1. No te aha mea tano ia parau o Iehova te fatu o te mau mea atoa? (A hiˈo i te hohoˈa matamua.)

 O IEHOVA te fatu o te mau mea atoa! “Inaha hoi te raˈi, e te raˈi i nia roa i te mau raˈi ra, no to Atua ïa no Iehova, te fenua atoa nei hoi e te mau mea atoa i roto ra.” (Deut. 10:14; Apo. 4:11) I te mea na Iehova i poiete i te taata, no ˈna ïa tatou paatoa. (Sal. 100:3) Ua maiti râ te Atua vetahi feia i rotopu i te huitaata no te riro ei tufaa taa ê na ˈna.

2. Ia au i te Bibilia, o vai te feia i riro ei tufaa taa ê na Iehova?

² Te faaite ra te Salamo 135 ua faariro Iehova i te feia taiva ore o te nunaa Iseraela ei “taoˈa here na ˈna.” (Sal. 135: 4) Ua tohu atoa Hosea e itehia te feia e ere i te Iseraela i roto i te nunaa o Iehova. (Hos. 2:23) Ua tupu tera parau tohu a maiti ai o Iehova i te feia no te nunaa ê no te faatere e te Mesia i te raˈi. (Ohi. 10:45; Roma 9:23-26) Ua riro teie feia faatavaihia i te varua moˈa ei “nunaa moˈa,  e pǔpǔ taata hoohia mai no te Atua” ra o Iehova. (Pet. 1, 2:9, 10) E no te mau Kerisetiano taiva ore i teie mahana o te tiaturi e ora e a muri noa ˈtu i nia i te fenua? Te pii atoa ra Iehova ia ratou, “to ˈu ra mau taata,” “to ˈu ra feia i maitihia.”—Isa. 65:22.

3. (a) O vai te fanaˈo ra i te auhoaraa taa ê e o Iehova i teie mahana? (b) Eaha ta tatou e hiˈopoa i roto i teie haapiiraa?

³ Te “nǎnǎ iti,” o te feia ïa e tiaturi e ora e a muri noa ˈtu i te raˈi. Area te “mamoe ê atu,” o te feia ïa e tiaturi e ora e a muri noa ˈtu i nia i te fenua. I teie mahana, te haamori amui ra na pǔpǔ e piti ia Iehova “ei hoê noa nǎnǎ.” (Luka 12:32; Ioa. 10:16) E hinaaro tatou e haamauruuru ia Iehova no te auhoaraa taa ê ta tatou e fanaˈo ra e o ˈna. I roto i teie haapiiraa, e hiˈopoa tatou e nafea ia haamauruuru ia Iehova no tera haamaitairaa taa ê.

4. E nafea ia haamauruuru ia Iehova no te auhoaraa ta tatou e fanaˈo ra e o ˈna? Eaha ta Iesu i rave atoa i to ˈna bapetizoraahia?

⁴ E haamauruuru tatou ia Iehova ma te pûpû ia tatou ia ˈna a bapetizohia ˈtu ai. I tera taime, e ite te taata atoa no Iehova tatou e ua ineine tatou i te auraro ia ˈna. (Heb. 12:9) Tera atoa ta Iesu i rave i to ˈna bapetizoraahia. Ei ati Iuda, tei roto Iesu i te hoê nunaa o tei pûpû-aˈena-hia i te Atua. Noa ˈtu râ, ua faaoti Iesu i te pûpû ia ˈna iho ia Iehova. Mai te huru ra ïa, ua na ô oia: “E mea au na ˈu te rave i to oe hinaaro, e tau Atua.”—Sal. 40:7, 8.

5, 6. (a) Eaha ta Iehova i parau i te bapetizoraahia Iesu? (b) Eaha te huru o Iehova ia pûpû tatou i to tatou ora ia ˈna? A horoa i te hoê hiˈoraa.

