1-3. (a) Eaha te tahi mau tauiraa mea fifi paha ia rave i muri aˈe i te bapetizoraa? (b) Mai te peu e mea fifi aˈe te haereraa i mua i te pae varua i ta tatou i manaˈo na, eaha te mau uiraa ta tatou e uiui? (A hiˈo i te hohoˈa matamua.)

 UA HAUTI pere o Kevin e rave rahi matahiti, ua puhipuhi i te avaava, ua inu hua i te ava e ua rave i te raau taero. ^[1] I muri iho, ua haapii oia no nia ia Iehova e ua hinaaro oia e riro mai ei hoa no ˈna. Tera râ, no te na reira, ua titauhia ia ˈna ia rave i te mau tauiraa rahi i roto i to ˈna oraraa. Ua taui oia maoti ta Iehova tauturu e te puai o ta ˈna Parau, te Bibilia.—Heb. 4:12.

² I muri aˈe i to Kevin bapetizoraahia, ua titau-faahou-hia ia ˈna ia rave i te tahi mau tauiraa o to ˈna huru no te riro mai ei Kerisetiano maitai aˈe. (Eph. 4:31, 32) Ei hiˈoraa, oioi noa oia i te riri i na mua ˈˈe. Ua maere roa oia i te iteraa e ere i te mea ohie i te haavî i to ˈna huru. Ua parau Kevin e ua riro ei mea fifi aˈe ia haapii i te haavî i to ˈna huru i te faaearaa i te  mau ohipa ino ta ˈna i rave na mua ˈˈe a bapetizohia ˈi oia! Ua nehenehe râ ta ˈna e rave i te mau tauiraa ma te taparuparu ia Iehova ia tauturu ia ˈna e maoti te hoê haapiiraa hohonu o te Bibilia.

³ Hou tatou a bapetizohia ˈi, e rave rahi o tatou o tei rave i te mau tauiraa rahi i roto i te oraraa a nehenehe atu ai e ora ia au i ta te Bibilia e parau ra. Tae roa mai râ i teie mahana, te taa ra ia tatou e te vai ra te tahi mau tauiraa nainai te titauhia ia rave ia piri atu â to tatou huru i to te Atua e te Mesia. (Eph. 5:1, 2; Pet. 1, 2:21) Ei hiˈoraa, te tapao ra paha tatou e mea amuamu roa tatou aore ra e pinepine tatou i te paraparau e i te faahiti i te mau parau tano ore no nia ia vetahi ê. Aore ra i te tahi mau taime, e mǎtaˈu paha tatou i ta vetahi ê e manaˈo aore ra e parau, a ore atu ai tatou e rave i te mea tano. Peneiaˈe ua tamata tatou i te taui e rave rahi matahiti, ua tapea noa râ tatou i te rave i te hoê â mau hape. No reira, e nehenehe paha tatou e uiui: ‘No te aha mea fifi ai no ˈu ia rave i teie mau tauiraa nainai? Eaha te tia ia ˈu ia rave no te pee i ta te Bibilia e parau ra a nehenehe atu ai au e tamau i te haamaitai i to ˈu huru?’

4. No te aha eita ˈi ta tatou e nehenehe e faaoaoa ia Iehova i te mau mea atoa ta tatou e rave ra?

⁴ Ua here tatou ia Iehova e te hinaaro ra tatou ma to tatou aau atoa e faaoaoa ia ˈna. Teie râ hoi, eita ta tatou e nehenehe e faaoaoa ia ˈna i te mau taime atoa, no te mea e taata tia ore tatou. E pinepine tatou i te manaˈo mai te aposetolo Paulo o tei parau: “O te hinaaro . . . , te fatata nei ïa ia ˈu, area te rave i te mea maitai ra, aita ïa i itea ia ˈu.”—Roma 7:18; Iak. 3:2.

5. Eaha te mau tauiraa ta tatou i rave hou tatou a bapetizohia ˈi, e eaha râ te mau paruparu o ta tatou e aro noa ra?

⁵ Hou a riro mai ai ei mero o te amuiraa, ua titauhia ia faaea tatou i te rave i te mau ohipa mea riri na Iehova. (Kor. 1, 6:9, 10) E taata tia ore noa â râ tatou. (Kol. 3:9, 10) No reira e hape noa ˈi tatou, noa ˈtu e rave rahi matahiti to tatou bapetizoraahia. I te tahi mau taime, e tupu paha te tahi mau hinaaro e manaˈo tano ore aore ra e ite paha tatou e mea fifi ia haavî i te hoê paruparu o to tatou huru. Ua patoi paha tatou i tera paruparu e rave rahi matahiti.

