MEA rahi te mau fifi ta Diana i faaruru noa ˈtu e 80 matahiti to ˈna. Ua roohia ta ˈna tane i te maˈi roro mǎrô, ua tapeahia i roto i te hoê fare e aupuru i te feia maˈimaˈi e pohe atura oia. I muri aˈe, ua pohe atoa ta ˈna na tamaiti e piti e ua roo-atoa-hia oia i te mariri ai taata o te titi. Ia farerei râ te mau taeae e tuahine ia ˈna i te putuputuraa e te taviniraa, e mata oaoa noa to Diana!

Ua tavini John ei tiaau haaati hau atu i te 43 matahiti te maoro. Noa ˈtu mea au na ˈna ta ˈna taviniraa, ua titauhia ia vaiiho oia i te reira no te aupuru i te hoê fetii maˈimaˈi. Ia farerei râ te mau taeae e tuahine ia John i te tairururaa, aita roa ˈtu oia i taui, te vai noa ra to ˈna oaoa!

Eaha tei tauturu ia Diana e ia John ia oaoa noa? E nafea te hoê taata e nehenehe ai e oaoa noa i mua i te fifi? E nafea ia tamau i te oaoa ia titauhia tatou ia vaiiho i te hoê hopoia? Te pahono ra te Bibilia: “E oaoa te feia parau-tia ra ia Iehova.” (Sal. 64:10) E taa maitai atu â tatou i tera irava ia ite tatou eaha te hopoi mai i te oaoa o te ore e mou e eaha te hopoi mai i te oaoa poto noa.

Mea rahi te mau tupuraa e oaoa ˈi tatou. Te hoê faaipoiporaa, te fanauraa i te tamarii e te fanaˈoraa i te hopoia apî i roto i te taviniraa a Iehova. E oaoa iho â tatou no te mea e ô anaˈe tera no ǒ mai ia Iehova.—Gen. 2:18, 22; Sal. 127:3; Tim. 1, 3:1.

E nehenehe râ te tahi mau tupuraa e faaere i to tatou oaoa. Peneiaˈe, ia taiva aore ra ia pohe te hoa faaipoipo. (Ezk. 24:18; Hos. 3:1) Ia faaroo ore te tamarii i to ratou metua e i te Atua a tiavaruhia ˈtu ai. A feruri na i te oto o Samuela a tavini ai ta ˈna na tamaiti ia Iehova ma te faatura ore. Hoê â atoa no Davida, mea rahi te fifi i tupu i roto i to ˈna utuafare no to ˈna hararaa e o Bate-seba. (Sam. 1, 8:1-3; Sam. 2,  12:11) No tera mau tupuraa, e moˈe taue noa te oaoa, e toe noa mai râ te mauiui rahi.

Ua oto atoa vetahi i te vaiihoraa i te hoê hopoia i roto i te taviniraa a Iehova no te maˈi, no te aupuru i te tahi mero utuafare aore ra no te tahi tauiraa i roto i te faanahonahoraa a Iehova. E nehenehe atoa te reira e tupu i nia ia tatou.

Ua oaoa noa Samuela, Davida e te tahi atu mau tavini a te Atua noa ˈtu te mau fifi ta ratou i faaruru. E nafea ia noaa atoa ia tatou taua oaoa ra?

Ua ite atoa Iesu i tera oaoa. I te raˈi, te parau ra te Bibilia te oaoa noa ra Iesu i “te oaoa tamau-maite-raa i mua i [to Iehova] aro.” (Mas. 8:30) I to ˈna haereraa mai i nia i te fenua, e fifi rahi ta Iesu i faaruru, ua oaoa noa râ oia ma te rave i te hinaaro o to ˈna Metua. (Ioa. 4:34) Eaha te tumu i noaa ˈi ia ˈna i te faaoromai i te mauiui rahi? Te na ôhia ra: “No te oaoa i tuuhia i mua ia ˈna i faaoromai ai oia i te pou haamauiuiraa.” (Heb. 12:2) Ua riro ïa oia ei hiˈoraa maitai no tatou. E hiˈopoa anaˈe e piti parau ta Iesu i faahiti no nia i te oaoa.

I te hoê mahana, ua oaoa roa e 70 pǐpǐ a Iesu i te mau ohipa ta ratou i rave i roto i te pororaa, ua tia atoa hoi ia ratou ia tiavaru i te mau demoni. Ua parau atu râ Iesu: “Eiaha râ e oaoa e ua vî te mau varua ino ia outou, a oaoa râ e ua papaihia to outou iˈoa i te raˈi.” (Luka 10:1-9, 17, 20) Aita ˈtu haamaitairaa e faito i te oaoa ia fanaˈo i te farii maitai a Iehova!

