1, 2. E nafea te oraraa o te hoê taata e nehenehe ai e maitai mai? A horoa i te hiˈoraa.

 AITA te tahi taurearea o Tony te iˈoa i paari e to ˈna metua tane. I te fare haapiiraa, e ere atoa oia i te mea aravihi roa. Ua tae roa oia i te hinaaro e faarue i te haapiiraa noa ˈtu aita ta ˈna e parau tuite. I te mau hopea hebedoma, e mataitai noa Tony i te mau hohoˈa teata aore ra e amuimui e to ˈna mau hoa. E ere Tony i te hoê taurearea ohipa ino e aita atoa oia e rave ra i te raau taero. Aita râ e aratairaa papu ta Tony i roto i to ˈna oraraa. I te hoê mahana, ua farerei Tony e piti Ite no Iehova e ua faaite atu oia aita o ˈna i papu e te vai mau ra te hoê Atua. Pûpû atura na Ite no Iehova e piti buka rairai o te tauturu ia ˈna ia papu i te vai-mau-raa o te Atua. *

² Ua miˈomiˈo roa na buka rairai e piti no te mea e rave rahi taime to Tony taioraa i te reira. I te farerei-faahou-raa oia i na Ite no Iehova, teie ta Tony i parau: “Te vai mau ra  iho â te hoê Atua!” Haamata ˈtura Tony i te haapii i te Bibilia e ua taui mǎrû noa to ˈna manaˈo e to ˈna huru. Ua maere roa te faatere o te fare haapiiraa e ua maitai mai te mau nota a Tony. O ˈna hoê o te mau piahi maitai roa ˈˈe o te fare haapiiraa. Ua ani te faatere o te haapiiraa ia Tony: “No te mau Ite no Iehova anei i taui ai to oe huru e ta oe mau nota?” Ua nehenehe o Tony e faataa ˈtu i ta ˈna i haapii mai maoti te Bibilia. I muri aˈe, ua noaa mai ta Tony parau tuite. I teie mahana, e pionie tamau e e tavini tauturu oia. Auê Tony i te mauruuru e ua riro mai Iehova ei Metua î i te here no ˈna!—Sal. 68:5.

3. Eaha te aˈoraa ta Iehova e horoa ra i te feia apî tataitahi?

³ E te feia apî, te haamanaˈo ra te hiˈoraa o Tony e mea here na Iehova ia outou. Te hinaaro ra hoi oia ia oaoa e ia mauruuru mau outou i to outou oraraa. Teie te aˈoraa ta ˈna e horoa ra i te feia apî tataitahi: “E haamanaˈo i tei Hamani ia oe i to apîraa ra.” (Koh. 12:1) E ere paha i te mea ohie ia haapao i tera aˈoraa. Maoti râ te tauturu a te Atua, e nehenehe te feia apî e fanaˈo i te hoê oraraa oaoa i teie nei â e a muri aˈe. No te taa maitai atu â, e hiˈopoa anaˈe i te hiˈoraa o te mau Iseraela e to Davida.

4, 5. Eaha te haapiiraa faufaa e huti mai i te tupuraa o Iseraela e to Davida? (A hiˈo i na hohoˈa matamua.)

⁴ Ua horoa Iehova i te aratairaa a faaineine ai to Iseraela i te tomo i te Fenua tǎpǔhia. Aita Iehova i faataa ˈtu e nafea ia aro, ua faaue atu râ oia ia auraro e ia tiaturi ia ˈna. (Deut. 28:1, 2; Ios. 1:7-9) Ua huru ê paha te taata i tera faaueraa, maoti râ te reira i upootia ˈi to Iseraela i nia i te mau nunaa e parahi ra i Kanaana. (Ios. 24:11-13) Mea titauhia te faaroo no te auraro i te Atua, eita roa ˈtu râ te feia o te na reira e tatarahapa!

