Aamu

Te haamauruururaa ia Iehova—Na roto i te taviniraa ma te taime taatoa!

FAATIAHIA E STANLEY E. REYNOLDS

Ua fanauhia vau i Lonedona, i Beretane, i te matahiti 1910. I muri aˈe i te Tamaˈi Rahi Matamua, ua haere to ˈu mau metua e faaea i te hoê oire iti i Wiltshire tei parauhia Westbury Leigh. Ei taurearea, ua uiui pinepine au e, ‘O vai te Atua?’ Aita hoê aˈe taata i nehenehe e pahono mai. E aita roa ˈtu i taa ia ˈu no te aha i hamanihia ˈi e piti fare pure iti e te hoê fare pure rahi no te haamori i te Atua i to matou oire iti.

I TE matahiti 1935, e maha matahiti hou te haamataraa te Piti o te Tamaˈi Rahi, ua tere mâua to ˈu taeae apî aˈe o Dick na nia i te pereoo taataahi i Weymouth i te hiti apatoa o te fenua Beretane no te hoê tau faaearaa i roto i te fare ie. Te parahi ra mâua i roto i to mâua fare ie a faaroo noa ˈi i te ûa rahi e a uiui noa ˈi e nafea mâua, ua haere maira te hoê taata paari e ua pûpû maira e toru buka haapiiraa Bibilia—La Harpe de Dieu, Lumière I, e Lumière II. Ua oaoa vau i te noaaraa mai teie mau buka, e ore ïa te haumani. Ua anaanatae oioi roa vau i ta ˈu i taio, aita râ vau i ite e e taui roa te reira i to ˈu oraraa—e to to ˈu taeae atoa.

I to ˈu hoˈiraa i te fare, ua parau mai to ˈu metua vahine e te opere ra o Kate Parsons, e faaea ra i to matou oire iti, i taua atoa mau huru papai Bibilia ra. Mea matau-maitai-hia oia no te mea, noa ˈtu to ˈna ruhiruhia, e tere oia na nia i te hoê moto nainai e farerei i te taata i to matou oire iti atea. Ua haere au e hiˈo ia ˈna, e ua horoa maira oia ma te oaoa i te buka ra Création e te buka ra Richesses e tae noa ˈtu i te tahi atu mau papai a te Taiete Watch Tower. Ua parau atoa mai oia e e Ite no Iehova oia.

I muri aˈe i te taioraa i te mau buka e ta ˈu Bibilia, ua ite aˈera vau e o Iehova te Atua mau e ua hinaaro vau e haamori ia ˈna. No reira, hapono ihora vau i te hoê rata e faaite ra e te faarue ra vau i ta matou ekalesia e haamata ˈtura vau  i te apiti i roto i te mau haapiiraa Bibilia i te fare o John raua o Alice Moody. Te faaea ra raua i Westbury, to matou oire fatata roa ˈˈe. E hitu anaˈe matou i taua mau putuputuraa ra. Na mua ˈˈe e i muri aˈe i te mau putuputuraa, na Kate Parsons e hauti i te harmonium a himene puai ai matou pauroa i te mau himene o te Basileia!

Te mau mahana matamua

Ua taa ia ˈu e te ora ra matou i te hoê tau faufaa roa, e ua hinaaro vau e apiti i roto i te ohipa pororaa i tohuhia i roto i te Mataio 24:14. No reira, ua faaea vau i te puhipuhi i te avaava, ua hoo mai au i te hoê pute, e ua pûpû atura vau ia ˈu na te Atua Rahi ra o Iehova.

