E hinaaro tatou i te faanahonahoraa a Iehova

AITA anei outou i faaroo aˈenei i te taata i te parauraa e, “E tiaturi au i te Atua eiaha râ i te hoê faanahonahoraa faaroo”? Ua faaite-pinepine-hia te mau manaˈo mai teie e te mau taata e feia anaanatae ratou i te haere e pure i te hoê taime o tei inoino râ no te manuïa-ore-raa ta ratou haapaoraa i te haamâha i to ratou mau hinaaro i te pae varua. Noa ˈtu e i te rahiraa o te taime, te inoino ra ratou i ta ratou mau faanahonahoraa faaroo, e onoono e rave rahi e e hinaaro noa ratou e haamori i te Atua. E tiaturi râ ratou e mea maitai aˈe e haamori ia ˈna na roto i ta ratou iho mau ravea maoti i te tahoê atu i te hoê ekalesia aore ra i te tahi atu faanahonahoraa.

Eaha ta te Bibilia e parau ra? E hinaaro anei te Atua ia tahoê te mau Kerisetiano i te hoê faanahonahoraa?

Ua haamaitaihia te mau Kerisetiano matamua no to ratou faanahonahoraahia

I te Penetekose 33 T.T., ua ninii Iehova i to ˈna varua moˈa, eiaha i nia i te tahi noa taata faaroo moemoe, i nia râ i te hoê pǔpǔ tane e vahine i ruru amui mai “i te vahi hoê,” oia hoi i roto i te hoê piha teitei i te oire o Ierusalema. (Ohipa 2:1) I taua taime ra, ua haamauhia te amuiraa Kerisetiano, tei riro mai ei faanahonahoraa rahi na te ao nei. Ua riro te reira ei haamaitairaa mau no taua mau pǐpǐ matamua ra. No te aha? Na mua, ua horoahia na ratou te hoê hopoia faufaa—te pororaa i te parau apǐ maitai o te Basileia o te Atua i “te mau fenua atoa” i te pae hopea. (Mataio 24:14) I roto i te amuiraa e nehenehe te mau taata i taui apî i ta ratou haapaoraa e haapii na roto i te mau hoa faaroo aravihi nafea ia rave i te ohipa pororaa.

Ua parare oioi te poroi o te Basileia na nia ê i te mau patu o Ierusalema. I rotopu i te mau matahiti 62 e 64 T.T., ua papai te aposetolo Paulo i ta ˈna rata matamua i te mau Kerisetiano “i purara i Ponoto, e i Galatia, e i Kapadokia, e i Asia, e i Bitunia,” i te feia atoa i Turekia i teie nei tau. (Petero 1, 1:1) Te vai atoa ra te feia faaroo i Paletetina, Lebanona, Turia, Kupero, Heleni, Kereta, e i Italia. I to Paulo papairaa i to Kolosa i te mau matahiti 60-61 T.T., ua “faaite-haere-hia” te parau apî maitai “i te taata atoa i raro aˈe i teie nei raˈi.”—Kolosa 1:23.

Te piti o te haamaitairaa e tahoê i te hoê faanahonahoraa, o te faaitoitoraa ïa ta te mau Kerisetiano e horoa te tahi i te tahi. Na roto i te tahoêraa ˈtu e te amuiraa, e nehenehe te mau Kerisetiano e faaroo i te mau oreroraa parau faauruahia, e haapii amui i te mau Papai Moˈa, e faaite i te mau tupuraa e haapaari i te faaroo, e e apiti i te mau hoa faaroo  i roto i te pure. (Korinetia 1, pene 14) E e nehenehe te mau taata paari e “faaamu i te nǎnǎ a te Atua.”—Petero 1, 5:2.

Ei melo o te amuiraa, e haamatau atoa te mau Kerisetiano te tahi i te tahi e e here te tahi i te tahi. E ere roa ˈtu i te mea teimaha ia tahoê ratou e te amuiraa, ua patuhia e ua haapaarihia te mau Kerisetiano matamua e te reira.—Ohipa 2:42; 14:27; Korinetia 1, 14:26; Kolosa 4:15, 16.

Te tahi atu tumu e hinaarohia ˈi te amuiraa tahoê na te ao nei, aore ra faanahonahoraa, no te tururaa ïa i te tahoêraa. Te haapii ra te mau Kerisetiano i te “parau hoê.” (Korinetia 1, 1:10) Mea faufaa roa te reira. No roto mai te mau melo o te amuiraa i te mau haapiiraa e oraraa totiale huru rau. Te paraparau ra ratou i te mau reo ěê, e mea taa ê maitai to ratou huru. (Ohipa 2:1-11) I te tahi mau taime, te vai mau ra te mau manaˈo taa ê. Ua tauturuhia râ te mau Kerisetiano ia faatitiaifaro i teie mau taa-ê-raa i roto i te amuiraa.—Ohipa 15:1, 2; Philipi 4:2, 3.

