Te mau Evanelia—Tuatapaparaa aore ra aai?

NA TE ao atoa nei, ua riro te aamu o Iesu no Nazareta—te hoê taurearea tei taui i te tereraa o te tuatapaparaa—ei tuhaa o te totaiete. E tuhaa te reira o te haapiiraa faanahohia e te faanaho-ore-hia a te taata. Mea rahi o te faariro i te mau Evanelia ei tumu no te mau parau mau e mau parau paari e au i te mau tau atoa, mai teie, ‘Ia riro ta outou oia ei oia, e ta outou aita ei aita.’ (Mataio 5:37) Oia mau, ua riro paha te mau Evanelia ei niu o te mau haapiiraa ta to outou mau metua i haapii ia outou, e Kerisetiano anei ratou aore ra eita.

No te mau mirioni pǐpǐ aau rotahi a Iesu, ua faataa mai te mau Evanelia i te taata no ˈna ratou i farii ai e mauiui e e pohe. Ua riro atoa te mau Evanelia ei niu o te faatupu i te itoito, te faaoromai, te faaroo e te tiaturiraa. Eita anei ïa outou e farii e e tia ia vauvauhia te hoê haapapuraa fati ore no te parau e e mau aai noa teie mau faatiaraa? Ia hiˈo tatou i te mana rahi roa o te mau Evanelia i nia i te manaˈo e te haerea o te taata, eita anei outou e titau i te haapapuraa ia hinaaro te hoê taata e haafeaa e e parau mau te reira?

Te titau atu nei matou ia outou ia hiˈopoa i te tahi mau uiraa haaferuri no nia i te mau Evanelia. A hiˈo na eaha ta te tahi feia faahohonu i te mau Evanelia e manaˈo ra no nia i teie mau tumu parau, noa ˈtu e aita te tahi pae o ratou e parau ra e e Kerisetiano ratou. Ia oti, e nehenehe outou e huti i ta outou iho faaotiraa ma te ite maite.

MAU UIRAA E HIˈOPOA

◆ E nehenehe anei te mau Evanelia e riro ei mea ferurihia e te hoê taata aravihi?

Te na ô nei Robert Funk, tei haamau i te Fare haapiiraa no nia ia Iesu e: “Ua ‘faaite’ o Mataio, Mareko, Luka e Ioane ‘i te Mesia’ ma te faaau maite atu ia ˈna i te haapiiraa tumu Kerisetiano tei tauiui i muri aˈe i te poheraa o Iesu.” A papaihia ˈi râ te mau Evanelia, te ora noa râ e rave rahi taata o tei faaroo i te mau parau a Iesu, tei hiˈopoa i ta ˈna i rave, e tei ite atu ia ˈna i muri aˈe i to ˈna tia-faahou-raa. Aita ratou i faahapa e e feia taviri parau te mau papai Evanelia.

A hiˈo na i te poheraa e te tia-faahou-raa o te Mesia. E ere to roto anaˈe i te mau Evanelia te mau faatiaraa papu no nia i te poheraa e te tia-faahou-raa o Iesu, to roto atoa râ i te rata matamua e au i te canon Bibilia a te aposetolo Paulo i te mau Kerisetiano no Korinetia i tahito ra. Ua papai oia e: “Ua tuu atu hoi au ia outou i mutaa ihora, i tei noaa na ia ˈu ra, e i pohe te Mesia i ta tatou nei hara, mai tei te parau i papaihia ra; e i tanuhia hoi oia, e tia faahou maira i te rui toru, mai tei te parau i papaihia ra: e i itea oia Kepha, e i te ahuru ma piti i muri aˈe. E muri aˈera hoi, i itea oia e te mau taeae e pae atoa hanere e tiahara, hoê â iteraa; te ora noa nei â te rahi o taua feia ra, ua taoto râ te tahi pae. E muri aˈera hoi, itea ihora oia e Iakobo; e i te mau aposetolo atoa i muri aˈe. E te hopea ihora, itea atoa ihora ia ˈu, mai te mea e e mahemo vau.” (Korinetia 1, 15:3-8) Ua riro teie mau ite ei tiai i te mau tupuraa mau o te oraraa o Iesu.