I te avaˈe Atete 1936, ua tere atu o Joseph F. Rutherford, te peretiteni o te Taiete Watch Tower, i Glasgow, i Écosse, no te paraparau no nia i te parau ra “Aramagedo.” Noa ˈtu e fatata e 600 kilometera i te atea e tae atu ai i Glasgow, ua faaoti au e haere i ǒ ia bapetizohia vau i taua tairururaa ra. Aita i rahi ta ˈu moni, ua tuu aˈera vau i to ˈu pereoo taataahi i nia i te pereoo auahi e tere ra i Carlisle, te hoê oire i te hiti fenua Écosse, e taahi atura mai reira 160 kilometera i te atea i te pae apatoerau roa. Ua taahi atoa vau i te rahiraa o te mau kilometera no te hoˈi i te fare, ua paruparu roa to ˈu tino, area i te pae varua ra, ua puaihia ïa vau.

Mai reira mai, e na nia vau i te pereoo taataahi i te mau taime atoa e haere ai au e faaite i to ˈu faaroo i te mau taata i te mau oire iti tapiri. I taua tau ra, e tareta faaiteraa ta te Ite taitahi e poroi Bibilia to nia iho ta te mau fatu fare e taio. E faaohipa atoa matou i te mau matini faataˈi pehe mea amo no te haapuroro i te mau oreroraa parau Bibilia a te peretiteni o te Taiete. E parau mau, e pute vea noa to nia iho ia matou, * e faaite ra e e Ite no Iehova matou.

Te taviniraa ei pionie i te tau tamaˈi

Ua bapetizohia to ˈu taeae i te matahiti 1940. Ua haamata na te Piti o te Tamaˈi Rahi i te matahiti 1939, e ua ite mâua toopiti e te hinaaro-ru-hia ra te mau taata poro ma te taime taatoa. No reira mâua i faaî ai i ta mâua aniraa no te taviniraa pionie. Ua mauruuru mâua i to mâua toopiti tonoraahia i te fare pionie i Bristol, to reira aˈena o Edith Poole, Bert Farmer, Tom raua o Dorothy Bridges, Bernard Houghton, e te tahi atu â mau pionie ta mâua i faahiahia maoro no to ratou faaroo.

Ua tae oioi maira te hoê pereoo iti, tei papaihia “MAU ITE NO IEHOVA” i na pae e piti e te mau leta meumeu, e tii mai ia matou. O Stanley Jones te taata faahoro, ua riro mai oia i muri aˈe ei mitionare i Taina e ua tapeahia oia i reira e hitu matahiti i te maoro i roto i te hoê piha o ˈna anaˈe no ta ˈna ohipa pororaa.

 A tupu noa ˈi te tamaˈi, mea varavara matou i te taoto i te hoê po taatoa. E topa noa te mau paura e ati aˈe to matou fare pionie, e e tia ia matou ia vai ara noa i te mau matini tutui auahi. I te hoê po, ua faarue matou i te pu o Bristol i muri aˈe i te hoê tairururaa faahiahia e 200 Ite tei tae mai e ua tapae matou i to matou fare tei paruru-rii-hia na roto i te mau ofai pupuhi tupita manureva i parari haere.

Ia poipoi aˈe, ua hoˈi mâua o Dick i te oire no te tii i te tahi mau mea ta mâua i vaiiho i ǒ. Ua hitimahuta mâua. Ua huanane roa o Bristol. Ua ino roa e ua paapaa roa te oire pu taatoa. Ua riro te Park Street, to reira ta matou Piha a te Basileia, ei haapueraa toetoeâ i paapaa. Aita râ te mau Ite i pohe aore ra i pepe. Auaˈe e ua rave aˈena matou i ta matou mau papai Bibilia i roto i te Piha a te Basileia e ua opere na te mau fare o te mau melo o te amuiraa. Ua haamauruuru matou ia Iehova no te reira.

