Eaha ta outou i ite no nia i te peu tahutahu?

PEU TAHUTAHU! Eaha ta teie parau e faahaamanaˈo ia outou?

No te rahiraa, o te niu te reira o te mǎtaˈu maamaa e te aai o te ore e tia ia tâuˈahia ˈtu. No ratou, tei roto noa te peu tahutahu i te ao feruri-noa-hia—te vai ra te feia tahutahu ma te ahu e taupoo to nia iho o te tuu i te pererau otelepha i roto i te pani rahi e pihaa ra, te faariro i te taata ei rana, te marere i nia i te raˈi na nia i te raau o te hoê purumu pehu ia po a ata ˈi ma te ino.

No vetahi atu, e ere te peu tahutahu i te parau hauti. Te parau ra te tahi feia maimi e ua hau atu i te afaraa o te taata o te ao nei o te tiaturi e te vai mau ra te feia tahutahu e e nehenehe ratou e ohipa i nia i to vetahi ê oraraa. E mau mirioni taata o te tiaturi e mea ino te peu tahutahu, mea atâta, e te tia ia mǎtaˈuhia. Ei hiˈoraa, te na ô ra te hoê buka no nia i te haapaoraa i Afirika e: “Ua aˈa-maitai-hia te tiaturiraa i te peu tahutahu e to ˈna huru atâta i roto i te oraraa Afirika . . . O te feia tahutahu te feia riri-roa ˈˈe-hia i roto i to ratou oire. E tae roa mai i teie mahana, te vai ra te mau vahi e te mau taime e taparahi-roa-hia ˈi ratou e te toea o te taata.”

I roto râ i te mau fenua no Tooa o te râ, ua faaapî e ua haamaitai te peu tahutahu i to ˈna roo. Na te mau buka, te afata teata, e te mau hohoˈa teata i faaiti roa i te mǎtaˈu i te peu tahutahu. Teie te manaˈo o te taata tuatapapa i te mau faaanaanataeraa o David Davis: “Ua riro taue mai te feia tahutahu ei mea apî aˈe e ei mea haviti aˈe, ei mea haviti mau â. Mea aravihi Hollywood i te tapaoraa i tei auhia e te taata. . . . Na roto i te faariroraa i te feia tahutahu ei mea haviti aˈe e te herehia, e nehenehe ratou e faaanaanatae i te feia rahi aˈe, tae noa ˈtu te mau vahine e te mau tamarii apî aˈe.” Ua ite Hollywood nafea ia faaohipa i tei auhia e te taata ei pûpûraa hoona.

Te parau nei te vetahi e ua riro mai te peu tahutahu ei hoê o te mau pǔpǔ pae varua maraa rahi roa ˈˈe i te mau Hau Amui no Marite. Na te ao i haere i mua taatoa, te rahi noa ˈtura te taata, turaihia e te mau pǔpǔ turu i te paeau o te mau vahine e i taahoa roa i te mau haapaoraa rahi, o te imi i te haamâha i to ratou pae varua i roto i te mau peu tahutahu huru rau. Oia mau, no te rahi o te mau huru peu tahutahu, aita te manaˈo o te taata e tuati ra i nia i te auraa o te parau “tahutahu.” Teie râ, mea pinepine te feia tahutahu mau i te parau e no te Wicca ratou—faataahia e te titionare mai “te hoê haapaoraa etene o te natura no ǒ roa mai i Europa tooa o te râ no te tau hou te Kerisetianoraa e o te fa faahou maira i te senekele 20.” * No reira, e rave rahi te parau nei e e etene ratou aore ra e etene apî.

 I te roaraa o te aamu, ua ririhia te feia tahutahu, ua hamani-ino-hia, ua haamauiuihia e ua haapohe-atoa-hia. E ere i te mea maere ia hinaaro te feia e rave i te peu tahutahu i teie tau e haamaitai i to ratou roo. I roto i te hoê uiuiraa manaˈo, ua uihia e rave rahi feia tahutahu eaha te poroi ta ratou e hinaaro rahi ra e faatae i te taata. Teie ta ratou pahonoraa, i haapotohia e te vahine maimi ra o Margot Adler: “E ere matou i te mea ino. Aita matou e haamori ra i te Diabolo. Eita matou e hamani ino aore ra e haavare i te taata. E ere matou i te mea atâta. E feia au noa matou mai ia outou. E utuafare, e ohipa, e tiaturiraa e e moemoeâ to matou. E ere ta matou i te hoê haapaoraa. E ere matou i te mea huru ê. . . . Eiaha outou ia mǎtaˈu mai ia matou. . . . Hoê â matou e outou, hau atu i ta outou e manaˈo ra.”

Ua fariihia teie poroi e ua rahi noa ˈtu i te fariihia. O te auraa anei râ e aita e tumu ia haapeapea no nia i te raveraa i te peu tahutahu? E hiˈopoa anaˈe i teie uiraa i roto i te tumu parau i muri nei.

[Nota i raro i te api]