Te vai ra anei ta te Bibilia te hoê papai huna?

FATATA e piti matahiti i muri aˈe i te taparahi-pohe-raahia te Faatere hau nui matamua o Iseraela ra o Yitzhak Rabin i te matahiti 1995, ua na ô te hoê papai vea e maoti te tauturu a te roro uira, ua iteahia ia ˈna te hoê tohu o taua ohipa huna ra i roto i te papai Hebera Bibilia tumu. Ua papai te papai vea ra o Michael Drosnin e ua tamata oia i te faaara i te faatere hau nui hau atu i te hoê matahiti na mua ˈˈe a taparahi-pohe-hia ˈi oia, aita râ i manuïa.

I teie nei, te neneihia ra te tahi atu mau buka e mau vea e parau ra e te horoa ra teie papai huna i te hoê haapapuraa mau e mea faauruahia te Bibilia e te Atua. Te vai ra anei te hoê papai mai teie? E riro anei te hoê papai huna ei niu no te tiaturi e ua faauruahia te Bibilia e te Atua?

E manaˈo apî anei?

E ere i te mea apî te manaˈo o te hoê papai huna i roto i te Bibilia. E tiaturiraa tumu te reira i roto i te Kabbale, aore ra te peu miterio ati Iuda. Ia au i te feia haapii Kabbaliste, e ere te auraa tumu o te papai Bibilia i to ˈna auraa mau. Te tiaturi ra ratou e ua faaohipa te Atua i te mau leta taitahi o te papai Bibilia Hebera ei taipe, o te faaite, ia taa-maitai-hia, i te hoê parau mau rahi aˈe. I to ratou hiˈoraa, ua tuuhia te leta taitahi e to ˈna tiaraa i roto i te papai Bibilia e te Atua ma te manaˈo i te hoê opuaraa taa ê.

Ia au i te hoê taata maimi i te papai o te Bibilia o Jeffrey Satinover, te tiaturi ra teie mau ati Iuda faaroo miterio e ua faaohipahia te mau leta Hebera no te papai i te aamu no te poieteraa i roto i te Genese no te faatupu i te puai taa ê faahiahia. Te papai ra oia e: “Ma te haapoto noa, e ere te Genese i te hoê noa faataaraa; e mauhaa te reira o te ohipa mau o te poieteraa iho, te hoê opuaraa i roto i te feruriraa o te Atua tei itehia i roto i te huru i te pae tino.”

Ua papai te hoê rabi Kabbaliste o te senekele 13 o Bachya ben Asher no Saragosse, i Paniora no te tahi haamaramaramaraa huna tei faaitehia ia ˈna na roto i te taioraa i te 42raa o te mau leta atoa i roto i te hoê tuhaa o te Genese. Ua riro teie ravea e iriti i te mau leta ia au i te hoê anairaa taa ê ma te tamata e ia itehia mai te mau poroi huna, ei niu no te tiaturiraa i te papai o te Bibilia o teie tau.

 Te “faaite” ra te mau roro uira i te papai

Hou te tau o te roro uira, ua taotiahia te aravihi o te taata no te hiˈopoa i te Bibilia na roto i te reira ravea. I te avaˈe Atete 1994 râ, ua nenei te vea Statistical Science i te hoê tumu parau i reira to Eliyahu Rips no te Fare haapiiraa tuatoru Hebera i Ierusalema e to ˈna mau hoa maimi faahitiraa i te tahi mau parau maere. Te faataa ra ratou e na roto i te tatararaa i te mau area i ropu i te mau leta e te faaohiparaa i te hoê anairaa o te mau area hoê noa faito i ropu i te mau leta i roto i te papai Hebera a te Genese, ua ite ratou i te mau iˈoa o na 34 rabi tuiroo i tapaohia i roto i te papai, e te tahi atu mau haamaramaramaraa, mai to ratou mahana fanauraa aore ra poheraa, i pihai iho i to ratou iˈoa. * I muri aˈe i te tamata-tamau-raa, ua nenei te feia maimi i ta ratou faaotiraa e ia au i te mau numera aita te mau haamaramaramaraa i tapaohia i roto i te Genese i manuïa—te haapapuraa e ua hunahia te mau haamaramaramaraa faauruahia ma te opua i roto i te papai i roto i te Genese e mau tausani matahiti i teie nei.

