E OAOA tatou ia hamani maitai vetahi ê ia tatou, e ere anei? E haapapu mai hoi te reira e te tâuˈahia ra tatou. E nafea ïa tatou ia hamani maitai atoa ia vetahi ê?

Mai te aha mau na te huru o te taata hamani maitai? E itehia te hamani maitai na roto i ta ˈna mau parau e ohipa. Eita râ oia e na reira ma te faatia ture noa, no to ˈna râ here e tâuˈa ia vetahi ê. O te hamani maitai hoê o te mau huru maitatai ta te varua moˈa e faatupu. (Gal. 5:22, 23) Te titau mai ra ïa Iehova ia hamani maitai tatou ia vetahi ê. No te tauturu mai, ua faaite mai raua ta ˈna Tamaiti i te hiˈoraa maitai. E hiˈopoa anaˈe mea nafea raua i te hamani-maitai-raa ia vetahi ê.

Te hamani maitai ra Iehova i te taata atoa, oia atoa i “te feia mauruuru ore e te ino.” (Luka 6:35) E nafea? “E faahiti hoi oia i to ˈna mahana i nia i te feia ino e te feia maitai atoa e e haamairi oia i te ûa i nia i te feia parau-tia e te feia parau-tia ore atoa.” (Mat. 5:45) Te oaoa e te faufaa-atoa-hia ra te feia o te ore e tiaturi i te hoê Atua poiete i te hamani maitai o Iehova.

Ua hamani maitai rahi atoa Iehova ia Adamu raua Eva. I muri aˈe i to raua hararaa, ua hamani Adamu e Eva i “te rau suke ei pareu no raua.” Ua ite râ Iehova e ere te oraraa i rapae mai i te ô i Edene i te mea ohie, ua ino hoi te fenua e ua î roa i “te tataramoa, e te motuu.” Eaha ïa ta Iehova i rave? “Hamani ihora te Atua ra o Iehova i te ahu iri” no Adamu raua Eva.—Gen. 3:7, 17, 18, 21.

E hamani maitai Iehova i “te feia ino e te feia maitai atoa,” e rahi roa ˈtu râ oia i te na reira i nia i ta ˈna mau tavini haapao maitai. I te tau o te peropheta Zekaria, ua haapeapea te hoê melahi no te mea ua faaea te mau Iseraela i te patu i te hiero i Ierusalema. Ua faaroo maite Iehova i taua melahi ra e ua horoa ˈtu oia i “te parau maitai e te parau haamahanahana.” (Zek. 1:12, 13) Hoê â atoa raveraa ta Iehova no te hamani maitai ia Elia. I te hoê mahana, ua hepohepo roa ino te peropheta Elia e tae roa ˈtura oia i te hinaaro e pohe. Ua tâuˈa Iehova i to Elia huru aau e tono atura i te hoê melahi no te faaitoito ia ˈna. Ua haapapu atoa ˈtu oia e ere o Elia anaˈe te tavini ra ia ˈna. Ua itoitohia Elia ia tamau i ta ˈna taviniraa maoti te hamani maitai o Iehova. (Arii 1, 19:1-18) I rotopu i ta ˈna mau tavini atoa, o vai tei pee ma te tia roa i te hamani maitai o Iehova?

Ua ite roa te taata i te hamani maitai o Iesu i nia i te fenua nei. No to ˈna tâuˈa ia vetahi ê i parau ai Iesu: “A haere mai ia ˈu nei outou atoa e rohirohi e e teimaha nei, na ˈu e tamahanahana ia outou. . . . Mea mǎrû hoi ta ˈu zugo.” (Mat. 11:28-30) Aita roa Iesu i paraparau i te taata ma te iria e aita atoa oia  i faahepo ia rave i ta ˈna e parau ra. No to ˈna hamani maitai, aita te taata i taiâ i te apee ia ˈna i te mau vahi atoa. No to ˈna aroha, ua faatamaa e ua faaora Iesu i te maˈi o te taata. Hau atu â, ua haapii oia ia ratou “e rave rahi parau mau” no nia i to ˈna Metua.—Mar. 6:34; Mat. 14:14; 15:32-38.