⁵ A opua ˈi Davida e aro ia Golia, ua manaˈo paha vetahi e taata maamaa oia. E faehau Golia o tei matau i te aroraa. Fatata toru metera to ˈna roa e e mauhaa tamaˈi ta ˈna no te haapohe i te taata. (Sam. 1, 17:4-7) Area Davida, eaha ta ˈna i rave no te haere i te aroraa? Ua rave noa oia i ta ˈna taora ofai. Te taa-ê-raa râ, ua tiaturi oia i te Atua e ua upootia mai o ˈna! O Golia ïa te tano ia faariro ei maamaa!—Sam. 1, 17:48-51.

6. Eaha ta tatou e hiˈopoa i roto i teie haapiiraa?

⁶ Mai ta tatou i hiˈopoa i roto i te haapiiraa na mua ˈtu, e maha maitai ta Iehova e horoa mai ra ia oaoa e ia mauruuru tatou i te oraraa nei. Maoti Iehova, te fanaˈo ra tatou i te maa pae varua, i te mau hoa papu, i te mau fa maitai e i te tiamâraa. I roto i teie haapiiraa, e hiˈopoa tatou i te Salamo 16 no te ite e nafea ˈtu â tatou ia faufaahia i tera mau maitai no ǒ mai ia Iehova.

7. (a) Mai te aha te huru o te hoê taata feruriraa paari i te pae varua? (b) O vai ta Davida i faariro ei “tufaa” na ˈna e eaha to ˈna huru i muri aˈe?

⁷ E taata feruriraa paari i te pae varua o Davida. Eaha tatou e parau ai mai tera? E tiaturi hoi te taata feruriraa paari  i te pae varua i te Atua e e manaˈo atoa mai ia ˈna. E vaiiho oia e na te mau aratairaa a Iehova e faatere i to ˈna oraraa e e auraro o ˈna ia ˈNa. (Kor. 1, 2:12, 13) Ta Davida ïa i rave e no reira oia i himene ai: “O Iehova, o ta ˈu ïa tufaa.” (Sal. 16:5) Te manaˈo ra oia i to ˈna auhoaraa piri e te Atua. Ua faariro atoa oia ia Iehova mai to ˈna Faaora. (Sal. 16:1) No to ˈna mauruuru rahi i parau ai Davida: “Te oaoa nei tau varua.” Aita ˈtu oaoaraa no Davida i te riroraa ei hoa piri no Iehova!—A taio i te Salamo 16:9, 11.

8. Eaha te titauhia ia rave no te fanaˈo i te hoê oraraa mauruuru mau?

⁸ Eita te feia e titau rahi i te moni e i te taoˈa e nehenehe e oaoa mai ia Davida. (Tim. 1, 6:9, 10) Ua parau te tahi taeae no Kanada: “Eita e noaa ia tatou te mauruuru mau ma te haapao noa i to tatou hinaaro. E fanaˈo râ tatou i te reira na roto i te horoaraa ia Iehova, na ˈna hoi i ho mai i te mau ô maitatai atoa.” (Iak. 1:17) Ma te faatupu i te hoê faaroo puai ia Iehova e ma te tavini ia ˈna, e fanaˈo tatou i te hoê oraraa oaoa e te mauruuru mau! E nafea ia haapuai i to tatou faaroo? E titauhia ia faaherehere i te taime no te faaroo i te reo o Iehova. A taio ïa i te Bibilia e a hiˈopoa i te mau mea nehenehe ta ˈna i poiete. I muri iho, a feruri i to ˈna mau huru maitatai mai to ˈna here rahi ia tatou!—Roma 1:20; 5:8.

