Te neneiraa i te mau buka bibilia i te tau opanihia

FAATIAHIA MAI E MALCOLM G. VALE

“A nenei i te buka ra Te mau tamarii (beretane).” O te faaueraa maere mau ïa i faauehia mai ia ˈu na te amaa a te mau Ite no Iehova i Auteralia, i te Piti o te Tamaˈi rahi, i muri noa ˈˈe te matararaa mai te buka i te tairururaa i tupu i St. Louis, Missouri, U.S.A., i te 10 no atete 1941. No te aha hoi e parauhia ˈi e e faaueraa maere mau teie?

INAHA, ua opanihia ta matou ohipa pororaa i te avaˈe tenuare 1941 ra, e te tamauraa i te nenei ma te taotiahia hoi te mau ravea, e riro mau â ïa ei ohipa fifi mau. Hau atu, e 384 api to te buka ra Te mau tamarii (beretane) e mea rahi te mau hohoˈa peni. E e tia ta matou mau ravea neneiraa ia tatâˈihia, aita te papie i rahi, e aita te mau rave ohipa i aravihi no te faatupu i te mau buka.

Hou aˈe vau e faataa ˈtu ai e mea nafea to matou manuïaraa i te nenei noa ˈtu te opaniraa, a vaiiho mai na ia ˈu ia faatia ˈtu e mea nafea to ˈu haamataraa i te rave i te ohipa e te mau piha ohipa a te amaa no Auteralia, ei tiaau haapao i te parau no te neneiraa.

Te tiaraa matamua

E fatu na to ˈu metua tane i te hoê fare neneiraa buka i roto i te oire ruperupe mau no Ballarat, i Victoria, i reira to ˈu fanauraahia i te matahiti 1914 ra. Mea na reira ˈtura hoi to ˈu haapiiraa i te ohipa nenei i roto i te fare neneiraa buka a papa. Tei roto atoa vau i te tahi mau ohipa a te ekalesia i Beretane, e himene na vau i roto i te pǔpǔ himene a te ekalesia e e pate atoa na hoi au  i te ǒě. E haapii atoa na vau i te haapiiraa sabati, e ere râ hoi te reira i te mea ohie no ˈu.

Te tumu no te mea ïa mea rahi ta ˈu mau uiraa faufaa roa no nia vetahi mau haapiiraa a te ekalesia. Te mau haapiiraa mai te torutahi, te po auahi, e te pohe-ore-raa te nephe taata, e aita roa ˈtu vau i mauruuru i te hoê noa ˈˈe pahonoraa. E huru ê roa atoa na vau i te tahi taime, ia faahiti mai to matou tavini ma te riri mau hoi, i te parau no te hoê pǔpǔ iti faaroo o ta ratou iho i mairi ei mau Ite no Iehova. Ua na ô noa na vau eaha pai te faufaaraa o te hoê pǔpǔ haapaoraa ore mai teie te huru no te hoê oire e 40 000 taata.

I te hoê sabati, te tia noa ra vau i rapae au mai i te fare pure, i muri aˈe i te pureraa taviniraa, a haere mai ai te hoê pǔpǔ tamahine no te fare pure méthodiste fatata mai. Ua haamata aˈera hoi au i te faahoa ˈtu i te hoê o ratou. O Lucy to ˈna iˈoa e ua titau mai oia ia ˈu i te hoê taime e haere i to ˈna fare e farerei i to ˈna mau metua. Ua maere roa vau ia ˈu i ite e to ˈna metua vahine, o Vera Clogan, o ˈna te hoê o te mau Ite no Iehova. Ua tupu e rave rahi mau tauaparauraa bibilia oraora mau i roto ia matou, e taˈiraa tano mau hoi te mau parau ta ˈna e parau na.

Aita i maoro roa, ua faaipoipo aˈera mâua o Lucy, e i te matahiti 1939 ra, ua faarue atura mâua i te oire no Melbourne, te oire pû no Victoria. Noa ˈtu â ïa e ua riro mai o Lucy ei Ite no Iehova, aitâ to ˈu feruriraa i papu atura. Tera râ, ia tupu te Piti o te Tamaˈi rahi i te avaˈe setepa o taua matahiti ra, ua haamata aˈera vau i te feruri papu i nia i te mau mea o ta ˈu i haapii i roto i te mau Papai. Ua tauturu mau â te opaniraahia te ohipa pororaa a te mau Ite no Iehova i te avaˈe tenuare 1941 ra, ia ˈu nei ia haapapu i to ˈu feruriraa. Ua pûpû atura vau i to ˈu ora no te Atua ra o Iehova e aita i maoro i muri iho, ua bapetizo aˈera vau ia ˈu.

