1, 2. Eaha te auraa ia hiˈo ia Iehova?

 “E TAU ino mau ïa e te fifi ia faaruru” ta tatou e ora nei. (Tim. 2, 3:1) E ino roa ˈtu â te oraraa e tae noa ˈtu i te taime e haamou ai Iehova i teie ao ino a tupu atu ai te hau i nia i te fenua. No reira, mea maitai ia ui ia tatou iho, ‘E fariu vau ia vai no te fanaˈo i te tauturu e te aratairaa?’ Oioi roa paha tatou i te parau, ‘Ia Iehova!’ e e pahonoraa tano roa.

² Eaha te auraa ia hiˈo, aore ra ia fariu, ia Iehova ra? I roto i te fifi, e nafea ia papu te tamau ra tatou i te hiˈo ia ˈna? Ua faataa te tahi taata papai Bibilia i te faufaaraa ia fariu ia Iehova ia hinaaro tatou i te tauturu. (A taio i te Salamo 123:1-4.) Ua parau oia e au tatou i te tavini o te hiˈo i to ˈna fatu no te fanaˈo i te maa e te parururaa. E moemoe tamau atoa râ oia no te ite e ohipa anei ta to ˈna  fatu e hinaaro ia rave oia. I muri iho, e haavitiviti o ˈna i te rave i te reira. Mai tera tavini, mea tia ia haapii maite tatou i te Parau a te Atua i te mau mahana atoa no te taa eaha ta Iehova e hinaaro ra ia rave tatou. I muri iho, e rave anaˈe i te reira. Mea papu ïa e tauturu mai o Iehova ia tatou i te taime hinaarohia.—Eph. 5:17.

3. Eaha te nehenehe e haafariu ê ia tatou ia Iehova?

³ Ua ite tatou mea tia ia tamau i te hiˈo ia Iehova. Noa ˈtu râ, e fariu ê to tatou mata i te tahi taime. Tera tei tupu i nia i te hoa piri o Iesu o Mareta. Te parauhia ra, “te raverave noa ra ïa e rave rahi ohipa.” (Luka 10:40-42) Noa ˈtu to reira Iesu, ua fariu ê te hoê tavini haapao maitai mai ia Mareta, eita ïa tatou e maere ia tupu atoa te reira i nia ia tatou. Eaha te nehenehe e haafariu ê ia tatou ia Iehova? I roto i teie haapiiraa, e hiˈopoa anaˈe e nafea ta vetahi ê e rave e nehenehe ai e haafariu ê ia tatou. E hiˈo atoa mai tatou e nafea ia tamau i te fariu ia Iehova ra?

4. Eaha te tumu e maere ai paha tatou i te ereraa Mose i te haamaitairaa ia tomo i te Fenua tǎpǔhia?

⁴ Mea papu, ua imi Mose i te aratairaa a Iehova. Te parau ra te Bibilia, “ua mau papu noa hoi oia mai te huru ra e te ite ra oia i te Atua ite-ore-hia.” (A taio i te Hebera 11:24-27.) Te na ô atoa ra te Parau a te Atua: “E mai reira mai â aore roa e peropheta i tupu i roto ia Iseraela mai ia Mose te huru, i ta Iehova i ite papu atu i te mata i to ˈna mata.” (Deut. 34:10) Noa ˈtu ïa e hoa piri Mose no Iehova, ua ere oia i te haamaitairaa ia tomo i te Fenua tǎpǔhia. (Num. 20:12) Eaha hoi te ohipa i tupu?

5-7. Eaha tei tupu i muri aˈe i to te mau Iseraela faarueraa ia Aiphiti e eaha ta Mose i rave?

