Ihea outou e nehenehe ai e fariu atu e imi i te aˈoraa maitai?

Ua riro mai te “tapihaa o te aˈoraa” ei ohipa imiraa ehia miria dala Marite te apîraa i te matahiti hoê. Te hinaaro ra te taata i te tauturu. Te na ô ra te aivanaa ea feruriraa o Heinz Lehmann e: “[I roto i te totaiete no teie tau,] te vai ra te navai ore i te pae haapiiraa e totiale. E ere faahou te mau faufaa i te pae faaroo mai mutaa ihora. Mea papu ore roa ˈtu â te mau utuafare . . . , e no reira ua painu roa te taata.” Te na ô ra te papai buka o Eric Maisel e: “Te imi ra te feia i fariu na i nia i to ratou tahuˈa tahutahu, orometua aore ra taote o te utuafare no to ratou mau fifi i te pae feruriraa, varua e tino, i te pahonoraa i roto i te mau buka tauturu.”

UA HAAMAU te Taatiraa Marite o te Ihi feruriraa i te hoê pǔpǔ ohipa no te hiˈopoa i teie tapihaa e ruperupe noa ˈtura. Ua parau ratou e te vai ra “te ravea rahi roa no te tauturu i te taata taitahi ia taa ia ratou iho e ia vetahi ê . . . , teie râ, te teoteo e te horuhoru noa ˈtura te mau parau faateniteni e te mau upoo parau o teie mau porotarama.” Te na ô ra te hoê papai vea a te Toronto Star e: “A ara maitai i te rahiraa aˈoraa pae faaroo e pae varua hape. . . . A ara iho â râ i te mau buka tauturu, ripene aore ra rururaa haapiiraa atoa, o te pûpû rahi roa, i roto i te hoê taime poto roa, no maa tutavaraa aore ra haavîraa ia ˈna iho iti roa.” Parau mau, mea rahi roa te taata e tamata mau nei i te tauturu i te feia e hinaaro ra. Teie râ, mea peapea mau e te vai ra te tahi mau taata aroha ore o te imi nei i te apî i nia i te moemoe e te mauiui o te taata, a ore ai e horoa ˈtu i te tauturu e te ravea mau.

Ia au i te reira, eaha te pu o te tauturu ta tatou e nehenehe e tiaturi? Ihea e noaa mai ai ia tatou te mau aˈoraa ohie o te manuïa noa?

Te pu o te aratairaa hape ore

Ua parau te taata poro Marite no te senekele 19 o Henry Ward Beecher e: “O te Bibilia te aveia a te Atua no te aratai ia outou, eiaha outou ia iri, e no te faaite atu teihea te tapaeraa, e nafea ia tapae ma te ore e û atu i te toˈa aore ra i te haapueraa one.” Ua parau te tahi atu â taata no nia i te Bibilia e: “Aita e taata e hau aˈe i te mau Papai; e faaaraara e e faahohonu atu â te buka i to tatou mata.” No te aha e tia ˈi ia tatou ia hiˈopoa maitai i teie pu?

Te faaite maira te Bibilia i to ˈna iho faufaa: “Te mau Papai atoa, e mea faaurua ïa e te Atua e e mea faufaa ei haapiiraa, ei faahaparaa, ei faatitiaifaroraa i te mau mea, ei aˈoraa ma te parau-tia ra, ia aravihi roa te taata no te Atua, ia ineine roa no te mau ohipa maitatai atoa ra.” (Timoteo 2, 3:16, 17, MN) No ǒ mai te tumu parau o te Bibilia i te Tumu o te ora ra te Atua ra o Iehova. (Salamo 36:9) No te reira tiaraa to ˈna, ua ite maite oia mea nafea to tatou hamaniraahia, mai ta te Salamo 103:14 e haamanaˈo maira: “Ua ite hoi oia i to tatou huru; te manaˈo ra  oia e, e repo tatou nei.” E nehenehe ïa tatou e tiaturi roa ino i te faufaa o te Bibilia.

