1, 2. (a) Eaha te faaite ra e mea taa ê Iehova i te feia mana e faatere i te nunaa? (b) Eaha ta tatou e hiˈopoa i roto i teie haapiiraa?

 I TEIE mahana, mea haavî roa te feia mana a faatere ai ratou i te nunaa. (Mat. 20:25; Koh. 8:9) Area Iehova, noa ˈtu to ˈna mana rahi, mea tâuˈa na ˈna ia tatou te taata hara nei. E Atua mǎrû oia e te haapao i te huru e te mau hinaaro o te taata tataitahi. Eita roa ˈtu Iehova e ani mai ia rave i te ore e maraa ia tatou. Te haamanaˈo ra hoi oia e feia tia ore e e otia atoa to tatou.—Sal. 103:13, 14.

² I roto i te Bibilia tatou e taa ˈi i ta Iehova mau raveraa no te tauturu i to ˈna nunaa. E hiˈo mai tatou e toru hiˈoraa Bibilia. Na mua, mea nafea o Iehova i te faaiteraa i te mǎrû a titauhia ˈi Samuela ia horoa i te hoê poroi faautuaraa i te tahuˈa rahi ra o Eli. Te piti, mea nafea Iehova i te faaiteraa i te faaoromai a manaˈo ai Mose eita e maraa ia ˈna ia aratai i te nunaa Iseraela mai  Aiphiti mai. E te toru, mea nafea o Iehova i te haapaoraa i te nunaa Iseraela a faarue ai ratou ia Aiphiti. Eaha ta tera mau aamu Bibilia e haapii mai ra no nia ia Iehova e e nafea tatou ia pee i to ˈna hiˈoraa?

3. Eaha te ohipa maere tei tupu i nia ia Samuela i te hoê po e eaha te uiraa e hiti mai? (A hiˈo i te hohoˈa matamua.)

³ Mea apî roa Samuela a haamata ˈi oia i te tavini i te sekene. (Sam. 1, 3:1) I te hoê râ po, e ohipa maere mau tei tupu. a (A taio i te Samuela 1, 3:2-10.) Ua faaroo Samuela i te hoê reo e tuô ra ia ˈna. Manaˈo ihora Samuela o te tahuˈa rahi, horo atura oia ia Eli e na ô aˈera: “Teie au; ta oe hoi i tiaoro mai ia ˈu nei.” Parau maira Eli: “Aore au i tiaoro atu ia oe.” I te toru o te taime, taa ihora Eli o te Atua tei tuô ia Samuela. Faaite ihora Eli i te tamaiti eaha te parau ia tuô-faahou-hia mai oia e ua rave Samuela mai ta Eli i parau atu. Eaha o Iehova i ore ai i faaite oioi ia Samuela o ˈna te tuô ra ia ˈna? Aita te Bibilia e faaite ra. Eita râ e ore ua na reira Iehova no to ˈna tâuˈa ia Samuela.

4, 5. (a) Eaha to Samuela huru a ani ai Iehova ia ˈna ia faaite i ta ˈna poroi ia Eli? (b) Eaha ta teie aamu e haapii mai ra no nia ia Iehova?

⁴ A taio i te Samuela 1, 3:11-18. I faaue na te ture a Iehova i te tamarii ia faatura i te feia paari, i tei amo iho â râ i te hopoia taa ê. (Exo. 22:28; Lev. 19:32) I te poipoi aˈe, aita paha Samuela i haere oioi e faaite i te tahuˈa rahi i te faautuaraa a te Atua. Te parau ra hoi te Bibilia, “mǎtaˈu aˈera Samuela ia faaite atu ia Eli i taua orama ra.” Ua faaite maitai râ te Atua ia Eli o ˈNa te tuô ra ia Samuela. No reira Eli i ani ai ia Samuela eiaha ia huna i te tahi noa ˈˈe tuhaa o te poroi a te Atua. Auraro ihora te tamaiti, “faaite atura Samuela ia ˈna i te mau parau atoa ra.”

⁵ E ere tera faautuaraa i te mea maere, ua faaite ê na ˈtu hoi “te hoê taata no te Atua” ia Eli i te hoê â poroi. (Sam. 1, 2:27-36) Te haapii mai ra tera aamu e Atua paari Iehova o te tâuˈa i te huru o te taata tataitahi.

6. Eaha ta tatou e haapii mai i ta te Atua raveraa no te tauturu ia Samuela?

⁶ E te feia apî, te taa ra ia Iehova to outou tupuraa. E taiâ paha outou i te poro i te feia paari aore ra i te faataa ê mai i te mau hoa haapiiraa. Eita râ o Iehova e faarue ia outou, e tauturu atu râ oia! No reira, a haamahora i to outou aau na roto i te pure. (Sal. 62:8) A feruri maite i te mau aamu Bibilia no nia i te feia apî mai ia Samuela. A paraparau i te mau taeae e tuahine apî e  paari aˈe o tei farerei i te hoê â tupuraa. E faaite atu paha ratou mea nafea Iehova i te tautururaa ia ratou ma te ravea manaˈo-ore-hia i te tahi taime!—A hiˈo i te tumu parau “E pahonoraa î i te here no ǒ mai ia Iehova!”