⁵ Aita i tia e piti avaˈe i muri aˈe te faarueraa Iseraela ia Aiphiti, hou a tae atu ai i te mouˈa Sinai, e ohipa tei tupu. Aita te nunaa i mauruuru no te mea aita ta ratou e pape. Ua amuamu e ua riri aˈera ratou ia Mose, “tiaoro atura Mose ia Iehova, na ô atura, Eaha vau i teie nei feia? Rooau aˈe ratou ua tui mai ia ˈu i te ofai.” (Exo. 17:4) Mea papu maitai te mau aratairaa ta Iehova i horoa ia Mose. Ua parau atu oia ia rave i ta ˈna raau e ia tairi i te mato i Horeba. Te na ô ra te Bibilia: “E ua na reira hoi Mose i mua i te aro o te hui matahiapo o Iseraela ra.” Tahe mai nei te pape e mâha aˈera te poihâ o te mau Iseraela. Ua oti ïa te fifi i te faaafarohia.—Exo. 17:5, 6.

⁶ Ia au i te Bibilia, ua mairi Mose i tera vahi Masa, “aa” te auraa, e Meriba atoa, “mârô” te auraa. Eaha te tumu? “No te avau a te tamarii a Iseraela, e no te mea ua faatiˈo [aore ra aa] ratou ia Iehova, i te na ôraa e, Tei roto anei Iehova ia tatou, e aore anei?”—Exo. 17:7.

⁷ Eaha to Iehova huru no tei tupu i Meriba? Aita te mau Iseraela i patoi noa ia Mose, ua orure hau atoa râ ia Iehova e i to ˈna mana faatere. (A taio i  te Salamo 95:8, 9.) E hara ino mau ta te mau Iseraela i rave. Area Mose, ua rave ïa i te mea maitai. Ua fariu oia ia Iehova ra e ua haapao maitai i ta ˈna mau aratairaa.

8. A fatata ˈi te tau a overe ai te mau Iseraela i te hope, eaha tei tupu?

⁸ Fatata 40 matahiti i muri aˈe, hoê â ohipa tei tupu! Te hope atu ra te tau i overe haere noa ˈi te mau Iseraela na te medebara e ua tae aˈera i te tahi vahi piri atu ia Kadesa. Tei mua noa ˈtu te Fenua tǎpǔhia. Ua mairi-atoa-hia tera vahi o Meriba. * Eaha te tumu? Ua amuamu faahou te mau Iseraela no te mea aita ta ratou e pape. (Num. 20:1-5) I tera râ taime, e hara rahi ta Mose i rave.

9. Eaha te mau aratairaa ta Iehova i horoa ia Mose, eaha râ ta ˈna i rave? (A hiˈo i te hohoˈa matamua.)

⁹ I te orure-hau-raa te nunaa, eaha ta Mose i rave? Ua fariu faahou oia ia Iehova ra no te ani i ta ˈna aratairaa. I tera râ taime, aita Iehova i parau atu ia tairi i te mato. Ua faaue oia ia Mose ia rave i ta ˈna raau, ia haaputuputu i te nunaa i pihai iho i te mato e ia parau atu i te mato. (Num. 20:6-8) Tera anei ta Mose i rave? Aita. No to Mose inoino e riri, na ô atura oia i te nunaa: “A faaroo mai na, tena na mau faaroo-atâ; e tia anei ia mâua ia hopoi atu i te pape na outou no roto i teie nei mato?” Tairi atura Mose i te mato, eiaha hoê noa taime, e piti râ.—Num. 20:10, 11.

10. Eaha te huru o Iehova no ta Mose i rave?

¹⁰ Ua riri roa o Iehova ia Mose. (Deut. 1:37; 3:26) Eaha te tumu? Na mua roa, no te mea aita Mose i auraro i te mau aratairaa apî ta Iehova i horoa ˈtu.

11. I te tairi-faahou-raa Mose i te mato, no te aha te mau Iseraela i manaˈo ai aita o Iehova i faatupu i te semeio?

¹¹ Te vai ra paha te tahi atu tumu i riri ai Iehova. E ofai paari te mato i te Meriba matamua, pii-atoa-hia Masa. Noa ˈtu e e tairi-puai-hia tera mato, eita te pape e nehenehe e tahe mai. Area te mato i te piti o te Meriba, mea taa ê ïa. E ofai puˈa te rahiraa o te mau mato na tera vahi. E ere tera ofai i te mea paari, e pinepine ïa te reira i te tapea e i te haapue i te pape ûa. E nehenehe te taata e rave mai i tera pape ma te pao i te mato. No reira i to Mose tairi-faahou-raa i te mato, ua manaˈo paha te mau Iseraela aita o Iehova i faatupu i te semeio, ua tahe noa mai râ te pape no roto mai i te mato. *