Oia mau, e rave rahi faaueraa tumu e aratairaa i roto i te Bibilia o te nehenehe e faaohipahia e noaa mai ai te maitai i roto i te mau huru tupuraa atoa ta outou e farerei. Na roto i te reira, te parau maira te Atua e: “Teie te eˈa: e na reira i te haere.” (Isaia 30:21) E nehenehe mau anei te Bibilia e haamâha i te mau hinaaro o te taata i teie mahana? E hiˈo anaˈe.

E haamâha te Bibilia i to tatou mau hinaaro . . .

No te faaruru i te ahoaho. Te parau maira te Bibilia e: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” (Philipi 4:6, 7) Ua riro anei te pure ei tauturu mau no te faaruru i te ahoaho i te pae manaˈo horuhoru i taaihia i te fifi i te pae ihiihi, i te hamani-ino-raa i te pae taatiraa e na roto i te parau, aore ra i te poheraa o te hoê taata here? A hiˈo na i te tupuraa i muri nei.

Te faˈi ra o Jackie i muri aˈe i to ˈna iteraa e ua rave-ino-hia to ˈna tamahine: “Eita e nehenehe e parau i te manaˈo hohonu faahapa no te oreraa i manuïa i te paruru i to oe tamarii. Ua tia ia ˈu i te aro i te mau manaˈo hohonu o te inoino e te riri. Te haamata ra teie mau manaˈo i te tuino i to ˈu oraraa. Te hinaaro ra vau ma te peapea ia paruru Iehova i to ˈu mafatu.” I muri aˈe i to ˈna taioraa, e taio-faahou-raa i te Philipi 4:6, 7, ua rohi hua oia i te faaohipa i ta ˈna aˈoraa. “Te pure nei au i te mau mahana atoa, a ani ai ma te tuutuu ore eiaha vau ia ino roa ˈtu i to ˈu mau manaˈo hepohepo, e ua tauturu mau Iehova ia ˈu ia faatupu i te hoê mafatu hau e te oaoa. Ua itea mau â ia ˈu te hau i roto mai ia ˈu,” o ta Jackie ïa e faatia ra.

E nehenehe atoa outou e farerei i te hoê tupuraa eita e noaa ia outou i te haavî aore ra i te faatitiaifaro e o te hopoi mai i te ahoaho i te pae manaˈo horuhoru. Na roto i te peeraa i te aˈoraa Bibilia e pure, e nehenehe outou e faaruru ma te manuïa. Te faaitoito maira te papai salamo na roto i teie mau parau: “E tuu atu i to parau ia Iehova; e tiaturi ia ˈna, e na ˈna e faatupu i te reira.”—Salamo 37:5.

I te faaitoitoraa. Ua faahiti te papai salamo i teie haamauruururaa: “Ua hinaaro vau, e Iehova, i te vahi moˈa ra o to fare, e te vairaa o te sekene o to oe ra hanahana. Te taahi nei tau avae i te vahi papu; e haamaitai â vau ia Iehova i roto i te mau amuiraa ra.” (Salamo 26:8, 12) Te faaitoitohia ra tatou e te Bibilia e amui tamau no te haamori ia Iehova. Nafea teie amuiraa e haamâha ˈi i to tatou mau hinaaro? Eaha tei itea mai e vetahi ê?

Te faatia ra o Becky e: “Eita to ˈu mau metua e tavini ia Iehova, no reira raua e patoi ai ia ˈu ia tamata vau i te rave i te hoê ohipa i taaihia i te taviniraa i te Atua. E tia ia ˈu ia tutava rahi no te haere i te mau putuputuraa.” Te manaˈo nei Becky e e rave rahi haamaitairaa tei tae mai i nia ia ˈna no te mea ua rohi oia i te haere tamau i te mau putuputuraa Kerisetiano. “Ua haapaari te mau putuputuraa i to ˈu faaroo e ia nehenehe au e faaruru i te mau faaheporaa o te mau mahana atoa ei tamarii haapii, ei tamahine, e ei tavini a Iehova. E taa ê roa te taata i te Piha a te Basileia i te mau tamarii haapii i te fare haapiiraa! E haapao mai e e tauturu mai ratou, e e faaitoito noa iho â ta matou mau aparauraa. E hoa mau ratou.”