Te tiamâraa manaˈo-ore-hia

Ua maraa te Amuiraa no Bristol ta ˈu i tiaau ei peretiteni i nia i te 64 tavini i te taeraa mai ta ˈu mau api parau no te tau faehau. E rave rahi Ite ê atu tei tapeahia no to ratou tiaraa amui ore, e ua manaˈo vau e e taotia-atoa-hia to ˈu tiamâraa e poro. Ua haavahia vau i te hoê Tiribuna no Bristol e na Taeae Anthony Buck, te hoê ofitie fare tapearaa na mua ˈˈe, i tia ˈtu no ˈu. E taata itoito oia, te mǎtaˈu ore, e te turu maite i te parau mau Bibilia, e ei faahopearaa o to ˈna tia-maitai-raa ˈtu no ˈu, ua faaore-roa-hia ma te manaˈo-ore-hia ta ˈu tau faehau mai te peu e e tamau noa vau i ta ˈu taviniraa ma te taime taatoa!

Ua oaoa roa vau i to ˈu tiamâraa, e ua faaoti au e faaohipa i te reira no te poro i nia i te hoê faito rahi roa ˈˈe. I to ˈu niuniuraahia mai e haere i te amaa no Lonedona e paraparau ia Albert D. Schroeder, te tiaau o te amaa, ua uiui iho â ïa vau eaha te tiai maira ia ˈu. A feruri na i to ˈu maere i to ˈu aniraahia e haere e tavini i Yorkshire ei tiaau ratere, ma te tere i roto i te mau amuiraa taa ê i te mau hebedoma atoa no te tauturu e no te faaitoito i te mau taeae. Ua manaˈo vau e eita roa ˈtu e maraa ia ˈu teie hopoia, tera râ, ua faaorehia ta ˈu tau faehau e aita ïa e fifi no te haere. No reira, ua farii ihora vau i te aratairaa a Iehova e reva ˈtura vau ma te aau tae.

I te hoê tairururaa i tupu i Huddersfield, ua faaite o Albert Schroeder o vai au i te mau taeae, e i te avaˈe Eperera 1941, ua haamata vau i ta ˈu tuhaa taviniraa apî. Auê te oaoa e i to ˈu matauraa i taua mau taeae here ra! Maoti to ratou here e to ratou maitai, ua taa ˈtu â ia ˈu e e nunaa mau to Iehova tei pûpû taatoa ia ratou na ˈna e o te here ra te tahi i te tahi.—Ioane 13:35.

Te tahi atu â mau hopoia i roto i te taviniraa

Ua tupu te hoê tairururaa no te mau nunaa e pae mahana o te ore e moehia i te matahiti 1941 i te De Montfort Hall no Leicester. Noa ˈtu e mea tufahia te maa e mea iti te utaraa taata a te hau, ua maraa te numera o te feia i tae mai i nia i te faito 12 000 i te  Sabati, i taua tau ra, ua hau rii noa ˈˈe i te 11 000 Ite i taua fenua ra. Ua faataˈihia te mau oreroraa parau haruharuhia a te peretiteni o te Taiete, e ua mahiti mai te buka ra Enfants. Papu maitai e ua riro taua tairururaa ra ei ohipa faufaa roa i roto i te aamu teotaratia o te nunaa o Iehova i Beretane, e tairururaa i faatupuhia, ei auraa parau, i ropu mau i te Piti o te Tamaˈi Rahi.

I muri iti noa ˈˈe i teie tairururaa, ua titau-manihini-hia vau e tavini e te fetii o te Betela no Lonedona. I reira, ua haa vau i te mau tuhaa haponoraa e puohuraa e i muri aˈe, i roto i te piha ohiparaa, e haapao i te mau ohipa i taaihia i te mau amuiraa.

E faaruru na te fetii o te Betela i te mau topitaraa manureva i Lonedona i te rui e te ao, e tae noa ˈtu i te mau hiˈopoaraa tamau a te mau tia mana i te mau taeae haapao e ohipa ra i reira. Ua tapeahia o Pryce Hughes, Ewart Chitty, e o Frank Platt no to ratou tiaraa amui ore, e i te pae hopea, ua afaihia o Albert Schroeder i te mau Hau Amui. Noa ˈtu teie mau faaheporaa, ua haapao-maitai-noa-hia te mau faufaa a te amuiraa e a te Basileia.

I Gileada!

