Aamu

Te haamanaˈoraa i to tatou Poiete mai te apîraa

FAATIAHIA E DAVID Z. HIBSHMAN

“Ia tae noa ˈtu vau i te hopea o to ˈu oraraa, mea maitai e ua haapao maitai au ia Iehova. E ani au ia ˈna ia haapao i ta ˈu David. Mauruuru Iehova no ˈna e no to mâua faaipoiporaa. Mea maitai roa, mea oaoa roa!”

A FERURI na i to ˈu horuhoru i to ˈu iteraa i teie mau parau hopea i roto i te buka mahana a ta ˈu vahine, i muri aˈe i to ˈna hunaraahia i te avaˈe Mati 1992. E pae noa avaˈe na mua ˈtu, ua faatupu mâua i te 60raa o te matahiti taviniraa ma te taime taatoa a Helen.

Te haamanaˈo maitai ra vau i te mahana a parahi ai au i pihai iho ia Helen i te tairururaa i Columbus, i Ohio, i te mau Hau Amui no Marite i te matahiti 1931. Aita to Helen i naeahia ˈtura 14 matahiti, mea taa aˈe râ ia ˈna te faufaaraa o taua ohipa ra ia ˈu. Ua itehia te anaanatae o Helen no te taviniraa i muri iti noa ˈˈe i te riroraa oia e to ˈna metua vahine ivi ei pionie, oia hoi te mau poro evanelia ma te taime taatoa i rotopu i te mau Ite no Iehova. Ua faarue raua i to raua nohoraa nahonaho no te poro i roto i te mau mataeinaa i te pae apatoa o te mau Hau Amui no Marite.

Ta ˈu tufaa Kerisetiano

I te matahiti 1910, ua faarue to ˈu mau metua e ta raua na tamarii nainai e piti i te pae hitia o te râ o Pennsylvanie no te haere i Grove City, i te pae tooa o te râ o te hau. I reira, ua aufau rii noa raua i te hoê fare au noa e ua riro ei melo itoito o te Ekalesia Porotetani. I muri iti noa ˈˈe, ua haere o William Evans, te hoê o te Feia haapii Bibilia, te iˈoa o te mau Ite no Iehova i taua tau ra, e farerei ia raua. Ua faaroo Papa, e 25 noa matahiti to ˈna, e o Mama, e pae matahiti apî aˈe, i teie Gallois maitai e ua titau manihini atura ia ˈna e tamaa. Aita i maoro, ua farii raua i te mau parau mau Bibilia ta raua e haapii ra.

Ua afai Papa i te utuafare fatata e 40 kilometera i te atea i te oire no Sharon, mea fatata ïa i te amuiraa. Tau avaˈe i muri aˈe, i te matahiti 1911 aore ra 1912, ua bapetizohia Papa raua Mama. Na  Charles Taze Russell, te peretiteni matamua o te Taiete Watch Tower, i horoa i te oreroraa parau o te bapetizoraa. Ua fanauhia vau i te 4 no Titema 1916, e maha tamarii aˈena ta to ˈu mau metua. I to ˈu fanauraahia, ua parauhia e: “Te tahi atu taeae e tia ia herehia.” Inaha, te auraa o to ˈu iˈoa ra David, oia ïa “Herehia.”

E maha noa hebedoma to ˈu i to ˈu afairaahia i ta ˈu tairururaa matamua. I taua mau mahana matamua ra, e haere avae noa to ˈu papa e to ˈu mau tuaana e rave rahi kilometera i te atea i te mau putuputuraa a te amuiraa, area o Mama e mâua to ˈu tuahine ra, e na nia ïa matou i te tramway. E tupu te mau putuputuraa i te poipoi e te avatea. I te fare, e pinepine te aparauraa i te niuhia i nia i te mau tumu parau o Te Pare Tiairaa e L’Âge d’Or, te iˈoa o te A ara mai na! na mua ˈˈe.

Te fanaˈoraa i te mau hiˈoraa maitatai

Mea rahi te mau taata perenina, oia hoi te mau taeae orero ratere i taua tau ra, tei tere mai i roto i ta matou amuiraa. E faaea mai na ratou hoê aore ra e piti mahana ia matou ra. Te hoê taeae orero ta ˈu e haamanaˈo maitai noa ra, o Walter J. Thorn ïa o tei haamanaˈo i to ˈna Poiete Rahi i ‘to ˈna apîraa.’ (Koheleta 12:1) E tamaroa noâ vau i to ˈu apeeraa ia Papa no te faaite i te “Hohoˈa-Darama o te Poieteraa,” te hoê pataraa hohoˈa tavirihia e haruharuhia e maha tuhaa o te aamu o te huitaata nei.

