1, 2. (a) Eaha ta Iesu i pahono i to Petero faahitiraa i te manaˈo taata? (A hiˈo i te hohoˈa matamua.) (b) No te aha Iesu i pahono ai mai tera?

 I TO Iesu faaiteraa e fatata oia i te hamani-ino-hia e te haapohehia, ua maere roa ta ˈna mau pǐpǐ! I manaˈo na hoi ratou e haamau Iesu i ta ˈna faatereraa i Iseraela. Teie ta te aposetolo Petero i parau ia Iesu: “E te Fatu, eiaha oe e na reira i te parau, e ore roa oe e roohia i teie mau mea.” Pahono ihora Iesu: “Haere na muri mai ia ˈu, Satani! E turoriraa oe no ˈu, no te mea e ere to oe manaˈo i to te Atua, to te taata râ.”—Mat. 16:21-23; Ohi. 1:6.

² Na roto i ta ˈna i pahono atu, ua haapapu Iesu mea taa ê te manaˈo o Iehova i to teie ao faaterehia e Satani. (Ioa. 1, 5:19) Ua turai hoi Petero ia Iesu ia imi i to ˈna iho maitai. Ua taa râ oia aita te reira i tuati i te  manaˈo o te Atua. Ua hinaaro hoi Iehova ia faaineine Iesu ia ˈna no te mauiui e te pohe ta ˈna e faaruru. Ua haapapu ta Iesu pahonoraa ua farii oia i te manaˈo o Iehova, ua patoi râ i to teie nei ao.

3. No te aha e ere i te mea ohie ia farii i te manaˈo o Iehova e ia patoi i to teie nei ao?

³ E tatou, to vai manaˈo ta tatou e pee? To Iehova aore ra to te taata o teie nei ao? Parau mau, e tutava tatou i te rave i te ohipa e mauruuru ai te Atua. Te na reira atoa nei râ tatou no te manaˈo mai ia Iehova? Te mana ra te reva aore ra huru feruriraa o teie nei ao i nia i te taata e haaati ra ia tatou. (Eph. 2:2) Mea pinepine te taata i te turai mai ia haapao noa ia tatou iho. Mea ohie roa ïa ia manaˈo mai te rahiraa. E titauhia ia tutava no te manaˈo mai ia Iehova!

4. (a) Eaha te tupu ia ore tatou e patoi i te huru feruriraa o te ao? (b) Eaha ta tatou e haapii i roto i teie haapiiraa?

⁴ Mea faufaa roa ia haapii tatou i te manaˈo mai te Atua, eiaha râ mai te taata. Ia ore, e rave tatou i to tatou iho hinaaro ma te ore e tâuˈa i te mea ino e i te mea maitai i te aro o Iehova. (Mar. 7:21, 22) I roto i teie haapiiraa, e hiˈo mai tatou no te aha e mea maitai ia manaˈo mai ia Iehova e e nafea tatou e faufaahia ˈi ia na reira. Hau atu â, e haapii mai tatou e nafea ia patoi i te huru feruriraa o teie nei ao. I roto i to mua ˈtu haapiiraa, e hiˈopoa tatou e nafea ia manaˈo mai ia Iehova i roto i te tahi mau tuhaa taa maitai.

5. No te aha te tahi mau taata e ore ai e farii i te manaˈo o vetahi ê?

⁵ Eita te tahi mau taata e farii i te manaˈo o vetahi ê. E na ô paha ratou i te feruri, ‘E tiamâraa to ˈu ia manaˈo mai tera!’ Te hinaaro ra ratou e rave i ta ratou iho faaotiraa ma te ore e rave mai te rahiraa. *

6. (a) Eaha te tiamâraa ta Iehova i horoa mai? (b) Te auraa anei aita to tatou tiamâraa i taotiahia?

⁶ Ia farii tatou i te manaˈo o Iehova, te auraa anei eita tatou e nehenehe e rave i ta tatou iho faaotiraa? E ere Iehova i te Atua etaeta. Te parau ra hoi te Korinetia 2, 3:17: “I te vahi tei reira te varua o Iehova, tei reira atoa ïa te tiamâraa.” Ua hamani te Atua ia tatou ma te horoa mai i te tiamâraa ia maiti i te mau mea ta tatou e au e e anaanatae. E vaiiho Iehova ia tatou ia maiti i te huru taata ta tatou e hinaaro e riro mai. E ere râ te auraa aita to tatou tiamâraa i taotiahia. (A taio i te Petero 1, 2:16.) No te tauturu ia tatou ia rave i te faaotiraa, te ani mai ra Iehova ia hiˈo i roto i ta ˈna Parau no te ite eaha te mea maitai e te mea ino.

