Eaha tei tupu? No te aha te Atua i ore ai i aro no te mau ati Iuda mai ta ˈna i rave na mua ˈˈe? Aore ra, no te aha oia i ore i faaue ia aro ia tiamâ mai ratou i te faatîtîraa? Ua taui anei te manaˈo o te Atua i te tamaˈi? Aita. Hoê ohipa râ tei taui no te mau ati Iuda. Aita ratou i farii ia Iesu, te Tamaiti a te Atua, ei Mesia. (Ohipa 2:36) No reira, ei nunaa, ua ere ratou i te auhoaraa taa ê e te Atua.—Mataio 23:37, 38.

Aita te mau ati Iuda e te Fenua tǎpǔhia i fanaˈo faahou i te paruru a te Atua. Eita atoa ratou e nehenehe e parau ma te tia te farii aore ra te turu ra te Atua i ta ratou mau aroraa. Mai ta Iesu i tohu, ua horoahia te mau maitai o te farii maitai a te Atua i te tahi atu nunaa apî tei piihia i muri aˈe i roto i te Bibilia, ‘te Iseraela o te Atua.’ (Galatia 6:16; Mataio 21:43) Ua haapapu te amuiraa o te mau Kerisetiano faatavaihia e te varua moˈa o ratou te Iseraela o te Atua. I te senekele matamua, ua parauhia ia ratou: “O outou, . . . o tei riro rā i teie nei ei nunaa no te Atua.”—Petero 1, 2:9, 10, Te Faufaa Api.

Mai te taime i riro ai te mau Kerisetiano matamua ei nunaa no te Atua, ua aro anei oia no te faatiamâ ia ratou i te rima o Roma? Ua faaue anei oia ia aro atu? Aita. Eaha te tumu? Mai ta te tuhaa na mua ˈtu i faaite, o ˈna anaˈe te nehenehe e maiti afea ta ˈna aroraa e tupu ai. Aita te Atua i aro no te mau Kerisetiano matamua e aita atoa i faaue atu ia haere i te tamaˈi. E nehenehe ïa e parau, e ere te senekele matamua te taime ta te Atua i maiti no te faaore i te ino e te haavîraa.

Mai te mau tavini a te Atua i tahito ra, ua faaoromai te mau Kerisetiano matamua tae roa i te taime ta te Atua i maiti no te faaore i te ino e te haavîraa. A tiai noa ˈi, aita te Atua i faaue ia aro i to ratou enemi. Ua haapapu maitai Iesu Mesia i te reira i roto i ta ˈna mau haapiiraa. Aita oia i faaitoito i ta ˈna mau pǐpǐ ia aro, ua na ô atu râ: “E aroha i to outou mau enemi, . . . e pure hoi no te feia hamani ino mai ia outou.” (Luka 6:27, 28) I to ˈna faahitiraa i te taime e haruhia ˈi Ierusalema e te nuu Roma i te senekele matamua, aita Iesu i parau i ta ˈna mau pǐpǐ ia faaea i ǒ e ia aro. Ua faaue râ ia horo, e tera iho â ta ratou i rave.—Luka 21:20, 21.

Hau atu â, ua faaurua te Atua i te aposetolo Paulo ia papai: “Eiaha outou e tahoo, . . . ua papaihia hoi e, Te parau maira Iehova, Ei ia ˈu te riri, na ˈu ïa e tahoo atu.” (Roma 12:19) Ua faahiti Paulo i ta te Atua i parau e rave rahi matahiti na mua ˈtu i roto i te Levitiko 19:18 e te Deuteronomi  32:35. Mai ta te tuhaa na mua ˈtu i faaite, ua tahoo te Atua no to ˈna nunaa i tahito ra ma te turu atu a aro ai i to ratou mau enemi. Te faaite ra ïa ta Paulo mau parau, aita te manaˈo o te Atua i te tamaˈi i taui. I te senekele matamua, ua riro noa iho â te aroraa aore ra te tamaˈi ei ravea no te paruru i to ˈna mau tavini e no te faaore i te mau ohipa iino e haavîraa huru rau. Mai tahito ra, o te Atua anaˈe atoa te nehenehe e maiti afea ta ˈna aroraa e tupu ai e o vai te haere e tamaˈi.

Aita ïa te Atua i faaue i te mau Kerisetiano i te senekele matamua ia haere i te tamaˈi. E teie mahana? Ua faaue anei te Atua i te tahi pǔpǔ taata ia haere i te tamaˈi? Ua tae anei tatou i te taime ta te Atua i maiti no te aro no to ˈna mau tavini? Eaha te manaˈo o te Atua i te tamaˈi i teie mahana? E pahonohia tera mau uiraa i roto i te tuhaa hopea.