A tiaturi ia Iehova no te ora ˈtu!
“E tiaturi ia Iehova ma to aau atoa ra; eiaha râ e tiaturi i to oe ihora haapao.”—MAS. 3:5.
1. No te aha tatou paatoa e hinaaro ai i te tamahanahanaraa?
TE INO o te taata, te maˈi, te matahiti rahi, te pohe o te herehia, te hamani-ino-raa e te mau haapeapearaa. E ere anei tera ta tatou e ite nei i teie “mau mahana hopea”? Te ora nei tatou i te hoê “tau ino mau.” (Tim. 2, 3:1) Mea maoro paha tatou i te tiairaa ia tupu ta Iehova mau parau fafau. Noa ˈtu ua fatata roa te ao apî, e faaruru â tatou i te fifi. Eaha ïa te nehenehe e tamahanahana mai?
2, 3. (a) Eaha ta tatou i ite no nia ia Habakuka? (b) No te aha tatou e faufaahia ˈi ia hiˈopoa i te buka a Habakuka?
2 No te ite i te pahonoraa i tera uiraa, e hiˈopoa anaˈe i te buka a Habakuka. Mea iti ta te mau Papai e faaite ra no nia ia Habakuka. E poroi mahanahana mau râ ta Iehova e horoa mai ra na roto i taua peropheta. E au ra e “tauahi mahanahana” te auraa o te iˈoa Habakuka. Tano maitai tera hohoˈa i te hoê tamarii o te haru i to ˈna metua tane. Ia tiaturi papu tatou ia Iehova, e tamahanahana mai oia ia tatou mai te hoê metua e tauahi i ta ˈna tamarii. Hau atu â, te faaitehia ra e ua faahiti Habakuka e rave rahi uiraa i te Atua. Ua pahono Iehova i te peropheta e ua hinaaro atoa oia ia papai Habakuka i te reira maoti te aratairaa a to ˈna varua moˈa. Ua ite to tatou Atua e faufaahia tatou i ta ˈna i pahono i te peropheta ra.—Hab. 2:2.
3 Ua faahiti-noa-hia te parau o Habakuka i roto anaˈe i ta ˈna buka, mea faufaa râ ta ˈna i papai. E tuhaa te reira o ‘te mau parau atoa i papaihia mai tahito mai â, ua papaihia ïa . . . ia noaa ia tatou te tiaturiraa na roto i te faaoromai tamau e te tamahanahanaraa a te mau Papai.’ (Roma 15:4) E tauturu mai te buka a Habakuka ia taa eaha mau na te auraa ia tiaturi ia Iehova. Hau atu â, e ite atoa tatou e nafea ia tapea i te feruriraa maitai noa ˈtu eaha te fifi aore ra ati ta tatou e faaruru.
E PURE ANAˈE IA IEHOVA
4. No te aha Habakuka i hepohepo ai?
4 A taio i te Habakuka 1:2, 3. I te tau o Habakuka, ua rahi roa te feia ino e te ohipa tia ore. Ua oto roa te peropheta i te iteraa i te mau Iseraela ia haamauiui i te tahi e te tahi ma te aroha ore. No reira oia i ui ai, ‘Afea te ino e faaorehia ˈi? Eaha te maoro e Iehova?’ Aita anei oe i feruri aˈenei mai ia ˈna? Ua hepohepo roa Habakuka i taparuparu ai o ˈna ia Iehova ia ohipa mai. Ua haamata paha te peropheta i te manaˈo aita o Iehova e tâuˈa faahou ra i to ˈna nunaa aore ra mea taere oia no te ohipa mai.