Noa ˈtu e aita ta Taeae Evans raua ta ˈna vahine o Miriam e tamarii, ua riro raua ei mau metua e mau tupuna metua no to matou utuafare. E parau noa William ia Papa e “Tamaiti,” e ua faaô raua Miriam i te manaˈo poro evanelia i roto i to matou utuafare. I te omuaraa o te senekele 20, ua revareva noa Taeae Evans i te fenua no Galles no te faaite i te parau mau Bibilia i te tuhaa fenua no Swansea. I reira, ua matauhia oia ei taata poro no Marite.

I te matahiti 1928, ua faarue Taeae Evans i ta ˈna ohipa e ua haamata i te poro i te mau aivi o Virginie Tooa o te râ. Ua apee to ˈu na tuaana e piti, o Clarence e 21 matahiti e o Carl 19 matahiti, ia ˈna. E rave rahi matahiti to matou, na maha tamaroa atoa, raveraa i te taviniraa ma te taime taatoa. Inaha, ua tavini matou pauroa ei tiaau ratere a te mau Ite no Iehova i to matou apîraa. Aita i maoro, ua papai mai Mary, te tuahine hopea o Mama, e 90 matahiti to ˈna i teie nei, ia ˈu e: “Auê hoi tatou pauroa i te mauruuru i te itoito o Taeae Evans no te taviniraa e to ˈna haereraa mai i Grove City!” O “Tatie” Mary atoa tei haamanaˈo i to ˈna Poiete mai to ˈna apîraa mai â.

Te haereraa i te mau tairururaa

O Papa raua Clarence anaˈe tei tae i te tairururaa faufaa roa i tupu i Cedar Point, i Ohio, i te matahiti 1922. I te matahiti 1924 râ, e pereoo to matou, e ua haere to matou utuafare taatoa i te tairururaa i Columbus, i Ohio. Ua tia ia matou te mau tamarii ia rave i ta matou iho moni i haaputu no te aufau i ta matou maa i na mahana tairururaa e vau. Te manaˈo o to ˈu mau metua, oia hoi e tia i te mau melo atoa o te utuafare ia haapii i te turu ia ratou iho. No reira matou i faaamu ai i te moa e te rapiti e i haapao ai i te mau afata manu meli, e matou pauroa te mau tamaroa, e opere matou i te mau vea.

I te taeraa mai te taime o te tairururaa i Toronto, i Kanada, i te matahiti 1927, e taeae to matou e ono avaˈe o Paul te iˈoa. O vau tei maitihia no te faaea i te fare e no te haapao ia Paul e te hoê tatie faaipoipo, area to ˈu mau metua e te tahi atu mau tamarii ra, ua haere ïa i Toronto. Ua horoahia mai hoê ahuru dala Marite na ˈu ei haamauruururaa, ua rave au i te reira no te hoo mai i te hoê ahu pereue apî. Ua haapii-noa-hia matou ia faaahu  maitai no te mau putuputuraa e ia rave maitai i to matou ahu.

I te tupuraa te tairururaa faufaa roa i te matahiti 1931 i Columbus, i Ohio, ua faaipoipohia Clarence e o Carl e te tavini ra ei pionie e ta raua nau vahine. Ua faaea ratou taitahi i roto i te hoê fare tavere. Ua faaipoipo Carl ia Claire Houston no Wheeling, i Virginie Tooa o te râ, e no reira vau i parahi ai i pihai iho ia Helen, te tuahine apî aˈe o Claire, i te tairururaa i Columbus.

Te taviniraa ma te taime taatoa

Ua noaa ta ˈu parau tuite i te haapiiraa teitei i te matahiti 1932 i te 15raa o to ˈu matahiti, e i te matahiti i muri iho, ua horoahia te hoê pereoo i faaohipa-ê-na-hia na to ˈu tuaana o Clarence, o te tavini ra ei pionie i Caroline Apatoa. Ua ani au e rave i te taviniraa pionie e ua haamata i te poro na muri ia Clarence e ta ˈna vahine. Te tavini ra ïa Helen ei pionie i Hopkinsville, i Kentucky, e ua papai au ia ˈna no te taime matamua. I roto i ta ˈna pahonoraa, ua ani mai oia e: “E pionie anei oe?”

