Te mau faaipoiporaa oaoa o te faahanahana ra ia Iehova

Ua faaipoipo Welsh e Elthea i Soweto, i Afirika Apatoa, i te matahiti 1985. I te tahi mau taime, te hiˈo nei raua i ta raua buka hohoˈa faaipoiporaa e ta raua tamahine ra o Zinzi, e te ora faahou nei ïa ratou i taua mahana oaoa ra. Mea au na Zinzi e imi o vai ma te mau manihini o te faaipoiporaa e mea oaoa iho â râ na ˈna te mau hohoˈa o to ˈna metua vahine tei faanehenehehia ma te haviti mau.

UA HAAMATA te faaipoiporaa na roto i te hoê oreroraa parau tei horoahia i roto i te hoê piha huiraatira i Soweto. I muri iho, ua himene mai te hoê pǔpǔ Kerisetiano apî i te mau himene arueraa i te Atua i nia e maha nota. I muri noa mai, ua tamaa te mau manihini ma te au a taˈi mǎrû noa ˈi te hoê ripene o te mau himene o te Basileia na muri. Aita e ava i operehia, e aita e upaupa puai aore ra e oriraa. Ua oaoa râ te mau manihini i te amuimui atu i te tahi e te tahi e ua haapopou atu i nau hoa faaipoipo. Te maororaa o te tereraa taatoa, fatata ïa e toru hora. “E faaipoiporaa teie o tei hopoi noa mai i te mau haamanaˈoraa au maite no ˈu,” o ta Raymond ïa, te hoê matahiapo Kerisetiano, i haamanaˈo.

I te taime a faaipoipo ai raua, e feia rima tauturu o Welsh e Elthea i te amaa a te Taiete Watch Tower Bible and Tract Society i Afirika Apatoa. E nehenehe noa raua e faatupu i te hoê faaipoiporaa au noa. Ua maiti te tahi mau Kerisetiano e faarue i te taviniraa ma te taime taatoa no te rave i te ohipa no te aufau i te mau haamâuˈaraa o te hoê faaipoiporaa rahi. Teie râ, aita Welsh e Elthea e tatarahapa ra i ta raua faaotiraa e faatupu i te hoê faaipoiporaa au noa no te mea ua turu te reira ia tamau raua i te tavini i te Atua ma te taime taatoa e tae atu i te fanauraahia o Zinzi.

Eaha râ ia maiti nau hoa i momoˈahia e tuu i te upaupa e te ori i to raua faaipoiporaa? Eaha râ ia faaoti raua e opere i te uaina aore ra i te tahi atu mau ava? Eaha mai te peu e e nehenehe raua e faatupu i te hoê faaipoiporaa rahi mau? Nafea raua e nehenehe ai e papu e e riro te reira ei oroa oaoa e au i te feia e haamori ra i te Atua? E tia ia haapao-maite-hia taua mau uiraa ra, no te mea te aˈo nei te Bibilia e: “Te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua.”—Korinetia 1, 10:31.

A haapae i te mau arearearaa maamaa

Mea fifi roa ia feruri i te hoê faaipoiporaa aita e oaoa. Teie râ, te vai ra te hoê fifi rahi atu â ia topahia i roto i te tahi atu paeau e ia faatupu-rahi-roa-hia te arearearaa maamaa otia ore. I roto e rave rahi mau faaipoiporaa e ere na te mau Ite, te faaino ra te mau mea e ravehia i te Atua. Ei hiˈoraa, mea matauhia te inu-hua-raa i te ava. Te vahi peapea râ, ua tupu atoa te reira i roto i te tahi mau faaipoiporaa Kerisetiano.

Te faaara ra te Bibilia e “e hauti rahi tei te ava taero.” (Maseli 20:1) Te auraa o te taˈo Hebera i hurihia “hauti rahi,” oia ïa “faatupu i te hoê maniania puai.” Mai te peu e e riro te hoê taata inu ava ei taata maniania, a feruri na eaha te nehenehe e tupu ia putuputu mai te hoê nahoa rahi taata e ia inu hua ratou! Papu maitai e e nehenehe taua mau tupuraa ra e topa ohie noa i roto i “te taero ava, te [mau arearearaa maamaa] ra, e mai te reira atoa te huru,” tei anaihia i roto i te Bibilia mai te mau ‘ohipa a te tino.’ E faaere taua mau peu ra i tei ore e tatarahapa i te ora mure ore i raro aˈe i te faatereraa o te Basileia o te Atua.—Galatia 5:19-21; MN.