6, 7. (a) E nafea tatou e nehenehe ai e riro ei hoa no Iehova noa ˈtu to tatou huru taata tia ore? (b) No te aha eiaha tatou e taiâ i te ani ia Iehova ia faaore i ta tatou mau hapa?

⁶ Noa ˈtu e e taata tia ore tatou, e nehenehe atoa tatou e fanaˈo i te hoê auhoaraa e o Iehova e e tavini ia ˈna. A haamanaˈo mea nafea oe i te riroraa mai ei hoa no Iehova. O ˈna tei ite i te mea maitai i roto ia oe e ua hinaaro oia ia ite oe no nia ia ˈna. (Ioa. 6:44) Ua ite atoa oia e hapa e e paruparu atoa to oe e ua fatata oe i te rave i te hoê ohipa hape. Ua hinaaro noa râ Iehova ia riro oe ei hoa no ˈna.

⁷ No to Iehova here rahi ia tatou i horoa mai ai oia i te hoê ô faahiahia. Ua tono oia i ta ˈna Tamaiti i te fenua nei ia nehenehe Iesu e horoa i to ˈna ora ei hoo no ta tatou mau hara. (Ioa. 3:16) Ia hape tatou, e nehenehe tatou e ani ia Iehova ia faaore i ta tatou mau hape. Maoti te hoo e papu ai ia tatou e e faaore mai oia i ta tatou hape e e vai noa to tatou auhoaraa e o ˈna. (Roma 7:24, 25; Ioa. 1, 2:1, 2) A haamanaˈo, ua pohe Iesu no te feia o tei  tatarahapa. No reira, ia manaˈo tatou e mea ino roa te mea ta tatou i rave, eiaha e faaea i te pure ia Iehova ia faaore i ta tatou mau hape. Ia ore tatou e ani ia ˈna ia faaore i ta tatou mau hape, mai te mea ra e te patoi ra tatou i te horoi i to tatou rima ua repo anaˈe. Auê tatou i te oaoa e ua rave Iehova i te hoê faanahoraa ia nehenehe tatou e riro mai ei hoa no ˈna, noa ˈtu e taata tia ore tatou.—A taio i te Timoteo 1, 1:15.

8. No te aha eita e tia ia tatou ia haamoe i to tatou mau paruparu?

⁸ Mea papu, eita ta tatou e nehenehe e haamoe i to tatou mau paruparu aore ra e tamau i te otohe no te reira. Ua parau mai Iehova o vai te taata ta ˈna e hinaaro ia riro ei hoa no ˈna. (Sal. 15:1-5) No reira, ia hinaaro tatou e haafatata ˈtu â ia Iehova, mea tia ia tutava tatou i te pee i to ˈna hiˈoraa e to ta ˈna Tamaiti. Mea tia atoa ia tamata tatou i te haavî i to tatou mau hinaaro tano ore e e nehenehe atoa paha tatou e haapae i te tahi o te reira. Noa ˈtu ehia maororaa tatou i te bapetizoraahia, mea tia ia tamau tatou i te haamaitai i to tatou huru.—Kor. 2, 13:11.

9. E nafea tatou e ite ai e e nehenehe tatou e tamau i te rave i te tutavaraa no te faataata apî?

⁹ Ua parau te aposetolo Paulo i te mau Kerisetiano: “E e haapae outou i ta outou parau i mutaa ihora, i te taata tahito i tei ino i te hinaaro haavare ra; e ia faahouhia outou i to outou varua ra i te aau; e ia faataata apî hoi outou, o tei hamanihia ia au i te Atua ra, i te parau-tia e te maitai mau ra.” (Eph. 4:22-24) Te auraa ïa e mea titauhia ia tamau tatou i te tutava no te taui e no te “faataata apî.” No reira, noa ˈtu ehia maororaa tatou i te taviniraa ia Iehova, e nehenehe tatou e haapii noa ˈtu â no nia i to ˈna mau huru maitatai. E e nehenehe te Bibilia e tauturu mai ia tamau tatou i te rave i te mau tauiraa i nia i to tatou huru ia piri atu â to tatou huru i to ˈna.

