E itea mai ia outou eaha to a muri aˈe!

E feruri maite te rahiraa o te taata i te tau a muri aˈe. Mea au na ratou e faanaho i te opuaraa, e tuu i te moni i roto i te hoê ohipa ma te paari e e ite i te oraraa papu. Teie râ, te vai ra anei te hoê noa ˈˈe ravea e papu ai ia tatou eaha te tupu mai ananahi?

I TO ratou tutavaraa i te ite mai eaha to a muri aˈe, ua tamata te taata i te mau mea atoa. E hiˈopoa te mau aivanaa i te pae totiale parauhia feia tuatapapa i te tau a muri aˈe, i to teie nei mau huru tupuraa e e tohu ratou na nia i te reira. E na reira atoa te feia tuatapapa i te pae faanavairaa faufaa i roto i ta ratou iho tuhaa. E imi te feia hiˈohiˈo e te feia tâura i te pae o te horoscope, te hiˈo kerehe, e te tahutahu, e e rave rahi o te pee ia ratou. Ei hiˈoraa, te tui noa râ te roo o te taata hiˈohiˈo Farani ra o Nostradamus, noa ˈtu e ua pohe oia ahia senekele i teie nei.

Ua riro teie mau taata atoa i faahua peropheta ei feia eita roa ˈtu e nehenehe e tiaturihia e te mauruuru-ore-hia. No te aha? No te mea aita ratou i ite i te Atua ra o Iehova e i ta ˈna Parau, te Bibilia. No reira, eita e noaa ia ratou i te pahono i te mau uiraa tumu mai teie: ‘E nehenehe anei e papu roa ia ˈu e e tupu iho â te mau mea i tohuhia i roto i te Bibilia? Nafea te reira e tuati ai e te opuaraa a te Atua no te taata? Nafea to ˈu utuafare e o vau e faufaahia ˈi i teie mau parau tohu?’ E pahono mai te Bibilia i teie mau uiraa.

Mea faahiahia atoa aˈe te parau tohu o te Bibilia i roto i te tahi atu â mau tuhaa e rave rahi. Taa ê roa ˈtu i te mau tohu a te feia hiˈohiˈo, e faatura te reira i te tiamâraa o te taata. No reira, aita e taata ua oti aˈena to ˈna aveia i te papaihia. (Deuteronomi 30:19) Mea veve roa te mau papai mai ta Nostradamus, i te pae morare, e e mono ratou i taua veve rahi ra i te parau aro e te faahoruhoru. Area te parau tohu o te Bibilia ra, e niu morare papu ïa to te reira. Te faataa ra te reira no te aha te Atua e rave ai mai ta ˈna i opua. (Paraleipomeno 2, 36:15) E eita e ore e tupu noa iho â te mau parau tohu a Iehova, eita hoi “te Atua . . . e tia ia haavare.” (Tito 1:2) E ora ïa te mau taata e arataihia e te Parau a te Atua i te oraraa oaoa, tei haamaramaramahia e tei feruri-maitai-hia ma te ore e haamâuˈa i to ratou taime e ta ratou mau ravea faahiahia no te titau i te mau mea faufaa ore.—Salamo 25:12, 13.

Ua tauaparauhia teie mau manaˈo e e rave rahi atu â i te mau Tairururaa Mataeinaa 1999/2000 “Te parau tohu a te Atua” a te mau Ite no Iehova i tupu na te ao atoa. Ua huti te mau oreroraa parau, te mau uiuiraa manaˈo, te mau faahiˈoraa, e te hoê hautiraa taata ora Bibilia, i te ara-maite-raa o te feia i ruru mai, i nia i te tufaa pae varua faahiahia e fanaˈohia e te feia e haapii e e faaohipa i te parau tohu a te Atua. E hiˈo faahou te tumu parau i muri nei i te tahi mau parau rahi faahiahia o te tairururaa.