1. Noa ˈtu e o Iehova te Atua Teitei, eaha ta ˈna e titau manihini ia vetahi ê ia rave?

 O IEHOVA te Atua teitei. Ua poiete oia i te mau mea atoa e mea faito ore to ˈna paari e to ˈna puai. I muri iho i to ˈna tautururaa ia Ioba ia taa i te reira, ua parau Ioba ia ˈna: “Ua ite au e, e puaihope to oe, e e ore ta oe i opua ra e tia ia faaore.” (Ioba 42:2) E nehenehe Iehova e rave i te mau ohipa atoa ta ˈna e faaoti i te rave ma te ore e titau i ta te tahi atu tauturu. Ua faaite râ oia i te here a titau manihini ai ia vetahi ê no te ohipa amui e o ˈna e no te faatupu i ta ˈna opuaraa.

2. Eaha te ohipa faufaa ta Iehova i hinaaro ia rave Iesu?

² Ua poiete te Atua i ta ˈna Tamaiti ra o Iesu hou oia a poiete ai i te taata e te tahi atu mau mea. Ua vaiiho Iehova i ta ˈna Tamaiti ia tauturu ia ˈna no te poiete i te tahi atu mau mea. (Ioa. 1:1-3, 18) Ua papai te aposetolo Paulo no nia ia Iesu: “Na ˈna hoi  i hamani i te mau mea atoa nei, o to te raˈi, e to te fenua nei, o tei itea ia hiˈo ra e tei ore i itea, te feia terono, e te feia hau, te hui arii, e te feia mana; e mea hamani-anaˈe-hia ïa e ana, e no ˈna anaˈe.” (Kol. 1:15-17) No reira aita noa Iehova i horoa i ta ˈna Tamaiti i te hoê ohipa faufaa, ua faaite atoa râ oia ia vetahi ê i te hopoia faufaa a ta ˈna Tamaiti. Auê ïa fanaˈoraa taa ê!

3. Ua titau manihini Iehova ia Adamu ia rave i te aha, e no te aha?

³ Ua hinaaro atoa Iehova ia ohipa amui mai te taata e o ˈna. Ei hiˈoraa, ua farii oia ia Adamu ia horoa i te iˈoa o te mau animara. (Gen. 2:19, 20) A feruri na i te oaoa o Adamu a rave ai i teie ohipa! Ua hiˈopoa maite oia i te huru o te mau animara e ua maiti oia i te hoê iˈoa no te mau animara taitahi. No te mea na Iehova i poiete i te mau animara atoa, e nehenehe ïa oia e horoa i te iˈoa o te mau animara. Teie râ, ua faaite oia i to ˈna here rahi no Adamu ma te farii ia ˈna ia horoa i te iˈoa o te mau animara. Ua horoa atoa te Atua i te hopoia ia Adamu ia faariro i te fenua ei paradaiso. (Gen. 1:27, 28) Ua faaoti râ Adamu e faaea i te ohipa e te Atua e ei faahopearaa, ua mauiui rahi oia e ta ˈna atoa mau huaai.—Gen. 3:17-19, 23.

4. Mea nafea vetahi e ohipa ˈi e te Atua no te faatupu i to ˈna hinaaro?

⁴ I muri iho, ua titau manihini te Atua i te tahi atu taata ia tavini e o ˈna. Ua patu Noa i te araka o tei faaora ia ˈna e to ˈna utuafare i te roaraa o te diluvi. Ua faatiamâ Mose i te nunaa Iseraela mai Aiphiti mai. Ua aratai Iosua ia Iseraela i roto i te Fenua tǎpǔhia. Ua patu Solomona i te hiero i Ierusalema. Ua riro mai Maria ei metua vahine no Iesu. Ua haa teie feia taiva ore atoa e te tahi atu e o Iehova no te faatupu i to ˈNa hinaaro.