Eiaha e taiâ i te faaite i to tatou mau manaˈo horuhoru ia Iehova
5. Eaha ta tatou e haapii mai na roto i te buka a Habakuka? (A hiˈo i te hohoˈa matamua.)
5 Ua faaea anei Habakuka i te tiaturi ia Iehova e i ta ˈna mau parau fafau? Aita, ua fariu hoi oia ia Iehova ra no te ani i ta ˈna tauturu. A tiatonu ai râ te peropheta i nia i te mau fifi e haaati ra ia ˈna, haamata ihora oia i te feruri, ‘Eaha te maoro e Iehova? Eaha te tumu oe e vaiiho ai i te taata ia mauiui?’ No te aha te mau manaˈo horuhoru o Habakuka i papaihia ˈi i roto i te Bibilia? No te faaitoito mai ia haamahora i to tatou aau ia Iehova. Ia hepohepo aore ra ia teimaha tatou, eiaha e taiâ i te pure e te faaite atu i to tatou mau manaˈo horuhoru. (Sal. 50:15; 62:8) Mea tano maitai te faaitoitoraa a te Maseli 3:5: “E tiaturi ia Iehova ma to aau atoa ra; eiaha râ e tiaturi i to oe ihora haapao.”
6. No te aha mea faufaa te pure?
6 Aita Habakuka i imi i te faatitiaifaro i te mau fifi na roto i to ˈna iho puai. Ua tiaturi râ oia ia Iehova. Ua haamahora Habakuka i to ˈna aau ma te paraparau atu i to ˈna Hoa e Metua atoa. Eaha te haapiiraa no tatou? O Iehova te Atua o te faaroo i te pure. Ia faaite atu tatou i to tatou mau manaˈo horuhoru, te tiaturi ra ïa tatou ia ˈna. (Sal. 65:2) E ite tatou i te tauahi mahanahana a Iehova. E topa hoi te hau e e horoa mai oia i te aratairaa papu. (Sal. 73:23, 24) E tauturu mai te reira ia taa i ta ˈna huru hiˈoraa i to tatou tupuraa. Ua riro te pure ei faaiteraa papu i to tatou tiaturi ia Iehova.
E FAAROO ANAˈE IA IEHOVA
7. Mai te aha te huru o Iehova i te faaiteraa Habakuka i ta ˈna e haapeapea ra?
7 A taio i te Habakuka 1:5-7. Noa ˈtu ua faaite Habakuka ia Iehova i ta ˈna e haapeapea ra, ua uiui â oia eaha ta Iehova e rave. Mai te hoê metua î i te here, ua taa ia Iehova te hinaaro ra Habakuka i te tauturu. Aita Iehova i faahapa ˈtu, ua faaite atu râ i ta ˈna e rave no te faautua i te feia taiva i Iuda. O Habakuka ïa te taata matamua ta Iehova i faaite i te faautuaraa ta teie feia e faaruru.
8. No te aha Habakuka i huru ê ai i ta Iehova pahonoraa?
8 Ua haapapu ïa Iehova ia Habakuka e ere oia i te mea taere no te ohipa mai. E faaohipa oia i te Kaladaio, oia hoi i to Babulonia, no te faautua i te feia iino i Iuda. Ma te parau “to outou nei pue mahana,” ua faaite Iehova e tupu te reira a ora noa ˈi Habakuka aore ra te mau Iseraela ati aˈe ia ˈna. Eaha o Iehova i maiti ai i to Babulonia, te hoê nunaa taata ino aˈe i to Iseraela e tei ore i haapao i ta ˈna mau ture aveia? Ahani o tatou Habakuka, eita anei tatou e huru ê i ta Iehova raveraa?
9. Eaha ˈtu â ta Habakuka i ani ia Iehova?
9 A taio i te Habakuka 1:12-14, 17. Noa ˈtu e ua hitimahuta Habakuka i ta Iehova raveraa, ua faaite oia i te haehaa e ua tamau i te tiaturi ia Iehova. No reira o ˈna i parau ai o Iehova “te Mato.” (Deut. 32:4; Isa. 26:4) Ua papu ia Habakuka e Atua î i te here e te hamani maitai o Iehova. Ma te taiâ ore, mai te huru ra ua ani â oia ia Iehova: Eaha oe e vaiiho ai ia rahi roa te ino i Iuda e ia mauiui to oe nunaa? Eaha oe e tiai ai no te faatitiaifaro i to matou nei fifi? Iehova o oe te Atua Manahope, no te aha oe e mamû noa ˈi i mua i te ino rahi? E ere anei o oe “Tei Moˈa ra, . . . e ore to oe mata maitai e tia ia hiˈo i te ino?”
