1. Eaha te tahi tumu taa ê e oaoa ˈi tatou?

 AUÊ tatou i te oaoa te anaana ra te maramarama o te mau tavini a te Atua! I te matahiti i mairi, ua faatere te nunaa o Iehova hau atu i te 10 000 000 haapiiraa Bibilia. E mirioni tei tae mai i te Oroa haamanaˈoraa no te taime matamua. Ua haapii atu â ratou no nia i te ô î i te here ta Iehova i horoa mai, oia hoi te hoo.—Ioa. 1, 4:9.

2, 3. (a) Eaha te ore e tapea nei ia tatou ia anaana “ei tiarama i roto i teie nei ao”? (b) Eaha ta tatou e hiˈopoa mai i roto i teie haapiiraa?

² Na te ao nei, ua rau te reo e paraparauhia e te mau Ite no Iehova. Eita râ te reira e tapea ia ratou ia faahanahana ia Iehova ei utuafare hoê. (Apo. 7:9) Noa ˈtu te taa ê o to tatou reo e fenua, e nehenehe tatou paatoa e anaana “ei tiarama i roto i teie nei ao.”—Phil. 2:15.

³ E faahanahana tatou ia Iehova na roto i ta tatou taviniraa, to tatou auhoêraa Kerisetiano e ma te vai ara noa. E  nafea ïa ia anaana to tatou maramarama i roto i teie na tuhaa e toru?—A taio i te Mataio 5:14-16.

4, 5. (a) Taa ê atu i te ohipa pororaa, e nafea atoa to tatou maramarama e anaana ˈi? (b) Eaha te itehia ia hamani maitai tatou i te taata? (A hiˈo i te hohoˈa matamua.)

⁴ Ua riro te pororaa e te ohipa faariroraa i te taata ei pǐpǐ ei ravea faufaa ia anaana to tatou maramarama. (Mat. 28:19, 20) I 1925, te faahiti ra te tumu parau “Te maramarama i roto i te hoê ao poiri,” eita te taata e nehenehe e tapea i to ˈna haapao maitai i te Fatu i te mau mahana hopea ia ore “to ˈna maramarama e anaana.” E te na ô atoa ra: “E tia i te taata ia paraparau no nia i te parau apî oaoa i te mau nunaa atoa e ia ora ia au i te mau ture aveia a Iehova.” (Te Pare Tiairaa o te 1 no Tiunu 1925, Beretane) Taa ê atu i te ohipa pororaa, e faahanahana-atoa-hia Iehova na roto i to tatou haerea. Mea rahi te taata o te mataitai noa mai ra a poro ai tatou. Ma te mata ataata e te aroharaa ˈtu ia ratou, e tauturu te reira i te taata ia manaˈo e feia maitai tatou e na reira atoa te Atua ta tatou e haamori ra.

⁵ Ua na ô Iesu i ta ˈna mau pǐpǐ: “Ia tomo outou i roto i te fare, a aroha ˈtu i te utuafare.” (Mat. 10:12) Na te fenua i poro ai Iesu, e peu na te taata ia titau manihini i te feia ěê i to ratou fare. I teie mahana, mea rahi te vahi te ore ra tera peu. Pinepine te taata i te haapeapea e te iria ia tia ˈtu te tahi i to ratou opani fare. E topa râ paha to ratou hau ia faaite tatou i te mata oaoa e te hamani maitai. Aita anei outou i tapao ia na reira outou a faaohipa ˈi i te vairaa papai, mea ohie aˈe no te taata ia tapiri mai e ia rave i te papai? Peneiaˈe, e tae roa ratou i te farii i te hoê aparauraa!

6. Eaha tei tauturu i te tahi na hoa faaipoipo ruhiruhia ia ohipa noa i roto i te taviniraa?

⁶ No te maˈi, aita ˈtura i tia faahou i te tahi na hoa faaipoipo ruhiruhia i Beretane ia poro i tera e tera fare mai ta raua i matau. Ua tuu aˈera raua i te hoê airaa maa i rapae mai i to raua fare a apǎpǎ ˈtu ai i te papai i nia iho. Mea piri te hoê fare haapiiraa i to raua nohoraa, ua maiti ïa raua i te mau papai e anaanataehia e te mau metua o te haere e tii i ta ratou tamarii. Ua rave vetahi metua i te mau papai mai te buka 1 e 2 Les jeunes s’interrogent. Réponses pratiques. Mea pinepine te tahi tuahine pionie i te apiti mai ia raua. Ua tapao te mau metua, mea maitai roa te tuahine e te hinaaro mau ra na hoa faaipoipo e tauturu i te taata. Ua farii roa hoê metua i te haapii i te Bibilia.

7. E nafea ia tauturu i te feia o tei horo ê i to ratou fenua?

⁷ Aita i maoro aˈenei, mea rahi te feia o tei horo ê i to ratou fenua. Ia farerei noa ˈtu oe hoê, e nafea ia tauturu atu ia ite o vai o Iehova? Na mua, a haapii e nafea ia aroha ˈtu na roto i to ratou reo.  Maoti atoa i te ravea roro uira JW Language, a hiˈo eaha te tahi mau parau rii e anaanatae ai ratou i te paraparau mai. I muri iho, e nehenehe e faaite atu i te mau video e papai na roto i to ratou reo i nia i te jw.org.—Deut. 10:19.