I te hoperaa te tamaˈi i te matahiti 1945, ua tapao vau ia ˈu i te haapiiraa mitionare i te Haapiiraa Bibilia no Gileada a te Taiete Watchtower e ua fariihia vau i roto i te 8raa o te pǔpǔ i te matahiti 1946. Ua faanaho te Taiete e ia fano mai vetahi pae o matou, tae noa ˈtu ia Tony Attwood, Stanley Jones, Harold King, Don Rendell, e ia Stanley Woodburn, mai te uahu taiˈaraa no Fowey i Cornouailles. Ua tapao te hoê Ite no ǒ i to matou tere na nia i te hoê pahi hoo taoˈa iti e tari ra i te araea no Taina. Ua î roa to matou mau piha, e ua î noa te tahua pahi i te pape. Ua topa aˈera to matou hau i to matou fatataraa ˈtu i te uahu tapaeraa, o Philadelephia!

Mea nehenehe te vahi o te fare Gileada i South Lansing i te tuhaa apatoerau o te Hau no New York, e mea faufaa roa no ˈu te haapiiraa ta ˈu i fanaˈo i ǒ. No ǒ mai te feia haapii o ta matou pǔpǔ 18 nunaa—a tahi ra te Taiete i nehenehe ai e tapao e rave rahi roa tavini no te mau fenua ěê—e ua riro matou pauroa ei mau hoa rahi. Ua fanaˈo rahi au i te auhoaraa o to ˈu hoa piha, o Kalle Salavaara no Filelane.

Ua mairi oioi te tau, e i te hopea o na avaˈe e pae, ua tae mai te peretiteni o te Taiete, o Nathan H. Knorr, mai te pu no Brooklyn mai, no te horoa mai i ta matou mau parau tuite e no te faaite mai teihea ta matou mau tuhaa taviniraa. I taua tau ra, eita te feia haapii e ite ihea ratou e tonohia ˈi hou te reira a faaarahia ˈi i te mahana faatuiteraa. Ua faahoˈihia vau i te Betela no Lonedona e tamau i ta ˈu ohipa i reira.

To ˈu hoˈiraa i Lonedona

Mea peapea mau te mau matahiti i muri aˈe i te tamaˈi i Beretane. Ua tufa-noa-hia te maa e te tahi atu â mau mea faufaa e rave rahi, tae noa ˈtu te papie. Ua imi râ matou i te ravea, e ua ruperupe mai te mau faufaa a te Basileia o te Atua. Taa ê atu i te ohiparaa i te Betela, ua haapao vau i te mau tairururaa mataeinaa e haaati e ua tere au i roto i te mau amuiraa, tae noa ˈtu vetahi i Irelane. E haamaitairaa atoa to ˈu farereiraa ia Erich Frost e te tahi atu â mau taeae e tuahine no Europa e te faarooraa no nia i te taiva ore o te tahi atu mau Ite i faaruru i te mau mea riaria o te mau aua tapearaa Nazi. Ua riro mau â te taviniraa i te Betela ei haamaitairaa faahiahia.

Hoê ahuru matahiti to ˈu matauraa ia Joan Webb, te hoê pionie taa ê e tavini ra i Watford, te hoê oire i te pae apatoerau noa o Lonedona. I te matahiti 1952, ua faaipoipo mâua. Ua hinaaro mâua toopiti e tamau i te taviniraa ma te taime taatoa, no reira ua oaoa roa mâua i to ˈu nominoraahia ei tiaau haaati i muri aˈe i to ˈu faarueraa i te Betela. Ta mâua tuhaa haaati matamua, tei te hiti apatoa ïa o Beretane, i Sussex e i Hampshire. E ere te taviniraa haaati i te mea ohie i taua tau ra. E na nia mâua na mua i te pereoo uta taata, te pereoo taataahi, e na raro atoa. Mea rahi te mau amuiraa mea aano ta ratou mau tuhaa fenua i te mataeinaa, e pinepine mea fifi ia tae atu i reira, noa ˈtu râ, ua tamau noa te numera o te mau Ite i te maraa.

