Te faaî nei “tei hinaarohia” i te fare o Iehova

“Na ˈu [Iehova] e faaaueue i te mau fenua atoa, e e tae mai tei hinaarohia o te mau fenua atoa ra: e faaî hoi au i teie nei fare i te hanahana.”—HAGAI 2:7.

1. I roto i te hoê tupuraa ru, no te aha tatou e manaˈo ai i tei herehia e tatou?

 EAHA te mau mea hinaarohia e faaî ra i to outou fare? E mau tauihaa unauna anei ta outou, e matini roro uira aravihi roa, e pereoo apî i roto i ta outou fare vairaa pereoo? Noa ˈtu e te vai ra ta outou teie mau mea atoa, eita anei outou e farii i te parau e te mau mea faufaa roa ˈˈe i roto i to outou fare, o te mau taata ïa—te mau melo o to outou utuafare? A feruri na e i te hoê po ua faaarahia outou e te hauˈa au auahi. Te ura ra to outou fare i te auahi, e e tau minuti noa to outou no te haere i rapae! Eaha ta outou e haapeapea na mua? Ta outou mau tauihaa anei? Ta outou matini roro uira? To outou pereoo? Eita anei outou e manaˈo maoti i te feia herehia e outou? Papu maitai ïa e oia, no te mea mea faufaa aˈe te taata i te mau tauihaa.

2. Mai te aha te rahi te poieteraa a Iehova, e eaha te tuhaa o te reira mea au roa na Iesu?

² I teie nei, a feruri na i te Atua ra o Iehova e ta ˈna Tamaiti, o Iesu Mesia. O Iehova “te Atua i hamani i te raˈi, e te fenua, e te tai, e te mau mea atoa i roto ia ratou ra.” (Ohipa 4:24) O ta ˈna Tamaiti, te “rave ohipa aravihi,” te arai ta Iehova i rave no te hamani i te tahi atu â mau mea atoa. (Maseli 8:30, 31, MN; Ioane 1:3; Kolosa 1:15-17) Papu maitai e e haafaufaa o Iehova e o Iesu atoa i te mau mea atoa i poietehia. (A hiˈo i te Genese 1:31.) I to outou râ manaˈoraa, eaha te mea i poietehia mea faufaa roa ˈˈe no raua—te tauihaa aore ra te taata? I roto i to ˈna tiaraa paari faahohoˈahia i te hoê taata, te parau ra Iesu e: “Tei te mau tamarii a te taata ra to ˈu oaoaraa,” aore ra “mea au roa” na Iesu “te taata,” ia au i te huriraa a William F. Beck.

3. Eaha te tohu ta Iehova i parau na roto ia Hagai?

³ Aita e feaaraa, mea faufaa roa te taata no Iehova. Te vai ra te hoê haapapuraa i roto i te mau parau tohu ta ˈna i faahiti i te matahiti 520 H.T.T. na roto i te arai o ta ˈna peropheta Hagai. Ua parau Iehova e: “Na ˈu e faaaueue i te mau fenua atoa, e e tae mai tei hinaarohia o te mau fenua atoa ra: e faaî hoi au i teie nei fare i te hanahana. . . . Te hanahana o teie nei fare hopea, e rahi ïa i to tei mutaa ihora.”—Hagai 2:7, 9.

4, 5. (a) No te aha e ore ai e tano ia parau e “tei hinaarohia” o te unauna materia ïa? (b) Nafea outou e faataa ˈi eaha “tei hinaarohia,” e no te aha?

⁴ Eaha “tei hinaarohia” o te faaî i te fare o Iehova e o te afai mai i te hanahana aita e faaauraa? Te mau tauihaa unauna e te mau faaneheneheraa anei? Te auro, te ario, e te mau ofai taoˈa rahi anei? E au ra e e ere te reira. A haamanaˈo na i te hiero tahito i avarihia fatata e pae senekele na mua ˈtu, e mau miria dala Marite tei pau! * Papu maitai, aita Iehova i manaˈo e  e hau aˈe te unauna o te hiero i patuhia e teie pǔpǔ iti o te mau ati Iuda i hoˈi i ǒ ratou, i te hiero a Solomona!