8, 9. (a) E nafea te putuputuraa Oraraa e taviniraa Kerisetiano e tauturu mai ai? (b) E nafea te metua e tauturu ai i ta ratou tamarii ia haamaitai i ta ratou pahonoraa?

⁸ Te horoa mai ra o Iehova i ta tatou e hinaaro mau ra no te riro ei taata poro aravihi. A hiˈo na i te putuputuraa Oraraa e taviniraa Kerisetiano. Te tauturuhia ra tatou ia ore e taiâ faahou ia rave i te mau farerei-faahou-raa e ia haamata i te mau haapiiraa Bibilia.

⁹ Ia tae apî mai te taata i ta tatou mau putuputuraa, e pinepine ratou i te faahiahia i te pahonoraa a te mau tamarii. Mea maitai ïa ia haapii i ta outou tamarii ia pahono na roto i ta ratou iho mau parau. Ua farii vetahi i te parau mau i te faaiteraa te tamarii i to ratou faaroo na roto i te mau parau ohie e te putapû mau.—Kor. 1, 14:25.

10. E nafea te utuafare ia hoê roa ˈtu â maoti te haamoriraa utuafare?

¹⁰ Ia tutava tatou i te haapii i to tatou utuafare ia ohipa amui ma te hoê e te hau, te faahanahanahia ra ïa Iehova. Ei metua, a faatupu tamau i te arui haamoriraa utuafare. Mea rahi te mau utuafare o te mataitai amui i te JW Haapurororaa  teata a paraparau atu ai e nafea ia faaohipa i ta ratou i haapii mai. A haamanaˈo râ, mea ê te hinaaro o te tamarii, mea ê te hinaaro o te taurearea. A rave i te maraa ia outou ia faufaahia te mero tataitahi i te haamoriraa utuafare.—Sal. 148:12, 13.

11-13. E nafea ia tauturu i ta outou amuiraa ia hoê roa ˈtu â?

¹¹ E nehenehe atoa te feia apî e tauturu i te mau mero o te amuiraa. Te tahi ravea, o te faahoaraa ïa i te mau taeae e tuahine ruhiruhia. A ani atu eaha tei tauturu ia ratou ia tamau i te tavini ia Iehova i te roaraa o te mau matahiti. E haapiiraa faufaa mau ta outou e huti mai! E faaitoito-mau-hia ratou e outou atoa! E nehenehe atoa tatou paatoa, feia apî e ruhiruhia, e farii maitai i te taata i te Piha a te Basileia. E ere i te mea ohipa rahi. A aroha ˈtu ma te mata oaoa, a imi i te parahiraa no ratou e a faaite i to ratou iˈoa ia vetahi ê. Te mea faufaa, eiaha ratou ia taiâ!

¹² Ia maitihia oe no te faatere i te putuputuraa no te pororaa, a tauturu i te feia ruhiruhia ia anaana noa to ratou maramarama. A ara i te horoa ˈtu i te tuhaa fenua e tano. A faanaho ia poro te feia apî na muri ia ratou. E pinepine te mau taeae e tuahine ruhiruhia e te maˈimaˈi i te toaruaru no te mea eita ratou e nehenehe faahou e poro mai na mua ˈˈe. E itoitohia râ ratou ia ite te haapao ra oe i to ratou tupuraa. Noa ˈtu to ratou faito matahiti e noa ˈtu mea maoro ratou i roto i te parau mau, e faaitoito to outou hamani maitai ia ratou ia tamau i te poro ma te itoito.—Lev. 19:32.

¹³ Mea oaoa roa na te mau Iseraela ia haamori amui ia Iehova. Teie ta te papai Salamo i parau: “Inaha hoi, te maitai e te popou, ia parahi atoa te mau taeae ma te au maite!” (A taio i te Salamo 133:1, 2.) Ua faaau oia i te auhoêraa o te nunaa o te Atua i te monoˈi faatavai o te faahaumârû e o te faanoˈanoˈa i te iri. E nehenehe atoa tatou e faaitoito i to tatou mau taeae e tuahine ma te hamani maitai atu. E tauturu te reira i te amuiraa ia hoê roa ˈtu â. E nehenehe anei oe e haamatau atu â i te mau taeae e tuahine o ta oe amuiraa?—Kor. 2, 6:11-13.

14. E nafea to outou maramarama ia anaana i to outou vahi nohoraa?

¹⁴ E nehenehe to outou maramarama e anaana i te mau vahi atoa. E turai paha to outou hamani maitai i te feia tapiri ia hinaaro e ite atu â no nia ia Iehova. A ui ia outou iho, ‘Eaha te manaˈo o te feia tapiri no nia ia ˈu? Mea naho e mea mâ anei to ˈu fare? E riro anei ei hiˈoraa maitai? E taata tauturu anei au i te feia tapiri?’ A ani i te tahi atu mau Ite no Iehova mea nafea to ratou hamani maitai e hiˈoraa i te tautururaa i te fetii, feia tapiri, hoa ohipa aore ra haapiiraa.—Eph. 5:9.