10. No te aha tatou e taa ˈi ia Habakuka?
10 Te taa ra ia tatou te autâ a Habakuka. I teie mahana, te faaroo ra tatou i te reo o Iehova maoti ta ˈna Parau e ta ˈna faanahonahoraa. E tauturu mai te reira ia mau papu i to tatou tiaturiraa no a muri aˈe. Noa ˈtu râ, e ui iho â tatou i te tahi taime, ‘Afea te hopea e tae mai ai?’ E hiˈo anaˈe eaha te tahi atu haapiiraa ta Habakuka e horoa mai ra no tatou.
E TIAI ANAˈE I TE TAIME E OHIPA MAI AI IEHOVA
11. Eaha ta Habakuka i faaoti papu i te rave?
11 A taio i te Habakuka 2:1. Ua topa te hau o Habakuka i muri aˈe i to ˈna aparauraa ia Iehova. Ua faaoti papu oia i te tiai i te taime e ohipa mai ai Iehova. Ta Habakuka ïa i haapapu ia ˈna i parau: “E faaea râ vau ia tae mai i taua mahana ahoaho ra.” (Hab. 3:16) Ua pee atoa te tahi atu mau tavini o te Atua i to ˈna hiˈoraa. Mai ia ratou, e tiai atoa anaˈe ia Iehova ma te faaoromai.—Mika 7:7; Iak. 5:7, 8.
E tiai maite anaˈe i te taime ta Iehova i faaoti no te faaore i te mauiui atoa
12. Eaha te haapiiraa e huti mai i te hiˈoraa o Habakuka?
12 Eaha te tauturu mai ia tiai maite ia Iehova mai ia Habakuka? A tahi, e tamau anaˈe i te faaite ia Iehova i to tatou mau manaˈo horuhoru na roto i te pure noa ˈtu eaha te fifi. A piti, e faaroo anaˈe i ta Iehova e parau mai ra maoti ta ˈna Parau e ta ˈna faanahonahoraa. A toru, e tiai maite anaˈe i te taime ta Iehova i faaoti no te faaore i te mauiui atoa. E topa te hau e e faaoromai tamau ïa tatou i te fifi. Maoti to tatou tiaturiraa papu no a muri aˈe, e faaoromai e e oaoa tatou noa ˈtu eaha ta tatou e faaruru. Ua papu hoi ia tatou e ohipa mai iho â to tatou Metua i te raˈi.—Roma 12:12.
13. Mea nafea Iehova i te tamahanahanaraa ia Habakuka?
13 A taio i te Habakuka 2:3. Ua mauruuru roa Iehova e ua tiaturi papu Habakuka ia ˈna. Ua taa maitai i to tatou Atua Manahope i te autâ a te peropheta. Ma te here, ua tamahanahana e ua haapapu oia ia Habakuka fatata oia i te ohipa mai. Mai te huru ra ua parau Iehova ia ˈna: “Habakuka, a faaoromai e a tiaturi noa mai ia ˈu! Manaˈo noa â oe mea taere au, e pahono râ vau i ta oe pure.” Ua haamanaˈo atu Iehova ua faaoti ê na o ˈna i te mahana e tupu roa ˈi ta ˈna opuaraa. Ua faaitoito râ oia ia Habakuka ia tamau i te tiai, eita to ˈna mahana e maoro roa.
No te aha e titauhia ia faaohipa maitai i to tatou taime no te tavini ia Iehova? (A hiˈo i te paratarafa 14)
14. I roto i te ati, ia faaoti papu tatou i te aha?
14 I teie mahana, e titau-atoa-hia ia faaroo maite i ta Iehova e parau mai ra e ia tiai i te taime e ohipa mai ai o ˈna. E tamau ïa tatou i te tiaturi ia ˈna e eita tatou e aueue noa ˈtu eaha te ati ta tatou e faaruru. Ua faaitoito mai Iesu eiaha ia tiatonu i “te hora aore ra te tau” ta te Atua i faaoti. (Ohi. 1:7) O Iehova anaˈe tei ite i te taime maitai roa ˈˈe no te ohipa mai, e tiaturi anaˈe ïa ia ˈna! Ta tatou tuhaa, o te faaiteraa i te haehaa, te faaoromai e te tiaturi i te Atua. A tiai noa ˈi râ, e faaohipa maitai anaˈe i to tatou taime no te tavini ia Iehova ma te taiva ore.—Mar. 13:35-37; Gal. 6:9.