⁵ Eaha ïa “tei hinaarohia” o te faaî i te fare o Iehova? Papu maitai e e mau taata. Inaha hoi, e ere na te ario e te auro e faaoaoa i te mafatu o Iehova, na te taata râ e tavini ra ia ˈna ma te here. (Maseli 27:11; Korinetia 1, 10:26) Oia, mea here na Iehova te mau tane, te mau vahine, e te mau tamarii atoa e haamori ra ia ˈna ma te au. (Ioane 4:23, 24) O ratou “tei hinaarohia,” e mea faufaa aˈe ratou no Iehova i te mau faaneheneheraa atoa i roto i te hiero a Solomona.

6. Eaha te fa i patuhia ˈi te hiero o te Atua i tahito ra?

⁶ Noa ˈtu te patoiraa tuutuu ore, ua oti te hiero i te hamanihia i te matahiti 515 H.T.T. E tae mai i te tau o te tusia a Iesu, ua riro noa te hiero i Ierusalema ei pu o te haamoriraa viivii ore no te rahiraa “tei hinaarohia,” oia hoi te mau ati Iuda pae tino e te mau peroseluto Etene. Teie râ, ua faahohoˈa te hiero i te tahi mea rahi atu â, mai ta tatou e ite mai.

Te hoê tupuraa i te senekele matamua

7. (a) Eaha ta te hiero o te Atua i tahito ra i Ierusalema i faahohoˈa? (b) A faataa i te mau ohipa a te tahuˈa rahi i te Mahana Taraehara.

⁷ Ua faahohoˈa te hiero i Ierusalema i te hoê faanahoraa rahi atu â no te haamoriraa. O te hiero pae varua ïa o te Atua, ta Iehova i haamau i te matahiti 29 T.T. e o Iesu te Tahuˈa Rahi. (Hebera 5:4-10; 9:11, 12) E ite mai tatou e e tuea te mau hopoia a te tahuˈa rahi a Iseraela e te mau ohipa a Iesu. I te mau matahiti atoa i te Mahana Taraehara, e haere te tahuˈa rahi i te fata ra i roto i te aua o te hiero e pûpû i te hoê puaatoro oni ei taraehara na te mau tahuˈa. I muri iho, e tomo oia i roto i te hiero e te toto o te puaatoro oni, e na roto atu oia i te mau opani e faataa ê ra i te aua e te vahi Moˈa e i muri iho, te paruru e faataa ê ra i te vahi Moˈa e te vahi Moˈa Roa. I roto i te vahi Moˈa Roa, e pîpî te tahuˈa rahi i te toto i mua i te afata o te faufaa. Ia oti, e na reira atoa oia no te pûpû i te hoê puaaniho ei taraehara na te mau opu fetii 12 o Iseraela e ere i to te opu tahuˈa. (Levitiko 16:5-15) Nafea teie peu e taaihia ˈi i te hiero pae varua o te Atua?

8. (a) I roto i teihea auraa i haamata ˈi te pûpûraa a Iesu i te matahiti 29 T.T.? (b) Eaha te taairaa taa ê ta Iesu i fanaˈo e o Iehova i te roaraa o ta ˈna taviniraa i nia i te fenua?

⁸ Oia mau, ua pûpûhia Iesu i nia i te fata o te hinaaro o te Atua i to ˈna bapetizoraahia e faatavairaahia i te varua moˈa o te Atua i te matahiti 29 T.T. (Luka 3:21, 22) Ua tapao mau â teie ohipa i te haamataraa o te hoê huru oraraa faaere no Iesu e toru matahiti e te afa i te maoro. (Hebera 10:5-10) I te roaraa o te reira tau, ua fanaˈo Iesu i te hoê taairaa faatavaihia i te varua e te Atua. Eita e taa maitai i te tahi atu â mau taata teie taairaa otahi i rotopu ia Iesu e to ˈna Metua i te raˈi. Mai te mea ra e te tapoˈi ra te hoê paruru i to ratou mata o te ite maite, mai te hoê noa paruru i mua i te vahi Moˈa ia ore te feia i roto i te aua o te sekene e ite atu.—Exodo 40:28.