7, 8. Mea nafea Iehova i te faaiteraa ua tâuˈa o ˈna i te huru o Mose?

⁷ E 80 matahiti to Mose i to Iehova horoaraa ˈtu i te hopoia rahi ia faaora i te nunaa Iseraela i te faatîtîraa a to Aiphiti. (Exo. 3:10) Ua hitimahuta roa paha Mose, e tiai mamoe noa hoi oia i Midiana e 40 matahiti te maoro. No reira Mose i na ô ai: “O vai hoi au a tae ai au ia Pharao ra, e a aratai mai ai au i te tamarii a Iseraela mai Aiphiti mai?” Pahono maira Iehova ia Mose: “Ei pihai-atoa-iho ïa vau ia oe.” (Exo. 3:11, 12) Noa ˈtu ua haapapu Iehova e faaroo te hui matahiapo o Iseraela ia ˈna, ua parau â Mose eita te feia ra e tiaturi e e faaroo ia ˈna. (Exo. 3:18; 4:1) Mai te huru e te parau ra Mose ua hape Iehova! Ua faaite noa râ Iehova i te faaoromai i nia ia ˈna. Ua horoa atoa ˈtu oia i te mana ia Mose no te faatupu i te mau semeio. O ˈna te taata matamua i roto i te Bibilia tei fanaˈo i tera mana.—Exo. 4:2-9, 21.

⁸ Noa ˈtu te mau ravea atoa ta Iehova i horoa ˈtu, ua imi â Mose i te otoheraa. Ua parau oia e reo maumau to ˈna, pahono atura ïa Iehova: “Ei pihai-atoa-iho vau i to vaha, e na ˈu e faaite ia oe i te parau ia parau oe ra.” Ua farii anei Mose i te hopoia? Aita, ua ani oia ia tono i te tahi atu taata. Noa ˈtu to ˈna mauruuru ore i ta Mose i parau, ua hamani maitai noa Iehova ia Mose e maiti atura ia Aarona ei auvaha no Mose.—Exo. 4:10-16.

9. Mea nafea te faaoromai e te mǎrû o Iehova i te tautururaa ia Mose ia riro ei aratai maitai?

 ⁹ Eaha ta tera aamu e haapii mai ra no nia ia Iehova? No to ˈna tiaraa Atua Manahope, ua nehenehe Iehova e faahepo ia Mose ia auraro ia ˈna. Aita râ, ua faaite Iehova i te faaoromai e te mǎrû e ua haapapu atoa ei pihai iho oia i ta ˈna tavini haehaa e te haihai. Ua manuïa anei tera huru raveraa? E, e ua riro Mose ei aratai maitai no te nunaa o te Atua. Ua tutava atoa hoi oia i te faaite i te mǎrû ma te tâuˈa atoa i te huru o vetahi ê mai ta Iehova i rave i nia ia ˈna.—Num. 12:3.

10. Eaha te mau maitai e itehia ia tâuˈa tatou ia vetahi ê mai ia Iehova?

¹⁰ E te mau tane, metua e matahiapo, mea faufaa roa ia pee outou i te hiˈoraa o Iehova! A tâuˈa i ta outou vahine, tamarii e te amuiraa e a faaite atoa i te mǎrû e te faaoromai i nia ia ratou. (Kol. 3:19-21; Pet. 1, 5:1-3) Ia haa outou i nia ia vetahi ê mai ia Iehova e Iesu, te Mose Rahi, e tapiri ohie mai te taata e e nehenehe atoa outou e faaitoito ia ratou. (Mat. 11:28, 29) E riro ïa outou ei hiˈoraa maitai no ratou.—Heb. 13:7.

11, 12. Eaha ta Iehova i rave ia ore to ˈna nunaa ia mǎtaˈu a aratai mai ai oia ia ratou mai Aiphiti mai?

¹¹ Ua hau atu paha i te toru mirioni Iseraela tei faarue ia Aiphiti i 1513 hou te Mesia. I rotopu ia ratou, te vai ra te tamarii, te ruhiruhia, e peneiaˈe te taata maˈimaˈi atoa. Mea tano mau ïa e na te Atua iho e aratai ia ratou na roto ia Mose, e aratai î i te here e te tâuˈa hoi o Iehova. No reira te nunaa Iseraela i ore ai i mǎtaˈu a faarue ai i to ratou nohoraa i Aiphiti.—Sal. 78:52, 53.

¹² Eaha ta Iehova i rave ia ore to ˈna nunaa ia mǎtaˈu? Te faaite ra te Bibilia, e “haerea taa maite to te tamarii a Iseraela mai Aiphiti maira.” (Exo. 13:18) Ua faanaho maitai ïa Iehova ia ratou e ua papu i te nunaa na te Atua e aratai ra ia ratou. Ua haamanaˈo atoa “te ata” i te ao e “te maramarama auahi” i te po tei pihai iho te Atua i to ˈna nunaa, na ˈna e aratai e e paruru ia ratou. (Sal. 78:14) Ua tauturu mau te reira i te nunaa Iseraela, ua titauhia  hoi te tiaturiraa papu ia Iehova i mua i te tupuraa ta ratou e farerei i muri iho.

