E faatupu anaˈe i te taairaa piri roa e o Iehova

“E HAAFATATA ˈTU i te Atua, e na ˈna e haafatata mai ia outou na,” ta te pǐpǐ Iakobo ïa i papai. (Iakobo 4:8) E ua himene te papai salamo ra o Davida e: “Te [taairaa piri roa e o] Iehova ra, tei te feia ïa i mǎtaˈu ia ˈna ra.” (Salamo 25:14; MN) Papu maitai, e hinaaro te Atua ra o Iehova ia faatupu tatou i te hoê taairaa piri roa e o ˈna. Aita râ te taatoaraa o te feia e haamori ra i te Atua e e auraro ra i ta ˈna mau ture, e manaˈo ra e mea piri ratou ia ˈna.

E o outou? E taairaa piri roa anei to outou e te Atua? Eita e ore e e hinaaro outou e haafatata roa ˈtu â ia ˈna. Nafea ïa tatou e nehenehe ai e faatupu i te taairaa piri roa e te Atua? Eaha te auraa o te reira no tatou? Te horoa maira te pene toru o te buka Bibilia o te mau Maseli i te mau pahonoraa.

E faaite anaˈe i te hamani maitai e te parau mau

Te haamata ra o Solomona, te Arii i tahito ra o Iseraela, i te pene toru o te Maseli na roto i teie mau parau: “E tau tamaiti, eiaha e haamoe i ta ˈu nei [ture]; ia haapao maite to aau i ta ˈu nei [mau faaueraa]: e maoro hoi to oe ra pue mahana e to oe ra mau matahiti, e te ora hoi e te hau ta te reira e amui atoa mai ia oe ra.” (Maseli 3:1, 2; MN) I te mea e ua papai Solomona ma te faauruahia e te Atua, no ǒ roa mai ïa teie aˈoraa e au i ta te hoê metua tane, i te Atua ra o Iehova e no tatou te reira. Te aˈohia ra tatou i ǒ nei e haapao maite i te mau faahaamanaˈoraa a te Atua—ta ˈna ture, aore ra haapiiraa, e ta ˈna mau faaueraa—i papaihia i roto i te Bibilia. Ia na reira tatou, ‘e maoro ïa to tatou pue mahana e to tatou mau matahiti, e e amui-atoa-hia mai te ora e te hau’ ia tatou ra. Oia i teie nei â, e nehenehe tatou e fanaˈo i te hoê oraraa hau e e ape i te mau mea o te tuu ia tatou i mua i te ati o te pohe oioi e tupu pinepine ra i nia i te feia ohipa ino. Hau atu â, e nehenehe tatou e tiaturi e fanaˈo i te ora mure ore i roto i te hoê ao apî o te hau.—Maseli 1:24-31; 2:21, 22.

Te parau faahou ra Solomona e: “Eiaha roa te [hamani maitai] e te parau mau ia taa ê ia oe ra, e taamu-hua-hia ïa i nia i to aˈî na; e papai hoi i te reira i nia i te pǎpǎ ra o to oe ra [mafatu]; e noaa ia oe te itehia mai i reira e te au-rahi-hia mai, i te aro o te Atua e te taata atoa nei.”—Maseli 3:3, 4; MN.

I roto i te reo tumu, ua huri-atoa-hia te taˈo no te parau ra “hamani maitai” na roto i te “here taiva ore” e te faataa ra te reira i te haapao maitai, te tautururaa te tahi i te tahi, e te taiva ore. Ua faaoti anei tatou e ati maite noa ia Iehova noa ˈtu eaha te tupu mai? Te faaite ra anei tatou i te hamani maitai i roto i to tatou mau taairaa e to tatou mau taeae i roto i te faaroo? Te rohi ra anei tatou i te vai piri noa ia ratou? I roto i to tatou mau taairaa e o ratou i tera e tera mahana, te tapea maite ra anei tatou i ‘te ture o te hamani maitai i nia i to tatou arero’ tae noa ˈtu i roto i te mau tupuraa fifi?—Maseli 31:26.