E faaohipahia te taˈo Heleni ra “arearearaa maamaa” no te faataa i te hoê poroteraa maniania a te mau taurearea taero rii o te himene, o te  ori e o te faataˈi ra i te upaupa i roto i te oire. Mai te peu e e inu-hua-hia te ava i te hoê faaipoiporaa, e mai te peu e e haapuaihia te upaupa e e orihia ma te tano ore, te vai ra ïa te hoê fifi mau e e riro teie oroa mai te hoê arearearaa maamaa ra te huru. I roto i taua huru ra, e nehenehe te feia paruparu e hema ohie a rave atu ai i te tahi atu mau ohipa a te tino mai “te poreneia, te mau peu faufau ra, te taiata, [aore ra e topa ohie i roto i] te iria.” Eaha ïa te nehenehe e ravehia no te ape i taua mau ohipa a te tino ra o te faaino ra i te oaoa o te hoê faaipoiporaa Kerisetiano? No te pahono i taua uiraa ra, e hiˈo mai ïa tatou eaha ta te Bibilia e parau ra no nia i te tahi faaipoiporaa.

Hoê faaipoiporaa ta Iesu i haere

Ua titau-manihini-hia o Iesu e ta ˈna mau pǐpǐ i te hoê faaipoiporaa i Kana i Galilea. Ua farii ratou i te titau-manihini-raa, e ua faanavai atoa Iesu i te oaoa i te oroa. I to te uaina pauraa, ua faatupu semeio oia i te hoê haapueraa uaina maitai roa ˈˈe. I muri aˈe i te faaipoiporaa, aita e feaaraa e ua haamâha te uaina i toe mai i te mau hinaaro o te tane faaipoipo apî mauruuru e to to ˈna utuafare no te hoê taime.—Ioane 2:3-11.

E rave rahi mau haapiiraa ta tatou e nehenehe e huti mai mai roto mai i te faaipoiporaa ta Iesu i haere. A tahi, aita Iesu e ta ˈna mau pǐpǐ i haere noa mai te reira i te oroa faaipoiporaa. Te faahiti mau ra te Bibilia e ua titau-manihini-hia ratou. (Ioane 2:1, 2) Oia atoa, i roto i na parabole e piti o te oroa faaipoiporaa, ua paraparau pinepine Iesu no te feia i tae mai no te mea ua titau-manihini-hia ratou.—Mataio 22:2-4, 8, 9; Luka 14:8-10.

I roto i te tahi mau fenua, e peu matauhia e te taata atoa i roto i te totaiete taata ia haere noa i te hoê faaipoiporaa ia titau-manihini-hia aore ra aita. Teie râ, e nehenehe te reira e aratai i te fifi i te pae moni. E tarahu paha nau hoa i momoˈahia e ere hoi i te mea ona no te papu e e navai te maa e te inu no te hoê nahoa taotia-ore-hia. No reira, ia faaoti nau hoa Kerisetiano i momoˈahia e faatupu i te hoê faaipoiporaa au noa ma te taotia i te numera o te mau manihini, e tia ïa i te mau hoa Kerisetiano tei ore i titau-manihini-hia ia taa e ia faatura i te reira. Te haamanaˈo ra te hoê taata o tei faaipoipo i Cap, i Afirika Apatoa, e ua titau manihini oia e 200 taata i to ˈna faaipoiporaa. E 600 râ tei haere mai e ua haapau oioi ratou i te maa. I rotopu ia ratou, te vai ra hoê pereoo uta ratere o tei haere mai e mataitai ia Cap i te hopea hebedoma e tupu ai te faaipoiporaa. E fetii atea te faahoro pereoo no te taata faaipoipo apî e ua manaˈo oia e e nehenehe oia e afai mai i te pǔpǔ taatoa ma te ore e ani na mua i te taata faaipoipo apî aore ra i te taata haapao i te oroa!

