haapii mai no nia ia Iehova? No te aha oia i na reira ˈi?’ E mai ia Davida, mea tia ia ani tatou ia Iehova i te tauturu ia taa maitai atu â ia ˈna. Ua papai Davida: “E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea: e faaite mai oe ia ˈu i te parau mau na oe ra, e haapii mai hoi ia ˈu; o oe hoi te Atua o to ˈu ora; te tiaturi nei au ia oe i te mau mahana atoa nei.” (Sal. 25:4, 5) Ia haapii tatou no nia ia Iehova, e nehenehe tatou e feruri i roto i teihea mau tupuraa e nehenehe ai e faaohipa i ta tatou i haapii. E nehenehe anei e faaohipa i te reira i roto i te utuafare, i te ohipa, i te fare haapiiraa aore ra i roto i te taviniraa? Ia manaˈo tatou i te hoê tupuraa taa maitai, e ohie atu â tatou i te ite e nafea Iehova e hinaaro ai ia faaohipa tatou i ta tatou i haapii.

12. E nafea ta tatou mau papai e putuputuraa e tauturu mai ai ia taa i to Iehova manaˈo no nia i te mau ohipa e rave rau?

¹² Te tahi atu ravea no te ite i to Iehova manaˈo, o te haapao-maite-raa ïa eaha ta ta ˈna faanahonahoraa e haapii mai ra no ǒ mai i te Bibilia ra. Ei hiˈoraa, ia rave tatou  i te hoê faaotiraa, e tauturu mai te Index des publications des Témoins de Jéhovah e te buka Maimiraa Bibilia no te mau Ite no Iehova ia ite i to Iehova manaˈo. E nehenehe atoa tatou e faufaahia i ta tatou mau putuputuraa Kerisetiano ia faaroo maite tatou e ia horoa i te mau pahonoraa e ia feruriruri i tei haapiihia ra. E tauturu te reira ia tatou ia feruri mai ia Iehova. E nehenehe ïa tatou e rave i te mau faaotiraa o te faaoaoa ia ˈna e ta ˈna e haamaitai.

13. A horoa i te hoê hiˈoraa e nafea tatou e nehenehe ai e rave i te hoê faaotiraa î i te paari ia feruri tatou i to Iehova manaˈo.

¹³ E hiˈo anaˈe i te hoê hiˈoraa e nafea tatou e nehenehe ai e rave i te hoê faaotiraa î i te paari ia hiˈopoa tatou eaha to Iehova manaˈo. Peneiaˈe te hinaaro nei oe e riro mai ei pionie. Ua rave oe i te tahi mau tauiraa i roto i to oe oraraa ia nehenehe oe e horoa rahi atu â i to oe taime i roto i te taviniraa. Aita râ i papu ia oe e oaoa anei oe ia iti mai ta oe moni e ta oe mau tauihaa. Mea papu, aita te Bibilia e parau ra ia riro tatou ei pionie no te tavini ia Iehova. E nehenehe tatou e tamau i te tavini ia ˈna ma te taiva ore ei taata poro. Tera râ, ua parau Iesu e e haamaitai Iehova i te feia o te rave ra i te mau haapaeraa no te Basileia. (A taio i te Luka 18:29, 30.) Te parau atoa ra te Bibilia e e oaoa Iehova ia rave tatou i te mau tutavaraa no te arue ia ˈna e te hinaaro nei oia ia oaoa tatou i te tavini ia ˈna. (Sal. 119:108; Kor. 2, 9:7) Ma te pure no nia i teie mau ohipa e ma te feruriruri i te reira, e nehenehe tatou e rave i te hoê faaotiraa maitai e o ta Iehova e haamaitai.

14. E nafea tatou e ite ai e mea au anei na Iehova i te tahi huru faaahuraa?

¹⁴ Teie te tahi hiˈoraa. Mea au roa na oe i te tahi huru faaahuraa, ua ite râ oe e nehenehe vetahi o te amuiraa e huru ê i to oe faito ahu. Aita te Bibilia e parau ra no nia i tera huru faaahuraa. E nafea ïa oe e ite ai i to Iehova manaˈo? Te parau mai ra te Bibilia: “E te mau vahine ra . . . , ia faanehenehe ia ratou iho i te ahu e au ra, ma te faaieie ore, e te haapao maitai; eiaha ma te rouru firi, e te auro, e te poe, e te ahu taoˈa rahi ra. Ma te parau maitai râ, o tei au ïa i te mau vahine i mau i te paieti ra.” (Tim. 1, 2:9, 10) Mea papu, no te taatoaraa o te mau tavini a Iehova, oia atoa no te mau tane teie mau parau. Ia faaite tatou i te haehaa, e feruri tatou e nafea vetahi ê e manaˈo no nia i te mau ahu ta tatou e maiti i te oomo. E no to tatou here i to tatou mau taeae, eita tatou e hinaaro ia huru ê ratou. (Kor. 1, 10:23, 24; Phil. 3:17) Ia hiˈopoa tatou eaha ta te Bibilia e parau ra e eaha to Iehova manaˈo, e rave tatou i te mau faaotiraa o te faaoaoa ia ˈna.