5. I roto i teihea ohipa e nehenehe ai tatou e apiti, e te hinaaro ra anei Iehova ia apiti atoa tatou i roto i teie ohipa? (A hiˈo i te hohoˈa matamua.)

⁵ I teie mahana, te titau manihini ra Iehova ia tatou ia rave i te nehenehe ia tatou no te turu i to ˈna Basileia. E rave rahi ravea ta tatou no te tavini i te Atua. Noa ˈtu eita tatou e nehenehe e tavini ia ˈna mai te taatoaraa, e nehenehe tatou pauroa e poro i te parau apî oaoa o te Basileia. E nehenehe Iehova e rave i teie ohipa o ˈna anaˈe ma te paraparau tia ˈtu mai te raˈi mai i te taata i te fenua nei. Ua parau Iesu e e nehenehe Iehova e haaparaparau i te mau ofai ia vetahi ê no nia i te Arii o to ˈna Basileia. (Luka 19:37-40) Ua farii râ Iehova ia riro tatou ei “rave ohipa” no ˈna. (Kor. 1, 3:9) Ua papai te aposetolo Paulo: “E teie nei te aˈo atoa ˈtu nei matou, te rave ohipa amui nei [e o ˈna], ia outou, e eiaha outou e farii faufaa ore noa i te aroha mau o te Atua.” (Kor. 2, 6:1) E fanaˈoraa taa ê rahi mau ia titau-manihini-hia tatou no te ohipa e te Atua. E hiˈo anaˈe i te tahi mau tumu e fanaˈo ai tatou i te oaoa rahi maoti te reira.

6. Mea nafea te Tamaiti fanau tahi a te Atua i faataa ˈi i to ˈna huru aau no nia i ta ˈna ohipa e to ˈna Metua?

⁶ E ite noa te mau tavini a Iehova i te oaoa a ohipa ˈi e te Atua. Hou a haere mai ai i te fenua nei, ua parau te Tamaiti fanau tahi a te Atua: “Ia Iehova ra vau i haamata ˈi oia i ta ˈna ohipa . . . Tei pihaiiho hoi au ia ˈna i reira mai te tamaiti faaamu; e te oaoa noa ra vau i te mau mahana atoa ra, i te oaoa tamau-maite-raa i mua i tana aro.” (Mas. 8:22,  30) A ohipa ˈi e to ˈna Metua, ua oaoa Iesu i te faatupu e rave rahi ohipa e ua ite atoa oia e ua here Iehova ia ˈna. E no tatou ïa?

7. No te aha e hopoi mai te ohipa pororaa i te oaoa?

⁷ Ua parau Iesu e e oaoa tatou ia horoa ˈtu e oia atoa, ia rave mai. (Ohi. 20:35) Ua hopoi mai te reira i te oaoa a farii ai tatou i te parau mau. No te aha râ e oaoa atoa ˈi tatou ia faaite atu i te parau mau ia vetahi ê? No te mea te ite ra tatou i to ratou oaoa a taa ˈi ia ratou eaha ta te Bibilia e haapii ra e a haamata ˈi te hoê taairaa e te Atua. E oia atoa, i te iteraa e ua taui ratou i to ratou feruriraa e haerea. O te pororaa te ohipa faufaa roa ˈˈe ïa e te oaoa mau ta tatou e nehenehe e rave. Maoti te reira, e nehenehe te feia o te riro mai ei hoa o te Atua e fanaˈo i te ora mure ore.—Kor. 2, 5:20.