No to ˈna hamani maitai rahi, ua “ineine” Iehova “i te faaore i te hara.” (Salamo 86:5, MN) Mai te peu e ua tatarahapa tatou i ta tatou mau hara tahito e te faatitiaifaro ra tatou i teie nei i to tatou mau haerea, e papu ïa ia tatou e e tae mai te “anotau haumǎrû” mai ǒ mai ia Iehova ra. (Ohipa 3:19) Eita anei e tia ia pee tatou i te  hiˈoraa o to tatou Atua na roto i te faaoreraa i te hara a vetahi ê?—Mataio 6:14, 15.

E “Atua parau mau” o Iehova, e e hinaaro oia ia faaite te feia e faatupu ra i te taairaa piri roa e o ˈna, i te “parau mau.” (Salamo 31:5) E nehenehe mau anei tatou e tiaturi e e riro Iehova ei Hoa no tatou ia ora tatou e piti huru oraraa—hoê huru i mua i te aro o te mau hoa Kerisetiano e te tahi atu huru i muri i to ratou tua—mai “te mau taata haapao ore i te parau” e huna ra i to ratou huru mau? (Salamo 26:4) Mea maamaa mau â te reira, i te mea e ‘te vai noa ra te mau mea atoa ma te maheu roa i mua i te mata’ o Iehova!—Hebera 4:13.

E tia i te hamani maitai e te parau mau ia haafaufaahia mai te hoê fǐfǐ arapoa faufaa roa ‘i taamuhia i nia i to tatou aˈî,’ no te mea e tauturu mai te reira ia ‘au-rahi-hia tatou i te aro o te Atua e te taata.’ Eiaha tatou e faaite tahaa noa i teie nau huru maitatai, e tia atoa râ ia haamau roa i te reira ‘i nia i te pǎpǎ o to tatou mafatu,’ ma te faariro i te reira ei tuhaa faufaa roa o to tatou huru.

E faatupu anaˈe i te tiaturi taatoa ia Iehova

Te na ô faahou ra te arii paari ra e: “E tiaturi ia Iehova ma to [mafatu] atoa ra; eiaha râ e tiaturi i to oe ihora [maramarama]. Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”—Maseli 3:5, 6; MN.

Papu maitai e e au ia Iehova to tatou tiaturi taatoa. Ei Atua poiete, e “mana rahi” to ˈna e o ˈna te Tumu o te “puai rahi.” (Isaia 40:26, 29) E nehenehe ta ˈna e faatupu i ta ˈna mau mea atoa i opua. Inaha, te auraa mau o to ˈna iˈoa, oia ïa “Na ˈna e faariro,” e e patu te reira i to tatou tiaturi i ta ˈna ravea no te faatupu i ta ˈna i tǎpǔ! I te mea e e “ore e tia i te Atua ia haavare,” o ˈna ïa te hiˈoraa tumu o te parau mau. (Hebera 6:18) O te here to ˈna huru maitai rahi. (Ioane 1, 4:8) “E parau-tia” ta ˈna “i tana atoa ra mau haerea, e te hamani maitai i ta ˈna atoa ra mau ohipa.” (Salamo 145:17) Ia ore tatou e tiaturi i te Atua, o vai ïa ta tatou e tiaturi? Parau mau e no te faatupu i te tiaturi ia ˈna, e tia ia tatou ia ‘tamata e ia ite i te maitai o Iehova’ na roto i te faaohiparaa i ta tatou i haapii maoti te Bibilia i roto i to tatou oraraa e na roto i te faahohoˈaraa i te maitai ta te reira e faatupu.—Salamo 34:8.

Nafea tatou e ore ai ‘e haamoe ia Iehova i roto i to tatou mau haerea atoa’? Te parau ra te papai salamo i faauruahia e: “E imi â vau i to mau ohipa atoa ra, e paraparau â vau i ta oe i rave ra.” (Salamo 77:12) I te mea e eita tatou e ite mata i te Atua, mea faufaa roa ïa ia imi aore ra ia feruri hohonu tatou i ta ˈna mau ohipa rarahi e ta ˈna mau raveraa i nia i to ˈna nunaa no te faatupu i te taairaa piri roa e o ˈna.