Aita e itehia ra te haerea feruri haere noa ta te feia faahapa no teie tau e pari ra i roto i te mau Papai Heleni Kerisetiano. E ite-maoti-hia te reira i roto i te mau parau o te senekele 2 T.T. No reira,  ua papaihia te tahi mau aamu no nia i te Mesia e ere i ta te Bibilia i te tupuraa mai te taivaraa i te Kerisetianoraa mau i roto i te mau pǔpǔ taata tei taa ê mai i te amuiraa a te mau aposetolo.—Ohipa 20:28-30.

◆ E nehenehe anei te mau Evanelia e riro ei aai?

Mea fifi roa na te taata papai e faahohonu o C. S. Lewis ia parau e e aai noa te mau Evanelia. Ua papai oia e: “Ei taata tuatapapa i te mau papai, ua papu roa ia ˈu e noa ˈtu eaha te mau Evanelia, e ere te reira i te aai. Aita i navai te nehenehe no te riro ei aai. . . . Aita tatou i ite i te rahiraa o te oraraa o Iesu, e aita e taata o te papai i te hoê aai e vaiiho mai te reira.” Mea faahiahia atoa teie faˈiraa a te taata tuatapapa tuiroo o H. G. Wells noa ˈtu e e ere oia i te Kerisetiano: “E tuea te faataaraa i te hoê taata taa maitai a na [papai Evanelia] e maha; ua horoa mai ratou i te . . . haapapuraa o te mea mau.”

A hiˈo na i to Iesu tei faatiahia faraa ˈtu i mua i ta ˈna mau pǐpǐ. E rave iho â paha ïa te hoê taata hamani aai aravihi e ia faanaho Iesu i te hoê hoˈi-faahou-raa mai horuhoru, ia vauvau i te hoê oreroraa parau faahiahia roa, aore ra ia î roa oia i te maramarama e te hanahana. Aita râ, ua faataa noa te mau papai Evanelia ia ˈna e tia ra i mua i ta ˈna mau pǐpǐ. Ua ui atura oia e: “E te mau tamarii ra, e maa ta outou?” (Ioane 21:5) Teie te manaˈo ta te taata ite o Gregg Easterbrook i huti mai: “O te mau parau rii teie o te faaite i te hoê faatiaraa mau, eiaha i te hoê hamaniraa aai.”

E û atoa ˈtu te pariraa e e aai te mau Evanelia i te huru haapiiraa etaeta a te mau rabi e vai ra i te tau a papaihia ˈi te mau Evanelia. Ta ratou ravea, o te haapii-aau-raa ïa—te hoê ravea tamauraa ma te na nia iho noa. E paturu te reira i te faatiaraa tia roa e te haapao maitai i te mau parau e te ohipa a Iesu, eiaha râ i te hamaniraa i te tatararaa faanehenehehia.

◆ Ahiri e e aai te mau Evanelia, e nehenehe anei te reira e papai-oioi-hia mai teie i muri aˈe i te poheraa o Iesu?

Ia au i te mea papu, ua papaihia te mau Evanelia i te area 41 e 98 T.T. Ua pohe Iesu i te matahiti 33 T.T. E tapao ïa te reira e ua papaihia te mau tupuraa o to ˈna oraraa aita i maoro roa i muri aˈe i te hopea o ta ˈna taviniraa. E patoiraa rahi teie i te parau e e mau aai noa te mau faatiaraa a te mau Evanelia. E hinaarohia te taime e tupu ai te mau aai. A rave na i te Iliade e te Odyssée a te rohipehe Heleni o Homère. Te na ô ra te vetahi e ua tauiui noa e ua mau atura te papai o na aai no nia i te mau aito i te roaraa hoê hanere matahiti. Eaha ïa no nia i te mau Evanelia?

