No te aha te huitaata e hinaaro ai i te hoê taata tauturu

‘E TAATA hamani ino na vau e te faatura ore,’ ta te hoê ïa taata, mea teoteo oia na mua ˈˈe e te iria, i faˈi. Ua riro na oia ei faaino e ei taata i faaooo e i hamani ino i te mau pǐpǐ a Iesu Mesia e mǎtaˈu ra i te Atua. “I arohahia mai râ vau,” ta ˈna ïa i parau ma te aau mehara. Noa ˈtu te maere, ua riro mai taua taata hamani ino taehae ra ei aposetolo Kerisetiano haapao maitai oia o Paulo.—Timoteo 1, 1:12-16; Ohipa 9:1-19.

E ere te mau taata atoa tei rave i te mau mea ta Paulo i rave. Teie râ, aita i noaa ia tatou paatoa i te haapao i te mau ture a te Atua. No te aha? “Ua rave paatoa hoi” tatou “i te hara, e ua ere i te haamaitai a te Atua ra.” (Roma 3:23) Hau atu â, mea ohie roa ia hepohepo roa ˈtu, peneiaˈe a manaˈo ai e mea ino roa tatou no te fanaˈo i te aroha hamani maitai o te Atua. A feruri ai oia i to ˈna mau manaˈo hara, ua parau Paulo iho e: “Auê hoi au o te taata ati rahi e! na vai ra vau e faaora i teie nei tino pohe?” E pahono oia i ta ˈna iho uiraa e: “E haamaitai au i te Atua, i to tatou Fatu ra ia Iesu Mesia.” (Roma 7:24, 25)

Nafea te Atua Poiete parau-tia i ohipa ˈi e te feia hara? (Salamo 5:4) A tapao na e ua parau Paulo e: “E haamaitai au i te Atua, i to tatou Fatu ra ia Iesu Mesia.” Ua faataa te tahi atu taata tei fanaˈo i te aroha hamani maitai o te Atua e: “Ia roohia ˈtu râ te hoê taata i te hara, e tia [aore ra taata tauturu] to tatou tei ǒ i te Metua ra, o Iesu Mesia, o te taata parau-tia ra; e oia hoi te taraehara i ta tatou nei hara; e ere hoi i ta tatou anaˈe ra, i ta to te ao atoa nei râ.”—Ioane 1, 2:1, 2.

No te aha Iesu Mesia e parauhia ˈi “e tia [aore ra taata tauturu] . . . tei ǒ i te Metua ra”? E nafea Iesu e riro ai ei “taraehara i ta tatou nei hara”?

No te aha e hinaarohia ˈi te hoê taata tauturu

Ua haere mai Iesu i te fenua nei e “horoa i to ˈna ora ei hoo no te taata e rave rahi.” (Mataio 20:28) Te hoê hoo, o te tino moni ïa e  aufauhia no te hoo faahou mai, aore ra no te faaora, i te hoê taata aore ra i te hoê mea. E au te huru o te ihoparau Hebera i hurihia e “hoo” i te manaˈo e tapoˈi, aore ra e tatara, i te hara. (Salamo 78:38) E faaohipahia na te taˈo Heleni mai te itehia i roto i te Mataio 20:28, no te tino moni e aufauhia no te hoo faahou mai i te feia i noaa i te tau tamaˈi aore ra no te faaora i te mau tîtî. No te haapao i te mau titauraa a te parau-tia, e horoahia te hoê mea ei faahoˈiraa i te tahi atu mea hoê â faufaa.

Ua riro mai te huitaata ei tîtî no te orureraa hau a te taata matamua i te Atua. Mai tei faaitehia i roto i te Genese pene 3, ua maiti taua taata tia roa ra—o Adamu—i te pee i te haerea faaroo ore i te Atua o Iehova. I te na reiraraa, ua hoo atu oia ia ˈna iho e to ˈna huaai aitâ i fanauhia ˈtura ei tîtî na te hara e te pohe. Ua ere atura ïa Adamu no ˈna iho e no to ˈna mau huaai, i te ô o te oraraa taata tia roa.—Roma 5:12, 18, 19; 7:14.

