Te “Autaeaeraa Polonia”—No te aha ratou i hamani-ino-hia ˈi?

I te matahiti 1638, ua tairi ino roa te hau faatere Polonia i te hoê pǔpǔ iti faaroo matauhia mai te Autaeaeraa Polonia. Ua tuinohia te hoê fare pure e te hoê matini neneiraa a te pǔpǔ. Ua opanihia te Fare haapiiraa tuatoru no Raków, e ua tiavaruhia te mau orometua i haapii na i reira i te fenua ê.

E piti ahuru matahiti i muri aˈe, ua haere â te hau faatere i mua. Ua faaue oia i te mau melo atoa o taua pǔpǔ ra, 10 000 paha ratou aore ra hau atu, ia faarue i te fenua. Nafea te huru tupuraa i te ino-roa-raa i roto i te fenua i matauhia na i taua tau ra mai te fenua farii maitai roa ˈˈe no Europa atoa? Eaha ta te Autaeaeraa Polonia i rave i au ai ia ratou teie hamani-ino-raa?

UA HAAMATA te mau mea atoa i te tupuraa te hoê amaharaa rahi i roto i te Ekalesia a Kalavino i Polonia. Te tumu parau rahi aimârôraa, o te haapiiraa tumu ïa o te Toru Tahi. Ua patoi te feia aratai o te hoê pǔpǔ e haere ra i mua i roto iho i te ekalesia i taua haapiiraa tumu ra aita hoi i roto i te Bibilia. Ua riri roa te taata aratai i te ekalesia i te reira e ua taa ê aˈera te pǔpǔ e haere ra i mua.

Ua mairi to Kalavino taata i te feia amahamaha te mau Arien, * mea au aˈera na to te pǔpǔ apî e parau ia ratou iho e mau Kerisetiano aore ra te Autaeaeraa Polonia. Mea matau-atoa-hia ratou mai te mau Socinien, ia au i te iˈoa ra Laelius Socinus, te hoê Italiano tei pee i te mau manaˈo o Servet, ua tere atu hoi to ˈna tamaiti fetii o Faustus Socinus i Polonia e ua riro mai ei taata rahi i roto i taua pǔpǔ iti ra.

I taua tau ra, ua manaˈo te hoê huiarii Polonia o Jan Sienieński, e horoa i ta ˈna i parau “te hoê vahi maniania ore e te hau mau” na te ekalesia apî i reira oia e tupu ai i te rahi. Ma te fanaˈo i te hoê haamaitairaa taa ê i horoahia e te arii no Polonia, ua haamau aˈera o Sienieński i te oire o Raków, tei riro mai i muri aˈe ei pu no te haapaoraa Socinien i Polonia. Ua horoa o Sienieński i te tahi mau tiaraa na te huiraatira no Raków, tae noa ˈtu te tiaraa e haamori ma te tiamâ.

Ua anaanatae roa te feia rimaî, te mau taote, te feia hoo raau, te feia noho i te oire, e te mau huiarii rii haapaoraa rau i te oire apî. Hau atu â, ua tae rahi atu te mau tavini a te haapaoraa i ǒ na Polonia, Lituanie, Transylvanie, Farani e tae noa ˈtu na Beretane mai. Aita râ teie feia i tae apî atu i farii paatoa i te mau tiaturiraa Socinien; no reira, i te roaraa o na matahiti e toru i muri mai, mai te matahiti 1569 e tae atu i te matahiti 1572, ua riro mai Raków ei vahi no te mau tauaparauraa hopea ore i te pae faaroo. Eaha te faahopearaa?

Te hoê utuafare amahamaha

Ua amaha aˈera te pǔpǔ Socinien iho, i te hoê pae, tei pee i te mau manaˈo etaeta aˈe e i te tahi pae, te feia mea mǎrû aˈe to ratou mau manaˈo. Noa ˈtu râ to ratou mau taa-ê-raa, mea taa maitai ta ratou mau tiaturiraa amui. E patoi ratou i te Toru Tahi; eita ratou e bapetizo i te tamarii; eita ratou e rave i te mau mauhaa tamaˈi e mea  pinepine, eita ratou e rave i te toroa politita. * E patoi atoa ratou i te po auahi ei vahi haamauiuiraa. I roto i teie mau mea atoa, eita ratou e tâuˈa i te mau peu faaroo a te taata.

Ua faanaho te haapaoraa a Kalavino oia atoa te pǔpǔ ekalesiatiko Katolika i te patoiraa uˈana i te pǔpǔ iti ra, ua faaohipa râ te feia toroa Socinien i te huru feruriraa farii noa i te pae faaroo, i faaitoitohia e te mau arii Polonia mai ia Sigismond II Auguste e o Stéphane Báthory, no te haapii i to ratou mau manaˈo i te taata.