Patuhia i nia i teie ravea, ua rave te papai vea o Drosnin i ta ˈna iho mau tamatamataraa, ma te maimi i te mau haamaramaramaraa huna i roto i na buka matamua e pae o te Bibilia. Ia au ia Drosnin, ua ite oia i te iˈoa o Yitzhak Rabin i tapaohia i roto i te Bibilia na roto i te hoê faanahoraa o na 4 772 leta atoa. Maoti te mau irava Bibilia i faanahohia i roto i te mau reni o na 4 772 leta atoa i ite ai oia e ua tuati te iˈoa o Rabin (ia taiohia mai nia i raro) e te hoê reni (Deuteronomi 4:42, ia faataravahia i te taio) ta Drosnin i huri “e haapohehia te taparahi taata.”

Tera râ, te faahiti ra te Deuteronomi 4:42 no te hoê taparahi taata o te haapohehia ma te opua ore. No reira, ua faahapa e rave rahi i te raveraa tano ore a Drosnin, ma te parau e e nehenehe e faaohipahia te mau ravea e ere i te ite aivanaa no te ite i te hoê â mau poroi i roto i te tahi irava. Ua tapea noa oia ia ˈna, ma te horoa i teie tautooraa: “Ia ite to ˈu mau taata faahapa i te hoê poroi no nia i te taparahi-pohe-raahia o te hoê Faatere hau nui matamua tei tapaohia i roto i [te buka] Moby Dick, e tiaturi ïa vau ia ratou.”

E haapapuraa anei e mea faauruahia?

Ua farii te orometua haapii o Brendan McKay, no te Tuhaa o te Ihi roro uira i te Fare haapiiraa tuatoru no Auteralia i te tautooraa a Drosnin e ua rave ma te uˈana i te mau maimiraa roro uira i roto i te papai Beretane o Moby Dick. * Ma te faaohipa hoê â ravea i faataahia e Drosnin, te faaite ra o McKay e ua itehia te “mau tohu” o te taparahi-pohe-raahia o Indira Gandhi, Martin Luther King, John F. Kennedy, Abraham Lincoln, e vetahi atu. Ia au ia McKay, ua itea mai ia ˈna e ua “tohu” atoa Moby Dick i te haapoheraahia o Yitzhak Rabin.

Ma te hoˈi faahou i te mau papai Hebera o te Genese, ua patoi atoa te orometua haapii o McKay e to ˈna mau hoa i te mau faahopearaa o te tamatamataraa a Rips e a to ˈna mau hoa. Te faahaparaa oia hoi aita te mau faahopearaa i tuati e te hoê poroi tabulahia i faauruahia e te ravea e te raveraa a te feia maimi—ua ravehia te tamataraa o te rahiraa o te mau haamaramaramaraa ma te parau faatia a te feia maimi. Te tamau noa ra te tuatapaparaa a te feia ite i nia i taua tumu parau ra.

Teie te tahi atu ohipa i farereihia i te faatiaraahia e ua hunahia te mau poroi i tapaohia ma te opua i roto i te mau papai Hebera “tumu” aore ra “matamua.” Te na ô ra o Rips e to ˈna mau hoa maimi e ua rave ratou i ta ratou maimiraa ma te “niu, pinepine e fariihia te papai o te Genese.” Te papai ra Drosnin e: “Te mau Bibilia atoa na roto i te reo Hebera tumu e vai ra i teie nei, hoê â te tahi leta i te tahi leta.” Mai te reira anei râ? Maoti te hoê irava “tumu,” e rave rau mau neneiraa o te Bibilia Hebera e faaohipahia ra i teie mahana, i niuhia i nia i te mau otaro tahito taa ê. I te mea e aita te poroi o te Bibilia e taa ê ra, e ere hoê â leta to te mau otaro taitahi.