I roto i ta ˈu rata—ta Helen i tapea noa e tae noa ˈtu i to ˈna poheraa fatata e 60 matahiti i muri aˈe—ua pahono vau e: “E, mea maitai e e tamau noa vau.” I roto i taua rata ra, ua faatia vau ia Helen i te opereraa o te buka rairai ra Le Royaume, l’Espérance du Monde i te mau ekalesiatiko e te mau tia mana haava i roto i ta ˈu tuhaa pororaa.

I te matahiti 1933, ua hamani Papa i te hoê fare iˈe huira no ˈu—e fare iˈe tavere e 2,4 metera i te roa e e 2 metera i te aano e mea hamanihia te pǎpǎi i te ahu tei hutihia e ati aˈe te mau pou ǒaǒa e e haamaramarama to mua e to muri. Tera to ˈu fare iti i na maha matahiti taviniraa pionie i muri iho.

I te avaˈe Mati 1934, ua tere matou Clarence e o Carl, ta raua vahine, o Helen e to ˈna metua vahine, e te tuahine hoovai o Clarence—e vau matou—i te pae tooa o te râ i te tairururaa i Los Angeles, i Kalifonia. Ua na nia vetahi i to ˈu pereoo tavere e ua taoto atoa i roto. Ua taoto vau i roto i te pereoo, area te toea ra, ua tarahu ïa i te mau piha. I te mea e ua fifihia to matou pereoo, ua tae matou i Los Angeles i te piti o na ono mahana tairururaa. I reira, i te 26 no Mati, ua nehenehe atura mâua Helen e faataipe i ta mâua euhe ia Iehova na roto i te bapetizoraa i roto i te pape.

I te tairururaa, ua farerei roa ˈtu Joseph F. Rutherford, te peretiteni o te Taiete Watch Tower i taua tau ra, i te mau pionie atoa. Ua faaitoito oia ia matou, ma te parau mai e e mau taata aro itoito matou no te parau mau Bibilia. I taua taime ra, ua ravehia te tahi mau faanahoraa no te tauturu i te mau pionie i te pae moni ia nehenehe hoi ratou e rave tamau noa i ta ratou taviniraa.

Te hoê haapiiraa no te oraraa

I to matou hoˈiraa mai te tairururaa i Los Angeles, ua faaite matou i te poroi o te Basileia i te taata i roto i te mau mataeinaa atoa i Caroline Apatoa, Virginie, Virginie Tooa o te râ, e i Kentucky. Tau matahiti i muri aˈe, ua papai Helen no nia i taua tau ra: “Aita e amuiraa e turui atu, aita e hoa e tauturu mai, no te mea e e taata ěê mau â mâua i roto i te hoê fenua ê. Ua ite râ vau i teie nei e te haapiihia ra vau. Te taoˈahia maira vau.”

Ua ani oia e: “E nafea ïa te hoê potii i to ˈna taime, ua atea hoi oia i to ˈna mau hoa e to ˈna fetii? E ere i te mea au ore roa. Aita vau e haamanaˈo ra e ua fiu vau. Mea taio roa vau. Aita roa ˈtu mâua i mairi i te taio e i te tuatapapa i ta tatou mau papai Bibilia. E faaea noa vau i pihai iho i to ˈu metua vahine, ma te haapii i te faaherehere i ta mâua moni, e hoohoo mai, e taui i te mau uaua pereoo i perehu, e tunu i te maa, e nira, e e poro. Aita vau e tatarahapa ra e e oaoa vau i te na reira noa.”

Ua oaoa Helen e to ˈna metua vahine i te faaea i roto i te hoê pereoo tavere nainai i taua mau matahiti  ra, noa ˈtu e e nohoraa nahonaho to to ˈna metua vahine. I muri aˈe i te tairururaa i Columbus, i Ohio i te matahiti 1937, ua faarahi te maˈi o te metua vahine o Helen, e ua tapeahia oia i te fare maˈi. Ua pohe oia i roto i ta ˈna tuhaa taviniraa i Philippi, i Virginie Tooa o te râ, i te avaˈe Novema 1937.

