Te ravaairaa i te taata i te miti Égée

MA TE fenua rahi o Heleni i te pae apatoerau e te pae tooa o te râ, te motu o Kereta i te pae apatoa, e te fenua Turekia i te pae hitia o te râ, e poˈi roa te hoê tuhaa rahi o te pae hitia o te râ o te miti Mediteranea i te miti Égée. Ua purara noa te mau motu e te mau motu iti na te miti Égée, no reira mai hoi te tahi mau nunaa rahi matamua. No te hohoˈa taratara o te mau motu, e te tahi noa mau fare nainai uouo i nia iho o te anaana i nia i te mahana, ua faaau te hoê rohipehe i taua mau motu ra i “te mau puaahorofenua ofai ma te mau huruhuru taratara.”

E ere i te mea maere ia riro teie mau motu ei hoê o te mau vahi mataitai-roa ˈˈe-hia e te mau ratere i te ao nei! E rahi atu â to ratou nehenehe na roto i te mau huru maitatai roa o te mau tane e mau vahine e noho ra e e ohipa ra i reira. No te feruriraa au noa e te farii maitai o teie mau taata o te turui noa i nia ia ratou, i riro taa ê atoa ˈi teie tuhaa fenua ei mea otahi.

E ora noa te feia e rave rahi o te mau motu i te ravaairaa i roto i te miti Égée. Tera râ, mea rahi te mau faahopearaa ta te tahi atu huru “ravaairaa” faufaa e faatupu ra i taua tuhaa fenua ra. Te haere ra te mau “ravaai taata,” e mau taata poro i te parau apî maitai o te Basileia o te Atua, na te mau motu o te miti Égée, e faariro i te taata ei pǐpǐ na te Mesia.—Mataio 4:18, 19; Luka 5:10.

Fatata 19 senekele aˈenei, ua haere te tahi mau taata poro evanelia Kerisetiano i te mau motu o te miti Égée. I te area matahiti 56 T.T., ua faaea te aposetolo Paulo, i roto i te toru o to ˈna tere hoˈiraa ei mitionare, i te mau motu o Lésvos, Hiu, Samo, Kono, e o Roda maa taime iti. Ei taata poro itoito noa, eita e ore e ua poro o Paulo i te tahi mau taata o te motu. (Ohipa 20:14, 15, 24; 21:1, 2) I muri aˈe i na matahiti e piti o to ˈna tapearaahia i Roma, ua fano paha oia i Kereta e ua rave i te ohipa Kerisetiano i reira. Fatata i te hopea o te senekele matamua, ua afaihia te aposetolo Ioane i te motu o Patamo, ‘no te parau a te Atua e te faaiteraa ia Iesu.’ (Apokalupo 1:9) Eaha te huru o te feia poro i te parau apî maitai no teie tau i taua mau motu ra?

E mau ohipa pororaa faahiahia mau

Mea fifi roa ia poro i teie mau motu. E titauhia te tutavaraa e te haapaeraa rahi. Mea atea roa te tahi mau motu. Aita e tere faanaho-maitai-hia na nia i te pahi aore ra te manureva i te tahi mau motu e aita roa ˈtu e tere i te tahi atu â mau motu, i te tau toetoe iho â râ. Mea mataare te miti ia farara mai te meltemia—te toerau puai e au i te tau. Hau atu â, mea moemoe te mau oire iti i nia e rave rahi motu e e ere i te mea ohie ia haere i reira no te fifi o te mau purumu repo puehu aita i faaîhia i te ofai. E nehenehe e fano i te tahi mau oire iti na nia noa i te mau poti nainai.

A rave na i te hiˈoraa o te motu o Icarie. Eita e noaa i na taata poro 11 i te parau apî maitai o te Basileia o te amuiraa iti ia poro i te mau oire iti atoa o taua motu ra e i te mau motu iti tapiri. No reira, ua haere atu te mau taeae e te mau tuahine Kerisetiano no Samo e tauturu i te pororaa i te feia no Icarie, tae noa ˈtu i te feia o te mau motu o Phournoi, o Patamo, e o Lipsos. Aita i maoro aˈenei, i roto i te hoê ohipa pororaa e piti mahana, ua  vaiiho te mau Ite e 650 vea, e 99 buka rairai, e e 25 buka no nia i te mau tumu parau Bibilia! Ua maere ratou i te farerei i te mau taata aita i ite o vai o Iehova, te mau taata i ani ia ratou ia faaea mai ia ite hau atu â ratou no nia i te Bibilia. Teie ta te hoê vahine i parau i te hoê Ite: “Te hoˈi ra outou. Mea rahi hoi ta ˈu uiraa no nia i te Bibilia. Na vai ïa e tauturu ia ˈu?” Ua tǎpǔ te tuahine Kerisetiano e atuatu i te anaanatae na roto i te niuniu paraparau, e ua haamata oia i te hoê haapiiraa Bibilia na roto i taua ravea ra.

