Te faaite ra anei outou ia outou iho ia vetahi ê?

‘Eita vau e haapao eaha to te taata manaˈo!’ I roto i te hoê taime riri aore ra inoino, peneiaˈe e faahiti outou i teie mau parau mǎtaˈu ore. Teie râ, a topa rii mai ai te haapaariraa, ua haapeapea paha outou. No te aha? No te mea te haapao mau ra te rahiraa o tatou to vetahi ê manaˈo ia tatou.

OIA mau, e tia ia tatou ia haapao i te manaˈo hohonu o vetahi ê. Ei Kerisetiano e ei tavini faatoroahia na te Atua ra o Iehova, e tia iho â ia tatou ia anaanatae ma te au i to vetahi ê manaˈo ia tatou. “Ei hiˈoraa” hoi tatou “na to te ao.” (Korinetia 1, 4:9) I roto i te Korinetia 2, 6:3, 4 [MN], te ite ra tatou i te aˈoraa papu a te aposetolo Paulo: “Aore roa i tuu i te turoriraa i te taata atoa, ia ore ia faainohia [ta tatou taviniraa]: te faaite hua nei râ matou ia matou iho e e rave ohipa na te Atua i te mau mea atoa nei.”

Eaha ra te auraa e faaite tatou ia tatou iho ia vetahi ê? Te auraa anei e faateitei tatou ia tatou iho aore ra e huti tatou i te ara-maite-raa rahi i nia ia tatou iho e to tatou mau aravihi? Eita. E titau râ te reira i te faaohiparaa i te mau parau o te Petero 1, 2:12 [MN]: “Ia maitai [to] outou [haerea] i rotopu i te mau Etene . . . ia hiˈo râ ratou i ta outou [ohipa] maitai, ia haamaitai ratou i te Atua.” E faaite te mau Kerisetiano ia ratou iho na roto i te vaiihoraa i to ratou haerea ia paraparau no ratou iho! I te pae hopea, e arue te reira, eiaha ia tatou, i te Atua râ. Noa ˈtu râ, e nehenehe atoa to tatou faaiteraa ia tatou iho ia vetahi ê e haamaitai ia tatou iho. E hiˈopoa anaˈe e toru tuhaa e nehenehe ai te reira e tano no outou.

Ei hoa faaipoipo no a muri aˈe

Ei hiˈoraa, e rave anaˈe i te parau o te faaipoiporaa. E ô te reira no ǒ mai i te Atua ra o Iehova,  “no ˈna hoi te iˈoa i mairihia i te fetii atoa, to te raˈi, e to te ao atoa nei.” (Ephesia 3:15) Peneiaˈe, e hinaaro outou e faaipoipo i te hoê mahana. Mai te peu e tera iho â, i nia i teihea faito e faaite ai outou ia outou iho ei hoa faaipoipo no a muri aˈe? Oia, eaha to outou iho roo ei tane aore ra ei vahine Kerisetiano taa noa?

I roto i te tahi mau fenua, ei haapeapearaa rahi te reira no te mau utuafare. Ei hiˈoraa, i Ghana, ia opua e piti taata e faaipoipo, e peu matauhia no na hoa e faaipoipo ia faaara i to raua mau metua. I to ratou aˈe pae, e faaara teie mau metua i te tahi atu mau melo utuafare. I muri iho, e haamata te utuafare o te tane i te titorotoro no nia i te roo o te vahine i to ˈna vahi faaearaa. Ia papu i na metua e e tano teie vahine, e faaara raua i te utuafare o te vahine i te opuaraa a ta raua tamaiti e faaipoipo i te tamahine. I teie nei, e hiˈopoa te utuafare o te vahine i te roo o te tane hou a faatia ˈi i te faaipoiporaa. No reira, te na ô ra te hoê parau paari no Ghana e, “A aniani i te feia o tei ite hou outou e faaipoipo ai.”