8. Eaha ta te tahi mau taata i parau no nia i te oaoa ia ohipa e o Iehova?

⁸ Ia tauturu tatou ia vetahi ê ia haapii no nia i te Atua, ua taa ia tatou e e faaoaoa tatou ia Iehova e e haafaufaa oia i ta tatou mau tutavaraa no te tavini ia ˈna. (A taio i te Korinetia 1, 15:58.) Te na ô ra Marco, o tei ora i Italia: “E oaoa rahi to ˈu i te iteraa e ua horoa vau i te mea maitai roa ˈˈe na Iehova, eiaha râ na te hoê taata e moe oioi ia ˈna i ta ˈu i rave.” Hoê â manaˈo to Franco, o te tavini ra i Italia, te parau ra oia: “Maoti ta ˈNa Parau e ta ˈna mau faanahoraa pae varua, ua haamanaˈo mai Iehova i te mau mahana atoa i to ˈna here no tatou e mea faufaa anaˈe te mau mea atoa ta tatou e rave no ˈna noa ˈtu e e au ra e no tatou mea faufaa ore ta tatou mau tutavaraa. Mea oaoa ïa ia rave i te ohipa e te Atua e mea faufaa te reira i roto i to ˈu oraraa.”

9. Eaha te taairaa e vai ra i rotopu ia Iehova e Iesu, e no te aha?

⁹ Ia ohipa amui tatou e te feia ta tatou e here ra, e haafatata ˈtu â tatou ia ratou. E ite  atu â ïa tatou no nia ia ratou e no nia i to ratou mau huru maitatai. E ite atoa tatou eaha ta ratou e opua i te rave e e nafea e naea ˈi ia ratou i te reira. Ua ohipa Iesu e o Iehova peneiaˈe e miria matahiti. No te puai râ o to raua here no te tahi e te tahi, aita hoê aˈe ohipa e nehenehe e haafifi i to raua taairaa. Ua faataa Iesu i to raua taairaa ma te parau: “O vau e te Metua ra, hoê â ïa.” (Ioa. 10:30) Ua hoê iho â raua e ua ohipa amui maitai atoa raua.

10. No te aha e haafatata ˈtu â ˈi te pororaa ia tatou i te Atua e ia vetahi ê?

¹⁰ Ua ani Iesu ia Iehova ia paruru i ta ˈna mau pǐpǐ. No te aha? Ua pure oia: “Ia hoê aˈe ratou mai ia tâua atoa nei â.” (Ioa. 17:11) Ia arataihia tatou e te mau faaueraa tumu a te Atua i roto i to tatou oraraa e ia faaite atu tatou i te reira i roto i te pororaa, e taa maitai ïa ia tatou i to ˈna mau huru maitatai faahiahia mau. Te haapii ra tatou no te aha e haerea paari ia tiaturi i te Atua e ia pee i ta ˈna aratairaa. Ia haafatata ˈtu tatou i te Atua, e haafatata atoa mai oia ia tatou. (A taio i te Iakobo 4:8.) Hau atu â, e haafatata ˈtu tatou i to tatou mau taeae e tuahine no te mea ua ite atoa tatou i te hoê â mau fifi e oaoaraa e o ratou e hoê â fa ta tatou. Te ohipa amui nei tatou, te oaoa amui nei e te faaruru amui nei tatou. Te parau ra Octavia, o te ora ra i Beretane: “Ua haafatata te ohiparaa e o Iehova ia ˈu ia vetahi ê.” Te faataa ra oia e ua niuhia to ˈna mau auhoaraa i nia i “te hoê â fa e aratairaa.” Mea papu, e na reira iho â tatou. I te iteraa i te mau tutavaraa o to tatou mau taeae no te faaoaoa ia Iehova, e haafatata ˈtu â tatou ia ratou.

11. No te aha e haafatata ˈtu â ˈi tatou ia Iehova e i to tatou mau taeae i roto i te ao apî?

¹¹ E puai to tatou here no te Atua e no to tatou mau taeae i teie nei â, e puai atu â râ te reira i roto i te ao apî. A feruri na i te mau ohipa faahiahia atoa ta tatou e rave a muri aˈe! E farii popou tatou i te feia e faatia-faahou-hia mai mai te pohe mai a haapii atu ai ia ratou no nia ia Iehova. E ohipa atoa tatou no te faariro i te fenua ei paradaiso. E oaoa rahi to tatou ia ohipa amui e ia naea riirii atu i te taata i te tia-roa-raa i raro aˈe i te faatereraa a te Mesia. E haafatata ˈtu â ïa te mau taata atoa te tahi i te tahi e ia Iehova atoa, o “te haamâha nei i te hiaai o te mau mea ora atoa nei.”—Sal. 145:16.