Ia ore e parauhia e ua matara te hoê oroa no te taatoaraa, eita ïa te hoê pǐpǐ mau a Iesu e haere i te hoê oroa faaipoiporaa mai te peu e aita ta ˈna e titau-manihini-raa e e rave i te maa e te inu i faataahia no te feia i titau-manihini-hia. E tia i te feia tei tamata i te haere ma te ore i titau-manihini-hia ia uiui e: ‘Ia haere au i teie oroa faaipoiporaa, eita anei au e ere ra i te aroha no te mau hoa faaipoipo apî? Eita anei au e faahuru ê e e faaino i te oaoa o te oroa?’ Maoti i te hiˈo i te oreraa i titau-manihi-hia ei inoinoraa, e faatae paha te hoê Kerisetiano taa maitai i te tupuraa ma te here i te hoê parau haapopouraa i nau hoa faaipoipo ma te hinaaro ia vai te mau haamaitairaa a Iehova i nia ia raua. E tauturu atoa paha oia i nau hoa faaipoipo ma te faatae i te hoê ô ei apitiraa i te oaoa o to raua mahana faaipoiporaa.—Koheleta 7:9; Ephesia 4:28.

Na vai e haapao?

I te tahi mau vahi i Afirika, e peu matauhia e te mau fetii paari ia rave oioi i te mau faanahoraa no te faaipoiporaa. E mauruuru paha nau hoa i momoˈahia i te reira, i te mea e e haamâmâ mai te reira ia raua i te mau hopoia i te pae moni. E manaˈo paha raua e e haamâmâ atoa te reira ia raua i te hopoia e haapao i te mau mea atoa o te nehenehe e tupu. Teie râ, hou raua e farii ai i te mau huru tauturu atoa a te mau fetii manaˈo maitai, e tia i na hoa e piti ia papu e e faaturahia to raua iho mau hinaaro.

Noa ˈtu e e Tamaiti Iesu na te Atua e “no te raˈi mai” oia, aita e haapapuraa e ua faanaho e ua faatere oia i te mau mea atoa i te faaipoiporaa i Kana. (Ioane 6:41) Aita, te parau maira te aamu Bibilia e ua maitihia te tahi atu taata ei “tavana o te oroa.” (Ioane 2:8) I to ˈna aˈe pae, ua amo teie taata i ta ˈna hopoia i mua i te upoo o te utuafare apî, te tane faaipoipo apî.—Ioane 2:9, 10.

 E tia i te mau fetii Kerisetiano ia faatura i te upoo o te utuafare apî ta te Atua i nomino. (Kolosa 3:18-20) Na ˈna e haapao i te mau mea e tupu i to ˈna faaipoiporaa. Papu iho â e e tia i te hoê tane i momoˈahia ia vai tano noa e, mai te peu e e nehenehe, ia haapao i te mau hinaaro o ta ˈna vahine momoˈa, to ˈna mau metua, e to to ˈna mau metua hoovai. Teie râ, ia onoono te mau fetii no te faanaho i te mau mea o te patoi ra i te mau hinaaro o te mau hoa i momoˈahia, e nehenehe ïa raua e patoi i ta ratou tauturu aroha e e aufau atu no to raua iho faaipoiporaa au noa. I te na reiraraa, aita ïa hoê aˈe mea o te tupu e vaiiho i na hoa e piti e te mau haamanaˈoraa au ore. Ei hiˈoraa, i te hoê faaipoiporaa i Afirika, ua faahanahana te hoê fetii tiaturi ore, ei haapao i te oroa, i te mau tupuna i pohe!

I te tahi mau taime, e reva nau hoa faaipoipo no to raua tere-faaipoipo-raa hou te oroa faaipoiporaa e hope ai. I roto i taua tupuraa ra, e tia ïa i te tane faaipoipo apî ia maiti i te tahi mau taata no te haapao i te oroa no te papuraa e e aurarohia te mau ture a te Bibilia e e hope te oroa i te hoê hora tano noa.

