Te faatia ra te feia poro i te Basileia

Ua haamaitaihia to ratou faaroo

UA RIRO te aposetolo Paulo ei taata faaroo faahiahia, e ua faaitoito oia i te mau hoa faaroo ia faatupu atoa i te faaroo. Te na ô ra oia e: “E faaroo oia e, e Atua, e tia ˈi, e o oia te [haamaitai] i te feia i imi papu ia ˈna ra.” (Hebera 11:6; MN) Te faaite ra te mau tupuraa i muri nei no Mozambique mai nafea Iehova ia haamaitai i te faaroo puai e ia pahono i te mau pure aau tae.

• Ua tapitapi te hoê tuahine ivi no te pae apatoerau o te mataeinaa o Niassa nafea o ˈna e ta ˈna na tamarii e ono e haere ai i te Tairururaa Mataeinaa “E aratai te eˈa o te Atua i te ora.” Ta ˈna noa imiraa moni, o te hooraa ïa i te mau taoˈa i te hoê matete no te fenua iho, teie râ, a fatata mai ai te taio mahana o te tairururaa, ua navai noa ta ˈna moni no te hoê tere na nia i te pereoo auahi no ˈna e no to ˈna utuafare. Noa ˈtu râ, ua faaoti aˈera oia e tiaturi i te mau faanahoraa a Iehova e ua opua oia e tae iho â i te tairururaa.

Ua rave oia i te pereoo auahi e ta ˈna na tamarii e ono. I roto i taua tere ra, ua ani maira te taata faahoro pereoo auahi ia ˈna i ta ˈna titeti. Ma te tapao i ta ˈna tareta, ua ui aˈera oia eaha teie huru faaiteraa ta ˈna i pine i nia ia ˈna. Ua parau te tuahine ia ˈna e te faaite ra te reira e e tia oia no te tairururaa mataeinaa a te mau Ite no Iehova. “Ihea e faatupuhia ˈi tera tairururaa?” ta te taata faahoro pereoo auahi ïa i ui. I muri aˈe i te itearaahia mai e tei te mataeinaa tapiri ia Nampula te tairururaa fatata e 300 kilometera i te atea, ma te manaˈo-ore-hia, ua faaaufau oia i te afaraa o ta ˈna titeti! Ua horoa atu oia na ˈna e no to ˈna utuafare te mau titeti no te hoˈiraa mai i te tahi atu afaraa o ta ˈna moni titeti. Auê oia i te oaoa i to ˈna tiaturiraa ia Iehova e!—Salamo 121:1, 2.

• Fatata e 25 matahiti te maoro, ua pure te hoê vahine faaroo mau i te Atua ia faaite mai i te ravea tano no te haamori ia ˈna. Ua anoi te ekalesia ta ˈna e haere ra i te mau oroa faaroo e te mau peu tutuu, e aita oia e papu ra e te au ra anei te Atua i teie huru haamoriraa.

Te faatia ra oia e: “Ua haamanaˈo noa vau i te mau parau a Iesu i papaihia i roto i te Mataio 7:7: ‘E ani, e horoahia mai ta outou, e imi, e itea ïa ia outou; e patoto atu, e iritihia mai te opani ia outou.’ Maoti teie irava i roto i te feruriraa, ua pure tamau vau i te Atua ia aratai ia ˈu i te parau mau. I te hoê mahana, ua ani te orometua o ta matou ekalesia i te feia atoa e ohipa ra i te matete o te fenua iho e horoa na ˈna i te tahi faito moni e te tahi o ta ratou mau taoˈa ia nehenehe oia e haamaitai ia ratou. Ua hiˈo vau e eita teie aniraa e au i te mau Papai, aita ˈtura vau i horoa i te hoê mea. I to te orometua iteraa e aita vau i horoa i te hoê ‘ô,’ ua haamata oia i te faaino mai ia ˈu i mua i te mau melo atoa o te ekalesia. I taua mahana ra, taa aˈera ia ˈu e e ere te reira te ravea ta te Atua e hinaaro ra ia haamorihia oia, ua faarue atura vau i te ekalesia. I taua area taime ra, ua tamau maite au i te pure no te ite i te parau mau.

“I te pae hopea, ua faaitoito e ua farerei au i te hoê fetii e Ite no Iehova oia. Ua pûpû mai oia na ˈu i te hoê api parau iti, e i muri aˈe i te taioraa i te reira, ua taa oioi ia ˈu e ua pahono mai te Atua i ta ˈu mau pure. I muri iho, ua haamata atoa to ˈu hoa i te au i te mau parau mau Bibilia, e ua haamana mâua i to mâua faaipoiporaa. I muri aˈe râ, ua roohia ta ˈu tane i te maˈi ino mau. Teie râ tae roa ˈtu i to ˈna poheraa ua faaitoito oia ia ˈu ia tamau maite i nia i te eˈa o te parau mau ia nehenehe mâua e farerei faahou i roto i te Paradaiso.

“E mauruuru noa vau ia Iehova no to ˈna pahonoraa i ta ˈu mau pure e to ˈna faaiteraa ia ˈu i te ravea tano no te haamori ia ˈna. Ua pahonohia atoa ta ˈu mau pure na roto i to ˈu iteraa i ta ˈu na tamarii e vau atoa i te riroraa ei tavini pûpûhia no Iehova.”