I to te hoê tiaau ratere haereraa ˈtu i Icarie, ua faanaho oia e poro i te motu taatoa hoê hopea hebedoma noa. Ua ani oia i te tauturu a na feia poro i te Basileia fatata e 30 no Samo. E tia hoi i te mau taeae ratere ia aufau i te piha hotela e piti po e te mau pereoo tarahu e te mau quatre-quatre. E piti mahana te ûa-puai-noa-raa, e e ere i te mea maitai te mahana i faaite-atea-hia no te hopea hebedoma. Aita râ te mau taeae i tuu, ma te haamanaˈo i te Koheleta 11:4: “O tei hiˈo i te mataˈi ra, e ore oia e ueue i te huero, e o tei haapao i te ata ra, e ore oia e ooti.” I te pae hopea, ua maitai rii mai te mahana, e i te otiraa ia ratou i te poro i te motu taatoa i ta ratou poroi faufaa, ua hoˈi te mau taeae i ǒ ratou ma te oaoa e te mauruuru.

Ua tutava rahi na feia poro 16 o te motu o Andros i te poro i te motu taatoa. I te taeraa ˈtu e piti taeae i te hoê oire iti moemoe, ua faaoti raua e poro i te feia atoa e noho ra i reira. Ua paraparau raua i te mau taata i to ratou fare, i roto i te aroâ, e i roto i te faaapu. Ua haere atoa raua i te fare mutoi e ua vaiiho i te mau papai i reira. Ua manaˈo raua e ua farerei raua i te taata atoa o te oire iti, ua opua aˈera raua e hoˈi. Te faarue ra raua i te mahora rahi, ite aˈera raua i te perepitero Orthodoxe Heleni e haere maira. Ua taa aˈera ia raua e aita raua i poro ia ˈna, ua horoa ˈtura raua i te hoê api parau iti na ˈna, o ta ˈna i farii ma te oaoa. I teie nei, ua papu ia raua e aita hoê i moehia i roto i ta raua pororaa!

Ua manaˈohia e tei te pae apatoa roa o Gavdos (aore ra Kalauda)—te hoê motu iti i raro aˈe i te vahi omenemene o Kereta e e 38 noa taata i reira—o Europa. (Ohipa 27:16) Ua haere te hoê tiaau ratere e ta ˈna vahine, e te tahi atu nau taata faaipoipo, e poro i reira e toru mahana i te maoro. No te haaputu i te moni, ua taoto ratou i roto i te hoê fare ie. Ua faaitehia te parau apî maitai i te mau taata atoa e faaea ra i reira, e ua oaoa te mau taeae i te mea e aita to te taata e manaˈo oti noa. Aita ratou i faaroo i te parau—maitai aore ra ino—o te mau Ite no Iehova. Ua farii te feia no reira, tae noa ˈtu te perepitero, 19 buka e 13 buka rairai. A hoˈi ai te mau Ite i Kereta na nia i te hoê poti nainai, mea mataare te miti, mea atâta hoi no ratou. “Ua haamauruuru matou ia Iehova e ua tae oraora matou i te fare, ua faahanahana atoa râ matou ia ˈna no to ˈna faatiaraa ia faahanahana matou i to ˈna iˈoa i teie motu i te pae apatoa roa o Europa,” ta ratou ïa i parau.