Te faaipoiporaa e te taviniraa tamau

I te 10 no Tiunu 1938, ua faaipoipo mâua Helen, e oroa nainai noa i te fare i reira to Helen fanauraahia i Elm Grove, i pihai iho ia Wheeling, i Virginie Tooa o te râ. Na to matou Taeae here o Evans, o tei faaite i te parau mau i to ˈu utuafare e rave rahi matahiti hou to ˈu fanauraahia, i horoa i te oreroraa parau o te faaipoiporaa. I muri aˈe i te faaipoiporaa, ua opua mâua Helen e hoˈi i roto i te taviniraa pionie i te pae hitia o te râ o Kentucky, i to mâua râ maere rahi, ua anihia mâua e rave i te ohipa no te tuhaa fenua. Oia hoi e tere mâua i roto i te mau pǔpǔ Ite no Iehova i te pae tooa o te râ o Kentucky e i te tahi mau vahi i Tennessee no te tauturu ia ratou i roto i ta ratou taviniraa. E 75 noa ïa taata e poro ra i te Basileia i taua tau ra i te mau vahi atoa ta mâua i tere atu.

I taua tau ra, ua faaino te here aiˈa i te manaˈo o te mau taeae e rave rahi, e ua manaˈo vau e ua fatata vau i te tapeahia no to ˈu tiaraa amui ore Kerisetiano. (Isaia 2:4) Aita râ, maoti ta ˈu tabula ohipa pororaa, ua horoa mai te pǔpǔ hiˈopoa i te hoê faataaraa ia nehenehe au e tamau noa i ta ˈu taviniraa ma te taime taatoa.

I to mâua haamataraa i te taviniraa ratere, ua parau fatata te taatoaraa e mea apî mâua. I Hopkinsville, i Kentucky, ua apa roa mai te hoê tuahine Kerisetiano ia Helen e ani maira e: “Te haamanaˈo ra anei oe ia ˈu?” I te matahiti 1933, ua poro Helen ia ˈna i te fare toa rahi o te fenua ta ta ˈna tane e haapao ra. E orometua haapii oia i te haapiiraa Sabati, i muri aˈe râ i to ˈna taioraa i te buka ta Helen i vaiiho na ˈna, ua tia aˈera oia i nia i mua i ta ˈna piha haapiiraa e tatarahapa ˈtura oia no to ˈna haapiiraa i te mau mea aita i roto i te Bibilia ia ratou. I muri aˈe i to ˈna faarueraa i te ekalesia, ua haamata oia i te faaite haere i te mau parau mau Bibilia i roto i to ˈna oire iti. Ua ratere mâua Helen na te pae tooa o te râ o Kentucky e toru matahiti i te maoro, e e pinepine mâua i te faaea i ǒ taua tuahine ra e ta ˈna tane.

I taua mau mahana ra, mea nainai ta matou mau tairururaa, e na A. H. Macmillan i peretiteni i te hoê o te reira. Ua faaea na oia i te fare o te mau metua o Helen a tamarii noa ˈi o Helen, no reira i te tupuraa te tairururaa, ua maiti oia i te faaea ia mâua ra i roto i to mâua fare tavere e 5 metera i te roa, inaha e roˈi vata to mâua. Ua haamanaˈo atoa oia i to ˈna Poiete Rahi i to ˈna apîraa, ua pûpû oia i to ˈna oraraa no Iehova i te matahiti 1900, i te 23raa o to ˈna matahiti.

I te avaˈe Novema 1941, ua vaiihohia maa taime poto te ohipa a te mau taeae ratere, e ua tonohia vau ei pionie i Hazard, i Kentucky. Ua ohipa faahou â mâua e to ˈu tuaana o Carl e ta ˈna vahine o Claire. I reira, ua apiti mai Joseph Houston, te tamaiti a te tuaana o Helen, ia mâua e ua haamata i te taviniraa pionie. Ua rave tamau noa oia i te taviniraa ma te taime taatoa fatata e 50 matahiti i te maoro, ua pohe taue oia i te maˈi mafatu i te matahiti 1992 a tavini ai oia ma te haapao maitai i te pu rahi a te mau Ite no Iehova i Brooklyn, i New York.