E ravea faufaa atoa te pure no te oreraa e haamoe ia Iehova. Ua tamau noa te Arii Davida i te tiaoro ia Iehova “aita e mahana tuua.” (Salamo 86:3) Ua pure pinepine Davida i te po, a tapuni haere ai oia na te medebara. (Salamo 63:6, 7) ‘A pure ma te tuutuu ore a te varua ra,’ o te aˈoraa ïa a te aposetolo Paulo. (Ephesia 6:18) Ehia taime tatou e pure ai? Te paraparau ra anei tatou ma te mafatu rotahi i te Atua? Ia faaruru tatou i te mau tupuraa fifi, te ani ra anei tatou i ta ˈna tauturu? Te imi ra anei tatou i ta ˈna aratairaa na roto i te pure hou a rave ai i te mau faaotiraa faufaa? Maoti ta tatou mau pure rotahi e here ai Iehova ia tatou. E mea papu e e faaroo oia i ta tatou pure e e ‘faaite mai oia i to tatou mau haerea.’

Mea maamaa mau â ia ‘tiaturi i to tatou iho maramarama’ aore ra to te feia tiaraa teitei i roto i te ao, inaha e nehenehe tatou e tuu i to tatou tiaturi taatoa i nia ia Iehova! “Eiaha oe ia paari i to oe iho manaˈoraa,” ta Solomona ïa e parau ra. Eiaha roa ˈtu, te aˈo ra oia e: “O Iehova ra ta oe e mǎtaˈu, a faarue ai i te ino. O te ora ïa no to oe ra tino, o te haamǎrû ïa no to oe ra mau ivi.” (Maseli 3:7, 8) E tia e na te mǎtaˈu tano i te haapeapea i te Atua e faatere i ta tatou mau ohipa, to tatou mau manaˈo hohonu e te horuhoru. E tapea taua mǎtaˈu faatura ra ia tatou eiaha e rave i te mea ino, e mea tamǎrû e mea haumǎrû te reira i te pae varua.

E horoa anaˈe i te mea maitai roa ˈˈe na Iehova

Nafea ˈtu â tatou e nehenehe ai e haafatata ˈtu i te Atua? “E faatura ˈtu ia Iehova i ta oe ra mau  taoˈa rarahi, e te oho matamua o ta oe atoa ra taoˈa ia tupu,” ta te arii ïa e faaue ra. (Maseli 3:9) Te auraa e faatura ia Iehova, oia ïa e faahanahana e e arue ia ˈna i mua i te taata na roto i te apitiraa i roto i te faaiteraa i to ˈna iˈoa e te tururaa i te reira. Te mau taoˈa rarahi ta tatou e rave no te faatura ia Iehova, o to tatou ïa taime, to tatou aravihi, to tatou puai, e ta tatou mau taoˈa materia. Ia riro te reira ei oho matamua—te mea maitai roa ˈˈe. Eita anei ta tatou huru faaohiparaa i ta tatou mau taoˈa e faaite i ta tatou faaotiraa e ‘mata na i te imi i te basileia e te parau-tia a te Atua’?—Mataio 6:33.

E haamaitai-mau-â-hia te faaturaraa ia Iehova i ta tatou mau taoˈa rarahi. “E î roa ta oe ra mau fare vairaa taoˈa i reira,” ta Solomona ïa e haapapu ra, “e î hoi ta oe mau farii uaina i reira e manii noa ˈtu.” (Maseli 3:10) Noa ˈtu e eita te ruperupe pae varua e faatupu i te ruperupe materia, e hopoi mai râ te faaohipa-noa-raa i ta tatou mau taoˈa no te faatura ia Iehova, i te mau haamaitairaa rahi. Ua riro te raveraa i te hinaaro o te Atua ei “maa” na Iesu. (Ioane 4:34) Oia atoa te apitiraa i roto i te ohipa pororaa e te faariroraa i te taata ei pǐpǐ o te faahanahana ia Iehova, e faatamaa ïa ia tatou. Ia tamau noa tatou i roto i taua ohipa ra, e î roa ïa ta tatou mau fare vairaa taoˈa. E rahi mai to tatou oaoa o tei faataipehia e te uaina apî.