7, 8. E faufaahia anei tatou ia manaˈo mai ia Iehova? A horoa i te hiˈoraa.

 ⁷ Mea ino anei ta Iehova e ani mai ra? E rave anaˈe i te hiˈoraa o te metua e haapii i te mea maitai i ta ˈna tamarii. E faaitoito atu oia ia faaite i te parau mau, ia ohipa ma te itoito e ia tâuˈa ia vetahi ê. Mea ino anei ta te metua e haapii ra? Aita, e faufaahia hoi ta ˈna tamarii i te reira i roto i to ˈna oraraa. Ia paari e ia faarue te tamarii i te fare, e tiamâraa to ˈna ia rave i ta ˈna iho faaotiraa. Ia haapao te tamarii i ta to ˈna metua i haapii atu, e rave oia i te faaotiraa maitai a oaoa ˈtu ai i roto i to ˈna oraraa.

⁸ Mai te hoê metua î i te here, te hinaaro ra Iehova ia oaoa ta ˈna mau tamarii atoa. (Isa. 48:17, 18) Maoti ta ˈna mau faaueraa tumu, te faaite mai ra oia eaha te mea maitai e te mea ino e e nafea ia hamani maitai ia vetahi ê. Te titau ra oia ia haapii tatou i te manaˈo mai ia ˈna e ia ora ia au i to ˈna hinaaro. (Sal. 92:5; Mas. 2:1-5; Isa. 55:9) E ere i te mea ino, maoti hoi ta ˈna mau faaueraa e noaa ˈi ia tatou te paari no te rave i te faaotiraa maitai. Noa ˈtu e manaˈo tatou mai ia Iehova, e nehenehe â tatou e rave i ta tatou iho faaotiraa a oaoa ˈtu ai. (Sal. 1:2, 3) O tatou te faufaahia ia manaˈo mai ia Iehova!

9, 10. Eaha te haapapu ra e mea hau ê te manaˈo o Iehova?

⁹ E aratairaa ta teie ao e horoa ra no nia i te haerea maitai, te oraraa utuafare, te toroa maitai aˈe e te vai ra ˈtu â. Aita roa ˈtu râ te reira i tuati i te manaˈo o Iehova. Te faaitoito ra hoi teie ao i te taata ia imi i to ratou anaˈe maitai, ia farii i te peu taotoraa tia ore e ia faataa i te hoa faaipoipo no te tahi tumu haihai. Eita te taata e maitaihia i te mau aˈoraa no ǒ mai i teie ao! Na te aha e haapapu mai ra?

¹⁰ Ua parau Iesu: “Na te mau ohipa parau-tia ta te hoê taata e rave e haapapu e e taata paari oia.” (Mat. 11:19) A hiˈo na, noa ˈtu e ua haere teie ao i mua i te pae o te mau ravea apî, aita i tia i te taata ia faaore i te tamaˈi, i te hiˈo-ê-raa e i te taparahiraa taata. Ma te farii i te peu taotoraa tia ore, ua amahamaha te mau utuafare, ua maˈihia vetahi aore ra ua topa i roto i te fifi ê atu. Ta vai aˈoraa te mea maitai aˈe no te taata? E ere anei ta Iehova? Ma te haapao i te manaˈo o Iehova, e oraraa utuafare oaoa to te mau Kerisetiano, e ea maitai to ratou e te vai hau atoa ra e to ratou mau taeae e tuahine na te ao nei. (Isa. 2:4;  Ohi. 10:34, 35; Kor. 1, 6:9-11) E haapapuraa anaˈe tera e mea hau ê te manaˈo o Iehova!