I te tahi atu taime, ua faahiahia roa te tahi vahine ati Iuda i ta Iesu haapiiraa i pii ai oia: “Ia oaoa te vahine tei fanau mai ia oe.” Teie râ ta Iesu i pahono atu: “Mea oaoa aˈe te feia e faaroo e e haapao i te parau a te Atua!” (Luka 11:27, 28) E oaoaraa te tamarii na to ratou metua. E nafea  râ ia fanaˈo i te oaoa o te ore e mou? E titauhia ia faaroo ia Iehova e ia vai piri noa e o ˈna.

E oaoa mau ïa tatou i te ite e te mauruuru ra Iehova ia tatou. Ia mau papu tatou i roto i te ati, e nehenehe to tatou oaoa e rahi atu â. (Roma 5:3-5) E horoa atoa Iehova i to ˈna varua moˈa i te feia e tiaturi ia ˈna. E hoê o te mau huru maitatai ta te varua moˈa e faatupu, o te oaoa ïa. (Gal. 5:22) No reira te Salamo 64:10 e parau ai: “E oaoa te feia parau-tia ra ia Iehova.”

Tera atoa te tumu e oaoa noa ˈi Diana e John noa ˈtu te mau fifi ta raua i faaruru. Ua parau Diana: “Mai te hoê tamarii e horo i to ˈna metua ra, ua imi atoa vau i te haapuraa ia Iehova ra.” Ua na ô â oia: “Ua taa ia ˈu e maoti Iehova i poro tamau noa ˈi au ma te mata oaoa.” E o John, eaha tei tauturu ia ˈna ia tamau i te oaoa e te poro i muri aˈe i te vaiihoraa i ta ˈna taviniraa? Te faataa ra oia: “I 1998, ua maitihia vau no te haapao i te Haapiiraa faaineineraa no te taviniraa. Ua nehenehe ïa vau e haapii rahi atu â ia ˈu i te Bibilia.” Aita roa ˈtu raua ta ˈna vahine i tatarahapa i te fariiraa i te mau hopoia atoa no ǒ mai ia Iehova. Na tera huru feruriraa i tauturu atu ia faaau ohie i to raua tupuraa apî.

E rave rahi atu â tei ite atoa i te oaoa ta te Salamo 64:10 e faahiti ra. Ua tavini te tahi na hoa faaipoipo hau atu i te 30 matahiti i te Betela no Marite. Ua anihia râ raua ia faarue i te Betela no te tavini ei pionie taa ê. Te parau ra raua: “Mea mauiui iho â ia ere i te hoê mea ta oe e au ra, eita râ oe e oto e a muri noa ˈtu!” Ua haamata raua i te poro e ta raua amuiraa apî. Te na ô atoa ra na hoa faaipoipo: “Ua faahiti mâua i te tahi mau mea taa maitai i roto i ta mâua mau pure. Ua itoitohia e ua oaoa roa mâua i te pahonoraahia ta mâua mau pure. Aita i maoro, ua haamata vetahi o te amuiraa i te rave i te taviniraa pionie e e piti haapiiraa Bibilia ta mâua e haere ra i mua i te pae varua.”

No te mau fifi, e ere i te mea ohie ia oaoa noa. Te tamahanahana mai ra râ Iehova ia tatou na roto i te Salamo 64:10. Ia tapea tatou i te taiva ore i roto i te ati, e oaoa tatou ia Iehova! Te tiai ru nei tatou i “te raˈi apî e te fenua apî” ta Iehova i fafau mai. I tera taime e tia roa ˈi te taata atoa. E tupu roa ïa teie mau parau: “E oaoa râ outou e ouˈauˈa noa i te oaoa e a muri noa ˈtu.”—Isa. 65:17, 18.

A feruri na, e fanaˈo te taata atoa i te ea maitai. Eita ïa tatou e rohirohi a ara mai ai i te mau poipoi atoa! Eita tatou e manaˈo faahou i te mau mea o tei haamauiui na ia tatou. Te haapapu ra hoi Iehova: “E ore hoi tei mutaaihora e manaˈohia, e ore e faatupu-faahou-hia i roto i te aau.” Hau atu â, e faatiahia mai te feia herehia i pohe. Mai te aha to tatou huru i tera taime? E oaoa roa tatou i te farii ia ratou mai te mau metua o te tamahine 12 matahiti ta Iesu i faatia mai. (Mar. 5:42) I nia i te fenua taatoa, “e oaoa te feia parau-tia ra ia Iehova” e a muri noa ˈtu!