Aita atoa anei tatou e fariu tia ra i nia ia Iehova e e pure ra ia ˈna no te maa e navai i te mahana taitahi? (Mataio 6:11) Inaha, no ǒ mai ta tatou mau mea atoa i to tatou Metua î i te here ra i nia i te raˈi. E ninii mai â Iehova i te mau haamaitairaa ia nehenehe tatou e faaohipa i ta tatou mau taoˈa rarahi no te arue ia ˈna.—Korinetia 1, 4:7.

E farii anaˈe i te aˈo a Iehova

A tapao na i te faufaaraa o te aˈo no te faatupu i te taairaa piri roa e o Iehova, a faaue ai te arii o Iseraela e: “Eiaha oe e inoino, e tau tamaiti, i te aˈo a Iehova, eiaha hoi e fatimauu i ta ˈna aˈoraa mai. O tei herehia e Iehova ra, o ta ˈna ïa e aˈo mai, mai te metua e aˈo i te tamaiti ta ˈna e here ra.”—Maseli 3:11, 12.

E ere râ paha i te mea ohie no tatou ia farii i te aˈo. “Aita roa hoi e aˈo e riro ei mea oaoa i reira ra, e mea oto râ,” ta te aposetolo Paulo ïa i papai, “area i muri aˈe, o te maitai ra ïa o te parau-tia te tupu i taua aˈo ra, i te feia i haamatarohia i te reira.” (Hebera 12:11) Te avau e te aˈo, e tuhaa  faufaa roa ïa o te haamataroraa o te haafatata ˈtu ia tatou i te Atua. Te aˈo a Iehova—no ǒ mai anei i to tatou mau metua ra, te amuiraa Kerisetiano, aore ra na roto i te feruri-hohonu-raa i te mau Papai i roto i ta tatou haapiiraa taitahi—e faaiteraa ïa i to ˈna here no tatou. E haerea paari ia farii tatou i te reira.

E tapea maite anaˈe i te paari e te ite maite

I muri iho, te haamatara ra Solomona i te faufaaraa o te paari e te ite maite no te faatupu i te taairaa piri roa e te Atua. Te na ô ra oia e: “E ao to te taata i noaa ia ˈna te paari; te taata i noaa ia ˈna te ite [maite] ra! O te taoˈa hoi e hoona ˈi oia ra, e maitai rahi ïa i to te ario ra, e ia rahi hoi oia ra, e maitai rahi ïa i to te auro maitai ra. . . . O te raau ora oia i te feia e tapea ia ˈna; e o te mau maite ia ˈna ra e ao to ˈna.”—Maseli 3:13-18; MN.

Ma te faahaamanaˈo mai i te paari e te ite maite i roto i te mau ohipa poieteraa faahiahia a Iehova, te na ô ra te arii e: “Ua haamau Iehova i te tumu o te fenua i to ˈna ra paari; e na to ˈna ite [maite] i haamau i te mau raˈi ra. . . . E tau tamaiti, eiaha roa teie ia moe ê atu i to mata; e tapeâ oe i te paari maitai e te haapao; o te ora ïa no to oe ra [nephe], e o te nehenehe ïa i nia i to oe ra aˈî.”—Maseli 3:19-22; MN.

E mau huru maitatai te paari e te ite maite no ǒ mai i te Atua ra. Eiaha noa tatou e faahotu i te reira, ia tapea maite atoa râ i te reira na roto i te ore-roa-raa e haapao ore i ta tatou haapiiraa hohonu i te mau Papai e te faaohiparaa i ta tatou e haapii ra. “Ei reira oe e haere noa ˈi na to oe ra eˈa ma te ora,” ta Solomona ïa e parau atoa ra, “e e ore to avae e turori.” Te na ô atoa ra oia e: “Ia taoto oe i raro ra, e ore ïa e mǎtaˈu; e taoto noa hoi oe i raro, e e mâha to oe taoto.”—Maseli 3:23, 24.