Ua papai te aposetolo Ioane i te buka hopea o te Bibilia, te Apokalupo, i nia i te motu o Patamo. Aitâ i maoro roa aˈenei, aita e Ite no Iehova i Patamo. Ua faanaho-maitai-hia te hoê ohipa pororaa i nia i taua motu ra na te mau taeae no Samo. Ua ite ratou e e farerei ratou i te patoiraa uˈana no te mea o taua motu ra te pu o te Ekalesia Orthodoxe Heleni. Ua titau manihini te hoê vahine i na tuahine e piti e faaite ra ia ˈna i te parau apî maitai ia tomo i roto i to ˈna fare. Ua ui noa te tane a taua vahine ra na vai i tono mai i na tuahine i to raua fare. I to raua faataaraa e te poro ra raua na te mau fare atoa, ua ui faahou te tane e: “Ua papu anei ia orua e aita te feia tapiri i tono mai ia raua i ǒ nei?” I muri aˈe, ua faataa te vahine, o tei matau  i te mau Ite no Iehova a vai ai oia i Zaïre, i na tuahine i te ohipa i tupu i taua poipoi ra. Ua parau oia e: “Te pure ra vau ia Iehova, mai ta ˈu i na reira i te tahi atu mau mahana, ia tono mai oia i te tahi mau Ite i te motu. Ua faaooo ta ˈu tane ia ˈu. I to ˈu iteraa ˈtu ia orua i te uputa, ua maere au e ta ˈu tane atoa. No reira oia i ui noa ˈi na vai i tono mai ia orua i to mâua fare.” Ua haamata-oioi-hia ˈtura te hoê haapiiraa Bibilia e te vahine ra. Ua faaterehia te haapiiraa na roto i te niuniu paraparau hoê ahuru avaˈe i te maoro, noa ˈtu e mea moni roa no te tuahine e no te vahine i anaanatae. Ua bapetizohia ˈtura oia e o o ˈna anaˈe te Ite i teie nei i taua motu ra i reira to te aposetolo Ioane vairaa o ˈna anaˈe a 1 900 matahiti aˈenei.

Te “ravaairaa” i te mau tapaeraa pahi

E tapea te mau pahi uta ratere i te mau uahu e rave rahi o te mau motu no Égée i te mau tau veavea atoa, mea rahi hoi te mau ratere. No reira, hoê anaˈe taime e farerei ai te mau Ite no Iehova i te taata no te mau nunaa e te mau reo rau. Ua haaputu te mau amuiraa i te mau papai Bibilia na roto e rave rau reo, e ua vaiiho te feia poro e mau tausani vea na te mau ratere. E tapae mai te tahi mau pahi uta ratere i taua noâ mau uahu ra i te mau hebedoma atoa, e mau taime maitai roa ïa teie no te mau taeae e farerei faahou i te taata e e faatere atoa i te mau haapiiraa Bibilia e vetahi mau horopatete.

I te tau veavea o te matahiti 1996, ua poro te hoê tuahine e tavini ra ma te taime taatoa i Roda i te hoê tane apî no Jamaïque e haa ra i nia i te hoê pahi uta taata e tapae mai i te uahu i te mau Mahana pae atoa. I te Mahana pae i muri iho, ua titau-manihini-hia te taata ra i te hoê tairururaa mataeinaa e tupu i nia i te motu. Ma te Bibilia Beretane i roto i te rima, ua tauturu atu te tuahine pionie ia taa i te taata apî te tahi mau parau mau Bibilia e vauvauhia ra i te tairururaa. Ua maere roa te taata apî ra i te here e te mahanahana o te mau Ite i te tairururaa. I te Mahana pae i muri aˈe, ua titau manihini oia e piti taeae pionie i nia i te pahi. Ua rave nau pionie i te tahi mau papai na roto i te mau reo Beretane e Paniora. Aita e papai faahou i roto i ta raua pute pororaa iti aˈe i te hoê hora! Ua haapii te taata apî no Jamaïque i te Bibilia i te mau Mahana pae atoa e tae atu i te hopea o te tau veavea. I te tau veavea i muri iho, ua hoˈi mai oia ma te ineine i te haapii faahou. I taua râ taime ra,  ua faaoti oia e taui i ta ˈna ohipa ia nehenehe oia e haere i mua i te pae varua. I muri aˈe, ua reva faahou oia. Ua oaoa te mau taeae i Roda i to ratou faarooraa e ua bapetizohia te taata apî ra i te omuaraa o te matahiti 1998!

Te noaaraa te “iˈa” o te taui noa i te vahi

Mea matauhia te miti Égée no ta ˈna mau iˈa o te taui noa i te vahi, mai te sardine e te haurâ, o te tere haere na roto i te miti e tae atu ai i roto i te mau upeˈa a te mau taata ite i te ravaai. Oia atoa te feia poro evanelia i te Basileia, te farerei nei ratou e rave rahi rave ohipa aau farii maitai no te mau fenua e rave rahi i Europa Hitia o te râ o tei haere atu i Heleni.