⁵ Eaha to Iehova huru i te bapetizoraahia Iesu? Te na ô ra te Bibilia: “E oti aˈera Iesu i te bapetizohia, i reira iho, haere maira oia i nia mai raro mai i te pape. E inaha, matara aˈera te raˈi e ite aˈera Ioane i te varua o te Atua i te pouraa mai mai te uupa ra i nia ia Iesu. Inaha, e reo atoa tei faaroohia mai te raˈi mai i te na ôraa: ‘O ta ˈu Tamaiti teie, tei herehia, ta ˈu i mauruuru roa.’” (Mat. 3:16, 17) No te Atua ê na Iesu, ua oaoa roa râ Iehova i te iteraa ua ineine Iesu i te faaohipa i to ˈna ora no te tavini ia ˈNa anaˈe. Ua oaoa atoa o Iehova i te pûpûraa tatou ia tatou ia ˈna e e haamaitai mai iho â oia.—Sal. 149:4.

⁶ E na ô râ paha tatou, ‘No Iehova te mau mea atoa, eaha ïa ta tatou e nehenehe e horoa ˈtu?’ A feruri na i te tahi metua tane, ua î roa to ˈna aua i te tiare nehenehe mau. I te hoê mahana, pofai atura ta ˈna tamahine hoê tiare no te horoa ˈtu na ˈna. Noa ˈtu no roto mai te tiare i to ˈna aua, e oaoa roa te metua tane i te farii i tera ô! Eaha te tumu? Te faaite ra ta ˈna tamahine mea here na ˈna to ˈna papa. Mea faufaa aˈe ïa tera tiare i te toea o te mau tiare i roto i te aua. Tera atoa te huru o Iehova ia faaoti anaˈe tatou i te pûpû i to tatou ora ia ˈna.—Exo. 34:14.

7. Ia au i te Malaki, eaha to Iehova huru na tatou anaˈe e faaoti i te pûpû ia tatou ia ˈna?

⁷ A taio i te Malaki 3:16. No te aha mea faufaa roa ia pûpû i to tatou ora ia Iehova e ia bapetizohia? Parau mau,  mai te taime i tôhia ˈi tatou, no Iehova ê na tatou, o ˈna hoi to tatou Atua poiete. A feruri na râ i to ˈna oaoa ia farii tatou ia ˈna ei Faatere a pûpû atu ai i to tatou ora ia ˈna! (Mas. 23:15) Ua ite o Iehova i te feia o te tavini ia ˈna ma te aau tae e e papai oia i to ratou iˈoa i roto i ta ˈna “buka manaˈoraa.”

8, 9. Eaha ta Iehova e titau ra i te feia ua papaihia to ratou iˈoa i roto i ta ˈna “buka manaˈoraa”?

⁸ Eaha te titauhia ia rave ia vai noa to tatou iˈoa i roto i ta Iehova “buka manaˈoraa”? Te parau ra Malaki mea tia ia mǎtaˈu ia Iehova e ia manaˈo noa i to ˈna iˈoa. Ia haamori noa ˈtu tatou i te tahi atu mea aore ra taata, e tumâhia to tatou iˈoa i roto i te buka a Iehova!—Exo. 32:33; Apo. 3:5.

⁹ Eita ïa e navai ia euhe i te rave i to Iehova hinaaro e ia bapetizohia. Hoê noa hoi taime te reira e ravehia ˈi, area te taviniraa ia Iehova, no te roaraa ïa o to tatou oraraa. I te mau mahana atoa, mea tia ia faaite ta tatou mau ohipa o Iehova ta tatou e auraro ra.—Pet. 1, 4:1, 2.

10. Na te aha e haapapu mea taa ê te feia e tavini ra ia Iehova?

¹⁰ I roto i te haapiiraa na mua ˈtu, ua ite mai tatou ua haamori Kaina, Solomona e te mau Iseraela ia Iehova. Ua taiva râ ratou ia ˈna i muri aˈe. Eita ïa e navai noa ia parau, ‘E haamori au ia Iehova!’ E titau-atoa-hia râ ia faufau i te mea ino e ia hinaaro i te mea maitai. (Roma 12:9) Ua parau o Iehova e ite-papu-hia te taa-ê-raa i rotopu “i te taata parau tia e te taata parau ino, i te taata i haamori i te Atua, e te taata e ore e haamori ia ˈna.”—Mal. 3:18.