Mau tauiraa faufaa mau i roto i to mâua oraraa

I taua tau ra, ua rave tarahu mai mâua i te hoê piha nahonaho maitai i Melbourne. Aita râ i maoro roa, ua titauhia maira mâua e haere e faaea i roto i te hoê fare e faaea-atoa-hia ra e te tahi atu mau Ite. Ua hoo atura hoi mâua pauroa ta mâua mau tauihaa, o te mau tauihaa o te piha taotoraa anaˈe ta mâua i tapea mai, e ua haere atura hoi i roto i tei parauhia e fare no te mau pionie. Ua tamau noâ vau i te rave i te ohipa nenei vea e no reira ua nehenehe aˈera hoi au e horoa i ta ˈu tauturu i roto i te mau haamâuˈaraa o te fare. Ua na reira atoa te tahi atu mau tane. E inaha, ua nehenehe aˈera hoi ta matou mau vahine e haere i roto i te ohipa pororaa ma te taime taatoa, ua apiti atoa ˈtura hoi matou te mau tane ia ratou, i roto i te ohipa poro evanelia e i roto i te mau putuputuraa kerisetiano i te mau ahiahi e i te mau hopea hebedoma.

Aita râ i maoro roa, ua tae maira ta mâua ta ˈu vahine te hoê rata no te piha ohipa a te amaa a te Taiete Watch Tower mai, e titau ra ia mâua e haere i Sydney. Ua hoo atura mâua i ta mâua mau tauihaa o te piha taotoraa e ua aufau hoi i te tahi mau tarahu ta mâua, no ta mâua tarahu pereoo auahi ra e haere tia i Sydney, ua tia hoi ia mâua ia hoo i te tapea momoˈaraa o Lucy!

No te mau faaheporaa a te tau tamaˈi e te parau opaniraa i haamauhia, eita te mau Bibilia e eita atoa hoi te mau buka bibilia e fariihia no te mau fenua ěê mai. No taua tumu ra te piha ohipa a te amaa no Auteralia i opua ˈi e haamau i te hoê fare neneiraa i raro i te fenua no te faatupu i te maa varua, e ua titauhia maira vau e haapao i taua ohipa ra. Ua riro ei haamaitairaa no ˈu i te raveraa i te ohipa i pihai iho i te hoê Ekotia, o George Gibb to ˈna iˈoa, tei tavini na i te fare neneiraa a te amaa no Auteralia te tahi tau 60 matahiti te maoro. * I te tau hoi te reira vau i  faauehia mai ai e: “A nenei i te buka ra Te mau tamarii [beretane].”

Te mau ravea neneiraa

E rave rahi mau taime horuhoru mau, e te riaria atoa hoi ta matou i farerei mai i roto i taua mau matahiti tamaˈi ra. Ei hiˈoraa, no te haamata i ta matou ohipa neneiraa, e hinaaro iho â ïa matou i te tahi mau ravea. E ta matou i manaˈo e faaohipa no te ohipa neneiraa taotiahia i roto i te mau matahiti na mua ˈˈe i te tamaˈi, ua haruhia ïa na te mau hui mana o te faatereraa, e i teie nei, ua tapeahia ïa te matini neneiraa iti a te Taiete e ua haapao-maitai-hia. Nafea ˈtura hoi e nehenehe ai e noaa mai ia matou i te mau ravea neneiraa e au ia faaohipahia i raro i te fenua?

Na te mau tiai e pupuhi ta ratou, e e mono hoi te tahi i te tahi, e hiˈopoa i te faufaa a te Taiete e 24 hora i te mahana hoê. Tera râ, tei te hiti te hoê o te mau patu muri, i te hoê tereraa pereoo auahi varavara roa i te faaohipahia. No reira, ia po, ma te faaohipa i te mau ravea tahito ra a te Ezekiela 12:5-7, e na roto mai vetahi mau rave ohipa itoito mau o te Betela i te patu, inaha e tataratara na ratou i te tahi mau tima araea i tuuhia i reira. Ia ô atu ratou i roto mai, e faahoˈi faahou ratou i taua mau tima ra i roto i te patu ia ore ia itehia te ohipa i tupu. Ia pou mai ratou i te po i te hoê maororaa e piti hebedoma, e tataratara maitai ratou i te hoê matini neneiraa iti, e Linotype, e te tahi atu mau matini. E ia oti, aita e peu, e haere mai ratou i rapae, na mua noa i te mata o te mau tiai!