Te ohipa faahiahia a Budny

Aita te hoê huriraa Bibilia a Kalavino, tei faaohipa-rahi-hia i taua tau ra, i haamâha i te mau hinaaro o te feia taio e rave rahi. Ua ravehia taua huriraa ra, eiaha mai roto mai i te mau reo tumu, mai roto râ i te Vulgate Latino e te hoê huriraa Farani no taua tau ra. “Ua erehia te afaroraa e te tanoraa o te manaˈo no te nehenehe noa o te huru papairaa,” ta te hoê ïa taata ite e parau ra. E rave rahi hape tei ô i roto. No reira, ua titauhia te hoê taata ite tuiroo o Szymon Budny te iˈoa, ia faaafaro i te huriraa. Ua faaoti oia e mea ohie aˈe ia hamani i te hoê huriraa apî roa i te faaafaro-noa-raa i te mea tahito. Ua haamata o Budny i te ohipa i te area 1567.

A huri ai oia, ua tuatapapa maitai o Budny i te mau taˈo atoa e to ˈna mau auraa taa ê mai tei ore i ravehia aˈenei i Polonia. I te mau vahi mea fifi te parau Hebera, ua faaite oia i te huriraa mau i roto i te nota i te hiti o te api. Ia titauhia, e hamani oia i te mau taˈo apî e e tamata oia i te faaohipa i te reo Polonia ohie o te mau mahana atoa no to ˈna tau ra. Ta ˈna fa, o te horoaraa ïa i te hoê huriraa Bibilia afaro e te tano na te taata taio.

Ua neneihia te huriraa Bibilia taatoa a Budny i te matahiti 1572. Ua taviri râ te feia nenei i ta ˈna buka, i ta ˈna huriraa o te mau Papai Heleni. Ma te ore e toaruaru, ua haamata aˈera o Budny i te hoê huriraa faaapî, tei oti e piti matahiti i muri aˈe. E hau aˈe te huriraa maitai roa a Budny i te mau Papai Heleni, i te mau huriraa Polonia tahito. Hau atu â, i te mau vahi e rave rahi, ua faahoˈi oia i te iˈoa o te Atua, o Iehova.

I te pae hopea o te senekele 16 e na matahiti matamua e toru ahuru o te senekele 17, ua riro mai o Raków, te oire pu o te pǔpǔ iti, ei pu a te haapaoraa e a te feia maramarama. I reira te feia aratai e te feia papai a te Autaeaeraa Polonia e nenei ai i ta ratou mau api parau e mau buka.

Ua faaitoito ratou i te haapiiraa

Ua haamata te ohipa neneiraa buka a te Autaeaeraa Polonia i te rahi mai i te area 1600 i te haamauraahia te hoê matini neneiraa i Raków. E nehenehe te matini neneiraa e horoa mai i te mau api parau iti e te mau buka rarahi na roto tau reo. Ei pu neneiraa, mea oioi to Raków faatitiauaraa i te mea maitai roa ˈˈe i Europa. Te manaˈohia ra e fatata e 200 buka tei neneihia i nia i taua matini ra i roto i na matahiti e 40 i muri mai. Na te hoê hamaniraa papie fatata, o te Autaeaeraa Polonia te fatu, e horoa ra i te hoê papie maitai roa no taua mau papai ra.

Aita i maoro, ua ite aˈera te Autaeaeraa Polonia i te faufaaraa ia haapii i to ratou mau hoa faaroo, e ia vetahi ê. No reira, ua haamauhia te Fare haapiiraa tuatoru no Raków i te matahiti 1602. E haere te mau tamaroa a te Autaeaeraa Polonia, oia atoa te mau tamaroa Katolika e Porotetani, i te haapiiraa i reira. Noa ˈtu e e fare haapiiraa tuatoru no nia i te Atua tera, e ere noa te haapaoraa te tumu parau e haapiihia ra. E haapii-atoa-hia te reo ê, te morare, te ohipa faanavairaa faufaa, te aamu, te ture, te manaˈo tano, te ihi o te natura, te matematika, te rapaauraa maˈi, e te faaetaetaraa tino. E haapueraa buka rahi ta te fare haapiiraa tuatoru, o te tamau noa i te rahi atu, maoti te matini neneiraa o taua vahi ra.

A mairi noa ˈi te senekele 17, e au ra e e tamau noa te Autaeaeraa Polonia i te ruperupe atu â. Eita râ e na reira.