12. E nafea te pororaa e paruru ai ia tatou?

¹² Mea faufaa ia paruru i to tatou taairaa e o Iehova. Te ora nei tatou i roto i te ao a Satani, e ei taata tia ore, mea ohie no tatou ia feruri e ia haa mai ta to te ao. Mai te mea ra e, i roto i te hoê anavai mea opape, te au nei tatou. Tera râ, te turaihia ra tatou i roto i te  hoê vahi aita tatou e hinaaro e haere. No reira, mea tia ia faaohipa i to tatou puai atoa no te au i te tahi atu vahi o te anavai. Hoê â huru, mea faufaa ia haa rahi tatou no te ape i te aratairaa o te ao a Satani. E nafea ïa te pororaa e paruru mai ai? Ia paraparau tatou no nia ia Iehova e no nia i te Bibilia, ia tiatonu i nia i te mau ohipa faufaa e te maitai atoa. Eiaha râ i nia i te mau ohipa o te haaparuparu i to tatou faaroo. (Phil. 4:8) E haapuai te pororaa i to tatou faaroo no te mea te haamanaˈo mai ra te reira i te mau parau fafau a te Atua e i ta ˈna mau faaueraa tumu î i te here. E tauturu atoa mai te reira ia tatou ia faaite tamau i te mau huru maitatai ta tatou e hinaaro rahi no te paruru ia tatou iho ia Satani e i ta ˈna ao.—A taio i te Ephesia 6:14-17.

13. Eaha ta te hoê tuahine no Auteralia i parau no nia i te pororaa?

¹³ Ia haa rahi tatou i roto i te pororaa, te haapiiraa e te tautururaa ia vetahi ê i roto i te amuiraa, e paruru te reira ia tatou no te mea aita e taime no te haapeapea rahi aˈe i to tatou mau fifi. Te parau ra Joel, o te ora ra i Auteralia: “Ua tauturu mai te ohipa pororaa ia ore e haapao rahi aˈe i to ˈu mau fifi. Ua haamanaˈo vau i te mau tautooraa ta te feia e faaruru ra e i te mau haamaitairaa ta ˈu i fanaˈo a faaohipa ˈi au i te mau faaueraa Bibilia i roto i to ˈu oraraa. Ua tauturu atoa te ohipa pororaa ia ˈu ia faaite i te haehaa, maoti te reira i nehenehe ai au e tiaturi ia Iehova e i te mau taeae e tuahine.”

14. Na te aha e faaite e tei ia tatou ra te varua moˈa o te Atua a faaoromai ai tatou i roto i te pororaa?

¹⁴ E horoa atoa mai te pororaa hau atu â tiaturiraa e tei ia tatou ra iho â te Atua. Ei hiˈoraa, ta oe ohipa, o te opereraa ïa i te faraoa na te taata o to oe nunaa. Eita oe e aufauhia no tera ohipa e e na oe iho e aufau i te mau haamâuˈaraa. Eita atoa te rahiraa o te taata e hinaaro i te faraoa, e no vetahi, mea riri roa na ratou ia afai atu oe i te reira na ratou. E tamau noa anei oe i te rave i tera ohipa? Peneiaˈe e haaparuparu te reira ia oe a hinaaro atu ai paha e faarue atu i teie ohipa. No te rahiraa o tatou, te tamau ra i te poro i te mau matahiti atoa noa ˈtu e titauhia te taime, te moni e noa ˈtu e faaooo mai te taata ia tatou aore ra e riri mai. Te haapapu ra te reira e te tauturu mai ra te varua moˈa o te Atua ia tatou.