I te tau mau ra, ua noaa faahou ta matou te tahi mau ravea neneiraa, no roto mai i te tahi atu mau pû, e inaha e mau ravea neneiraa papu maitai atura hoi ta matou i roto i te tahi atu mau vahi i Sydney. No reira, ua nehenehe aˈera matou e nenei na roto i te reo beretane eiaha noa te buka taatoa ra Te mau tamarii, te mau buka taatoa râ mai Te Ao Apî, “Na te Parau mau Outou e Faatiamâ,” e Te Fatata roa maira te Basileia, e oia atoa te Buka matahiti a te mau Ite no Iehova 1942, 1943, 1944, e 1945. Hau atu, i te tau te ohipa pororaa i opanihia ˈi i taua mau matahiti tamaˈi ra, aitâ te mau Ite no Iehova i erehia aˈenei i te hoê noa ˈˈe vea o Te Pare Tiairaa. Ua tamǎrû mau â te reira ia matou tataitahi i te mea e aore roa ˈtu te rima o Iehova i poto aˈenei.—Isaia 59:1.

Te faarururaa i te mau tere hiˈopoa manaˈo-ore-hia

I muri aˈe i te tau tamaˈi i reira te ohipa pororaa i te opaniraahia, e pinepine te mau taata toroa o te faatereraa i te tere e hiˈopoa i te mau fare neneiraa faaohipahia no te imi moni, e hiˈo e eaha te mau mea e neneihia ra. No reira, te vai ra i nia i te raroraa o te hoê o ta matou mau matini neneiraa parau te tahi ravea faaararaa, te hoê pitopito i nia i te tahua ohie roa na te vahine farii ia taahi atu i nia iho. Ia paiuma mai te tahi noa ˈtu taata ta ˈna i ore i matau aore ra ta ˈna e manaˈo ra e e mutoi hiˈopoa, e taahi ïa o ˈna i nia i te pitopito.

Ia taumihia te pitopito, e ite-noa-hia ˈtu te mau tino ia na roto atu i te mau haamaramarama e haere atu i te mau vahi atoa! E faaea noa hoi te mau rave ohipa i tapaohia ei mau rave ohipa i muri mai, no te haavitiviti i te tapoˈi i te mau haapueraa papie o te vea Te Pare Tiairaa aore ra o te tahi atu mau buka bibilia e ohipahia ra i nia iho. No te reira ra, e faaohipa ratou i te mau papie i neneihia hoê â faito e te tahi atu mau buka tei faaineinehia na te mau taata hoo.

I roto i te hoê o taua mau tere ra, tei nia e piti na mutoi hiˈopoa i te tahi mau buka arearea i te parahiraa, tei niâ i te mau papie i te mau papie faito rarahi, e i raro aˈe mai te vai ra ïa te mau papie o te mau vea a Te Pare Tiairaa tei neneihia i te po na mua ˈtu. I roto i te hoê fare neneiraa i te tahi atu vahi o te oire, e nenei matou i te mau parau e faaohipahia no te imi moni i te ao e te po e te mau hopea hebedoma ra e nenei ïa matou i te mau buka a Te Pare Tiairaa.

Te faatupuraa i to matou hiaai i te pae no te papie

Ua riro te papie no te neneiraa parau ei fifi rahi mau. Tera râ, te vai ra te tahi mau fare neneiraa parau rarahi o tei ore e hinaaro faahou i te taatoaraa o ta ratou mau papie no te iti hoi te imiraa i te tau tamaˈi, e o tei hinaaro râ e hoo atu i te mau papie hau—i nia iho â ïa i te hoê faito moni rahi aˈe. I te tahi râ taime, ua noaa mai ta matou papie no te tahi atu pû mai.

Te vai ra i nia i te hoê pahi rahi i tere mai i Auteralia, te tahi otaa papie uteute huru ereere, e ua ino te pahi i te miti e ua rari te rahiraa o te  papie i te pape. Ua hoo-pate-hia te taatoaraa o te papie, e i to matou maere rahi, o matou anaˈe te feia i hoo mai. Ua nehenehe aˈera hoi matou e hoo mai i te reira i nia i te tino moni raro roa ˈˈe. Ua taraˈi aˈera hoi matou i te papie i nia i te mahana, e inaha ua nehenehe atura ïa te rahiraa e faaohipahia, e ua tapûpû hoi matou i te reira ia au i te faito papie e tano i ta matou matini neneiraa.