9. No te aha Iesu e ore ai e tae i nia i te raˈi ei taata, e nafea teie tupuraa i te matararaa?

⁹ Noa ˈtu e e Tamaiti a te Atua oia tei faatavaihia i te varua, eita ta te taata ra o Iesu e nehenehe e ora i nia i te raˈi. No te aha e ore ai? No te mea eita te tino iˈo e te toto e parahi i te Basileia o te Atua i nia i te raˈi. (Korinetia 1, 15:44, 50) I te mea e ua riro te tino iˈo taata o Iesu ei haafifiraa, te faahohoˈa maitai ra ïa te reira i te paruru e faataa ê ra i te vahi Moˈa e te vahi Moˈa Roa i roto i te hiero o te Atua i tahito ra. (Hebera 10:20) E toru râ mahana i muri aˈe i to ˈna poheraa, ua faatia mai te Atua ia Iesu ei varua. (Petero 1, 3:18) I reira oia e nehenehe ai e tomo i roto i te vahi Moˈa Roa o te hiero pae varua o te Atua—te raˈi iho. E te reira mau â tei tupu. Te papai ra Paulo e: “Aita aˈenei hoi te Mesia i tomo i roto i na vahi moˈa [o te vahi Moˈa Roa iho â ïa ta ˈna e faahiti ra] i hamanihia e te rima ra, i te hohoˈa no te vahi moˈa mau ra, tei te raˈi mau râ oia ia faaite oia ia ˈna iho i mua i te aro o te Atua no tatou, i teie nei â.”—Hebera 9:24.

10. Eaha ta Iesu i rave no te hoˈi i nia i te raˈi?

¹⁰ I nia i te raˈi, ua ‘pîpî Iesu i te toto’ o ta ˈna tusia na roto i te faaiteraa i te faufaa taraehara  o to ˈna toto ia Iehova. Aita râ Iesu i faaea noa i reira. Na mua iti noa ˈˈe i to ˈna poheraa, ua parau oia i ta ˈna mau pǐpǐ e: “Te haere nei au e haamaitai i te hoê vahi no outou. E ua oti anaˈe i te faaauhia e au te hoê vahi no outou ra, e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.” (Ioane 14:2, 3) Na roto ïa i to ˈna tomoraa i roto i te vahi Moˈa Roa, aore ra te raˈi, ua horoa Iesu i te ravea na te tahi atu â mau taata ia pee ia ˈna. (Hebera 6:19, 20) E riro teie mau taata, 144 000 hoi ratou, ei tahuˈa apiti i roto i te hiero pae varua o te Atua. (Apokalupo 7:4; 14:1; 20:6) Mai te tahuˈa rahi a Iseraela o te afai na mua i te toto o te puaatoro oni i roto i te vahi Moˈa Roa ei taraehara na te mau tahuˈa, ua faaohipa-na-mua-hia te toto o Iesu i manii i nia i teie na 144 000 tahuˈa apiti. *

“Tei hinaarohia” no teie nei tau

11. Ua pûpû te tahuˈa rahi a Iseraela i te hoê puaaniho no vai ma, e eaha ta te reira i faahohoˈa?

¹¹ E au ra e i te matahiti 1935, ua hope te haaputuputuraa rahi o te feia faatavaihia. * Aita râ i oti atura ia Iehova i te faahanahana i to ˈna fare. Aita, e tomo mai â “tei hinaarohia” i roto. A haamanaˈo na e e pûpû te tahuˈa rahi i Iseraela e piti animala—hoê puaatoro oni no te mau hara a te mau tahuˈa e hoê puaaniho no te mau hara a te mau opu e ere i to te opu tahuˈa. I te mea e ua faahohoˈa te mau tahuˈa i te feia faatavaihia o te faatere e o Iesu i roto i te Basileia o te raˈi, o vai ïa ta te mau opu e ere i to te opu tahuˈa i faahohoˈa? Na te mau parau a Iesu i roto i te Ioane 10:16 e pahono maira: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” No reira, e piti pǔpǔ taata te faufaahia i te toto o Iesu i manii—a tahi, te mau Kerisetiano e tiaturi ra e faatere e o Iesu i nia i te raˈi e a piti, te feia e tiai noa ra i te ora mure ore i nia i te hoê fenua paradaiso. Papu maitai e o te piti o te pǔpǔ te faahohoˈa ra i “tei hinaarohia” o te parau tohu a Hagai.—Mika 4:1, 2; Ioane 1, 2:1, 2.