E patoi te ekalesia e te hau faatere

Te faataa ra o Zbigniew Ogonowski no te Fare vanaa Polonia i te pae o te mau Ihi, e: “I te hopea o te mau matahiti toru ahuru o te senekele 17, ua ino oioi noa ˈtura te huru tupuraa o te mau Arien i Polonia.” Ua tupu te reira no te ohipa itoito e rahi noa ˈtura a te pǔpǔ ekalesiatiko Katolika. Ua faaohipa te pǔpǔ ekalesiatiko i te mau ravea  atoa, e tae noa ˈtu te parau faaino e te pari haavare, no te faaino i te roo o te Autaeaeraa Polonia. Ua faaohie te hoê tauiraa politita i Polonia i te aroraa. E enemi te arii Polonia apî o Sigismond III Vasa no te Autaeaeraa Polonia. Ua turu atoa to ˈna mau mono, o Jean II Casimir Vasa iho â râ, i te mau tutavaraa a te Ekalesia Katolika no te patoi i te Autaeaeraa Polonia.

Ua tae roa te huru tupuraa i te faito rahi roa ˈˈe i te parauraahia e ua faainohia te hoê satauro e tau tamarii haapii no Raków. Ua ravehia teie fifi no te haamou i te oire pu o te Autaeaeraa Polonia. Ua parihia te fatu no Raków i mua i te tiribuna a te Apooraa iriti ture i te ‘haaparareraa i te ino’ na roto i te tururaa i te Fare haapiiraa tuatoru no Raków e ta ˈna matini neneiraa. Ua parihia te Autaeaeraa Polonia i te ohipa haapiˈo taata, i te raveraa i te mau amuraa maa nui, e te oraraa ma te tia ore i te pae morare. Ua faaoti te Apooraa iriti ture e e tia ia opanihia te Fare haapiiraa tuatoru no Raków e ia tupararihia te matini neneiraa e te fare pure a te Autaeaeraa Polonia. Ua faauehia te feia faaroo ia faarue i te oire. Ua tiavaruhia te mau orometua haapii o te fare haapiiraa tuatoru ra, i rapae i te fenua, ia ore ra e pohe ratou. Ua haere ê te tahi o te Autaeaeraa Polonia i te mau vahi papu aˈe, mai te Silésie e Slovaquie.

I te matahiti 1658, ua faaoti te Apooraa iriti ture e e tia i te Autaeaeraa Polonia ia hoo i to ratou fenua e ia haere i te fenua ê i roto e toru matahiti. I muri aˈe, ua haapotohia mai taua tau ra, e piti ïa matahiti. E haapohehia te mau taata atoa e haapao i ta ratou mau tiaturiraa i muri aˈe i te reira.

Ua haere te tahi o te mau Socinien e faaea i te mau Pays-Bas, i reira to ratou tamauraa i te rave i ta ratou ohipa neneiraa. I Transylvanie, ua ohipa te hoê amuiraa e tae roa i te omuaraa o te senekele 18. I ta ratou mau putuputuraa, o te faatupuhia e toru taime i te hebedoma, e himene ratou i te mau salamo, e faaroo i te mau aˈoraa, e e taio i te hoê buka katekita tei faaineinehia no te faataa i ta ratou mau haapiiraa. No te paruru i te viivii ore o te amuiraa, e faatitiaifarohia, e aˈohia e, ia titauhia, e tiavaruhia te mau hoa faaroo.

E feia haapii i te Parau a te Atua te Autaeaeraa Polonia. Ua itea mai ia ratou te tahi mau parau mau faahiahia, e aita ratou i haamarirau i te tufa i te reira e vetahi ê. I te pae hopea râ, ua purara haere ratou na Europa e mea fifi roa ˈtura na ratou ia vai hoê noa. Ia maoro, ua moe roa aˈera te Autaeaeraa Polonia.

[Nota i raro i te api]

[Hohoˈa i te api 23]

Te hoê fare a te hoê tavini a te haapaoraa Socinien i taua tau ra

[Hohoˈa i te api 23]

I nia nei: Raków i teie mahana; i te pae atau, o te fare monahi ïa i patuhia i te matahiti 1650 no te faaore roa i te “haapaoraa Arien”; i raro nei: I te vahi paturaa, ua faatia te pǔpǔ ekalesiatiko Katolika i te hoê satauro no te faatihaehae i te Autaeaeraa Polonia

[Faaiteraa i te fatu o te hohoˈa i te api 21]

Tareta o te upoo parau o te Biblia nieświeska a Szymon Budny, 1572