Nafea hoi matou ia faaohipa i te papie uteute huru ereere? Ua manaˈo aˈera hoi matou e, e te reira ma te tano mau, e oaoa roa te feia taio i te mau buka arearea, i nia i te mau papie peni. No reira ua faaohipa ˈtura matou i te papie uouo tei faataahia no te mau buka arearea, no te nenei i Te Pare Tiairaa e tahi atu mau materia a te Taiete.

Te tuhaa faufaa roa a te mau vahine

I roto i te roaraa o te mau matahiti tamaˈi, e rave rahi mau vahine kerisetiano i Auteralia tei haapii i te ohipa faatuatiraa i te mau papie o te hoê buka. I te hoê avatea veavea roa, te rave noa ra vetahi o ratou i te ohipa i roto i te hoê fare vairaa pereoo ta matou i tarahu mai i roto i te tahi aroâ no te oire iti tapiri mai i Sydney. Ia ore ia itehia te ohipa ta ratou e rave ra, e tapiripiri na ratou i te mau haamaramarama e te mau opani atoa. Ua ǎhu roa te mau farii tapau, ua hauˈa au auahi hoi, eita e û te veavea. E inaha, ua tataratara aˈera ratou i to ratou mau piriaro roto.

E aita i maoro roa, ua patotohia maira i te opani. Ua pii aˈera hoi te mau tuahine kerisetiano e o vai tera, e o te hoê rave ohipa a te hau tei pahono mai. No roto oia i te mau taata e mana to ratou i te tau tamaˈi, no te faaohipa i te mau taata i te mau vahi atoa e hinaarohia i te rave ohipa. Ua pahono atura te mau tuahine e eita ta ratou e nehenehe e farii ia ˈna i taua taime ra no te mea te rave ratou i te ohipa e aita to ratou mau piriaro roto no te rahi te veavea.

Ua faaea muhu ore te ofitie maa taime iti; e i muri iho, ua tuô aˈera oia e haere â o ˈna e farerei i te tahi mau taata i roto i taua aroâ ra. Ua na ô maira oia e e hoˈi mai â o ˈna e hiˈopoa ia poipoi aˈe. Ua niuniu oioi maira hoi taua mau vahine kerisetiano ra ia matou, e ua tono atura matou i te hoê pereoo uta tauihaa i taua po ra iho â e ohi mai i te mau mea atoa e titauhia no te ohipa faatuatiraa papie buka, e ua haere atura matou i te tahi atu vahi.

Te rahiraa o matou i faaô atu i roto i taua ohipa neneiraa parau i raro i te fenua ra, aita roa ˈtu matou i aravihi noa ˈˈe i roto i taua tuhaa na mua ˈtu, no reira aita e feaaraa, na te varua o Iehova i horoa mai i te tauturu e te aratairaa e hinaarohia ra. E haamaitairaa rahi mau â na ˈu e na ta ˈu vahine o Lucy, tei rave i te ohipa i te pae no te  faatuatiraa papie buka, i te apitiraa ˈtu i roto i taua tuhaa ra.

Mea nafea hoi te ohipa i te aratairaahia i roto i taua mau taime tamatamataraa ra? Ua faaue mai te faatereraa i te amaa hiˈopoa a te mau Ite no Iehova, e haere e ora i roto i te hoê oire i nia i te hoê atearaa 100 kilometera i rapae atu i te oire no Sydney. Ua opani taua faaueraa ra ia ˈna eiaha e haere atu i rapae i te hoê atearaa e 8 kilometera mai te ropuraa o taua oire ra ia taiohia. Ua tarani-atoa-hia te mori pereoo i nia i te hoê galani i te pereoo tataitahi e i te avaˈe hoê. Ua hamani râ te mau taeae i te hoê ravea faatupu mori pereoo—te hoê farii auri afa tane te teiaha, e tamauhia ˈtu i muri i te pereoo. E tutuihia te arahu i roto, e noaa mai ai te carbone monoxide o te riro hoi ei mori. E rave rahi po i te hebedoma, maoti taua ravea nei e nehenehe ai vau e te tahi mau taeae e hopoia ta ratou e farerei i te tiaau haaati na roto atu i te hoê anavai iti ua mǎrô te pape i reira e tae atu i roto i te oire tei reira oia. Na reira ˈtura ïa matou i nehenehe ai e paraparau no nia e rave rahi mau tumu parau hou aˈe e haaputu faahou ai i te ravea faatupu mori e e tere tia mai ai i Sydney i te mau hora aahiata roa.