Eaha ïa no te mau fenua Tooa o te râ ma, i reira te taata e faatia-pinepine-hia ˈi ia maiti i to ratou iho hoa faaipoipo? I reira atoa, e haerea paari ia imi te hoê tane aore ra vahine Kerisetiano feruriraa paari i te hoê faaiteraa haavare ore no ǒ mai i te feia o tei matau maitai i te hoê hoa faaipoipo no a muri aˈe, mai te mau metua aore ra mau hoa paari. Ia au i te buka ra Te ravea e itehia ˈi te oaoa i te utuafare, e nehenehe te hoê vahine apî e uiui e: “‘Eaha te roo o teie taata? O vai ma to ˈna mau hoa? E faaite anei oia i te hitahita ore? Eaha to ˈna huru i nia i te feia ruhiruhia? Mai te aha te huru o to ˈna utuafare metua? Eaha to ˈna auraa e o ratou? Eaha to ˈna huru no nia i te moni? E taata taero ava anei oia? E huru ê ohie anei o ˈna, e te haavî uˈana atoa? Eaha ta ˈna mau hopoia i roto i te amuiraa, e nafea o ˈna i te amoraa i te reira? E nehenehe anei au e faatura hohonu ia ˈna?’—Levitiko 19:32; Maseli 22:29; 31:23; Ephesia 5:3-5, 33; Timoteo 1, 5:8; 6:10; Tito 2:6, 7.” *

Oia atoa, e hinaaro te hoê tane e aniani no nia i te hoê vahine Kerisetiano ta ˈna e manaˈo ra e faaipoipo. Ia au i te Bibilia, ua anaanatae o Boaza ia Ruta, te vahine ta ˈna i faaipoipo i muri aˈe. I to Ruta uiraa ˈtu e: “Eaha vau nei i arohahia mai ai e oe, i ite mai ai oe ia ˈu, e vahine ê hoi au nei?” Ua na ô Boaza e: “Ua faaite-hua-hia mai au i to oe hamani maitai.” (Ruta 2:10-12) Oia, aita noa o Boaza iho i ite e e vahine taiva ore o Ruta, te pûpûhia, e te itoito, ua faaite atoa ra vetahi ê i te mau parau maitai no ˈna.

Oia atoa, e taairaa to to outou haerea i nia i te hiˈoraa o vetahi ê ia outou ei hoa faaipoipo e tano. Nafea mau â outou e faaite ai ia outou iho ia vetahi ê i roto i taua tuhaa ra?

Ei taata rave ohipa

Te raveraa ohipa, te tahi atu ïa vahi e nehenehe ai te tapea-maite-raa i te haerea maitai e ohipa no to outou maitai. Mea uˈana te tataˈuraa i te pae o te ohipa. E tihati-pinepine-hia te feia rave ohipa o tei matauhia no to ratou auraro-ore-raa, to ratou tae-tamau-raa i muri aˈe i te  hora, e te eiâ. E nehenehe atoa te mau taiete e vaiiho i te feia rave ohipa aravihi no te faaiti mai i te mau haamâuˈaraa. Ia imi te feia i erehia i te ohipa i te mau ohipa apî, e ite paha ratou e titorotoro te mau taiete i to ratou mau paoti ohipa na mua ˈtu no nia i ta ratou ohipa matauhia, to ratou haerea, e aravihi. Ua faaite e rave rahi Kerisetiano ia ratou iho ma te manuïa i te mau paoti ohipa maoti to ratou haerea tura, faaahuraa e au, huru au maitai, e to ratou mau huru maitatai Kerisetiano faahiahia.

Te hoê huru maitai, o te haerea tia ïa—te hoê ta te mau paoti ohipa e rave rahi e haafaufaa rahi ra. Mai te aposetolo Paulo, te hinaaro ra tatou e ‘[faaite i te haerea tia] i te mau mea atoa nei.’ (Hebera 13:18; MN) I roto i te hoê taiete heruraa i Ghana, ua faaitehia te hoê eiâraa. Ua tapea mai te raatira o te fare titiaraa, e Ite hoi, i ta ˈna ohipa area vetahi ê ra, ua tihatihia ïa. No te aha? Ua ite te mau paoti ohipa i to ˈna haerea tia ehia rahiraa matahiti. Ua ite-maitai-atoa-hia ta ˈna ohipa itoito e to ˈna faatura i te feia mana. Oia, ua paruru to ˈna haerea tia i ta ˈna ohipa!