15. E nafea te ohipa pororaa i taaihia ˈi i te opuaraa a Iehova no te huitaata?

¹⁵ E nafea te ohipa pororaa i taaihia ˈi i te opuaraa a Iehova no te huitaata? Ua hinaaro te Atua ia ora te taata e a muri noa ˈtu e aita te reira i taui a hara ˈi Adamu. (Isa. 55:11) Ua rave te Atua i te hoê faanahoraa ia tiamâ mai tatou i te hara e te pohe. E nafea ïa? Ua haere mai Iesu i te fenua nei e ua pûpû oia i to ˈna ora. No te fanaˈo râ i to ˈna tusia, mea faufaa no te taata ia auraro i  te Atua. Ua haapii ïa Iesu i te taata eaha ta te Atua e tiai ra ia ratou e ua faaue oia i ta ˈna mau pǐpǐ ia na reira atoa. Ia poro e ia tauturu tatou ia vetahi ê ia riro mai ratou ei hoa no te Atua i teie mahana, te ohipa tia ˈtu nei tatou e te Atua i roto i ta ˈna faanahoraa î i te here no te faaora i te taata i te hara e te pohe.

16. E nafea ta tatou pororaa i taaihia ˈi i te mau faaueraa rahi roa ˈˈe a te Atua?

¹⁶ Ia tauturu tatou ia vetahi ê ia ite i te eˈa no te ora mure ore, e faaite ïa tatou e te here ra tatou ia ratou e ia Iehova atoa. Ua ‘hinaaro oia i te taata atoa ia ora, e ia noaa te ite i te parau mau.’ (Tim. 1, 2:4) Ua ani te hoê Pharisea ia Iesu eaha te faaueraa rahi roa ˈˈe a te Atua, ua pahono atu Iesu: “Hinaaro oe i to Atua ia Iehova ma to aau atoa, e ma to varua [aore ra “ora,” Traduction du monde nouveau] atoa, e ma to manaˈo atoa. O te ture matamua teie e te hau i te rahi. E mai te reira atoa te piti; E aroha ˈtu oe i to taata-tupu, mai to aroha ia oe iho na.” (Mat. 22:37-39) E auraro tatou i teie mau faaueraa ma te poro i te parau apî oaoa.—A taio i te Ohipa 10:42.

17. Eaha to outou huru aau no nia i te fanaˈoraa taa ê e poro i te parau apî oaoa?

¹⁷ Auê ïa haamaitairaa ta tatou! Ua horoa mai Iehova i te hoê ohipa o te faaoaoa ia tatou, o te turai mai ia haafatata ˈtu tatou ia ˈna e i to tatou mau taeae e o te paruru i to tatou mau taairaa e o ˈNa. Ma te na reira, e faaite ïa tatou i to tatou here no te Atua e no vetahi ê. E mirioni tavini a Iehova na te ao e e tupuraa taa ê to ratou. Noa ˈtu mea apî tatou aore ra mea paari, mea ona aore ra mea veve, mea puai aore ra mea paruparu, e nehenehe tatou pauroa e faaite i to tatou faaroo ia vetahi ê. E tuea paha to tatou manaˈo e to Chantel, no Farani, o te na ô ra: “Ua parau mai te Atua puai roa ˈˈe o te ao nui e o tei poiete i te mau mea atoa, te Atua oaoa: ‘A haere e paraparau! A paraparau no ˈu, a paraparau ma to outou aau. E horoa ˈtu vau i te puai, ta ˈu Parau te Bibilia, te tauturu no te raˈi mai e no te fenua nei, te hoê faaineineraa tamau e te mau faaueraa taa maitai i te taime au mau.’ Auê ïa fanaˈoraa taa ê ia rave i ta Iehova e ani maira e ia ohipa amui e to tatou Atua!”