12. Nafea “tei hinaarohia” e rave rahi e arataihia ˈi i te fare o te Atua i teie mahana?

¹² Te faaî noa nei â “tei hinaarohia” i te fare o Iehova. I teie mau matahiti i mairi aˈenei, ua iritihia te mau opaniraa i Europa Hitia o te râ, i te mau fenua Afirika, e i te tahi atu â mau fenua, e nehenehe ïa e poro i te parau apî maitai  o te Basileia ta te Atua i haamau i te mau tuhaa fenua aitâ i porohia ˈtura. A tomo noa mai ai tei hinaarohia i roto i te hiero o te Atua, te tutava atoa ra ratou i te faariro e rave rahi atu â taata ei pǐpǐ, ia au i te faaueraa a Iesu. (Mataio 28:19, 20) A na reira ˈi ratou, te farerei nei ratou e rave rahi taata, te feia apî e te feia paari, o te nehenehe e riro mai ei mea “hinaarohia” o te faahanahana i te fare o Iehova. E hiˈo mai tatou i te tahi noa mau hiˈoraa nafea te reira e tupu ai.

13. Nafea to te hoê tamahine iti i Bolivie faaiteraa i to ˈna itoito no te haaparare i te poroi o te Basileia?

¹³ I Bolivie, ua ani te hoê tamahine e pae matahiti i haapiihia e te mau metua Ite, i ta ˈna orometua haapii e e nehenehe anei ta ˈna e mairi i te haapiiraa i te hebedoma e tere mai ai te tiaau haaati. No te aha? Ua hinaaro oia e apiti i roto i te taviniraa i te roaraa o teie hebedoma ohipa taa ê. Ua maere to ˈna mau metua, tera râ, ua oaoa raua i to ˈna haerea maitai. Te faatere ra te tamahine iti i teie nei e pae haapiiraa Bibilia i te fare o te taata, e te haere ra vetahi o teie mau taata haapii i te mau putuputuraa Kerisetiano. Ua afai atoa oia i ta ˈna orometua haapii i te Piha a te Basileia. Peneiaˈe i muri iho, e riro mai vetahi o ta ˈna feia e haapii ra ei mea “hinaarohia” o te faahanahana i te fare o Iehova.

14. I Korea, nafea te tamau-maite-raa te hoê tuahine i te paraparau i te hoê taata e au ra e aita e anaanatae ra, i te haamaitairaahia?

¹⁴ A tiai noa ˈi oia i te hoê vahi tapearaa pereoo auahi, ua paraparau atu te hoê vahine Kerisetiano i Korea i te hoê taurearea haere haapiiraa e faaroo noa ra i te upaupa e te mau taoˈa  no te faaroo i tamauhia i nia i to ˈna tariˈa. “E haapaoraa anei ta oe?” ta ˈna ïa i ui atu. “Aita vau e anaanatae ra i te mau huru haapaoraa atoa,” ta te taurearea ïa i pahono. Aita te tuahine i tuu. “A mairi noa ˈi te tau,” ta ˈna ïa i parau faahou, “e hinaaro iho â te hoê taata e maiti i te hoê haapaoraa. Mai te peu râ e aita to ˈna e ite no nia i te haapaoraa, e maiti paha oia i te haapaoraa hape.” Ua taui aˈera te taurearea i te manaˈo, e ua haamata ˈtura i te faaroo i to tatou tuahine ma te anaanatae. Ua pûpû aˈera te tuahine i te buka ra Y a-t-il un Créateur qui se soucie de vous? na ˈna e na ô atura e e riro teie buka ei tauturu rahi ia tae i te taime e maiti ai oia i te hoê haapaoraa. Ua farii oioi oia i te buka. I te hebedoma i muri iho, ua haamata oia i te haapii i te Bibilia e te mau Ite no Iehova, e i teie nei, te haere ra oia i te mau putuputuraa atoa a te amuiraa.

15. Nafea to te hoê tamahine i Tapone haamataraa i te mau haapiiraa Bibilia, e nafea ta ˈna mau tutavaraa i te haamaitairaahia?

¹⁵ I Tapone, ua faariro o Megumi, 12 matahiti, i ta ˈna fare haapiiraa ei tuhaa fenua maitai roa no te pororaa e no te haapiiraa. Ua nehenehe oia e faatere e rave rahi haapiiraa Bibilia. Eaha ta Megumi i rave? I te mea e e taio oia i te Bibilia aore ra e faaineine oia i te mau putuputuraa i te taime tamaaraa, e pinepine to ˈna mau hoa haapiiraa i te ui eaha ta ˈna e rave ra. E ui vetahi ia Megumi no te aha o ˈna e ore ai e apiti i roto i te tahi mau ohipa haapiiraa. E pahono ïa Megumi i ta ratou mau uiraa e e parau atoa oia e e iˈoa to te Atua. E pinepine te reira i te faaara i te anaanatae o tei faaroo ia ˈna. I muri iho, e pûpû oia i te hoê haapiiraa Bibilia. I teie nei, te faatere ra Megumi e 20 haapiiraa Bibilia—18 haapiiraa e to ˈna mau hoa haapiiraa.