11. No te aha e tia ia ite ohie te taata o Iehova anaˈe ta tatou e haamori ra?

¹¹ Auê tatou i te mauruuru ia Iehova i te maitiraa ia tatou ei nunaa no ˈna! Mea ohie ïa no te taata ia ite ua tia tatou i te pae o Iehova. (Mat. 5:16; Tim. 1, 4:15) E ui anaˈe ia tatou iho, ‘Te ite ra anei te taata o Iehova anaˈe ta ˈu e haamori ra? E haapeuraa anei no ˈu ia parau e Ite no Iehova vau?’ A feruri na i to Iehova huru ia haama tatou i te parau e taata tatou no ˈna.—Sal. 119:46; a taio i te Mareko 8:38.

12, 13. No te aha eita e ite-papu-hia e Ite no Iehova vetahi?

¹² Ma te peapea, te pee ra te tahi mau Ite no Iehova i “te huru feruriraa o teie nei ao.” Eita ˈtura e ite-mau-hia te taa-ê-raa i rotopu ia ratou e te feia e ore e haamori ia Iehova. (Kor. 1, 2:12) E turai “te huru feruriraa o teie nei ao” i te taata ia haapao i to ratou iho hinaaro. (Eph. 2:3) A hiˈo na, noa ˈtu te mau aˈoraa i horoahia mai, te maiti noa ra vetahi i te faaahuraa e ere i te mea tura. E oomo ratou i te ahu vî e te mea piri i nia i te tino, e te reira i te mau putuputuraa  Kerisetiano atoa. E maiti atoa vetahi i te tâpû e te faanehenehe i to ratou rouru mai te feia o teie nei ao. (Tim. 1, 2:9, 10) Eita ˈtura ïa e ite-papu-hia e Ite no Iehova ratou.—Iak. 4:4.

¹³ Te faaite ra vetahi Kerisetiano i te tahi atu mau haerea o tei ore i taa ê i to teie nei ao. I te taime faaanaanataeraa, eita te huru oriraa e te haerea o vetahi e tuati i to te hoê Kerisetiano. I nia i te reni faahoaraa, ua tuu atoa vetahi i to ratou mau hohoˈa e ua papai i te mau parau o te faaite ra e feruriraa pae tino to ratou. Aita paha ratou i aˈohia i roto i te amuiraa no te tahi hara ino, e ere râ ratou i te amuimuiraa maitai no te mau taeae e tuahine o te tutava ra i te faataa ê mai ia ratou i teie nei ao.—A taio i te Petero 1, 2:11, 12.

14. Mea tia ia rave tatou i te aha no te fanaˈo noa i te auhoaraa taa ê e o Iehova?

¹⁴ Ua faaineinehia te mau mea atoa i roto i teie nei ao no te turai ia tatou ia haapao noa i “te hinaaro tia ore o te tino e te hinaaro tia ore o te mata e te faaiteiteraa ahaaha i ta ˈna mau faufaa.” (Ioa. 1, 2:16) E taata tatou no Iehova, mea taa ê ïa tatou! E tia ia tatou “ia haapae i te haerea ino e oia atoa te mau hinaaro o teie nei ao” e “ia ora ma te manaˈo paari e te parau-tia e te haamori i te Atua anaˈe i roto i teie nei faanahoraa o te ao nei.” (Tito 2:12) Ia ite ïa te taata na roto i to tatou oraraa taatoa, ta tatou huru paraparau, tamaaraa, inuraa, faaahuraa e ohipa, no Iehova tatou.—A taio i te Korinetia 1, 10:31, 32.

15. No te aha e tia ˈi ia hamani maitai e ia here noa i te mau taeae e tuahine?

¹⁵ Mea faufaa anaˈe no tatou te auhoaraa e o Iehova, e haapao maitai ïa tatou i to tatou huru i nia i te mau taeae e tuahine. No Iehova atoa ratou mai ia tatou. Ma te haamanaˈo i te reira, e hamani maitai e e here noa ïa tatou ia ratou. (Tes. 1, 5:15) No te aha mea faufaa roa? Ua na ô Iesu i ta ˈna mau pǐpǐ: “I te mea e mea here outou te tahi i te tahi, e ite ïa te taata atoa e e pǐpǐ outou na ˈu.”—Ioa. 13:35.