9. E nafea ia vaiiho i te Parau a te Atua ia aˈo ia outou?

⁹ Mai te hoê metua î i te here, e aˈo Iehova ia tatou i te tahi taime. Mai te aha te huru o Davida i to Iehova aˈoraa ia ˈna? Ua parau Davida: “E haamaitai â vau ia Iehova o tei haapii mai ia ˈu ra; te aˈo maira tau manaˈo aau ia ˈu i te rui.” (Sal. 16:7) Ua feruri maite e ua farii Davida i te manaˈo o te Atua. Ua riro mai Davida ei taata maitai aˈe no te mea ua vaiiho oia i te Atua ia haapii ia ˈna e ia taui i to ˈna feruriraa. E te feia apî, ia pee outou i te hiˈoraa o Davida, e rahi mai to outou here i te Atua a hinaaro atu ai e rave i te mea e au ai oia ia outou. E riro mai ïa outou ei Kerisetiano paari i te pae varua. Te faataa ra te tahi tuahine o Christin te iˈoa ia rave oia i te maimiraa e ia feruri maite atoa i ta ˈna e taio ra, e au ra e o Iehova iho te paraparau ra ia ˈna!

10. Ia au i te Isaia 26:3, e nafea outou e faufaahia ˈi i te hoê feruriraa paari i te pae varua?

¹⁰ Te horoa ra Iehova i te feia e tiaturi ia ˈna i te ite papu e te haroˈaroˈa. E haapii Iehova ia outou eaha te mea faufaa aˈe e e nafea ia rave i te faaotiraa maitai e ia ore e mǎtaˈu i te tupu ananahi! (A taio i te Isaia 26:3.) Ua parau Joshua te tahi taeae no Marite, mea piri anaˈe to tatou auhoaraa e o Iehova, e taa maitai ia tatou eaha te mau mea faufaa e te mea faufaa ore. Ia noaa ia outou te hoê feruriraa paari i te pae varua, e ite papu outou i te tupuraa mau e te hopearaa o teie nei ao.

11. Mea nafea Davida i te maitiraa i to ˈna mau hoa?

¹¹ A taio i te Salamo 16:3. Te faaite ra Davida eaha tei tauturu ia ˈna ia maiti maitai i to ˈna mau hoa. Ua oaoa oia i te faahoa i te feia anaˈe e here ra ia Iehova. Ua parau oia e “feia moˈa” to ˈna  mau hoa no te mea te haapao ra ratou i ta Iehova mau ture aveia. Ua haapao maitai atoa te tahi atu papai Salamo a maiti ai i to ˈna mau hoa. Ua papai oia: “E taata au hoi au i te feia atoa i mǎtaˈu ia oe ra, i te feia e haapao i ta oe i faaue mai.” (Sal. 119:63) Mai ta tatou i ite i roto i te haapiiraa na mua ˈtu, e mea maitai ia maiti ei hoa no outou i te feia e here e e auraro ia Iehova noa ˈtu eaha to ratou faito matahiti.

12. Mea nafea Davida e Ionatana i te riroraa ei hoa piri?

¹² Aita Davida i faahoa noa i te feia hoê â faito matahiti e to ˈna. O Ionatana te tahi o to ˈna mau hoa papu. Hoê tera o te mau auhoaraa nehenehe roa ˈˈe ta te Bibilia e faahiti ra! Ua ite anei outou e 30 matahiti hau to Ionatana ia faaauhia i to Davida? Eaha te tumu i riro ai raua ei hoa piri? No to raua ïa faaroo ia Iehova. Hau atu â, mea faatura te tahi i te tahi e hoê â huru maitatai ta raua i faaite. Ei hiˈoraa, ua faaite toopiti atoa i te itoito a aro ai i te mau enemi o te Atua.—Sam. 1, 13:3; 14:13; 17:48-50; 18:1.

13. Eaha te titauhia ia rave ia rahi atu â to outou hoa? A horoa i te hiˈoraa.

¹³ Mai ia Davida raua Ionatana, e nehenehe atoa tatou e oaoa i te faahoa i te feia e here e e tiaturi papu ra ia Iehova. Te na ô ra Kiera tei tavini i te Atua e rave rahi matahiti: “Mea rahi to ˈu hoa na te ao nei e no roto mai ratou i te mau huru nunaa taata.” Ia na reira atoa outou, e papu ia outou na te parau mau e te varua moˈa e tahoê ra i te mau tavini atoa a Iehova na te ao nei!