Ua tâuˈa Iesu i te huru aau o te taata e ua hamani maitai atu oia. Noa ˈtu e haere te taata ia ˈna ra i te taime manaˈo-ore-hia, ua ineine noa Iesu i te tauturu ia ratou ma te hamani maitai. (Luka 9:10, 11) A hiˈo na i te huru o Iesu i nia i te vahine e tapahi to ˈna. No to ˈna hinaaro ia ora to ˈna maˈi, ua tapea taua vahine ra i te ahu o Iesu. Ia au râ i te ture a Mose, e mea viivii oia, eita ïa e tia ia ˈna ia na reira. (Lev. 15:25-28) Ua tamaˈi anei Iesu ia ˈna? Aita, ua ite Iesu i te mǎtaˈu i nia i te hohoˈa o te vahine, aroha ˈtura oia ia ˈna, 12 hoi matahiti oia i te mauiui-noa-raa no tera maˈi. Na ô ihora Iesu: “Ta ˈu tamahine, no to oe faaroo i ora ˈi oe. A haere, eiaha oe e haapeapea, e ia ora mai oe i to oe maˈi ino.”—Mar. 5:25-34.

No te hamani maitai, e titauhia ia haa no te tauturu ia vetahi ê. No te faataa i tera manaˈo faufaa, ua horoa Iesu i te faahohoˈaraa o te taata tupu no Samaria. Ua eiâ, ua hamani ino e ua faaruehia te hoê ati Iuda i te pae purumu. Noa ˈtu te vai ra te au ore i rotopu i te mau taata Samaria e te mau ati Iuda, na te hoê taata Samaria i tauturu i te ati Iuda i hamani-ino-hia. Na te hamani maitai i turai ia ˈna ia tauturu i tei roohia i te ati. Ua rapaau oia i te pepe o taua taata ra e afai atura ia ˈna i te hoê fare ratere. Ua ineine te taata Samaria i te aufau i te mau haamâuˈaraa atoa no te aupuru i taua ati Iuda ra.—Luka 10:29-37.

E hamani maitai atoa tatou ia vetahi ê ma te faahiti i te mau parau faaitoito mau. Te na ô ra te Bibilia: “E oto tei te aau o te taata ra, e piˈo ïa i raro; hoê roa râ parau maitai ra, oaoa aˈera ïa.” (Mas. 12:25) E itoitohia e e oaoa te taata ia faahiti tatou i te tahi parau î i te here e te maitai. * E faaite ïa te reira e te tâuˈa mau ra tatou ia vetahi ê e te faaitoito atoa ra ia ratou ia tamau i te faaoromai i te fifi.—Mas. 16:24.

E nehenehe tatou paatoa e hamani maitai no te mea ua poietehia tatou ia au i te huru o te Atua. (Gen. 1:27) A hiˈo na i te raatira faehau ra o Iulio, o ˈna tei maitihia no te afai i te aposetolo Paulo i Roma. Te faatiahia ra, “hamani maitai maira Iulio ia Paulo, e faatia maira ia ˈna ia haere i to ˈna ra mau hoa e ia aupuru ratou ia ˈna” i te oire ra o Sidona. (Ohi. 27:3) I te tomoraa te pahi o Paulo ma, ua “hamani maitai rahi” e ua tahu te mau taata no Melita i te auahi ia mahanahana ratou. (Ohi. 28:1, 2) E ohipa maitai ta teie feia i rave, e oaoa râ Iehova ia hamani maitai tatou i te mau taime atoa.

Te hinaaro ra Iehova ia ahu tatou i te hamani maitai i te mau mahana atoa. (Kol. 3:12) E ere râ i te mea ohie ia na reira noa. Eaha te tumu? Peneiaˈe no to tatou mamahu e taiâ, aore ra ua matau paha tatou i te haapao noa ia tatou iho. Peneiaˈe atoa, no te mea ua hamani ino te tahi taata ia tatou. Ma te ani râ i to ˈna varua moˈa, e tauturu mai Iehova ia hamani maitai ia vetahi ê mai ia ˈna.—Kor. 1, 2:12.