16. Nafea to te hoê taeae i Cameroun neheneheraa e haamata i te mau haapiiraa Bibilia e vetahi mau taata i faaooo ia ˈna?

¹⁶ I Cameroun, ua pii atu te hoê pûpû e vau taata o te rave ra i te ohipa, i te hoê taeae e pûpû ra i te mau papai Bibilia na te feia e hahaere noa ra. No to ratou hinaaro e faaooo i te taeae, ua ui ratou ia ˈna no te aha oia i ore ai e tiaturi i te Toru Tahi, te po auahi, aore ra te pohe-ore-raa o te nephe. Ma te faaohipa i te Bibilia, ua pahono to tatou taeae i ta ratou mau uiraa. I te pae hopea, ua farii e toru o taua mau taata ra i te haapii i te Bibilia. O Daniel te hoê i haamata i te haere i te mau putuputuraa e i faaore i ta ˈna mau taoˈa tahutahu atoa. (Apokalupo 21:8) E iti aˈe i te hoê matahiti, ua bapetizohia oia.

17. Nafea to te tahi nau taeae i Salvador faaohiparaa i te hoê ravea maramarama no te poro i te hoê taata aita i hinaaro i te omuaraa e faaroo i te poroi o te Basileia?

¹⁷ I Salvador, e taamu te hoê taata i ta ˈna urî taehae i mua i te opani ia ite oia i te mau Ite na pihai iho mai. E tiai teie taata ia moe roa te mau Ite, i reira ïa oia e faahoˈi ai i ta ˈna urî i roto i te fare. Aita roa ˈtu te mau taeae i nehenehe aˈenei e paraparau i te taata ra. No reira i te hoê mahana, ua faaoti aˈera raua e tamata i te tahi atu ravea. Ua ite hoi raua e e nehenehe te taata e faaroo mai ia raua, ua faaoti aˈera raua e poro i te urî. Ua haere atura raua i te fare, aroha ihora i te urî, e parau atura e te oaoa ra raua i te neheneheraa e paraparau ia ˈna. Ua paraparau raua i te taime e haamauhia ˈi te paradaiso i nia i te fenua, e ore ai te taata e riri faahou—oia, te taime e vai atoa ˈi te mau animala i roto i te hau. I muri iho, aroha ˈtura  raua i te urî e haamata ˈtura i te haere. I to raua maere rahi, ua haere mai te taata ra i rapaeau i to ˈna fare e tatarahapa ˈtura no to ˈna oreraa e farii i te paraparau i te mau Ite. Ua farii oia i te mau vea, e ua haamatahia te hoê haapiiraa Bibilia. I teie nei, e taeae teie taata no tatou—te hoê o “tei hinaarohia”!

“Eiaha e mǎtaˈu”

18. Eaha te mau fifi ta te mau Kerisetiano e rave rahi e faaruru ra, e nafea râ Iehova e hiˈo ai i te feia e haamori ra ia ˈna?

¹⁸ Te apiti ra anei outou i roto i te ohipa faufaa roa o te pororaa i te Basileia e te faariroraa i te taata ei pǐpǐ? Mai te peu e e, mea fanaˈo mau â outou. Oia mau, maoti teie ohipa e aratai ai Iehova i “tei hinaarohia” i roto i to ˈna fare. (Ioane 6:44) Parau mau, e fiu aore ra e paruparu rii paha outou i tera e tera taime. I te tahi mau taime—i rotopu atoa i te mau tavini haapao maitai a Iehova—te aro nei vetahi i te manaˈo ra e mea faufaa ore ratou. Eiaha râ e tuu! Te hiˈo ra Iehova i te taata taitahi e haamori ra ia ˈna ei taata hinaarohia, e te anaanatae mau ra oia i to outou ora.—Petero 2, 3:9.

19. Eaha te faaitoitoraa ta Iehova i horoa na roto i te arai o Hagai, e nafea teie mau parau e riro ai ei faaitoitoraa no tatou?