13, 14. (a) Mea nafea o Iehova i te aupururaa i te nunaa Iseraela i te miti Uteute? (b) Mea nafea Iehova i te faaiteraa e mea puai aˈe o ˈna i to Aiphiti?

¹³ A taio i te Exodo 14:19-22. A feruri na tei rotopu outou i te nunaa o Iseraela, eaha to outou huru i tera taime? I muri ia outou, te vai ra te nuu Aiphiti e i mua ˈtu, te miti Uteute. Aita e hororaa! Ite ihora outou i te rima o te Atua, mai mua mai, haere atura te pou ata i muri ia outou, i ropu maitai ia outou e te nuu Aiphiti. Poiri atura to ratou pae, area to outou, te maramarama noa ra ïa! Ite aˈera outou ia Mose i te faatororaa i to ˈna rima i nia i te miti Uteute. Farara maira te hoê mataˈi puai na te hitia o te râ mai e amaha ihora te miti e tae noa ˈtu i te tahi atu pae. Ma te naho maitai, na ropu atura outou, ta outou tamarii, te animara e te nunaa atoa i te haere. Auê outou i te maere, e ere i te mea heehee, e eˈa papu râ e te mǎrô maitai ta outou e ite ra! Noa ˈtu mea taere vetahi ia haere, ua tae pauroa outou i te tahi atu pae o te miti Uteute.

¹⁴ A taio i te Exodo 14:23, 26-30. No to ˈna teoteo e maamaa, ua auau â o Pharao ia outou. I reira, faatoro faahou atura Mose i to ˈna rima i nia i te miti e tapoihia maira Pharao e ta ˈna nuu, aita hoê i ora aˈe!—Exo. 15:8-10.

15. Eaha ta te aamu o te nunaa Iseraela e haapii mai ra no nia ia Iehova?

 ¹⁵ Aita anei Iehova i rave i ta ˈna ohipa ma te naho maitai? Eita roa ïa tatou e mǎtaˈu na ˈna anaˈe e aratai ia tatou. (Kor. 1, 14:33) Mai te tiai o te here e o te aupuru i ta ˈna mau mamoe, e aupuru atoa o Iehova i to ˈna nunaa ma te ravea faahiahia mau. Eita ratou e mǎtaˈu, na ˈna hoi e paruru ia ratou i mua i te enemi. E ere anei i te mea mahanahana no tatou o te tiai nei i te haamouraa o te faanahoraa o teie nei ao?—Mas. 1:33.

16. E nafea te aamu o te nunaa Iseraela e tauturu mai ai?

¹⁶ Aita Iehova i taui, e aupuru â oia i to ˈna nunaa. Maoti ta ˈna tauturu, e vai piri noa ratou ia ˈna e eita atoa e mǎtaˈu i mua i te enemi e tae noa ˈtu i te ati rahi o tei fatata roa mai. (Apo. 7:9, 10) Eita ïa te feia apî, ruhiruhia e maˈimaˈi o to ˈna nunaa e ahoaho e e mǎtaˈu i te roaraa o te ati rahi. b E haamanaˈo hoi ratou i ta Iesu i parau: “A tia mai e a faateitei i to outou upoo, no te mea ua fatata to outou faaoraraa.” (Luka 21:28) E tia mai Goga, te mau nunaa ïa o te tahoê no te aro i te mau tavini o te Atua, mea puai aˈe ratou ia Pharao. (Ezk. 38:2, 14-16) Aita râ o Iehova i taui, ua papu ïa i te nunaa o te Atua e paruru iho â o ˈna ia ratou i tera taime. E faaite â Iehova e Faaora î i te here e te hamani maitai oia no to ˈna nunaa!—Isa. 26:3, 20.

17. (a) E nafea tatou e faufaahia ˈi i te haapii i ta Iehova mau raveraa no te aupuru i to ˈna nunaa? (b) Eaha ta tatou e hiˈopoa i roto i to mua ˈtu haapiiraa?

¹⁷ Ua faaite te mau aamu Bibilia ta tatou i hiˈo mai, mea tâuˈa na te Atua i te huru o te taata tataitahi. Mea hamani maitai atoa oia ia aupuru, ia aratai e ia faaora i to ˈna nunaa. A taio ai i te mau aamu Bibilia, a imi i te mau poe ta outou i ore i haapao aˈenei o te haapii mai i te tahi mea apî no nia ia Iehova! Rahi atu â tatou i te ite i to Iehova mau huru maitatai, rahi atu â tatou i te here e te tiaturi ia ˈna. I roto i to mua ˈtu haapiiraa, e ite mai tatou e nafea ia tâuˈa i te mau mero o to tatou utuafare, o te amuiraa e te feia atoa ta tatou e poro.