11. To vai manaˈo ta Mose i maiti no te aratai ia ˈna e eaha te haamaitairaa ta ˈna i fanaˈo?

¹¹ Ua taa atoa i te mau tavini o te Atua i tahito e mea hau ê te manaˈo o Iehova. Noa ˈtu e ua haapiihia ia ˈna “i te mau parau paari atoa a to Aiphiti,” ua faaoti Mose i te pee i te paari mau no ǒ mai ia Iehova. (Ohi. 7:22; Sal. 90:12) No reira Mose i ani ai ia Iehova: “E faaite mai oe ia ˈu i ta oe ravea.” (Exo. 33:13) Ua vaiiho Mose i te manaˈo o Iehova ia aratai ia ˈna! Eaha te haamaitairaa ta ˈna i fanaˈo? Ua faaohipa Iehova ia ˈna no te faatupu i ta ˈna opuaraa ma te ravea faahiahia. Ua faahiti-atoa-hia oia i rotopu i te feia o tei faaite i te faaroo puai mau.—Heb. 11:24-27.

12. Eaha ta Paulo i haapao no te rave i ta ˈna mau faaotiraa?

¹² E taata maramarama atoa te aposetolo Paulo o tei haapii-maitai-hia i te ture a Mose. Hau atu â, e piti reo ta ˈna i paraparau na, te Hebera e te Heleni. (Ohi. 5:34; 21:37, 39; 22:2, 3) No te rave râ i ta ˈna mau faaotiraa, ua haapao oia i te mau Papai no te ite i te mea maitai e te mea ino i te aro o te Atua. (A taio i te Ohipa 17:2; Korinetia 1, 2:6, 7, 13.) Eaha te mau maitai ta ˈna i fanaˈo? Ua oaoa oia i roto i ta ˈna taviniraa e ua fanaˈo atoa i te hoê haamaitairaa mure ore.—Tim. 2, 4:8.

13. Na vai e faaoti i te faaau i to tatou manaˈo i nia i to Iehova?

¹³ Mea hau ê iho â te manaˈo o Iehova i to teie nei ao. Eita râ o Iehova e faahepo ia tatou ia manaˈo mai ia ˈna. Eita atoa “te tavini haapao maitai e te paari” e te mau matahiapo e na reira. (Mat. 24:45; Kor. 2, 1:24) Na tatou iho e faaoti i te faaau i to tatou manaˈo i nia i to Iehova. Ma te haapao râ i ta te Atua mau ture aveia, e oaoa e e maitaihia tatou. E nafea ïa ia na reira?

14, 15. (a) Ia hinaaro tatou e manaˈo mai ia Iehova, ia feruriruri tatou i te aha? (b) Eaha te titauhia ia faaea i te faaô i roto i to tatou feruriraa? A horoa i te hoê hiˈoraa.

¹⁴ Noa ˈtu mai te aha to tatou huru na mua ˈˈe, e nehenehe tatou paatoa e taui e e faaau i to tatou huru feruriraa i nia i te manaˈo o Iehova. Ta te Roma 12:2 ïa e haapapu ra, te parauhia ra hoi: “Eiaha atoa outou ia faaau faahou i to outou haerea i to teie faanahoraa o te ao nei, ia taui râ outou a faaapî ai i to outou feruriraa, ia papu ia outou iho te maitai e te au e te tia roa o te hinaaro o te Atua.” Noa ˈtu eaha to tatou nunaa e tupuraa, e nehenehe tatou e tamau i te taui e i te faaapî i to tatou feruriraa. Mea titauhia râ ia ara i ta tatou e faaô i roto i to tatou feruriraa. Ma te feruri tamau i te manaˈo o Iehova, e papu ia tatou i te maitai o te reira e e hinaaro atu â tatou e faaau i to tatou feruriraa i nia i to ˈNa.

 ¹⁵ Mai ta te irava tumu râ e parau ra, eiaha ‘ia faaau faahou i to tatou haerea i to teie faanahoraa o te ao.’ E nafea? Ma te faaea i te mataitai, i te taio e i te faaroo i te mau mea atoa e ore e tuati i te manaˈo o te Atua. A feruri na i te hoê taata o te hinaaro ia maitai mai to ˈna ea. E amu iho â oia i te maa maitatai. E maitai mai anei to ˈna ea ia amu oia i te hoê â taime i te maa pe? No reira, eita tatou e manaˈo mai ia Iehova mai te peu i te hoê â taime e faaô mai tatou i te manaˈo o teie nei ao i roto i to tatou feruriraa.