¹⁹ Ia paruparu tatou, no te patoiraa anei aore ra no te tahi atu mau tupuraa au ore, e nehenehe te mau parau a Iehova i te mau ati Iuda i hoˈi i ǒ ratou e riro ei faaitoitoraa. Te taio nei tatou i roto i te Hagai 2:4-6 e: “I tena na râ, e faaitoito, e Zerubabela, te parau maira Iehova; faaitoito, e Iosua a Iosedeka, te tahuˈa rahi ra; e faaitoito, e te mau taata atoa o te fenua nei, te parau maira Iehova, e rave i te ohipa; tei ia outou atoa na hoi au, te parau maira Iehova sabaota ra; mai te parau ta ˈu i faaau atu ia outou a haere mai ai outou mai te fenua maira mai Aiphiti; e te vai ra tau varua i roto ia outou: eiaha e mǎtaˈu. Te na ô maira Iehova sabaota ra, Hoê toe, e ore e mahia, e faaaueue ai au i te mau raˈi e te fenua, e te moana e te repo mǎrô.” A tapao na e aita noa Iehova e aˈo maira ia faaitoito tatou, te horoa atoa maira râ oia i te ravea ia puaihia tatou. Nafea? A tapao na i te mau parau tamahanahana ra: “Tei ia outou atoa na hoi au.” E puai mau â to tatou faaroo ia taa ia tatou e noa ˈtu eaha te mau haafifiraa ta tatou e faaruru, tei ia tatou atoa na o Iehova!—Roma 8:31.

20. Nafea te fare o Iehova e î ai i teie nei i te hanahana aita e faaauraa?

²⁰ Eita e ore e ua haapapu Iehova e tei to ˈna nunaa atoa oia. Oia mau, mai ta ˈna iho â i parau na roto i te arai o te peropheta Hagai: “Te hanahana o teie nei fare hopea, e rahi ïa i to tei mutaa ihora . . . Ei teie nei vahi au e horoa ˈtu ai i te hau.” (Hagai 2:9) Oia mau, te itehia ra te hanahana rahi roa ˈˈe i roto i te hiero pae varua o Iehova. Inaha, e mau hanere tausani o te haere ra i te haamoriraa mau i te mau matahiti atoa. Te faatamaa-maitai-hia ra ratou i te pae varua, e i roto atoa i teie nei ao arepurepu, te fanaˈo ra ratou i te hoê hau o te hemo-noa-hia e te hau e tupu i roto i te ao apî a te Atua.—Isaia 9:6, 7; Luka 12:42.

21. Eaha ta tatou faaotiraa e tia ˈi?

²¹ Ua fatata Iehova i te faaaueue i te mau nunaa i Aramagedo. (Apokalupo 16:14, 16) E faaohipa anaˈe ïa i te taime e toe ra no te tauturu i te faaora e rave rahi atu â mau taata. Ia faaitoito tatou e ia tiaturi taatoa tatou ia Iehova. Ia faaoti tatou e tamau noa i te haamori i roto i to ˈna hiero rahi i te pae varua, o te î noa ˈtu â i “tei hinaarohia” e tae noa ˈtu i te taime e parau ai Iehova e ua oti ta tatou ohipa.

[Nota i raro i te api]

Te haamanaˈo ra anei outou?

• Eaha te mea faufaa aˈe i te mau mea materia no Iehova?

• Eaha na pǔpǔ taata e piti e faufaahia ra i te toto o Iesu i manii?

• O vai ma “tei hinaarohia” e faaî ra i te fare o Iehova i te hanahana?

• Eaha ta tatou haapapuraa e te tupu ra te parau tohu a Hagai i teie mahana?

[Uiraa haapiiraa]

[Hohoˈa faataahia i te api 16]

(Hiˈo i te papai)

Ua ite anei outou i te auraa taipe o te hiero o Iehova i tahito ra?

Vahi Moˈa Roa

Paruru

Vahi Moˈa

Poretiko

Fata

Aua

[Hohoˈa i te api 17]

E pûpû te tahuˈa rahi i te hoê puaatoro oni no te mau hara a te mau tahuˈa e te hoê puaaniho no te mau hara a te mau opu e ere i to te opu tahuˈa a Iseraela

[Hohoˈa i te api 18]

Te aratai maira te ohipa pororaa i te Basileia na te ao nei e rave rahi taata i te fare o Iehova