Te haamanaˈo ra anei outou?

Ua au anei outou i te taioraa i te mau numera hopea o Te Pare Tiairaa? A hiˈo mai te peu e e nehenehe ta outou e pahono i te mau uiraa i muri nei:

• Na te aha i faaohie e ia fariihia te Noela i Korea?

Te vai ra te hoê tiaturiraa tahito i Korea e i te tahi atu mau fenua no nia i te hoê atua e haapao ra i te fare utuuturaa maa o te haere mai na roto i te umu e o te horoa i te mau taoˈa i te avaˈe Titema. Oia atoa i muri aˈe i te Piti o te Tamaˈi Rahi, ua opere te mau faehau Marite i te mau ô e ua horoa i te tauturu i te mau fare pure o te fenua iho.—15/12, api 4, 5.

• I roto i te tupuraa o te Isaia 21:8, eaha te “tiai” ta te Atua i haamau i to tatou tau?

Te faaara ra te mau Kerisetiano i faatavaihia i te varua, o te tavini ra ei pǔpǔ tiai, i te taata no nia i te auraa o te mau ohipa o te ao nei o te faatupu ra i te parau tohu o te Bibilia. Te tauturu atoa ra ratou i te feia haapii Bibilia ia taa e ia ape i te mau haapiiraa e mau peu aita hoi i roto i te Bibilia.—1/1, api 8, 9.

• O vai ma te “Autaeaeraa Polonia”?

E pǔpǔ iti faaroo ratou i te 16raa e te 17raa o te senekele i Polonia o tei faaitoito i te ati maite i te Bibilia e no reira ua patoi ratou i te mau haapiiraa tumu a te ekalesia, mai te Toru Tahi, te bapetizoraa i te tamarii e te po auahi. I muri iho, ua hamani-ino-roa-hia ratou e ua faahepohia ia horo i te tahi atu mau fenua.—1/1, api 21-23.

• No te aha e tiaturihia ˈi te mau parau tohu o te Bibilia eiaha ra i te mau tohu a te feia tuatapapa i te tau a muri aˈe aore ra te feia hiˈohiˈo?

Ua riro te feia atoa e faahua peropheta ei feia eita roa ˈtu e nehenehe e tiaturihia no te mea aita ratou i ite i te Atua e te Bibilia. O te mau parau tohu o te Bibilia anaˈe te nehenehe e tauturu ia outou ia ite nafea te mau ohipa e tuati ai e te opuaraa a te Atua, nafea e faufaahia ˈi outou iho e to outou utuafare e a muri noa ˈtu.—15/1, api 3.

• Eaha te tahi mau haapapuraa faufaa e te ora nei tatou i te anotau hopea?

E nehenehe tatou e ite i te mau faahopearaa o te tiavaruraa o Satani mai te raˈi mai. (Apokalupo 12:9) Te ora nei tatou i te tau o te hopea o te “arii, MN” i faahitihia i roto i te Apokalupo 17:9-11. Te iti noa maira te numera o te mau Kerisetiano faatavaihia teie râ, e au ra e tei nia noa te tahi o ratou i te fenua ia tupu te ati rahi.—15/1, api 12, 13.

• Anafea te papairaahia te buka a Habakuka, e no te aha e tia ˈi ia tatou ia anaanatae i te reira?

Ua papaihia teie buka Bibilia a Habakuka i te area matahiti 628 H.T.T. Te vai ra i roto te mau haavaraa a Iehova ia Iuda i tahito ra e ia Babulonia. Te faahiti atoa ra te reira e te fatata ra te mau haavaraa a te Atua i te tupu mai i nia i te faanahoraa o te mau mea ino.—1/2, api 8.

• I roto i te Bibilia ihea tatou e nehenehe ai e ite i te mau aˈoraa paari a te hoê metua vahine no te mau vahine maitai?

Ua riro te pene hopea o te buka o te Maseli, pene 31, ei pu maitai roa o teie mau aˈoraa.—1/2, api 30, 31.

• No te aha tatou e nehenehe ai e mauruuru e ua faaite mai Iehova i “te manaˈo o te Mesia” ia tatou? (Korinetia 1, 2:16, MN)

Maoti te mau Evanelia, ua nehenehe Iehova e haapii ia tatou i te mau manaˈo, mau manaˈo hohonu, mau ohipa e mau mea matamua a Iesu i rave. E tauturu te reira ia riro roa mai tatou mai ia Iesu, ia tuu iho â râ tatou i te faufaaraa i nia i te ohipa pororaa faaoraraa.—15/2, api 25.

• E pahono mau â anei te Atua i te mau pure i teie mahana?

E. Noa ˈtu e te faaite ra te Bibilia e eita te Atua e pahono i te mau pure atoa, te faaite ra te mau hiˈoraa no teie tau e ua pahono pinepine oia i te taata o te pure no te tamahanahana e ua tauturu oia i roto i te mau tupuraa mai te faatitiaifaroraa i te mau fifi o te faaipoiporaa.—1/3, api 3-7.

• Eaha ta tatou e nehenehe e rave no te fanaˈo i te puai o te Atua?

E nehenehe tatou e ani i te reira na roto i te pure, maoti te Bibilia e fanaˈo ai tatou i te puai pae varua, e e puaihia tatou na roto i te auhoaraa Kerisetiano.—1/3, api 15, 16.

• Nafea te mau metua e nehenehe ai e tauturu i ta ratou mau tamarii ia haafaufaa atu â i te mau putuputuraa Kerisetiano?

E nehenehe ratou e tauturu i ta ratou mau tamarii ia vai ara, peneiaˈe e tia ia ratou ia taoto rii na mua ˈˈe. E nehenehe e faaitoitohia i te mau tamarii ia rave i te mau “tapaopaoraa,” na roto i te papairaa i nia i te hoê api parau i te mau taime atoa i te mau taˈo aore ra mau iˈoa matauhia e faaohipahia ra.—15/3, api 17, 18.

• Eaha te tahi mau mea ta tatou e nehenehe e haapii no nia i te hiˈoraa o Ioba?

Ua tuu Ioba i to ˈna taairaa e te Atua i mua, ua faatupu i te mau taairaa e au e te mau taata-tupu, ua tutava ia ore e taiva i to ˈna hoa faaipoipo, ua faaite i to ˈna tapitapi no te huru pae varua o to ˈna utuafare, e ua faaoromai ma te taiva ore i te tamataraa.—15/3, api 25-27.

• Te vai ra anei i roto i te Bibilia te hoê papai huna o te faaitehia i roto i te mau poroi tapaohia?

Aita. Te mau parau no nia i te hoê papai huna e manaˈo-noa-hia, e nehenehe atoa e ravehia i nia i te tahi mau buka tahito. Ua tatara-noa-hia te mau papai e manaˈo-noa-hia maoti te mau tauiuiraa i roto i te mau vauera i roto i te mau otaro Hebera.—1/4, api 30, 31.