Te mau Evanelia—Te tupu noa râ te mârôraa

E parau mau anei te aamu o te mau Evanelia no nia i te fanauraa o Iesu Mesia?

Ua vauvau anei oia i te Aˈoraa i nia i te Mouˈa?

Ua faatia-mau-hia anei Iesu?

Ua parau mau anei oia e: “O vau te eˈa, e te parau mau, e te ora”?—IOANE 14:6.

UA TAUAPARAUHIA te mau tumu parau mai teie e te mau aivanaa fatata e 80 i te Apooraa no nia ia Iesu, o tei faatupuhia e piti taime i te matahiti mai te matahiti 1985 mai â. Ua pahono teie pǔpǔ aivanaa i taua mau uiraa ra ma te huru ê. Ua rave tei apiti atu i te apooraa i te maitiraa no nia i te mau manaˈo atoa i parauhia e na Iesu i faahiti i roto i te mau Evanelia. E haapapu te hoê titeti uteute i te manaˈo e na Iesu mau â i faahiti  i te hoê parau. E tapao te hoê titeti tarona e e au te hoê manaˈo i ta Iesu i nehenehe e parau. E faaite te hoê titeti rehu e e au te mau manaˈo i to Iesu, e ere râ na ˈna i faahiti i te reira. E haapapu te hoê titeti ereere e e ere roa ˈtu na ˈna te hoê parau, na te tutuu râ i faahiti i muri aˈe.

Ma te pee i teie huru raveraa, ua haafaufaa ore roa tei apiti atu i te Apooraa no nia ia Iesu i na manaˈo e maha i faahitihia ei uiraa i te omuaraa. Oia mau, ua maiti ratou i te titeti ereere no e 82 % o te mau manaˈo i parauhia e na Iesu i faahiti i roto i te mau Evanelia. Ia au ia ratou, 16 % noa o te mau aamu no nia ia Iesu i roto i te mau Evanelia e te tahi atu mau papai, e au ra e e parau mau.

E ere teie huru faainoraa i te mau Evanelia i te mea apî. Ua itea mai te hoê aroraa i te mau Evanelia i te matahiti 1774 i te neneiraahia te hoê parau papai 1 400 api a Hermann Reimarus, te hoê orometua haapii i te mau reo no Hitia o te râ ma i Hambourg, i Helemani, i muri aˈe i to ˈna poheraa. Mai reira mai, ua tamau noa te feaaraa hohonu i te huru mau o te mau Evanelia no te mau parau a Reimarus. Ua niuhia to ˈna mau manaˈo i nia i te hiˈopoaraa i te reo e te tahi mau mea e au noa ra e aita e tuea ra e itehia i roto i te aamu o te oraraa o Iesu o na Evanelia e maha. Mai reira mai, mea pinepine to te feia faahapa faahitiraa i te feaaraa e e parau mau te mau Evanelia, a faaaueue ai i te tiaturi o te taata i teie mau papai.

Te hoê manaˈo o taua mau aivanaa ra, tera ïa e faariro ratou i te mau Evanelia ei aai i te pae faaroo i faataehia mai e te mau taata e rave rau. Teie te mau uiraa matauhia a te mau aivanaa e feaa ra: Na ta ratou paha mau tiaturiraa i turai i te feia papai i na Evanelia e maha ia faaunauna i te mau tupuraa mau? Ua turai anei te politita a te pǔpǔ Kerisetiano matamua ia ratou ia papai aore ra ia anoi i te aamu o Iesu? Eaha te mau tuhaa o te mau Evanelia e parau tia iho â e ere râ i te aai?

E tiaturi te feia i paari mai i roto i te hoê totaiete raita aore ra aita e Atua e e buka aai noa te Bibilia—oia atoa hoi te mau Evanelia. Te vai ra o te faufau i te aamu haamaniiraa toto, haavîraa, amahamaharaa e te haerea paieti ore o te Amuiraa faaroo Kerisetiano. Aita teie mau taata e ite nei i te hoê noa ˈˈe tumu e haapao atu ai i te mau papai parauhia e mea moˈa i roto i te Amuiraa faaroo Kerisetiano. Te manaˈo nei ratou e te mau buka o te faatupu i te hoê haapaoraa haavarevare, e mau aai faufaa ore anaˈe ïa, atira ˈtu ai.

Eaha ta outou e manaˈo ra? E tia anei ia vaiiho outou i te tahi mau aivanaa o te feaa e e aamu mau te mau Evanelia ia faatupu i taua atoa ra mau feaaraa i roto i to outou upoo? Ia faaroo outou i te mau parau no nia i tei parauhia e aai a te feia papai Evanelia, e tia anei ia vaiiho outou e ia faaaueue te reira i to outou tiaturi i ta ratou mau papai? E tia anei ia turai te aamu paieti ore o te Amuiraa faaroo Kerisetiano ia outou ia feaa i te papuraa o te mau Evanelia? Te titau atu nei matou ia outou ia hiˈopoa i te tahi mau tupuraa.

[Hohoˈa i te api 4]

E aai anei aore ra e tupuraa mau to roto i te mau Evanelia?

[Faaiteraa i te tumu]

O Iesu e haere ra na nia i te miti/The Doré Bible Illustrations/Dover Publications

[Faaiteraa i te fatu o te hohoˈa i te api 3]

Hohoˈa i muri mai, mau api 3-5 e 8: Ma te parau faatia a te Freer Gallery of Art, Smithsonian Institution, Washington, D.C.