I roto i ta ˈna buka César et le Christ, ua papai te taata tuatapapa o Will Durant e: “Ia nehenehe tau taata rii noa . . . e feruri i te hoê taata mana e te anaanatae rahi mai teie, i te hoê ture morare teitei mai teie e te hoê autaeaeraa faahiahia i rotopu i te taata mai teie, e semeio fifi roa ˈtu â ïa ia tiaturihia ˈtu i to tei faatiahia i roto i te mau Evanelia. I muri aˈe e piti senekele faahaparaa, te maramarama noa râ te mau faataaraa i te oraraa, te huru, e te haapiiraa a te Mesia, e te riro nei ei ohipa faahiahia roa ˈˈe i roto i te tuatapaparaa i te pae Tooa o te râ ma.”

◆ Ua papaihia anei te mau Evanelia i muri aˈe no te faatano i te mau hinaaro o te pǔpǔ Kerisetiano matamua?

Te mârô ra te tahi feia faahapa e na te politita a te pǔpǔ Kerisetiano matamua i turai i te mau papai Evanelia ia papai i te aamu o Iesu aore ra ia anoi i te reira. Ia faahohonuhia râ te mau Evanelia, e itea mai e aita te reira i tavirihia. Ahiri e ua tauihia te faatiaraa a te mau Evanelia no nia ia Iesu ei faahopearaa o te haavare a te mau Kerisetiano no te senekele matamua, no te aha ïa te mau parau auraa ore no nia i te ati Iuda e te mau Etene e vai noa ˈi i roto i te papai?

E itehia te hoê hiˈoraa i roto i te Mataio 6:5-7 i reira to Iesu parauraa e: “Ia pure hoi oe ra, eiaha mai ta te feia haavare, o te hinaaro i te pure tia noa i te mau sunago, e te poro aroâ ra, ia hiˈohia ratou e te taata. Oia mau ta ˈu e parau atu ia outou na, Ua noaa ta ratou utua.” Papu maitai, e haavaraa teie i te mau aratai haapaoraa ati Iuda. Ua parau â Iesu e: “Ia pure outou ra, eiaha ia rahi te parau rii faufaa ore mai ta te mau Etene  ra; o tei manaˈo e tei te rahi o te parau e itehia mai ai ratou.” Na roto i te faahitiraa i ta Iesu parau mai teie, aita te mau papai Evanelia e imi ra e ia noaa mai te taata. Te papai noa ra ratou i te mau parau i faahitihia iho â e Iesu Mesia.

A hiˈo atoa na i ta te Evanelia e faatia ra no nia i te vahine tei haere e hiˈo i te menema o Iesu e tei ite e aita faahou te tino i roto. (Mareko 16:1-8) Ia au ia Gregg Easterbrook, “i roto i te oraraa totaiete i te pae Hitia o te râ no Ropu i tahito ra, eita roa ˈtu e tiaturihia te faaiteraa a te hoê vahine: ei hiˈoraa, e navai te faaiteraa a na ite tane e piti no te pari e ua faaturi te hoê vahine, area râ, eita te faaiteraa a te hoê vahine e pari i te hoê tane.” Oia mau, aita te mau pǐpǐ a Iesu iho i tiaturi i te hoê vahine! (Luka 24:11) Mea fifi roa ïa ia manaˈo e mea feruri-noa-hia teie tupuraa.

E haapapuraa puai te mea e aita e parabole i roto i te mau episetole e te buka Ohipa e e ere na te mau Kerisetiano matamua i amui atu i to roto i te mau Evanelia e na Iesu iho râ i faahiti. Hau atu â, ia faaau-maitai-hia te mau Evanelia e te mau episetole, e itea mai e aita te mau parau a Paulo aita atoa ta vetahi atu feia i papai i te mau Papai Heleni i tavirihia e i parauhia ma te aravihi e na Iesu i faahiti. Ahiri e ua na reira iho â te pǔpǔ Kerisetiano matamua, e ite mai ïa tatou i te tahi noa ˈˈe o te mau parau no roto i te mau episetole i roto i te mau Evanelia. Aita râ hoi, e nehenehe mau ïa tatou e faaoti e e parau tumu to roto i te mau Evanelia e e parau mau.