15, 16. (a) Eaha to Iehova huru aau ia tamau tatou i te feruri i te mau peu taotoraa tia ore? (b) Ia maiti i ta tatou mau faaanaanataeraa, e nafea tatou e nehenehe ai e ite eaha te faaoaoa ia Iehova? (c) E nafea tatou e rave ai i te mau faaotiraa faufaa?

¹⁵ I roto i te Bibilia, te haapii ra tatou e e mauiui roa e e oto Iehova ia rave te mau taata i te mau ohipa ino e ia feruri ratou i te mau mea ino. (A taio i te Genese 6:5, 6.) Mea papu maitai e aita Iehova e hinaaro ia feruri noa tatou i te mau peu taotoraa tia ore. Ia tamau tatou  i te manaˈo i teie mau ohipa, e nehenehe tatou e rave roa i te reira. Te hinaaro nei râ Iehova ia manaˈo tatou i te mau mea viivii ore e te maitai. Ua papai te pǐpǐ Iakobo no nia i to Iehova paari, “e mea viivii ore, e te hau, e te mǎrû, e te faaroo ohie, ua î i te aroha e te hamani maitai, mea pae tahi ore e te haavare ore.” (Iak. 3:17, New World Translation) Te haapii mai ra ïa te Bibilia e mea tia ia ape tatou i te mau faaanaanataeraa atoa o te nehenehe e turai ia tatou ia manaˈo aore ra ia hinaaro i te mau ohipa viivii e te ino. E ia taa maitai ia tatou eaha ta Iehova e au e ta ˈna e riri, e ohie ïa tatou ia ite eaha te mau buka, te mau hohoˈa teata aore ra te mau hauti e maiti. Aita e titauhia ia tatou ia ani ia vetahi ê eaha ta tatou e rave.

¹⁶ Ia rave tatou i te hoê faaotiraa, mea rahi te mau ravea ta oe e nehenehe e maiti o te faaoaoa ia Iehova. Ia rave râ tatou i te hoê faaotiraa faufaa mau, mea maitai paha ia ani i te hoê matahiapo aore ra i te tahi atu taeae aore ra tuahine aravihi no te horoa mai i te tahi mau aˈoraa. (Tito 2:3-5; Iak. 5:13-15) Mea papu, eiaha e ani i teie taata ia rave i te hoê faaotiraa no tatou. Mea titauhia râ ia feruri maite eaha ta tatou i ite i roto i te Bibilia a rave atu ai i ta tatou iho faaotiraa. (Heb. 5:14) Ua parau te aposetolo Paulo: “E riro hoi ta te taata nei hopoia ei nia ïa ia ˈna iho e ati noa ˈˈe.”—Gal. 6:5.

17. E nafea tatou e faufaahia ˈi i te raveraa i te mau faaotiraa o te faaoaoa ia Iehova?

¹⁷ Ia rave tatou i te mau faaotiraa o te faaoaoa ia Iehova, e piri atu â tatou ia ˈna e e fanaˈo tatou i ta ˈna farii maitai e haamaitairaa. (Iak. 4:8) E puai roa mai to tatou faaroo ia Iehova. No reira, e feruriruri tatou i ta tatou e taio ra i roto i te Bibilia ia nehenehe tatou e taa e nafea oia e feruri ai. Mea papu, e mau mea apî noa ta tatou e haapii mai no nia ia Iehova. (Ioba 26:14) Ia haa rahi râ tatou no te haapii atu â no nia ia ˈna i teie nei, e noaa ia tatou te paari e e nehenehe tatou e rave i te mau faaotiraa maitatai. (Mas. 2:1-5) E taui te mau manaˈo e te mau opuaraa a te taata, area ta Iehova eita roa ˈtu e taui. Ua parau te papai salamo: “Tei faaauhia e Iehova ra, e tia ïa i te vai-maite-raa; e tei manaˈohia e tana aau e tae noa ˈtu i te mau ui atoa ra.” (Sal. 33:11) Ma te papu, e nehenehe tatou e rave i te mau faaotiraa maitai roa ˈˈe ia haapii tatou ia feruri mai ia Iehova a rave atu ai i te mau mea o te faaoaoa ia ˈna.