Te faatia ra te feia poro i te Basileia

Te tautururaa i te mau taata reo ěê atoa i te mau Pays-Bas

E TAATA faaroo rahi o Aberahama. Ua faaite te aposetolo Paulo e “a parauhia mai ai oia e,” ua auraro Aberahama i te reo o te Atua e “e haere atura oia ma te ite ore i taua fenua i haerehia e ana ra.” I muri aˈe i to ˈna haereraa e to ˈna utuafare fetii taatoa, ua ‘purutia noa Aberahama i taua fenua i parauhia maira’ no te toea o na hoê hanere matahiti o to ˈna oraraa.—Hebera 11:8, 9.

I teie nei mahana atoa, e rave rahi mau Ite no Iehova o tei farii i te titauraa e haere i te tahi atu fenua no te tavini i te vahi e hinaaro rahi ra i te tauturu. Ua haapii vetahi i te hoê reo ê no te poro i te mau taata ěê o tei haere mai e noho i to ratou fenua. Mai ta te mau tupuraa i muri nei e faaite ra, ‘ua iriti teie feruriraa maitai i te hoê opani rahi i nia i te taviniraa’ i te mau Pays-Bas, hoê fenua e faaeahia ra e 15 mirioni taata, hoê mirioni no te mau fenua ěê ïa.—Korinetia 1, 16:9.

◻ No ǒ mai o Bahram, te hoê taata haapii tahito i te kung-fu, i te hoê fenua no te pae Hitia o te râ no Ropu. Ua noaa ia ˈna te hoê Bibilia e vetahi mau papai a te Taiete Watch Tower. I roto hoê avaˈe, ua papu ia Barham e ua ite mai oia i te parau mau. Ua haapii o ˈna e ta ˈna vahine, te vai ra râ te hoê fifi—aita to raua taata faatere i te haapiiraa Bibilia e paraparau i to raua reo. Ua tupu ïa te tauaparauraa maoti te mau apǎraa rima, “te mau rima e te mau avae,” ta raua ïa i haamanaˈo. I muri iho, ua itea mai e Bahram e ta ˈna vahine i te hoê amuiraa e paraparau ra i to raua iho reo, e mai reira mai ua haere oioi raua i mua. I teie nei, e Ite bapetizohia o Bahram.

◻ Ua tauaparau nau hoa pionie faaipoipo no te mau Pays-Bas i te hoê taata no Indonésie e tia ra i mua i te hoê fare toa. Ua maere roa o ˈna i to teie nau taata faaipoipo aparauraa i to ˈna iho reo. Ua ravehia ˈtura te mau faanahoraa no te hoˈi-faahou-raa e farerei ia ˈna i to ˈna fare. Ua itehia mai e ua noho o ˈna i Rusia e hau atu i te 20 matahiti i reira to ˈna riroraa ei taote no te vahine. Ua parau o ˈna e e taata tiaturi ore i te Atua oia, ua faˈi râ oia e ia faafanau anaˈe oia i te hoê aiû i te mau taime atoa, ua tupu te maereraa, “E poieteraa nehenehe mau te tino taata! E semeio iho â!” Ua farii o ˈna i te haapiiraa Bibilia, e ua tiaturi oioi oia e te vai mau ra te hoê Poiete o te tapitapi ra i te huitaata nei. (Petero 1, 5:6, 7) I teie nei e taeae bapetizohia o ˈna e te tavini nei oia i roto i te amuiraa reo Indonésie i Amsterdam.

◻ I Rotterdam, hoê o te mau uahu aano roa ˈˈe i te ao nei, ua riro te hoê pǔpǔ pionie ei feia aravihi roa no te poro i te mau pǔpǔ taata reo ěê o te haere mai i te mau mahana atoa. Te faahopearaa o ta ratou taviniraa faatupuhia ma te aau tae, e rave rahi ïa mau matero, e tae noa ˈtu hoê tapena, hoê ofitie faahoro pahi, e hoê taata paruru tahito, tei farii i te parau mau. I teie nei, te turu atoa nei ratou i te haaparareraa i te parau apî maitai o te Basileia o te Atua na te ao atoa nei.—Mataio 24:14.

Mai i te tahi atu mau fenua o te ao nei, te opua papu nei te mau Ite no Iehova no te mau Pays-Bas e rave i ta ratou tuhaa no te faaite i te parau apî maitai mure ore i te mau nunaa, te mau opu fetii, te mau reo, e te mau taata atoa.—Apokalupo 14:6.