10. Eaha te titauhia ia tamau tatou i te rave i te mau tauiraa maoti te tauturu a te Bibilia, e eaha te mau uiraa ta tatou e uiui?

¹⁰ E hinaaro tatou pauroa e pee i ta te Bibilia e parau ra. Mea titauhia râ ia haa rahi tatou ia hinaaro tatou e tamau i te taui. No te aha ia rave tatou i teie mau tutavaraa? Aita anei ta Iehova e nehenehe e faaohie no tatou i te raveraa i te mea tano?

11-13. No te aha Iehova e titau ai ia tutava tatou i te faaruru i to tatou mau paruparu?

¹¹ Ia feruri tatou i te ao nui e te mau mea atoa e vai ra i roto, papu roa ia tatou e e puai to Iehova no te rave i te mau ohipa atoa. Ei hiˈoraa, ua poiete oia i te mahana e mea puai roa te reira. I te mau tetoni atoa, e horoa rahi te mahana i te maramarama e te mahanahana. Ia nehenehe te ora e itehia i te fenua nei, hoê noa râ tuhaa iti o teie ito e titauhia. (Sal. 74:16; Isa. 40:26) E horoa atoa Iehova i te puai i ta ˈna mau tavini i te fenua nei ia hinaaro ratou i te reira. (Isa. 40:29) Mea  papu, mai te peu e e hinaaro Iehova, e nehenehe ta ˈna e faaohie roa no tatou te haavîraa i to tatou mau paruparu e ia faaea i te faatupu i te mau hinaaro tano ore. No te aha ïa eita oia e na reira?

¹² Ua horoa mai Iehova i te tiamâraa e maiti. Ua vaiiho oia ia tatou ia maiti no tatou iho e auraro anei tatou ia ˈna aore ra aita. Ia maiti tatou i te auraro ia ˈna a haa rahi atu ai no te rave i to ˈna hinaaro, te faaite ra ïa tatou i to tatou here ia ˈna e te hinaaro ra tatou e faaoaoa ia ˈna. E parau Satani e aita e tiaraa to Iehova no te faatere. Ia auraro râ tatou ia Iehova, te faaite ra tatou e te hinaaro nei tatou ia riro mai oia ei Faatere no tatou. E ua papu ia tatou e te haafaufaa ra to tatou Metua î i te here i ta tatou mau tutavaraa atoa no te auraro ia ˈna. (Ioba 2:3-5; Mas. 27:11) Ia haa rahi tatou no te patoi i to tatou mau paruparu, noa ˈtu e e ere i te mea ohie ia na reira, e taiva ore tatou ia Iehova e e faaite tatou e te hinaaro nei tatou ia riro mai oia ei Faatere no tatou.

¹³ Te parau ra Iehova e mea tia ia haa rahi tatou no te pee i to ˈna mau huru maitatai. (Kol. 3:12; a taio i te Petero 2, 1:5-7.) Te hinaaro atoa ra oia ia haa rahi tatou no te haavî i ta tatou e manaˈo ra e to tatou huru aau. (Roma 8:5; 12:9) I te mau taime e haa rahi ai tatou no te rave i te hoê tauiraa e e manuïa tatou, e oaoa roa tatou.

14, 15. Eaha ta tatou e nehenehe e rave no te faatupu i te mau huru maitatai o ta Iehova e au? (A hiˈo i te tumu parau tarenihia “ Ua faataui te Bibilia e te pure i to ratou oraraa.”)

¹⁴ Eaha te titauhia ia rave no te faatupu  i te mau huru maitatai o ta Iehova e au? Eiaha noa e faaoti no tatou iho eaha te titauhia ia tatou ia taui, e vaiiho râ tatou i te Atua ia aratai mai. Te parau ra te Roma 12:2: “E eiaha e faaau atu i teie nei ao; ei huru ê râ to outou i te faahouraa i to outou aau, ia ite outou i taua hinaaro tia o te Atua ra, e te au, e te maitai hoi.” No reira, no te ite i ta Iehova e hinaaro ra, mea titauhia ia tiaturi tatou i te tauturu ta ˈna i horoa mai. Mea tia ia taio tatou i te Bibilia i te mau mahana atoa, ia feruri maite i ta tatou e taio ra e ia pure ia Iehova no te horoa mai i to ˈna varua moˈa. (Luka 11:13; Gal. 5:22, 23) Ma te na reira, e nehenehe Iehova e tauturu mai ia taa eaha te faaoaoa ia ˈna e e nehenehe tatou e haapii ia feruri mai ia ˈna. E nehenehe ïa to tatou mau manaˈo, ta tatou mau parau e mau ohipa e faaoaoa ˈtu â ia Iehova. E haapii atoa tatou i te haavî i to tatou mau paruparu. Noa ˈtu râ, e titauhia ia tatou ia tamau i te patoi i te reira.—Mas. 4:23.