12. Eaha te tahi tumu ê atu i riri ai Iehova ia Mose raua Aarona?

¹² E tumu ê atu paha ta Iehova no te riri ia Mose raua Aarona. Ua parau Mose i te nunaa: “E tia anei ia mâua ia hopoi atu i te pape na outou no roto i teie nei mato?” Ma te faahiti “mâua,” e au ra e te parau ra Mose ia ˈna e o Aarona. Aita Mose i faatura ia Iehova, aita hoi o ˈna i faaite na Iehova i faatupu i te semeio. Te na ô ra te Salamo 106:32, 33: “Ua faariri hoi ratou ia ˈna [ia Iehova] i te pape ra o Meriba, e roohia ihora Mose i te ino ia ratou: Ua faaooo hoi ratou i tana aau, i ino ai hoi te parau o tana vaha.” * (Num. 27:14) Aita Mose i horoa i te hanahana e au ia Iehova. Na ô atura te Atua ia Mose raua Aarona: “Ua haapao-atâ orua i ta ˈu parau.” Auê ïa hara ino mau!—Num. 20:24.

13. No te aha mea maitai e mea tano ta Iehova faautuaraa ia Mose?

¹³ Ua horoa o Iehova ia Mose e ia Aarona i te hopoia rahi ia aratai i to ˈna nunaa. Ua tano iho â ïa Iehova i te titau rahi atu â ia raua. (Luka 12:48) I tahito, aita o Iehova i vaiiho i te hoê uˈi Iseraela ia tomo i te Fenua tǎpǔhia. Te tumu, ua orure hau ratou ia Iehova. (Num. 14:26-30, 34) Mea maitai e mea tano ïa ta Iehova faautuaraa i to Mose orure-hau-raa. Mai tera uˈi Iseraela orure hau, aita atoa o Iehova i vaiiho ia Mose ia tomo i te Fenua tǎpǔhia.

14, 15. Eaha te tumu i orure hau ai Mose ia Iehova?

¹⁴ Eaha te tumu i orure hau ai Mose ia Iehova? A hiˈo faahou na i ta te Salamo 106:32, 33 e parau ra: “Ua faariri hoi ratou ia ˈna i te pape ra o Meriba, e roohia ihora Mose i te ino ia ratou: Ua faaooo hoi ratou i tana aau, i ino ai hoi te parau o tana vaha.” Noa ˈtu ïa ua orure hau te nunaa ia Iehova, o Mose tei inoino e tei riri. Aita i noaa ia Mose i te haavî ia ˈna iho e ua faahiti atura i te mau parau ma te feruri ore i te mau faahopearaa.

¹⁵ Ua vaiiho Mose i te ohipa a vetahi ê ia haafariu ê ia ˈna ia Iehova. I te taime matamua a amuamu ai te nunaa no te pape, ua rave Mose i tei faauehia ia ˈna. (Exo. 7:6) I te piti râ o te taime, ua rohirohi e ua inoino roa paha oia, aita hoi te nunaa Iseraela i faaea i te orure hau i te mau rahiraa matahiti. Ua feruri noa paha Mose i to ˈna inoino e aita ˈtura i manaˈo faahou e faahanahana ia Iehova.

16. No te aha ta Mose i rave e haaferuri ai ia tatou?

¹⁶ Mai te peu ua fariu ê e ua hara te hoê peropheta haapao maitai mai ia Mose, e tupu ohie atoa ïa te reira i nia ia tatou! Mai ia Mose, fatata atoa tatou  i te tomo i roto i te ao apî. (Pet. 2, 3:13) Eita roa ˈtu tatou e hinaaro e ere i tera haamaitairaa taa ê! No te tae râ i roto i te ao apî, mea tia ia tamau tatou i te fariu ia Iehova e i te auraro ia ˈna. (Ioa. 1, 2:17) Eaha te haapiiraa e huti mai i te hara a Mose?