E nafea ia hamani maitai noa ˈtu â ia vetahi ê? E ui anaˈe ia tatou iho, ‘Te faaroo maite ra anei au i te taata a tamata ˈtu ai i te taa i to ˈna huru aau? Te tâuˈa ra anei au ia hinaaro vetahi ê i te tauturu? Inafea ra vau i te  hamani-maitai-raa i te hoê taata e ere i te fetii aore ra hoa piri?’ I muri iho, e haamatau maitai anaˈe i te feia e haaati ra ia tatou, i te mau mero iho â râ o ta tatou amuiraa. Mea na reira tatou e ite ai i te mau fifi ta ratou e faaruru ra e e nafea ia tauturu atu. E haa anaˈe i nia ia vetahi ê mai ta tatou e hinaaro ra ia na reirahia mai tatou. (Mat. 7:12) Eiaha e haamoˈe i te ani i ta Iehova tauturu, e haamaitai iho â oia i ta tatou mau tutavaraa no te hamani maitai ia vetahi ê.—Luka 11:13.

Ua faaite te aposetolo Paulo o te hamani maitai hoê o te mau huru maitatai tei tauturu ia ˈna i roto i ta ˈna taviniraa. (Kor. 2, 6:3-6) Ua faahoa te taata ia Paulo no te mea ua haa e ua paraparau atu oia ma te hamani maitai. Ua tâuˈa mau oia ia vetahi ê. (Ohi. 28:30, 31) E nehenehe te taata e farii i te parau mau ia hamani maitai tatou ia ratou. Noa ˈtu to ratou ino i nia ia tatou, e putapû paha to ratou aau a taui atu ai to ratou huru. (Roma 12:20) E tae roa paha ratou i te haapii i te Bibilia i te hoê mahana.

I roto i te paradaiso, e hamani maitai te taata atoa te tahi i te tahi. Tera atoa te huru e faaitehia i nia i te feia e faatiahia mai te pohe mai. No vetahi, a tahi roa paha te taata e hamani maitai ai ia ratou! E turai atoa te reira ia ratou ia na reira atoa i nia ia vetahi ê. I raro aˈe i te Faatereraa arii, aita roa e parahiraa no te feia hamani ino e te ore e hinaaro e tauturu ia vetahi ê! O te feia î i te here e te hamani maitai anaˈe te ora e a muri noa ˈtu i roto i te paradaiso. (Sal. 37:9-11) A feruri na ïa i te oraraa hau ta tatou e fanaˈo i tera taime! E nehenehe râ tatou e faufaahia i te hamani maitai i teie nei â. E nafea?

Te haapii ra te Bibilia e faufaahia te taata ia hamani maitai oia ia vetahi ê. (Mas. 11:17) Ua parau Iesu: “Tei te huru hoi o ta outou faitoraa e faito-atoa-hia ˈi ta outou.” (Luka 6:38) Mea au na te taata ia hamani-maitai-hia ratou e e pinepine ratou i te na reira atoa ˈtu i nia ia vetahi ê. No reira iho â ïa te taata hamani maitai e haaati-noa-hia ˈi e te mau hoa papu!

Ua parau te aposetolo Paulo i te mau Kerisetiano i Ephesia ia “hamani maitai . . . te tahi i te tahi, ma te aumihi î i te here, i te faaoreraa ˈtu i te hapa.” (Eph. 4:32) Mai tera anaˈe te huru o te mau taeae e tuahine i nia i te tahi e te tahi, e puai e e hoê atoa te amuiraa. Eiaha roa ïa tatou ia faahapa, ia faaino, ia iria aore ra ia haamauiui i to tatou mau taeae noa ˈtu no tatou e parau hauti noa. E faahiti anaˈe râ i te mau parau o te tauturu e te faaitoito ia vetahi ê. (Mas. 12:18) E tavini ïa te amuiraa atoa ia Iehova ma te aau oaoa mau.

Mai ta tatou i haapii mai, e hamani maitai tatou ia vetahi ê na roto i ta tatou mau parau e ohipa. Ma te hamani maitai i te taata, o te huru o Iehova ta tatou e pee ra, o ˈna hoi te Atua î i te here e te aau horoa noa. (Eph. 5:1) Hau atu â, e puaihia te amuiraa e e faaitoitohia te mau mero atoa ia tavini ia ˈna. E tutava anaˈe ïa i te faaite i te taata atoa e feia hamani maitai te mau Ite no Iehova!