15. No te aha e titauhia ia ara noa tatou?

¹⁵ Ia hinaaro tatou ia anaana noa to tatou  maramarama, e titauhia ia ara noa tatou i te tau ta tatou e ora nei. E rave rahi taime to Iesu parauraa i ta ˈna mau pǐpǐ: “A ara noa.” (Mat. 24:42; 25:13; 26:41) Mai te peu e mea atea â te “ati rahi” no tatou, eita ïa tatou e ru i te imi i te mau ravea atoa no te tauturu ia vetahi ê ia haapii o vai o Iehova. (Mat. 24:21) Eita ˈtura to tatou maramarama e anaana faahou, e mohimohi mǎrû noa râ a pohe roa ˈtu ai!

16, 17. Eaha te rave no te vai ara noa?

¹⁶ E titauhia ia vai ara noa tatou, i teie iho â râ tau. E ino roa ˈtu â te tupuraa na te ao, ua ite râ tatou e tae mai iho â te hopea i te taime ta Iehova i maiti. (Mat. 24:42-44) A tiai noa ˈi, e faaoromai anaˈe a tiatonu noa ˈi i te tupu i mua ia tatou. A taio i te Bibilia i te mau mahana atoa e eiaha e faaea i te pure ia Iehova. (Pet. 1, 4:7) A huti mai i te mau haapiiraa na roto i te hiˈoraa o te mau taeae e tuahine o tei tavini maoro ia Iehova. E nehenehe e taio i te aamu o vetahi mai tei faatiahia i roto i te tumu parau “Ua ite mâua i to te Atua hamani maitai rahi i roto e rave rahi tupuraa.” Tei roto te reira i Te Pare Tiairaa Fepuare 2017 i te api 27-30.

 ¹⁷ Ia rahi noa ta outou ohipa i roto i te taviniraa a Iehova. A hamani maitai ia vetahi ê e a faataa i te taime no te amuimui i te mau taeae e tuahine. E oaoa outou, e mai te huru ra e te mairi oioi ra te taime. (Eph. 5:16) Mea rahi mau ta te mau tavini a Iehova i rave i na hoê hanere matahiti i mairi aˈenei. E i teie mahana, ua rahi atu â. Ua haere roa ta Iehova ohipa i te rahi ia faaauhia i na mua ˈˈe. Te anaana roa ˈtura ïa to tatou maramarama!

18, 19. E nafea te mau matahiapo e tauturu mai ai ia tavini ia Iehova ma te itoito? A horoa i te hiˈoraa.

¹⁸ Noa ˈtu mea pinepine tatou i te hapa, te farii ra o Iehova ia tavini tatou ia ˈna. No te tauturu ia tatou, ua horoa mai oia i “te taata ei ô,” te mau matahiapo ïa o te amuiraa. (A taio i te Ephesia 4:8, 11, 12.) No reira ia haere atu te mau matahiapo e farerei ia outou, a haafaufaa i tera taime no te huti mai i te haapiiraa na roto i to ratou paari e ta ratou mau aˈoraa.

¹⁹ A hiˈo na i te tahi na hoa faaipoipo i Beretane o tei fifihia. Ua farerei raua e piti matahiapo no te ani i te tauturu. No te vahine, aita ta ˈna tane e tauturu ra i te utuafare ia tavini ia Iehova. Area no te tane, te manaˈo ra e ere oia i te mea aravihi no te haapii, te tumu ïa o ˈna i ore ai e rave tamau i ta ratou haamoriraa utuafare. Ua tauturu atu te mau matahiapo na roto i te hiˈoraa o Iesu. Ua faaitoitohia te tane ia aupuru i te utuafare mai ia Iesu i na reira no ta ˈna mau pǐpǐ. Area te vahine, ia faaite ïa i te faaoromai i nia i ta ˈna tane. Ua horoahia te tahi mau manaˈo tauturu no te faatupu i te haamoriraa utuafare e ta raua na tamarii e piti. (Eph. 5:21-29) Ua rave te tane i te mau tutavaraa no te riro ei upoo utuafare maitai aˈe. Ua faaitoito â te mau matahiapo ia ˈna ia tamau noa i te na reira a turui noa ˈi i nia i te varua moˈa o Iehova. Ua faufaa-mau-hia na hoa faaipoipo i te here e te hamani maitai ta te mau matahiapo i faaite!

20. Eaha te maitai e itehia ia anaana to outou maramarama?

²⁰ “E ao to te taata atoa i mǎtaˈu ia Iehova; o tei haapao i to ˈna ra mau eˈa.” (Sal. 128:1) E oaoa ïa outou ia anaana to outou maramarama! No reira, a haapii ia vetahi ê o vai te Atua. A rave i te maraa ia outou no te tauturu i to outou utuafare e te amuiraa ia hoê noa. E a tamau noa i te vai ara. Ma te ite i to outou hiˈoraa maitai, e hinaaro te taata e faahanahana i to tatou Metua ra o Iehova.—Mat. 5:16.