14. (a) E nafea ia haamau i te fa maitatai i roto i to outou oraraa? (b) Eaha ta vetahi i parau no nia i ta ratou mau fa?

¹⁴ A taio i te Salamo 16:8. Ua haamau Davida i te fa e tuu i te taviniraa i te Atua i te parahiraa matamua. Ia pee outou i te hiˈoraa o Davida e ia tamau outou i te haapao i ta Iehova aratairaa, e oaoa mau outou! Te na ô ra te tahi taeae  o Steven te iˈoa: “I te naearaa ta ˈu fa, ua oaoa roa vau i te mau tutavaraa ta ˈu i rave!” Te na ô ra te tahi taeae apî no Heremani e tavini ra i te tahi atu fenua: “Ia ruau vau, eita vau e hinaaro e tatarahapa i te haapao-noa-raa i to ˈu hinaaro.” No reira te feia apî, a faaohipa i to outou ite e aravihi no te faahanahana i te Atua e no te tauturu i te taata. (Gal. 6:10) A haamau i te fa i roto i te taviniraa a Iehova e a pure ia naea ta outou fa! E horoa ˈtu iho â Iehova i ta outou i ani atu!—Ioa. 1, 3:22; 5:14, 15.

15. Eaha te mau fa ta outou e nehenehe e haamau? (A hiˈo i te tumu parau “ Te tahi mau fa maitatai.”)

¹⁵ Eaha te tahi mau fa ta outou e nehenehe e haamau? E horoa paha i te pahonoraa i te putuputuraa na roto i ta outou iho mau parau. Peneiaˈe, e riro ei pionie aore ra e tavini i te Betela. Aore ra, e haapii i te reo ê no te poro e rave rahi atu â taata. Noa ˈtu to ˈna apî, tei roto taeae Barak i te taviniraa taime taatoa e teie ta ˈna e parau ra: “Ia ara mai au i te poipoi, oaoa roa vau i te ite te horoa ra vau i to ˈu puai atoa no te tavini ia Iehova. Aita ˈtu ohipa o te faatupu i te mauruuru mau.”

16. Eaha to Davida manaˈo i ta Iehova mau ture e faaueraa e no te aha oia i haafaufaa ˈi i te reira?

¹⁶ E noaa ia tatou te tiamâraa mau ia haapao tatou i te mau ture e faaueraa a te Atua. Na te reira e faaite mai e nafea ia hinaaro i te maitai e ia faufau i te ino. (Am. 5:15) Ua ite Davida o Iehova te Atua maitai roa. (Sal. 31:19) E itehia te maitai o Iehova i roto i ta ˈna mau ohipa atoa e te mau mea atoa ta ˈna e horoa mai ra. Ua tutava Davida i te pee i te huru o te Atua e te hinaaro i te mau mea ta Iehova e au ra. Ua titau-atoa-hia râ ia Davida ia haapii i te faufau atu i te mea ino i te aro o te Atua. Eaha te tahi mea ta te Atua e au ore ra? Te haamoriraa idolo, te horoaraa ïa i te hanahana e au ia Iehova no te tahi taata aore ra taoˈa. Eita te taata e oaoa i te haamoriraa idolo e o Iehova anaˈe te tia ia faahanahana.—Isa. 2:8, 9; Apo. 4:11.

17, 18. (a) Eaha ta Davida i parau no nia i te haamoriraa i te mau atua hape? (b) I teie mahana, e nafea te taata e faarahi ai i to ratou mauiui?