Eaha te tahi atu mau ohipa ta te hoê Kerisetiano e nehenehe e rave no te faaite ia ˈna iho i roto i te matete o te ohipa? A haapii i te faaaravihi ia outou i te mau ohipa atoa e horoahia mai na outou. (Maseli 22:29) A rave i te ohipa ma te itoito e ma te haapao maitai. (Maseli 10:4; 13:4) A faatura i ta outou paoti ohipa e e raatira ohipa. (Ephesia 6:5) Te taeraa mai i te hora, te haerea tia, te aravihi, e te ohipa ma te itoito, e mau huru maitatai ïa ta te mau paoti ohipa e haafaufaa, e e nehenehe taua mau huru maitatai ra e tauturu ia outou ia itea mai te hoê ohipa ia varavara te ohipa.

Mau hopoia taa ê a te amuiraa

I teie nei hau atu i mutaa ihora, e titauhia te mau tane paari ia aratai i te amuiraa Kerisetiano. Eaha te tumu? Ua tohu o Isaia e: “A faatea na i to tiaraa tiahapa; e hopoi i te paruru o to parahiraa i te atea ê.” (Isaia 54:2) Ia au i teie parau tohu, te maraa noâ ra te amuiraa a Iehova na te ao nei.

No reira, mai te peu e e tane Kerisetiano outou, nafea outou e faaite ai ia outou iho ei taata aravihi no te amo i te hoê hopoia i faataahia? A rave na i te hiˈoraa o te taata apî ra o Timoteo. Te faatia ra Luka e “e taata roo maitai” o Timoteo “i te mau taeae i Lusetera e Ikonio.” Oia, maoti to ˈna haerea maitai, ua faaite teie taata apî ia ˈna iho ia vetahi ê i roto e piti oire taa ê. No reira, ua titau manihini Paulo ia Timoteo ia apiti ia ˈna i roto i te taviniraa ratere.—Ohipa 16:1-4.

Nafea te hoê tane i teie mahana e nehenehe ai ‘e hinaaro uˈana i te toroa [tiaau]’ ma te hoê ravea e au i te Atua? Papu maitai e e ere na roto i te titauraa i te hoê nominoraa, na roto râ i te faahoturaa i te mau huru maitatai i te pae varua e titauhia no teie mau hopoia. (Timoteo 1, 3:1-10; MN, 12, 13; Tito 1:5-9) E nehenehe atoa oia e faaite e ‘te hinaaro ra oia i te ohipa maitai’ ma te apiti roa ˈtu â i roto i te ohipa pororaa e te faariroraa i te taata ei pǐpǐ. (Mataio 24:14; 28:19, 20) E anaanatae mau te feia e faaite ra ia ratou iho ei tane Kerisetiano haapao maitai i te maitairaa o to ratou mau taeae i te pae varua. E pee ratou i te manaˈo paari a te aposetolo Paulo: “E horoa ˈtu i te taoˈa i te feia moˈa i to ratou ati; e titau â i te hamani maitai i te taata ěê ra.” (Roma 12:13) I te raveraa i teie mau mea, e nehenehe mau â te hoê tane Kerisetiano e ‘faaite ia ˈna iho e rave ohipa oia na te Atua.’

I te mau taime atoa

Te auraa o te faaiteraa ia tatou iho ia vetahi ê, e ere ïa te faahuaraa aore ra te riroraa ei “faarearea taata.” (Ephesia 6:6) I te tanoraa mau, o te faaiteraa ïa ia tatou iho i to tatou Atua Poiete ra o Iehova, ma te pee maite i ta ˈna mau ture e mau faaueraa tumu. Ia haamaitai outou i to outou huru pae varua e ia haapaari i to outou taairaa e te Atua ra o Iehova, e tapao ïa vetahi ê i te hoê maitairaa mai o to outou huru i nia i to outou mau melo utuafare, hoa ohipa, e hoa Kerisetiano. E ite atoa ratou i to outou vai-papu-raa e to outou vai faito, to outou feruriraa maitai, to outou aravihi i te amo i te hopoia, e to outou haehaa. E here e e faatura ratou ia outou e, te mea faufaa roa, e fanaˈo outou i te farii maitai a te Atua ra o Iehova, no te mea e faaite outou ia outou iho ia vetahi ê!

[Nota i raro i te api]

[Hohoˈa i te api 19]

E aniani e rave rahi metua ma te paari no nia i te roo o te taata ta ta ratou tamaroa aore ra tamahine e anaanatae ra i te faaipoipo

[Hohoˈa i te api 20]

E faaite te hoê taeae ia ˈna iho no te mau hopoia o te taviniraa ma te manaˈo ia vetahi ê