◆ Eaha ïa no nia i te mau mea e au ra e mea taa ê i roto i te mau Evanelia?

Mea maoro to te feia faahapa parauraa e ua î te mau Evanelia i te mau taa-ê-raa. Ua imi te taata tuatapapa o Durant i te hiˈopoa i te mau Evanelia ma te feruriraa tano—ei mau parau mana i te pae tuatapaparaa. Noa ˈtu e te parau nei oia e te vai ra te mau mea e au ra e mea taa ê i roto, te faaoti nei oia e: “No nia te mau taa-ê-raa i te mau mea nainai roa, eiaha i te mea faufaa; e tuea taa ê te pae rahi o te taatoaraa o te mau evanelia, e ua riro ei hohoˈa taa maitai o te Mesia.”

E pinepine, mea ohie ia faatitiaifaro i te mau mea e au ra e mea taa ê i roto i te mau Evanelia. Ei hiˈoraa: te na ô ra te Mataio 8:5 e “ua haere maira te hoê raatira hanere, parau maitai maira ia [Iesu]” e faaora i te hoê tavini tane. I roto i te Luka 7:3, te taio nei tatou e ua “tono” te ofitie “i te feia paari ati Iuda ra, e parau maitai atu ia [Iesu] e haere mai oia e faaora i [te] tavini.” Ua tono te ofitie i te feia paari ei tia no ˈna. Te na ô ra Mataio e ua parau atu te raatira o te nuu iho ia Iesu no te mea ua rave te taata ra i ta ˈna titauraa na roto i te feia paari tei riro ei auvaha no ˈna. O te hoê noa hiˈoraa teie o te faaite e e nehenehe e faatitiaifarohia te mau mea e parauhia e e mau taa-ê-raa i roto i te mau Evanelia.

 E no nia i te parau a te feia faahapa e eita te mau Evanelia e au i te mau titauraa a te tuatapaparaa mau? Te na ô râ Durant e: “I roto i te horuhoru no ta ratou mau itearaa, ua faaohipa te Faahaparaa i te mau tamataraa e e parau anei, i nia i te Faufaa Apî ma te etaeta roa e e riro roa ˈˈe te mau hanere feia tuiroo no tahito ra—ei hiˈoraa o Hammourabi, Davida, Socrate—ei aai. Noa ˈtu te mau manaˈo oti noa i te pae faaroo o te mau papai Evanelia, ua faatia ratou i te mau tupuraa e rave rahi ta te feia hamani aai noa e tapuni—te faatitiauaraa a te mau aposetolo ia noaa te parahiraa teitei i roto i te Basileia, to ratou horo–ê-raa i to Iesu tapearaahia, te hunaraa a Petero . . . Aita e taata o te taio i teie mau tupuraa e nehenehe e feaa e mea mau te taata e faahitihia ra.”

◆ Te faahohoˈa ra anei te Kerisetianoraa no teie tau i te Iesu o te mau Evanelia?

Ua parau te Fare haapiiraa no nia ia Iesu e aita ta ˈna mau maimiraa i roto i te mau Evanelia i “taotiahia e te mau faaueraa a te mau apooraa a te ekalesia.” Ua itea mai râ i te taata tuatapapa o Wells e te vai ra te hoê abuso rahi i rotopu i te mau haapiiraa a Iesu i vauvauhia i roto i te mau Evanelia e ta te Amuiraa faaroo Kerisetiano. Ua papai oia e: “Aita roa ˈtu e haapapuraa e ua faaroo aˈena te mau aposetolo a Iesu no nia i te Toru Tahi—e ua faaroo ratou i te reira ia ˈna ra. . . . Aita atoa [Iesu] i parau i te hoê parau no nia i te haamoriraa i to ˈna metua vahine o Maria o te faahohoˈahia mai ia Isis, te Arii vahine o te raˈi. E mau mea anaˈe teie e au i te haamoriraa e te mau peu a te Amuiraa faaroo Kerisetiano aita oia i tâuˈa ˈtu.” No reira, eita e nehenehe e hiˈopoa i te faufaaraa o te mau Evanelia na nia i te mau haapiiraa a te Amuiraa faaroo Kerisetiano.