16. Eaha te titauhia ia rave no te paruru i to tatou feruriraa?

¹⁶ Eita tatou e nehenehe e faataa ê roa mai i teie nei ao. (Kor. 1, 5:9, 10) I roto i te pororaa, e faaroo tatou e rave rahi haapiiraa hape e manaˈo taata. Eita iho â ïa tatou e nehenehe e ape roa i te manaˈo o teie nei ao. E titauhia ia maiti i ta tatou e farii e ta tatou e patoi. Mai ia Iesu, ia taa ia tatou no ǒ mai ia Satani te tahi manaˈo, e patoi oioi anaˈe i te reira. E paruru ïa tatou i to tatou feruriraa ia ore ia taero i te manaˈo o teie nei ao.—A taio i te Maseli 4:23.

17. Eaha te titauhia ia rave ia ore to tatou feruriraa ia taero i te manaˈo o teie nei ao?

¹⁷ Te tahi ravea no te paruru i to tatou feruriraa, o te maiti-maitai-raa ïa i to tatou mau hoa. Te faaara mai ra te Bibilia, ia amuimui tatou i te feia o te ore e haamori ia Iehova, e haamata tatou i te manaˈo mai ia ratou. (Mas. 13:20; Kor. 1, 15:12, 32, 33) Te tahi atu ravea, o te maiti-maitai-raa ïa i ta tatou faaanaanataeraa. Eiaha to tatou feruriraa ia taero i te mau manaˈo o te patoi ra i “te ite no nia i te Atua.” E hiti mai paha na roto i te faaanaanataeraa o te turai ia manaˈo mea tupu noa mai te mau mea atoa,  mea maitai te taparahiraa taata aore ra te peu taotoraa tia ore.—Kor. 2, 10:5.

18, 19. (a) No te aha ia haapao maitai tatou i te mau ravea haavarevare a teie nei ao? (b) Eaha te mau uiraa e mea maitai ia uiui e no te aha?

¹⁸ E titau-atoa-hia ia patoi i te manaˈo o teie nei ao o te haapararehia na roto i te mau ravea haavarevare. I roto i te vea, e turuhia paha te tahi pǔpǔ poritita. I roto i te tahi faatiaraa, e haafaufaahia paha te opuaraa a te tahi taata. I roto i te hohoˈa teata aore ra buka, e turaihia paha tatou ia manaˈo mea maitai aˈe ia haapao na mua ia tatou aore ra i to tatou utuafare. Aita tera mau manaˈo e tuati ra i te manaˈo o te Atua. Te haapii ra hoi te Bibilia o Iehova ta tatou e tuu i te parahiraa matamua. (Mat. 22:36-39) I roto atoa i te mau aamu e faatiahia i te tamarii, e turaihia ratou ia faaite i te haerea tano ore.

¹⁹ I roto i te mau tuhaa atoa o to tatou oraraa, mea maitai ia uiui, ‘E taa anei ia ˈu no ǒ mai i teie nei ao tera e tera manaˈo? Te paruru ra anei au ia ˈu e i ta ˈu tamarii ia ore to matou feruriraa ia taero i te tahi faanahoraa teata aore ra i te tahi atu faaanaanataeraa tano ore? Te tauturu ra anei au i ta ˈu tamarii ia manaˈo mai ia Iehova noa ˈtu eaha ta teie nei ao e parau e e faaite ia ratou?’ Ia tia ia tatou i te faataa ê i te manaˈo o Iehova i to teie nei ao, eita tatou e faaau faahou i to tatou haerea i to teie faanahoraa o te ao nei.

20. To vai manaˈo ta tatou e pee?

²⁰ E titauhia ia haamanaˈo e piti anaˈe pae i teie mahana. To Iehova e to Satani. To vai manaˈo ta tatou e pee? Tei te huru ïa o te manaˈo ta tatou e farii. No ǒ mai anaˈe te reira i te ao a Satani, e manaˈo e e haa tatou ma te haapao noa i to tatou hinaaro mai te feia o teie nei ao. E i tera taime, ua turu tatou i te pae o Satani. Mea faufaa roa ïa ia haapao maitai i ta tatou e mataitai, e taio, e faaroo e e feruriruri.

21. Eaha ta tatou e hiˈopoa i roto i to mua ˈtu haapiiraa?

²¹ No te manaˈo mai te Atua, eita e navai noa ia patoi i te huru feruriraa o teie nei ao. E titau-atoa-hia râ ia faaô i te manaˈo o te Atua i roto i to tatou feruriraa. E hiˈopoa tatou e nafea ia na reira i roto i to mua ˈtu haapiiraa.