Te faanahoraa maitai e te aifaitoraa

Papu maitai, mea rahi roa te maa maitai i te faaipoiporaa ta Iesu i haere, no te mea te faataa ra te Bibilia i te reira mai te hoê oroa faaipoiporaa. Mai tei tapaohia, mea rahi atoa te uaina. Aita e feaaraa e te vai ra ïa te mau upaupa tano maitai e ua orihia ma te tura no te mea e peu matauhia te reira i roto i te oraraa totiale ati Iuda. Ua faaite Iesu i te reira i roto i ta ˈna parabole tuiroo o te tamaiti i haamâuˈa i ta ˈna faufaa. Ua oaoa roa te metua tane taoˈa rahi o taua aamu ra i te hoˈiraa mai ta ˈna tamaiti tatarahapa i parau ai oia e: “E amu hoi tatou i te maa, e oaoa hoi tatou.” Ia au i te manaˈo o Iesu, te vai ra “te oto vivo e te ori” i taua oroa ra.—Luka 15:23, 25.

Ma te faahiahia râ, aita te Bibilia e faataa papu ra i te upaupa e te ori i te faaipoiporaa i Kana. Inaha, aita te ori i faataahia i roto e rave rahi mau aamu faaipoiporaa a te Bibilia. E au ra e i rotopu i te mau tavini haapao maitai a te Atua i te mau tau Bibilia, tei te parahiraa piti te ori e aita to te reira e faufaaraa i roto i to ratou mau faaipoiporaa. E nehenehe anei tatou e haapii e rave rahi mau mea mai roto mai i te reira?

I te tahi mau faaipoiporaa Kerisetiano i Afirika, e faaohipahia te mau faanahoraa taˈiraa eretoroni puai mau. E nehenehe te upaupa e taˈi puai roa e eita te mau manihini e nehenehe e tauaparau faahou ma te au maitai. I te tahi mau taime, mea rahi roa te ori mâha ore eiaha râ te maa. E riro paha taua mau taime ra ei otoheraa noa no te faatupu i te hoê taime oriraa maoti i te riro ei oroa faaipoiporaa. Hau atu â, mea pinepine te upaupa puai i te huti i te feia faahuehue, e mau taata ěê o te haere noa mai ma te ore i titau-manihini-hia.

I te mea e aita te faatiaraa o te Bibilia no nia i te faaipoiporaa e haamatara ra i te upaupa e te ori, eita anei ïa te reira e nehenehe e aratai i nau hoa i momoˈahia o te opua ra e faatupu i te hoê faaipoiporaa o te faahanahana ra ia Iehova? Aita, no te faaineine i te mau faaipoiporaa e rave rahi i Afirika Apatoa aita i maoro aˈenei, e rave rahi mau hora to te mau Kerisetiano apî maitihia no te faanaho i te hoê tuhaa oriraa i te faaipoiporaa faaohiparaa no te haapii i te mau taahiraa avae fifi roa o te hoê ori. Ua faaohipa rahi ratou i te taime no te reira e mau avaˈe i te maoro. Teie râ, e tia i te mau Kerisetiano ia ‘[haapao] i te taime’ no “te mau mea i hau i te maitai ra,” mai te pororaa i te evanelia, te haapiiraa taitahi, e te haereraa i te mau putuputuraa Kerisetiano.—Ephesia 5:16; MN; Philipi 1:10.

Ia au i te rahiraa uaina ta Iesu i horoa, e au ra e e faaipoiporaa rahi mau te faaipoiporaa i Kana. E nehenehe râ tatou e papu e aita e maniania rahi i taua taime ra e aita te mau manihini i inu hua i te ava mai tei tupu i roto i te tahi mau faaipoiporaa ati Iuda. (Ioane 2:10) No te aha tatou e papu ai i te reira? No te mea tei reira atoa te Fatu ra o Iesu Mesia. I roto i te mau taata atoa, o Iesu tei  haapao maitai aˈe no te faaroo i te mau faaueraa a te Atua no nia i te mau amuimuiraa iino: “Eiaha oe e amui atoa i te feia i taero i te uaina ra.”—Maseli 23:20.