17. Eaha te tauturu mai ia haavî ia tatou iho ia riri tatou?

¹⁷ E tamau anaˈe i te haavî ia tatou iho ia riri tatou. I te tahi taime, mea maoro paha to tatou faarururaa i te hoê â fifi. Tera râ, te na ô mai ra te Bibilia: “Eiaha ïa tatou e faaea i te rave i te mea maitai, e ooti hoi tatou i te taime tano ra ia ore noa ˈtu tatou ia rohirohi.” (Gal. 6:9; Tes. 2, 3:13) Ia riri tatou no te tahi tupuraa aore ra taata, e feruri anei tatou hou a faahiti ai i te parau? E noaa anei ia tatou i te haavî ia tatou iho? (Mas. 10:19; 17:27; Mat. 5:22) I tera mau taime, e titauhia ia haapii tatou i te “tuu atu . . . e na te Atua e faaite atu i to ˈna riri.” (A taio i te Roma 12:17-21.) Eaha ïa te auraa? Eiaha tatou ia riri, e tiai anaˈe râ ma te faaoromai na Iehova e faaafaro i to  tatou fifi i te taime e titauhia. Ia tamata tatou i te tahoo, eiaha râ i te fariu ia Iehova, te faaino ra ïa tatou ia ˈna.

18. Eaha te tia ia haamanaˈo no nia i te peeraa i te mau aratairaa?

¹⁸ E pee maite anaˈe i te mau aratairaa apî. Te pee maite ra anei tatou i te mau aratairaa apî no ǒ mai ia Iehova? Eiaha tatou ia rave noa mai ta tatou i matau na mua ˈˈe. E tia râ ia ineine i te pee i te mau aratairaa apî atoa ta Iehova e horoa mai na roto i ta ˈna faanahonahoraa. (Heb. 13:17) E mea tia atoa ia ara “eiaha ia na nia ˈtu i tei papaihia.” (Kor. 1, 4:6) Ma te pee maite i ta Iehova mau aratairaa, te tamau ra ïa tatou i te fariu ia ˈna ra no te fanaˈo i te tauturu.

19. E nafea ia ore e vaiiho i te hapa a vetahi ê ia tuino i to tatou auhoaraa e o Iehova?

¹⁹ Eiaha e vaiiho i te hapa a vetahi ê ia tuino i to tatou auhoaraa e o Iehova. No ta vetahi ê e rave, e riri e e faataa ê te tahi mau Kerisetiano ia ratou i te Atua. Ma te tamau râ i te fariu ia Iehova ra, eita tatou e na reira. Mea faufaa roa ˈtu â e hopoia anaˈe ta tatou i roto i te faanahonahoraa a te Atua mai ia Mose. No te ora ˈtu, e titauhia i te taata tataitahi ia tutava e ia auraro ia Iehova. (Phil. 2:12) Tera râ, rahi atu â ta tatou hopoia, rahi atu â Iehova i te titau ia tatou. (Luka 12:48) Ua here mau anaˈe râ tatou ia Iehova, eita te hoê noa ˈˈe mea e nehenehe e faaturori e e faataa ê ia tatou i to ˈna here.—Sal. 119:165; Roma 8:37-39.

20. Ia faaoti papu tatou i te aha?

²⁰ E tau fifi e e tupuraa rau ta tatou e farerei nei, e tia ia vai ara noa. Mea faufaa roa ïa ia tamau i te fariu ia Iehova, “tei parahi i nia i te mau raˈi ra,” no te taa maitai eaha ta ˈna e hinaaro ia rave tatou. Eiaha roa e vaiiho i te mau ohipa ta vetahi ê e rave ia tuino i to tatou auhoaraa e o Iehova. Tera mau hoi tei tupu i nia ia Mose. E huti mai anaˈe ïa i tera haapiiraa faufaa roa. Eiaha e riri no ta vetahi ê e rave, e faaoti papu anaˈe râ i te fariu i “to tatou Atua ia Iehova ra, e ia aroha mai oia ia tatou nei.”—Sal. 123:1, 2.