Ua tuuhia te mau tumu parau faufaa tei ore e nehenehe e faaafarohia e te mau matahiapo o te fenua iho i te mau tiaau haaati paari, mai ia Paulo. Ua tuuhia te mau haapiiraa faufaa roa i te hoê pu a te tino aratai e vai ra i Ierusalema. E mau aposetolo a Iesu Mesia na mua to roto i te tino aratai, ua faaô-atoa-hia râ te mau taata paari o te amuiraa i Ierusalema i muri aˈe. Ua farii te amuiraa taitahi i te mana i horoahia e te Atua i te tino aratai e to ˈna mau tia ia faanaho i te taviniraa, ia nomino i te mau tane i nia i te mau hopoia o te taviniraa, e ia rave i te mau faaotiraa no nia i te mau haapiiraa faaroo. I te faatitiaifaroraahia i te hoê ohipa e te tino aratai, ua farii te mau amuiraa i te faaotiraa e ua “oaoa ˈtura ma te mauruuru.”—Ohipa 15:1, 2, 28, 30, 31.

Oia, ua faaohipa Iehova i te hoê faanahonahoraa i te senekele matamua. E i teie mahana ïa?

E hinaaro tatou i te hoê faanahonahoraa i teie mahana

Mai to ratou mau hoa i te senekele matamua, i teie mahana, te haapao maite ra te mau Ite no Iehova i te faaueraa e poro i te parau apî maitai o te Basileia. Te hoê ravea e rave ai ratou i teie ohipa, mea na roto ïa i te opereraa i te mau Bibilia e te mau papai haapiiraa Bibilia, o te titau ra i te hoê faanahonahoraa.

E tia ia faaineine-maitai-hia te mau papai Kerisetiano, ia hiˈopoahia te tanoraa, ia neneihia, e i muri iho, ia haponohia i te mau amuiraa. I te tahi aˈe pae, e tia i te mau Kerisetiano taitahi ia hinaaro e hopoi i te mau papai i te feia e hinaaro ra e taio i te reira. Ua naeahia te poroi o te Basileia i te mau mirioni taata na roto i taua ravea ra. Te tutava ra te feia poro i te parau apî maitai i te rave i ta ratou ohipa pororaa ma te nahonaho maitai, ma te haapapu e aita hoê aˈe tuhaa fenua e ohipa-pinepine-hia ra area te tahi atu mau vahi ra, aita ïa e tâuˈahia ra. E titau teie mau mea atoa i te hoê faanahonahoraa.

I te mea e “e ore te Atua e haapao i te huru o te taata,” e tia ia hurihia te mau Bibilia e te mau papai Bibilia. (Ohipa 10:34) I teie nei, te vai ra teie vea i roto 132 reo, e to ˈna apiti, te A ara mai na!, ua neneihia ïa i roto e 83 reo. E titau te reira i te mau pǔpǔ huriraa faanahonaho-maitai-hia e ati aˈe i te ao nei.

E fanaˈo te mau melo o te amuiraa i te faaitoitoraa ia haere ratou i te mau putuputuraa e te mau tairururaa Kerisetiano. I reira, e faaroo ratou i te mau oreroraa parau Bibilia faaitoito, e haapii amui i te mau Papai, e faaite i te mau tupuraa o te patu, e e apiti i te mau hoa haamori i roto i te pure. E mai to ratou mau taeae i te senekele matamua, e oaoa ratou i te mau tere o te mau tiaau ratere here o te haapaari i te faaroo. No reira, i teie mahana, ua riro te mau Kerisetiano ei “hoê aˈe nǎnǎ, e hoê hoi tiai.”—Ioane 10:16.

Oia mau, e ere te mau Ite no Iehova i te mea tia roa, aita atoa to ratou mau hoa matamua. Teie râ, te ohipa amui ra ratou ma te tahoê. Ei faahopearaa, te ravehia ra te ohipa pororaa i te Basileia na te fenua atoa nei.—Ohipa 15:36-40; Ephesia 4:13.

[Hohoˈa i te api 31]

I teie mahana, ua riro te mau Kerisetiano ei “hoê aˈe nǎnǎ, e hoê hoi tiai”