No reira, ia faaoti nau hoa i momoˈahia e opere i te uaina aore ra i te tahi atu ava i to raua faaipoiporaa, e faanaho ïa raua ia ravehia te reira i raro aˈe i te ara-maite-raa o te mau taata haapao. E ia faaoti raua e tuu i te upaupa, e maiti ïa raua i te mau pehe tano maitai e te hoê taata no te haapao i te puairaa. Eita te mau manihini e nehenehe e hopoi mai e e faaô mai i te mau upaupa atâta aore ra e faateitei i te puai i te hoê faito tano ore. Mai te peu e te vai ra te ori, e nehenehe e faaôhia te mau ori tura e te ara maitai. Ia ori te mau fetii tiaturi ore aore ra te mau Kerisetiano paari ore ma te faufau e te herehere, e tia i te tane faaipoipo apî ia taui i te upaupa aore ra ia ani mǎrû ia faaea te ori. Aita anaˈe, e nehenehe te faaipoiporaa e ino i roto i te hoê ohipa huehue e riro atu ai ei turoriraa.—Roma 14:21.

No te mau fifi e vai ra i roto i te tahi mau huru ori no teie tau, mau upaupa puai e te inu-hua-raa i te ava, ua faaoti e rave rahi mau hoa Kerisetiano i momoˈahia eiaha e faaô i taua mau mea ra i roto i to ratou faaipoiporaa. Ua faahapahia vetahi no te reira, e tia râ ia haapopouhia ratou no to ratou hinaaro e ape i te mau mea atoa o te nehenehe e hopoi i te mau faahaparaa i nia i te iˈoa moˈa o te Atua. I te tahi aˈe pae, e faanaho te tahi mau hoa i momoˈahia i te upaupa tano maitai, te hoê taime oriraa, e e operehia te ava ma te au. I roto i na tuhaa e piti, na te tane faaipoipo e amo i te hopoia e haapao i te mau mea atoa ta ˈna i faatia i to ˈna faaipoiporaa.

I Afirika, te hiˈo ê nei te tahi feia paari ore i teie mau faaipoiporaa Kerisetiano tura e mea au aˈe na ratou e haere i te hoê oroa hunaraa. Teie râ, e hiˈoraa faito ore te reira. E hopoi mai paha te mau ohipa haama o te tino i te faaanaanataeraa poto noa, e vaiiho râ te reira i te mau Kerisetiano e te hoê haava manaˈo peapea e e hopoi atoa te reira i te faahaparaa i nia i te iˈoa o te Atua. (Roma 2:24) I te tahi aˈe pae, e faahotu mai te varua moˈa o te Atua i te oaoa mau. (Galatia 5:22) E haamanaˈo te mau hoa faaipoipo e rave rahi ma te oaoa i to ratou mahana faaipoiporaa, no te mea ua ite ratou e e taime oaoa te reira eiaha râ e “turoriraa.”—Korinetia 2, 6:3.

Te haamanaˈo faahou ra Welsh e Elthea i te mau manaˈo au e rave rahi a te mau fetii tiaturi ore o tei haere mai i to raua faaipoiporaa. Ua na ô hoê e: “Ua fiu matou i te mau faaipoiporaa maniania o te tupu ra i teie mau mahana. Auê te maitai to ˈu haereraa i te hoê faaipoiporaa tura no te tauiui i te manaˈo.”

Te mea faufaa roa ˈˈe, e faahanahana te mau faaipoiporaa oaoa Kerisetiano e te tura i te Tumu o te faaipoiporaa, te Atua ra o Iehova.

[Tumu parau tarenihia/Hohoˈa i te api 22]

TE TITAURAA NO TE HOÊ OROA FAAIPOIPORAA

• Ia titau manihini outou i te hoê fetii tiaturi ore no te horoa i te hoê oreroraa parau, ua papu anei ia outou e eita oia e faaô mai i te tahi mau peu tuutuu eita roa ˈtu e tano no te hoê Kerisetiano.

• Mai te peu e e tuuhia te upaupa, ua maiti anei outou i te mau himene tano noa?

• E tano anei te puai o ta outou upaupa?

• Mai te peu e e faatiahia ia ori, e faatupuhia anei te reira ma te tura?

• E operehia anei te ava ma te au?

• E ara maite anei te feia haapao i teie opereraa?

• Ua maiti anei outou i te hoê hora tano e faaoti ai te oroa faaipoiporaa?

• E tae mai anei te feia haapao no te ara i te tere-maite-raa e tae atu i te hopea?