Hoê ahuru matahiti to Rezi i to ˈna taio-matamua-raa no nia ia Iehova e ta ˈna mau opuaraa i roto i Te Pare Tiairaa e te A ara mai na! Tei Albanie ïa oia. E toru matahiti i muri aˈe, ua haere oia e to ˈna utuafare e faaea i te motu o Roda. I te hoê mahana, ua pure o Rezi ia Iehova no te tauturu ia ˈna ia ite oia i to ˈna nunaa i to ˈna nohoraa apî. I te mahana i muri iho, ua hoˈi mai to ˈna metua tane i te fare e te mau vea matauhia o Te Pare Tiairaa e A ara mai na!, ua oaoa roa o Rezi. Ua farerei atura o Rezi i te tuahine i horoa i te mau vea na to ˈna metua tane, e aita i maoro, ua haamata oia i te haapii i nia i te buka ra Te ite e aratai i te ora mure ore. I te tahi taime, e ani oia e haapii e toru taime i te hoê noa mahana! I muri aˈe e piti avaˈe, ua riro mai oia ei tamahine poro bapetizo-ore-hia, e i te avaˈe Mati 1998, ua bapetizohia oia i te 14raa o to ˈna matahiti. I taua noâ mahana ra, ua haamata oia i te taviniraa pionie tauturu, e e ono avaˈe i muri aˈe, ua rave oia i te taviniraa pionie tamau, aore ra taviniraa ma te taime taatoa.

Te haapii ra te hoê taeae no te motu o Kono e te tahi mau taata no Rusia. I to ˈna aniraa ia ratou e e hoa anei to ratou o te hinaaro e haapii i te Bibilia, ua aratai ratou ia ˈna i te tahi nau taata faaipoipo no Arménie—o Leonidas e ta ˈna vahine, o Ophelia—i te hoê oire iti fatata e 30 kilometera i te atea. E ohipa maere te tiai maira i te mau taeae. Ua tatara mai nau taata faaipoipo no Arménie i te hoê pute î i te mau papai Bibilia na roto i te mau reo Arménie e Rusia, tei neneihia e te Taiete Watch Tower! Ua faataa ˈtura raua e ua haapii na raua i te Bibilia e te mau Ite no Iehova e ua riro mai raua ei feia poro bapetizo-ore-hia. No te faahuehueraa politita e te mau fifi i te pae faanavairaa faufaa, ua tia ia raua ia faarue i to raua fenua. I to raua iho â taeraa ˈtu i Kono, ua haamata raua i te haapii e te metua vahine e te tuahine o Leonidas, to reira aˈena raua. Aita i maoro, ua faatere te Ite e toru haapiiraa Bibilia apî—hoê e o Ophelia, hoê e o Leonidas, e hoê e te metua vahine e te tuahine o Leonidas. E tere ïa oia na nia i te moto e 60 kilometera haere e hoˈi mai e toru taime i te hebedoma. Ua bapetizohia o Leonidas e ta ˈna vahine tau avaˈe i muri aˈe. Auê ïa haamaitairaa no te feruriraa haapae o te mau taeae no reira!

Te faatupu ra Iehova

Te ite-maitai-hia ra te haamaitairaa a Iehova i nia i te mau tutavaraa rohirohi ore a na feia poro itoito i te Basileia e hau atu i te 2 000 i teie mau motu no Égée. I teie nei, e 44 amuiraa e e 25 pǔpǔ Ite no Iehova i reira. I rotopu i teie mau pǔpǔ, 17 na roto i te mau reo ěê, no te mea e e hinaaro Iehova ‘ia ora te [mau huru] taata atoa e ia noaa te ite [papu] i te parau mau.’ (Timoteo 1, 2:4; MN) Hau atu â, 13 pionie taa ê o te tutava rahi nei i te farerei e rave rahi atu â taata i taua mau tuhaa fenua moemoe ra.

E mau senekele i te maoro, ua riro te miti Égée ei pu o te tupuraa i te rahi o te hiroa tumu e te ohipa tapihoo. I teie mau ahuru matahiti i mairi aˈenei, ua riro oia ei vahi au-roa ˈˈe-hia e te mau hanere tausani ratere. Te mea faufaa roa ˈtu râ, ua itea mai i te feia poro i te Basileia, te mau “ravaai taata,” i nia i taua mau motu ra e rave rahi taata aau haavare ore i hinaaro e arue ia Iehova. Ua pahono rahi ratou paatoa i te titauraa i tohuhia e: “Ia haamaitai ratou ia Iehova: e ia arue ratou ia ˈna i te mau fenua roa [motu] ra.”—Isaia 42:12; MN.

[Hohoˈa fenua i te api 22]

(Hiˈo i te papai)

Miti Égée

HELENI

Lésvos

Hiu

Samo

Icarie

Phournoi

Patamo

Kono

Roda

Kereta

TUREKIA

[Hohoˈa i te api 23]

Motu Lésvos

[Hohoˈa i te api 24]

Te motu o Patamo

[Hohoˈa i te api 24]

Te motu o Kereta