I teie mahana, ua niuhia te mau huriraa e rave rahi i nia i te Codex de Saint-Pétersbourg—te otaro Hebera Massorétique taatoa tahito roa ˈˈe—i papaihia i te area matahiti 1000 T.T. Teie râ, ua faaohipa o Rips e o Drosnin i te tahi papai ê, tei piihia te Koren. Te faataa ra o Shlomo Sternberg, te hoê rabi Orthodoxe e taata tuatapapa i te parau  o te numera i te Fare haapiiraa tuatoru no Harvard, e “mea taa ê [te Codex de Saint-Pétersbourg] i te Koren ta Drosnin i faaohipa maoti na 41 leta i roto i te Deuteronomi anaˈe.” Ua papaihia te mau Otaro o te miti Pohe oia atoa te mau tuhaa o te Bibilia hau atu i te 2 000 matahiti i teie nei. E pinepine te leta i roto i taua mau otaro ra i te taa ê roa i te mau papai i muri aˈe i te mau papai Massorétique. I roto i te tahi mau otaro, ua faaô-roa-hia vetahi mau leta no te faaite i te mau taˈi leta vauera, i te mea hoi e aitâ i haamauhia te mau periota vauera. I roto i te tahi atu mau otaro, ua faaohipahia tau leta. Te faaite ra te hoê faaauraa i rotopu i te taatoaraa o te mau papai Bibilia e vai nei e aita te auraa o te papai Bibilia i taui noa ˈˈe. Teie râ, te faaite papu atoa ra te reira e e taui te leta e te mau numera o te mau leta i te tahi papai i te tahi papai.

Ua taaihia te maimiraa no te hoê papai huna e manaˈo-noa-hia i te hoê papai tei ore roa e taui. E faahuru ê roa te hoê leta i tauihia i te anairaa—e te poroi mai te peu e te vai ra. Ua faaherehere te Atua i ta ˈna poroi na roto i te arai o te Bibilia. Aita râ oia i faaherehere ia vai noa te leta taitahi, mai te mea ra e ua tapitapi roa oia i te mau ohipa faufaa ore mai te tauiraa o te leta i te roaraa o te mau senekele. Aita anei te reira e faaite ra e aita oia i tahuna i te hoê poroi huna i roto i te Bibilia?—Isaia 40:8; Petero 1, 1:24, 25.

E hinaaro anei tatou i te hoê papai huna Bibilia?

Ua papai te aposetolo Paulo ma te maramarama roa e “te mau Papai atoa, e mea faaurua ïa e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra.” (Timoteo 2, 3:16, 17, MN) E ere i te mea fifi roa ia taa aore ra ia faaohipa i te poroi maramarama e te tano o te Bibilia, e rave rahi râ tei maiti i te tâuˈa ore i te reira. (Deuteronomi 30:11-14) Te horoa ra te mau parau tohu o tei faaite-tahaa-hia i roto i te Bibilia i te hoê niu papu no te tiaturi e mea faauruahia oia. * Taa ê atu i te hoê papai huna, e ere te mau parau tohu o te Bibilia i te mea manaˈohia, e “e ere” te reira “i te mea imihia e te taata nei.”—Petero 2, 1:19-21.

Ua papai te aposetolo Paulo e “e ere hoi ta matou i te fabula i faatupuhia e te paari ra, a faaite atu ai matou ia outou i te mana e te haerea mai o to tatou Fatu ra o Iesu Mesia.” (Petero 2, 1:16) No roto mai te tiaturiraa o te hoê papai Bibilia i te miterio ati Iuda, o te faaohipa i te mau ravea “i faatupuhia e te paari ra” o te haapoiri e te faahuru ê i te auraa ohie o te Bibilia i faauruahia. Te faautua mau ra te mau Papai Hebera iho i te hoê tuatapaparaa miterio mai teie.—Deuteronomi 13:1-5; 18:9-13.

Auê i te oaoa e te fanaˈo ra tatou i te poroi maramarama e te mau faaueraa o te Bibilia o te nehenehe e tauturu ia tatou ia ite i te Atua! Mea hau aˈe te reira i te tamata i te haapii no nia i to tatou Poiete maoti i te imiraa i te mau poroi huna no roto mai i te tatararaa a te taata e te manaˈo tauturuhia e te roro uira.—Mataio 7:24, 25.

[Nota i raro i te api]