 EAHA TE FAAOTIRAA TA OUTOU E HUTI MAI?

Eaha to outou manaˈo i muri aˈe i te hiˈopoaraa i te mau manaˈo i nia nei? Te vai ra anei te haapapuraa mau e e aai noa te mau Evanelia? E rave rahi o te manaˈo e e ere te mau mârôraa e te mau feaaraa i faahitihia no nia i te huru parau mau o te mau Evanelia i te mea papu. No te haapapu i to outou iho manaˈo, mea titauhia ia taio outou i te mau Evanelia ma te feruriraa mahorahora noa. (Ohipa 17:11) Ia hiˈo outou i te au-maite-raa, te haavare ore, e te tano o te mau Evanelia ia faataa te reira i te huru taata o Iesu, e ite mai outou e e ere roa ˈtu teie mau faatiaraa i te hoê haapueraa fabula. *

Mai te peu e e hiˈopoa maitai outou i te Bibilia e e faaohipa outou i ta ˈna mau aˈoraa, e ite mai outou e e nehenehe te reira e taui i to outou oraraa e ia maitai aˈe. (Ioane 6:68) E parau mau iho â râ te reira no te mau parau a Iesu i papaihia i roto i te mau Evanelia. Hau atu â, e nehenehe outou e haapii mai i te oraraa faahiahia roa no a muri aˈe e tiai maira i te huitaata faaroo.—Ioane 3:16; 17:3, 17.

[Nota i raro i te api]

[Tumu parau tarenihia i te api 7]

Haapapuraa e e faatiaraa parau mau

TAU matahiti aˈenei, ua faˈi te hoê taata papai aamu no te mau hohoˈa taviri e taata i faahapa na i te Bibilia no Auckland e: “A tahi ra i roto i to ˈu oraraa vau i rave ai i te ohipa matamua e titauhia i te hoê papai vea: e haapapu i ta ˈu mau parau. . . . E ua hitimaue au no te mea e ere te mea ta ˈu e taio ra [i roto i te mau Evanelia] i te aai e e ere atoa i te aamu feruri-noa-hia fatata roa i te mea mau. E faatiaraa tera. E faatiaraa tumu e e faatiaraa ma te arai i te mau ohipa taa ê . . . E taota to te faatiaraa, e te vai ra taua taota ra i roto i te mau Evanelia.”

Oia atoa, ua parau o E. M. Blaiklock, orometua haapii i te mau classique i te Fare haapiiraa tuatoru no Autearoa e: “Te parau nei au e e taata tuatapapa vau. E rave au i te mau Classique ia au i ta te taata tuatapapa huru raveraa. E te parau atu nei au ia outou e mea papu aˈe e e parau mau te oraraa, te poheraa, e te tia-faahou-raa o te Mesia i te rahiraa o te mau tupuraa i tahito ra.”

[Hohoˈa fenua/Hohoˈa i te mau api 8, 9]

(Hiˈo i te papai)

PHOINIKIA

GALILEA

Anavai Ioridana

IUDEA

[Hohoˈa]

“Mea papu aˈe e e parau mau te oraraa, te poheraa, e te tia-faahou-raa o te Mesia i te rahiraa o te mau tupuraa i tahito ra.”—E. M. BLAIKLOCK, OROMETUA HAAPII

[Faaiteraa i te tumu]

Mau hohoˈa fenua i muri mai: Niuhia i nia i te hoê hohoˈa fenua faatiahia e te Pictorial Archive (Near Eastern History) Est. and Survey of Israel.