E ORA TE TAATA E TIATURI IA IEHOVA!
15, 16. (a) Eaha ta Iehova i fafau i roto i te buka a Habakuka? (b) Eaha ta te reira e haapii mai ra?
15 Eaha te haamaitairaa e noaa i te feia o te faaoromai e te tiaturi ia ˈna? Ua fafau Iehova i te horoa i te “ora” i te taata parau-tia e “ei reira e î ai te fenua i te ite i te hanahana o Iehova.”—Hab. 2:4, 14.
16 Mea faufaa roa te mau parau o te Habakuka 2:4. Ua faahiti te aposetolo Paulo i te reira e toru taime. Te hinaaro ra hoi Iehova ia tiatonu tatou i nia i to tatou tiaturiraa no a muri aˈe. (Roma 1:17; Gal. 3:11; Heb. 10:38) No te ite i te tupuraa o ta te Atua mau parau fafau, e tamau anaˈe i te tiaturi ia Iehova noa ˈtu eaha te fifi.
17. Ia tiaturi tatou ia Iehova, eaha ta ˈna e haapapu mai ra?
17 Te fafau ra Iehova i te horoa i te ora mure ore i te feia parau-tia o te tiaturi ia ˈna. E faaitoitoraa mahanahana mau te buka a Habakuka no tatou e ora nei i te mau mahana hopea. E tamau anaˈe i te tiaturi i te Atua noa ˈtu eaha te fifi. Na roto i ta ˈna i parau ia Habakuka, te haapapu mai ra Iehova na ˈna e tauturu e e faaora ia tatou. Ta ˈna noa e ani ra, ia tiaturi tatou ia ˈna e ia tiai tatou ma te faaoromai i te taime e faatere mai ai ta ˈna Faatereraa arii i te fenua. I tera mahana, e ite te feia atoa e haamori ra ia ˈna i te oaoa e te hau i nia i te fenua taatoa!—Mat. 5:5; Heb. 10:36-39.
A TIATURI IA IEHOVA E A OAOA!
18. Eaha to Habakuka huru no ta Iehova i parau ia ˈna?
18 A taio i te Habakuka 3:16-19. Ua itoitohia Habakuka no ta Iehova i parau ia ˈna. Ma te feruriruri i ta Iehova i rave no to ˈna nunaa i tahito, ua puaihia te faaroo o te peropheta e ua tiaturi atu â o ˈna ia Iehova! Noa ˈtu ïa e oto â Habakuka maa taime, aita oia i haapeapea faahou. Ua papu ia Habakuka e faaora Iehova ia ˈna. I roto i te Bibilia, aita e taata ê atu tei faaite i te hoê â tiaturi e to Habakuka. Ua na ô hoi oia i roto i te irava 18: “E oaoa vau ia Iehova, e ouˈauˈa noa vau i te Atua i to ˈu nei ora.” Eaha te haapii mai? Ua faaite Iehova ia tatou i te mau parau fafau faahiahia mau no a muri aˈe. E ere râ tera anaˈe, te haapapu mai ra hoi Iehova fatata roa oia i te faatupu ta ˈna i fafau mai.
19. Mai ia Habakuka, e nafea Iehova ia tamahanahana ia tatou?
19 E tiai ia Iehova, tera te haapiiraa faufaa roa o te buka a Habakuka. (Hab. 2:4) Eaha ïa te titauhia no te tiaturi papu atu â ia Iehova? A tahi, e tamau anaˈe i te pure no te faaite i to tatou mau manaˈo horuhoru e haapeapearaa. A piti, e faaroo maite anaˈe i ta Iehova e parau mai ra na roto i te Bibilia e ta ˈna faanahonahoraa. A toru, e faaoromai e e tiai maite anaˈe ia tupu ta Iehova mau parau fafau. I te haamataraa ua oto Habakuka, ua itoitohia râ e ua oaoa oia i muri aˈe i te paraparauraa ia Iehova. Mai ia Habakuka, e itoito-atoa-hia tatou i teie mau mahana hopea maoti te tauahi mahanahana a to tatou Metua i te raˈi o Iehova.