I te matahiti 1943, ua tonohia mâua i Rockville, i Connecticut. Mai te mea ra e mea taa ê teie vahi no mâua Helen no te mea ua matau mâua i te poro i te pae apatoa. I Rockville, ua faatere tamau Helen hau atu i te 20 haapiiraa Bibilia i te fare o te taata i te hebedoma. I te pae hopea, ua tarahu mâua i te hoê piha au noa no te hoê Piha a te Basileia, e ua faanahonahohia ˈtura te pu o te hoê amuiraa nainai.

A tavini ai mâua i Rockville, ua titau-manihini-hia mâua i te paeraa o te piha o te Haapiiraa Bibilia no Gileada a te Taiete Watchtower i South Lansing, i New York. Ua oaoa mâua i to mâua iteraa e e apiti atoa mai Aubrey raua Bertha Bivens, e mau hoa a tavini ai mâua ei pionie i Kentucky, i roto i ta mâua piha haapiiraa.

Te haapiiraa e ta mâua tuhaa taviniraa apî

Noa ˈtu e mea apî noâ mâua, mea apî atu â te rahiraa o to mâua mau hoa haapiiraa. Oia, te haamanaˈo ra ratou i to ratou Poiete Rahi i to ratou apîraa. Ua noaa ta matou parau tuite i te avaˈe Tiurai 1945, a fatata ˈi te Piti o te Tamaˈi Rahi i te  hope. A tiai noa ˈi i ta matou mau tuhaa taviniraa mitionare, ua ohipa matou e te Amuiraa no Flatbush i Brooklyn, i New York. I te pae hopea, i te 21 no Atopa 1946, ua reva mâua e e ono hoa haapiiraa ê atu tae noa ˈtu ia Bivens ma, i to matou fare apî i Guatemala City, i Guatemala. I taua taime ra, aita i naeahia e 50 Ite no Iehova i taua fenua taatoa ra i Marite no Ropu.

I te avaˈe Eperera 1949 i rotopu ia matou te mau mitionare, mea iti tei haere i Quetzaltenango, te piti o te oire rahi faufaa o te fenua. E 2 300 metera i te teitei to teie oire i nia ˈˈe i te faito o te miti, e mea haumǎrû e mea maitai te mataˈi o te mouˈa. Ua papai poto noa Helen i ta mâua ohipa i ǒ nei e: “E haamaitairaa ta mâua te pororaa i roto e rave rahi oire e oire iti. E tia mâua i nia i te hora maha i te poipoi e e rave i te hoê pereoo uta taata (mea pinepine e mau ahu mea huti te mau haamaramarama) no te tere atu i te hoê oire atea. I reira, e poro mâua fatata e vau hora hou a hoˈi ai i te po.” I teie mahana, te vai ra te mau amuiraa i roto e rave rahi o teie mau vahi, e e ono tei Quetzaltenango.

Aita i maoro, ua anihia te tahi mau mitionare e haere i Porto Barrios i te pae Tahatai o te mau Antilles, te toru o te oire rahi roa ˈˈe i Guatemala. O to mâua nau hoa here o Bivens ma tei tono-atoa-hia i roto i teie tuhaa taviniraa apî, ua tavini na hoi matou e pae matahiti i te maoro i Guatemala. Mea mauiui to matou taa-ê-raa e ua moemoehia mâua i roto i to mâua oraraa. I te mea e o mâua Helen anaˈe to roto i te fare mitionare, ua haere mâua e faaea i roto i te hoê fare nainai. I te matahiti 1955, ua farii mâua Helen i te hoê tuhaa taviniraa apî i te oire veavea ˈtu â no Mazatenango. I reira, ua tavini na to ˈu taeae hopea, o Paul e ta ˈna vahine o Dolores, tei faatuitehia i Gileada i te matahiti 1953, na mua iti noa ˈˈe i to mâua taeraa ˈtu.

I te matahiti 1958, ua hau atu matou i te 700 Ite, e 20 amuiraa, e e toru tuhaa haaati i Guatemala. Ua rave faahou mâua Helen i te ohipa ratere, ma te tere atu i roto i te mau pǔpǔ iti Ite e e rave rahi amuiraa, tae noa ˈtu i te amuiraa i Quetzaltenango. I muri iho, i te avaˈe Atete 1959, ua anihia mâua e hoˈi i Guatemala City, i reira ua faaea mâua i te amaa. Ua rave au i te ohipa i te amaa, area Helen ra, ua tamau noa ïa i te taviniraa mitionare 16 matahiti i te maoro. I muri iho, ua rave atoa oia i te ohipa i te amaa.