Oia, e nehenehe tatou e haere ma te fifi ore e e taoto ma te feruriraa hau a tiai noa ˈi tatou i te mahana o te “pohe oioi” e au i te eiâ e fatata maira i nia i te ao ino a Satani. (Tesalonia 1, 5:2, 3; Ioane 1, 5:19) I roto atoa i te ati rahi e piri maira, e nehenehe tatou e tiaturi papu e: “Eiaha oe e mǎtaˈu i te haamǎtaˈu ia faauˈana mai, e te pau i te feia paieti ore ia fatata mai: o Iehova hoi to oe tiaturiraa, e na ˈna e tiai i to oe avae ia ore ïa ia fifi i te marei.”—Maseli 3:25, 26; Mataio 24:21.

E rave anaˈe i te mea maitai

“Eiaha oe e tapea i te maitai i te taata e au ia ˈna ia hopoi ra,” ta Solomona ïa e aˈo ra, “tei to rima taua maitai ra ia hopoi.” (Maseli 3:27) Te raveraa i te maitai no vetahi ê, o te faaohipa-noa-raa atoa ïa i ta tatou mau taoˈa no ratou, e mea rahi te mau tuhaa o te reira. E ere anei râ te tautururaa ia vetahi ê ia faatupu atoa i te taairaa piri roa e te Atua mau, te ohipa maitai roa ˈˈe ta tatou e nehenehe e rave no ratou i teie “tau hopea”? (Daniela 12:4) Teie hoi te taime no te faaite i te itoito i roto i te ohipa pororaa i te Basileia e te faariroraa i te taata ei pǐpǐ.—Mataio 28:19, 20.

Te faahiti atoa ra te arii paari i te tahi mau peu e tia ia tatou ia haapae, a parau ai e: “Eiaha oe e parau i to taata-tupu ra, A haere, e e hoˈi faahou mai, e ananahi au e hopoi atu ai ia oe ra; e te vai ra hoi taua mea ra, tei ia oe. Eiaha oe e imi i te ino i to taata-tupu ra; te parahi maitai noa ra hoi oia i pihaiiho ia oe. Eiaha oe e mârô noa ˈtu i te taata aita e hara ra; e aita oia i hamani ino mai ia oe ra. Eiaha oe e feii i te taata hamani ino mai, eiaha e haere na ta ˈna ra mau eˈa.”—Maseli 3:28-31.

Ma te haapoto i te tumu o ta ˈna aˈoraa, te na ô ra Solomona e: “E mea faufau hoi na Iehova te feia mârô ra, tei te feia parau-tia ra [to ˈna taairaa piri roa]. Te vai ra te katara a Iehova i nia i te fare o te feia paieti ore ra, area te fare o te feia parau-tia ra, te haamaitai ra oia i te reira. Te vahavaha nei oia i te feia e vahavaha; area te feia haehaa te ite nei oia i te reira. E noaa te maitai i te feia paari; area te maamaa ra, o te haama ta ratou e noaa.”—Maseli 3:32-35; MN.

Ia hinaaro tatou e fanaˈo i te taairaa piri roa e o Iehova, eiaha tatou e opua i te mau mea piˈo e te mauiui. (Maseli 6:16-19) Tei te rave-noa-raa i te mea tia i te aro o te Atua e fanaˈo ai tatou i ta ˈna farii maitai e ta ˈna haamaitairaa. E fanaˈo atoa tatou i te faatura, ta tatou hoi i ore i imi, ia ite vetahi ê e te ohipa ra tatou ia au i te paari o te Atua. No reira, e haapae anaˈe i te mau raveraa piˈo a teie nei ao haavî e te ino. Oia mau, e tapi anaˈe i te hoê haerea tia e e faatupu anaˈe i te hoê taairaa piri roa e o Iehova!

[Hohoˈa i te api 25]

“E faatura ˈtu ia Iehova i ta oe ra mau taoˈa rarahi”