New York City i te matahiti 1958

I te matahiti 1957, ua tae mai ta ˈu te tahi atu titau-manihini-raa mai te Betela mai: “E hinaaro anei oe e haere mai i te piha ohiparaa e e tauturu i te faanahoraa i te mau tere no te tairururaa no te mau nunaa atoa e piri maira e tupu i te Yankee Stadium e i te Polo Grounds i New York City i te matahiti 1958?” Ua haapao oioi aˈera mâua Joan i te  mau parau aniraa a te mau taeae no te mau pahi e manureva tapǔpǔ a te Taiete. Ua riro te reira ei Tairururaa tuiroo no te mau Nunaa atoa, Te hinaaro o te Atua, e e 253 922 taata tei ruru mai. I teie tairururaa, e 7 136 taata tei faataipe i ta ratou euhe ia Iehova na roto i te bapetizoraa i roto i te pape—hau atu i te piti taime te numera o te feia i bapetizohia i te taime faufaa roa o te aamu, te Penetekose o te matahiti 33 T.T., ia au i te faatiaraa a te Bibilia.—Ohipa 2:41.

Eita roa ˈtu e moehia ia mâua Joan te hamani maitai o Taeae Knorr i to ˈna iho titau-manihini-raa mai ia mâua i te tairururaa no te tauturu i te haapaoraa i te mau tia e tae mai i New York City mai 123 fenua mai. E tupuraa oaoa mau teie e te faahiahia roa no mâua toopiti.

Te mau haamaitairaa o te taviniraa ma te taime taatoa

I to mâua hoˈiraa, ua tamau mâua i te taviniraa ratere e tae noa ˈtu i to mâua maˈiraahia. Ua mau o Joan i te fare maˈi, e ua roohia vau i te apoplexie puai ore. Ua nominohia mâua ei pionie taa ê, i muri aˈe râ ua fanaˈo mâua i te haamaitairaa e tavini faahou no te hoê taime i roto i te ohipa haaati. I te pae hopea, ua hoˈi mâua i Bristol, i reira to mâua faaearaa i roto i te taviniraa ma te taime taatoa. Te faaea ra to ˈu taeae o Dick i pihai mai e to ˈna utuafare, e e pinepine mâua i te faatia i to mâua aamu.

Ua ino roa to ˈu mata i te hoê fifi o te orio mata i te matahiti 1971. Mai reira mai, mea fifi roa no ˈu ia taio, no reira, ua riro te mau ripene haruharu o te mau papai Bibilia ei faanahoraa faahiahia mau no ǒ mai ia Iehova ra. Te faatere noa ra mâua Joan i te mau haapiiraa Bibilia i te fare o te taata, e i te roaraa o te mau matahiti, ua fanaˈo mâua i te haamaitairaa e tauturu fatata e 40 taata ia ite i te parau mau, tae noa ˈtu e hitu melo o te hoê utuafare.

I to mâua pûpûraa i to mâua oraraa na Iehova hau atu i te 60 matahiti aˈenei, ua hinaaro mâua e rave i te taviniraa ma te taime taatoa e eiaha e faaea. Auê mâua i te mauruuru i te mea e mea itoito noâ mâua i te tavini i te Atua Rahi ra o Iehova—mea na reira noa mâua e nehenehe ai e haamauruuru ia ˈna no to ˈna hamani maitai ia mâua e ta mâua mau matahiti oaoa!

[Nota i raro i te api]

[Hohoˈa i te api 25]

E to ˈu taeae o Dick (i te pae aui roa; te tia ra o Dick) e te tahi atu mau pionie i mua i te fare pionie i Bristol

[Hohoˈa i te api 25]

Te fare pionie i Bristol i te matahiti 1940

[Hohoˈa i te api 26]

O Stanley raua o Joan Reynolds i to raua mahana faaipoiporaa, i te 12 no Tenuare 1952, e i teie mahana