¹⁷ I tahito, mea pinepine atoa te taata i te apiti i te haamoriraa idolo no to ratou au i te peu taotoraa tia ore. (Hos. 4:13, 14) Ua oaoa mau anei râ ratou i te na reiraraa? Aita! Mai ta Davida i parau, ua rahi roa ˈtu â to ratou mauiui i te haamoriraa i te mau atua hape. (Sal. 16:4) Ua tae roa vetahi i te tutui ta ratou tamarii i te auahi. (Isa. 57:5) Ua riri roa Iehova i mua i to ratou aau aroha ore. (Ier. 7:31) Ahani outou i ora i tera tau, e mauruuru roa outou te tavini ra to outou mau metua ia Iehova!

¹⁸ I teie mahana, mea rahi te haapaoraa o te farii i te peu taotoraa tia ore mai te peu mahu. Te manaˈo ra te taata e tiamâ ratou i tera mau peu, te tupuraa mau râ te faarahi ra ratou i to ratou mauiui. (Kor. 1, 6:18, 19) No reira e te feia apî, te taparu atu nei matou ia faaroo i to outou Metua i te raˈi. Na outou iho e ite e maitaihia outou ia auraro i te Atua. A feruri maite i te mau faahopearaa ta te  feia e rave ra i te peu taotoraa tia ore e ooti. E papu ia outou eita e hoona ia mauiui no te hoê ohipa navenave poto noa. (Gal. 6:8) Teie ta Joshua tei faahiti-aˈena-hia i parau: “E tiamâraa to te taata ia rave i ta ˈna e hinaaro, eita râ oia e oaoa ma te faaohipa hape i te reira!”

19, 20. Eaha te mau haamaitairaa e noaa i te feia apî e tiaturi e e auraro ra ia Iehova?

¹⁹ E nehenehe outou e tiamâ ia vaiiho outou i te mau haapiiraa a te Mesia ia aratai i to outou oraraa. Ua parau hoi Iesu: “Ia haapao noa outou i ta ˈu parau, e pǐpǐ mau ïa outou na ˈu, e e ite outou i te parau mau e na te parau mau e faatiamâ ia outou.” (Ioa. 8:31, 32) Eita râ e navai noa ia ‘ite i te parau mau,’ e titau-atoa-hia ia haapao i te reira i roto i to tatou oraraa. I teie nei â, ua faatiamâ mai Iehova ia tatou i te haapaoraa hape maoti te parau mau. Te tiai ru nei râ tatou i te fanaˈo i “te tiamâraa hanahana o te mau tamarii a te Atua.”—Roma 8:21.

²⁰ E te feia apî, a poihere i te tiamâraa ta te Atua i horoa ˈtu! A faaohipa maitai i to outou tiamâraa, e tauturu atu hoi te reira ia rave i te faaotiraa e maitai ai outou a muri aˈe. Te na ô ra te hoê taeae apî: “Ua matau anaˈe te tahi taata i te faaohipa maitai i to ˈna tiamâraa i te apîraa ra, mea ohie aˈe no ˈna ia rave i te faaotiraa rahi aˈe mai te maitiraa i te hoê ohipa aore ra te faaotiraa e faaipoipo anei aore ra aita.”

21. Eaha te titauhia ia rave no te fanaˈo i “te ora mau”?

²¹ No te hoê taime poto noa te oraraa fanaˈo i roto i teie nei ao. Hau atu â, aita hoê noa ˈˈe taata i ite mai te aha te oraraa ananahi! (Iak. 4:13, 14) Mea faufaa roa ïa i teie nei â ia rave i te faaotiraa e noaa ˈi ia outou “te ora mau.” (Tim. 1, 6:19) Eita o Iehova e faahepo i te tavini ia ˈna, e tiamâraa to tatou. Tei ia outou atura ïa te faaotiraa e faariro ia Iehova ei “tufaa” na outou. E nafea ia na reira? A tamau i te haafatata ia Iehova e a poihere i te mau maitai atoa ta ˈna i horoa ˈtu. (Sal. 103:5) Eita roa outou e tatarahapa, e faaite atu hoi Iehova i te eˈa e oaoa roa ˈi outou e a muri noa ˈtu!—Sal. 16:11.