I Iseraela i tahito ra, ua faanaho te Atua i te mau pûpûraa tusia animala no te tatara, aore ra tapoˈi, i te mau hara a te nunaa. (Levitiko 1:4; 4:20, 35) Oia mau, te horoahia ra te ora o te animala faatusiahia no te mono i to te taata hara. (Levitiko 17:11) No reira, e nehenehe “te mahana tatararaa hara” e parau-atoa-hia “te mahana o te mau hoo.”—Levitiko 23:26-28.

I te mea râ e e iti aˈe te animala i te taata, eita roa “e tia i te toto puaatoro e te puaaniho ia faaore [roa ino] i te hara.” (Hebera 10:1-4) Ia navai te faufaa o te hoê tusia no te tatara, aore ra faaore roa, i te hara, e tia ia aifaito i to te mea ta Adamu i ere. E titau te faito o te parau-tia i te hoê taata tia roa (Iesu Mesia) ia hoê â faito e tei erehia e te tahi atu taata tia roa (Adamu). O te hoê noa taata tia roa te nehenehe e aufau i te moni hoo no te hoo faahou mai i te huaai o Adamu i te faatîtîraa ta to ratou metua matamua i hoo atu ia ratou. Ia horoahia ‘te hoê nephe no te hoê nephe,’ e mâha ïa te mau titauraa a te parau-tia mau.—Exodo 21:23-25.

I to Adamu hararaa e faautuaraahia i te utua pohe, tei roto noâ to ˈna huaai aitâ i fanauhia ˈtura i to ˈna mau mape e ua pohe atoa ïa e oia. Ma te hinaaro mau, aita te taata tia roa ra o Iesu, “te Adamu hopea,” i fanau i te tamarii. (Korinetia 1, 15:45) Tei roto to ˈna huaai fanau-ore-hia i to ˈna mau mape i to ˈna poheraa ei tusia taata tia roa. E nehenehe ïa e parau e ua pohe te huitaata parau-tia e noaa mai no roto i to ˈna mau mape e oia. Ua faariro Iesu i te utuafare hara e o te pohe atura o Adamu ei no ˈna iho. Ua faarue oia i te tiaraa e fanaˈo i to ˈna iho utuafare. Na roto i te pûpûraa i to ˈna ora taata tia roa ei tusia, ua hoo faahou mai Iesu i te huitaata taatoa no roto ia Adamu ia riro mai ratou ei To ˈna utuafare, o Oia ïa to ratou ‘Metua e a muri atu.’—Isaia 9:6, 7.

Ua haamatara te tusia taraehara a Iesu i te ravea e fanaˈo ai te huitaata faaroo i te aroha hamani maitai o te Atua e e roaa ˈi te ora mure ore. No reira te aposetolo Paulo i papai ai e: “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” (Roma 6:23) E turaihia ïa tatou ia arue ia Iehova no te here e te aau aroha i taaihia i te hoo, tei horoahia na roto i te mauiui rahi roa no ˈna iho no ta ˈna Tamaiti here roa. (Ioane 3:16) E ua faaite mau â Iesu e e ‘taata tauturu oia i ǒ i te Metua ra’ i to ˈna faatia-faahou-raahia no te oraraa i nia i te raˈi e tiaraa ˈtu ma te faufaa o ta ˈna tusia taraehara i mua i te Atua i te raˈi. * (Hebera 9:11, 12, 24; Petero 1, 3:18) Nafea râ Iesu Mesia e riro ai i teie nei ei taata tauturu no tatou i nia i te raˈi?

[Nota i raro i te api]

[Hohoˈa i te api 4]

Ua riro te ora taata tia roa o Iesu ei moni aufau no te hoo faahou mai i te huaai o Adamu