Te mau haamaitairaa hau

E mau matahiti aˈenei, e au ra e o vau noa te mea apî roa ˈˈe o te feia e tavini ra ia Iehova. I teie nei, e pinepine o vau te mea paari roa ˈˈe, i to ˈu iho â haereraa i te haapiiraa no te amaa i Patterson, i New York, i te matahiti 1996. Mai ia ˈu i fanaˈo i te tauturu rahi a te feia paari i to ˈu apîraa, na ˈu te haamaitairaa i teie mau ahuru matahiti i mairi aˈenei e tauturu e rave rahi feia apî e hinaaro ra e haamanaˈo i to ratou Poiete i to ratou apîraa.

Te tamau noa ra Iehova i te ninii mai i te mau haamaitairaa i nia i to ˈna nunaa i ǒ nei i Guatemala. I te matahiti 1999, ua hau atu i te 60 amuiraa i Guatemala City. E i te mau pae apatoerau, apatoa, hitia o te râ, e tooa o te râ, mea rahi atu â ïa te mau amuiraa e e mau tausani taata teie e poro nei i te parau apî maitai o te Basileia o te Atua. Ua maraa na iti aˈe i te 50 taata poro i te Basileia i to mâua taeraa ˈtu fatata e 53 matahiti aˈenei, i nia hau atu i te 19 000!

Mea rahi te mau mea e tia ia tatou ia mauruuru

E farerei iho â tatou i te fifi i roto i te oraraa, e nehenehe râ tatou e tuu atu i ta tatou “hopoia ia Iehova ra.” (Salamo 55:22) Te tauturu pinepine maira oia ia tatou na roto i te turu o te mau hoa î i te here. Ei hiˈoraa, tau matahiti hou oia a pohe ai, ua faaite mai Helen ia ˈu i te hoê iri nainai e ua papaihia i nia iho te irava Bibilia o te Hebera 6:10: “E ere te Atua i te mea parau-tia ore, a haamoe  ai oia i ta outou ohipa e te here ta outou i faaite i nia Ia ˈna inaha, ua tauturu outou i To ˈna nunaa e te tamau noa ra outou i te na reira.”—Weymouth.

Te na ô ra te tahi manaˈo ta ˈna i papai e: “Ta ˈu here e, mea iti roa ta ˈu e nehenehe e horoa ˈtu, maoti noa râ TO ˈU HERE TAATOA . . . E tano maitai teie irava no oe, e te ani ra vau ia tuu oe i te reira i nia i ta oe iri papairaa, eiaha no te mea e na ˈu te reira i horoa ˈtu, no te mea râ e au ia oe te reira i roto i ta oe mau matahiti taviniraa roa.” E tae roa mai i teie mahana, te vai noa ra te iri i nia i ta ˈu iri papairaa i te amaa no Guatemala.

Ua tavini au ia Iehova mai to ˈu apîraa mai, e i teie nei ua paari au, te haamauruuru ra vau ia Iehova no te mea maoti to ˈu oraora-maitai-raa e nehenehe ai au e rave i ta ˈu mau hopoia i horoahia mai. Ia rave au i ta ˈu taioraa Bibilia tamau, e pinepine au i te ite i te mau irava ta ˈu e manaˈo e e reni ta ˈu Helen here i roto i ta ˈna Bibilia. Ua tupu te reira i to ˈu taio-faahou-raa i te Salamo 48:14: “O te Atua nei â hoi to matou Atua e a muri noa ˈtu: e aratai tamau â hoi oia ia matou e tae noa ˈtu i te pohe ra.”

Te oaoa nei au i te faaite ia vetahi ê i te orama o te mahana tia-faahou-raa i reira te taata o te mau nunaa tahito atoa e farii ai i tei herehia o te faatiahia mai te pohe mai no te ora i roto i te hoê ao apî. Auê ïa ohipa faahiahia roa e! E roimata oaoa te tahe mai a haamanaˈo ai tatou e e Atua “haamahanahana” mau â Iehova “i te feia haehaa ra”!—Korinetia 2, 7:6.

[Hohoˈa i te api 25]

Ma te faaohu mai te pae aui i nia i te pae atau: Mama, Papa, “Tatie” Eva, e na tuaana o Carl e Clarence, 1910

[Hohoˈa i te api 26]

O mâua Helen i te matahiti 1947 e i te matahiti 1992