¹⁵ Hau atu i te taioraa i te Bibilia i te mau mahana atoa, mea titauhia ia haapii i te reira maoti te tauturu a ta tatou mau papai, mai Te Pare Tiairaa e te A ara mai na! Te haapii mai ra e rave rahi tumu parau o teie mau vea e nafea e pee i te mau huru maitatai o Iehova e e nafea ia patoi i to tatou mau paruparu. E ite paha tatou i te tahi mau tumu parau aore ra i te mau irava faufaa roa no te tauturu ia tatou. E nehenehe tatou e haaputu mai i teie mau irava e tumu parau ia nehenehe  tatou e taio faahou i te reira i te tahi mau taime.

16. No te aha eiaha tatou e haaparuparu mai te peu e eita ta tatou e nehenehe e rave oioi i te mau tauiraa?

¹⁶ E titauhia te taime no te haapii i te pee i to Iehova mau huru maitatai. No reira, ia manaˈo oe e aita oe i rave i te mau tauiraa atoa o ta oe i hinaaro e rave, a tiai â. I te omuaraa, e titauhia paha ia faahepo ia oe iho no te rave i ta te Bibilia e parau ra. Rahi noa ˈtu â râ oe i te feruri e i te haa mai ta Iehova e hinaaro ra, ohie roa ˈtu â oe i te feruri mai ia ˈna e i te rave i te mea tano.—Sal. 37:31; Mas. 23:12; Gal. 5:16, 17.

17. Ia taiva ore tatou ia Iehova, eaha te a muri aˈe faahiahia mau ta tatou e ite mai?

¹⁷ Te tiai ru nei tatou i te taime e riro ai tatou ei taata tia roa e e tavini ia Iehova e a muri noa ˈtu. I tera taime, eita e titau-faahou-hia ia patoi i te tahi mau paruparu, e e riro ei mea ohie roa ˈtu â no tatou i te pee i to Iehova hiˈoraa. I teie râ mahana, e nehenehe tatou e haamori ia Iehova no te mea ua horoa mai oia i te ô o te hoo. Noa ˈtu e taata tia ore tatou, e nehenehe tatou e faaoaoa ia ˈna ia tamau tatou i te haa rahi no te taui e no te pee i ta ˈna e haapii mai i roto i te Bibilia.

18, 19. E nafea e papu ai ia tatou e puai to te Bibilia no te tamau i te taui i to tatou oraraa?

¹⁸ Ua tutava o Kevin i te haapii i te haavî i to ˈna riri. Ua feruri maite oia i ta ˈna i taio i roto i te Bibilia e ua tutava oia i te rave i te tahi mau tauiraa i roto i to ˈna oraraa. Ua pee atoa oia i te mau aˈoraa ta te mau hoa Kerisetiano i horoa ˈtu. Noa ˈtu e ua titauhia ia Kevin tau matahiti no te haamaitai i to ˈna huru, a mairi ai te tau, ua nehenehe oia e riro mai ei tavini tauturu. E i na 20 matahiti i mairi, ua tavini oia ei matahiapo. I teie atoa râ mahana, ua ite oia e e titauhia ia ˈna ia tamau i te patoi i to ˈna mau paruparu.

¹⁹ Mai ia Kevin, e nehenehe tatou e haamaitai i to tatou huru. Ia na reira tatou, e piri noa ˈtu â tatou ia Iehova. (Sal. 25:14) E ia tutava tatou i te rave i te mau tauiraa no te faaoaoa ia ˈna, e tauturu mai oia ia manuïa tatou. E papu ia tatou e maoti te tauturu a te Bibilia, e nehenehe tatou e tamau i te rave i te mau tauiraa i roto i to tatou oraraa.—Sal. 34:8.