16. Ma te feruri i te tahi faaueraa o te ture a Mose, eaha te haapapu ra mea here na Iehova i to ˈna mau taata?

¹⁶ Eaha te huru e tia ia faaite i nia i te mau taeae e tuahine o te amuiraa? A hiˈo na i te tahi faaueraa o te ture a Mose. I roto i te sekene, te vai ra te mau farii faataa-noa-hia no te haamoriraa a Iehova. Te faataa maitai ra te ture mai te aha te huru raveraa a te ati Levi i tera mau mea moˈa. Ia ore te tahi e haapao i te mau faaueraa, e haapohehia oia. (Num. 1:50, 51) Mea faufaa tera mau farii, eaha ˈtu â ïa te mau tavini taiva ore i pûpû ia ratou ia Iehova! Mea faufaa roa tatou no Iehova i parau ai oia o tei hauti ia tatou, ua hauti ïa i to ˈna orio mata.—Zek. 2:8.

17. Eaha ta Iehova e faaroo e e ite?

¹⁷ Ua parau te peropheta Malaki, “ua faaroo maira” e “ua ite” o Iehova mai te aha to tatou huru i nia i te tahi e te tahi. (Mal. 3:16) “Ua ite Iehova i to ˈna mau taata.” (Tim. 2, 2:19) Ua ite oia i te mau  mea atoa ta tatou e rave e e parau. (Heb. 4:13) E ite oia e ere anaˈe to tatou huru i nia i te mau taeae e tuahine i te mea maitai. Te mea papu atoa râ, e ite atoa oia ia faaite tatou i te mau huru maitatai i nia i te mau taeae, mai te farii maitai, te horoaraa ma te aau tae, te faaoreraa i ta vetahi ê hara e te hamani-maitai-raa ia ratou.—Heb. 13:16; Pet. 1, 4:8, 9.

18. E nafea tatou e haamauruuru ai ia Iehova i te maitiraa ia tatou ei taata no ˈna?

¹⁸ E hinaaro tatou e haamauruuru mau ia Iehova i te maitiraa ia tatou ei taata no ˈna! Ua ite tatou e faaotiraa paari ta tatou i rave i te pûpûraa ia tatou ia Iehova. Noa ˈtu te ora nei tatou “i rotopu i te hoê uˈi ino e te piˈo,” e nehenehe noa â tatou e riro “ei feia hapa ore” e e anaana “ei tiarama i roto i teie nei ao.” (Phil. 2:15) E faaoti papu anaˈe ïa i te haapae i te mau mea atoa ta Iehova e au ore ra. (Iak. 4:7) E here e e faatura anaˈe i to tatou mau taeae e tuahine no te mea e taata atoa ratou no Iehova!—Roma 12:10.

19. E nafea o Iehova e haamaitai ai i to ˈna mau taata?

¹⁹ Te fafau ra te Bibilia: “E ore hoi Iehova e faarue i to ˈna taata.” (Sal. 94:14) Aita e feaaraa, eita o Iehova e faarue ia tatou noa ˈtu eaha te tupu. E mai te peu e pohe noa ˈtu tatou, eita tatou e moˈe ia ˈna. (Roma 8:38, 39) “Te ora nei tatou, te ora nei ïa no Iehova. E pohe noa ˈtu tatou, e pohe ïa tatou no Iehova. No reira, ora noa ˈtu â aore ra pohe noa ˈtu â tatou, no Iehova tatou.” (Roma 14:8) Te tiai ru nei tatou i te taime e faatia mai ai Iehova i to ˈna mau tavini taiva ore atoa tei pohe. (Mat. 22:32) Tera râ, i teie nei â, te oaoa nei tatou i te fanaˈo i te mau ô faahiahia mau no ǒ mai i to tatou Metua ra. Mai ta te Bibilia e parau ra: “E ao to te fenua o Iehova to ratou Atua; e te mau taata i maitihia e ana ei tufaa na ˈna.”—Sal. 33:12.