E i te pae hopea, ua tuuhia ˈtura te opaniraa i te mau Ite no Iehova i mua i te Haavaraa Teitei no Auteralia. Ua faariro te haava i taua opaniraa ra ei “opaniraa etaeta mau, papu ore, e te haavî” e ua faatia maira oia i te mau Ite no Iehova i te parau no te raveraa i te tahi ohipa huru ê. Ua turu mai te Haavaraa Teitei taatoa i taua opuaraa ra, e inaha ua nehenehe aˈera matou e haere i nia no te tamau â i te rave ta matou mau ohipa no nia i te Basileia.

Mau hopoia e mau haamaitairaa i mua

I muri aˈe i te tamaˈi, e rave rahi tei rave i te ohipa i roto i ta matou ohipa neneiraa parau i raro i te fenua tei rave i te taviniraa pionie. Ua haere atu vetahi o ratou i muri aˈe i te Fare Haapiiraa Bibilia a te Watchtower no Gileada i New York. Te reira atoa ta mâua o Lucy opuaraa, ua tae maira râ hoi te hoê aiû iti tamahine e ua opua aˈera vau e hoˈi faahou i roto i te ohipa neneiraa parau. Ua pure mâua ia Iehova e tauturu mai â ia mâua ia tuu mâua i te Basileia i nia i te parahiraa matamua, e ua na reira mau â oia. Ua ô faahou aˈera au i roto i te tahi atu hopoia no te taviniraa.

Ua niuniu maira o Lloyd Barry, teie e tavini nei i teie mahana ei melo no te Tino aratai a te mau Ite no Iehova i Brooklyn, New York. I taua tau ra, e tiaau hiˈopoa o ˈna i Sydney. Ua ani maira oia ia ˈu e te haamanaˈo ra anei au i te taio mahana o ta matou tairururaa i mua. Ia ˈu i pahono atu e e, ua na ô maira oia: “Te hinaaro nei matou e na oe e haapao i te parau no te faanahoraa i te maa.”

I to ˈu maere, ua na ô noa ˈtura vau ia ˈna: “Aitâ hoi au i rave aˈenei i te ohipa mai te reira i te huru i roto i to ˈu oraraa.”

“Na reira ïa e taeae,” o ta ˈna ïa i pahono mai ma te huru faaooo rii, “teie te taime tano maitai no oe no te haapii!” No te haapii, ua haapii mai au, e ua tamau â vau i te haapao i te parau no te maa, i roto iho â i te mau tairururaa rarahi, e te reira hau atu i te 40 matahiti te maororaa.

I roto i te roaraa o te mau matahiti, ua rahi atu â ta matou taiete imiraa faufaa i te pae no te neneiraa parau, e ua titau hoi te reira e rave rahi mau tere ohipa i te mau fenua ěê. E faatano iho â vau te reira i te mau tairururaa rarahi e tupu na i te oire no New York e i te tahi atu mau vahi i te mau Hau Amui no Marite. Maoti te reira, ua nehenehe aˈera vau e farerei i te feia e hopoia ta ratou i te mau tairururraa taa ê, i roto iho â ra i te parau no te faanahoraa i te maa. E inaha, ia hoˈi mai au i Auteralia, ua hau roa ˈtu â ïa to ˈu ite i te pae no te haapaoraa i te mau ohipa e hinaarohia i roto i ta matou mau tairururaa.

I teie nei ua paari roa mâua, e uiui noa na mâua o Lucy, e nehenehe hoi â ta mâua e rave hau atu â ahiri mâua i fanauhia i muri tau matahiti i muri aˈe. I te tahi aˈe pae, te fanauraahia mâua i te matahiti 1916 e i te matahiti 1914 ra, te faariro nei mâua ei haamaitairaa rahi roa i te iteraa i te mau parau tohu a te Bibilia i te tupuraa i mua i to mâua mata. E te haamauruuru nei mâua ia Iehova no te haamaitairaa i noaa mai ia mâua na roto i te haapiiraa e te mau taata e rave rahi e te tautururaa ia ratou ia ite i te parau e te ite-atoa-raa ˈtu ia ratou ia tavini ei mau melo bapetizohia. Ta mâua pure, ia tamau â ïa mâua i te tavini ia ˈna e a muri noa ˈtu, e ia noaa i te ite no nia ia ˈna e a muri noa ˈtu ei Arii Manahope no te ao nei.

[Nota i raro i te api]

[Hohoˈa i te api 29]

Fare neneiraa parau i te Betela no Strathfield, 1929-73

O George Gibb i pihai iho i te hoê o te mau matini neneiraa parau tei tatarahia mai roto mai i te fare neneiraa no roto i te patu i muri