Oia, na roto i te peeraa i te faaueraa Bibilia e haaputuputu tamau, e vaiiho tatou ia Iehova ia haamâha i to tatou hinaaro i te faaitoitoraa. I reira tatou e ite ai e e parau mau teie mau parau a te papai salamo: “O te Atua to matou haapuraa e to matou etaeta, e tauturu fatata ia roohia e te ati ra.”—Salamo 46:1.

I te ohipa faufaa e te mauruuru. “Ia itoito outou, eiaha e aueue, ia rahi â te rave i te ohipa a te Fatu eiaha e faaea, ua ite hoi outou e, e ere i te mea faufaa ore te ohipa a te Fatu ta outou e rave na,” o ta te Bibilia ïa e faaitoito maira. (Korinetia 1, 15:58) Mea mauruuru mau anei “te ohipa a te Fatu”? E faatupu mau anei te taviniraa Kerisetiano i te hoê mea faufaa?

 Te faaite ra o Amelia i to ˈna manaˈo hohonu: “Ua haapii au i te Bibilia i na feia faaipoipo o te fatata roa ra i te taa. Ua tauturu atoa vau i te hoê vahine ua taparahi-pohe-hia ta ˈna tamahine. Te haapeapea rahi roa ra te vahine no te huru papu ore o tei pohe. I roto i na hiˈoraa atoa ra, ua hopoi mai te faaohiparaa i te mau faaueraa tumu Bibilia i te hau e te tiaturiraa i roto i to ratou oraraa. Te ite nei au i te oaoa rahi e te mauruuru no te mea ua rave au i te hoê tuhaa i te tautururaa ia ratou.” Te na ô ra o Scott e: “Ia farerei outou i te hoê tupuraa maitai i roto i te taviniraa, ia haamata outou i te hoê haapiiraa Bibilia apî, aore ra ia manuïa rii outou i roto i te pororaa ma te faanaho-ore-hia, e paraparau noa outou no nia i te reira ehia matahiti i te maoro. E oraora noâ tauâ mau manaˈo hohonu e hitahitaraa ra i te mau taime atoa e faatia ˈi outou i te reira! Mea na roto i te taviniraa e noaa mai ai te oaoaraa rahi e te maoro roa ˈˈe.”

Mea maramarama maitai, ua haamâha te faaohiparaa i te faaueraa Bibilia e riro mai ei mau tavini itoito i te hinaaro o teie mau taata i te ohipa faufaa e te mauruuru. Te titau-atoa-hia ra outou e apiti i roto i teie ohipa haapiiraa ia vetahi ê no nia i te mau eˈa e te mau faaueraa tumu a te Atua, a faufaa-atoa-hia ˈi outou iho.—Isaia 48:17; Mataio 28:19, 20.

Te faufaaraahia i te Parau a te Atua

Ma te feaa ore, ua riro te Bibilia ei pu papu no te mau faaueraa e nehenehe e faaohipahia i roto i te ao i teie mahana. Ia faufaahia tatou i te reira, e tia ia tatou ia tutava tamau. E tia ia tatou ia taio, ia haapii, ia feruriruri tamau i te reira. Ua faaitoito Paulo e: “E haamanaˈo papu i teie nei mau parau; o ta oe ïa e rave eiaha e faaea, ia ite te taata atoa i te tupuraa o to oe ite.” (Timoteo 1, 4:15; Deuteronomi 11:18-21) Te haapapu maira te Atua e ia rohi outou i te faaohipa i ta ˈna aˈoraa e itehia ra i roto i te Bibilia, e manuïa outou. Te tǎpǔ nei oia e: “E tiaturi ia Iehova . . . Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.”—Maseli 3:5, 6.

[Hohoˈa i te api 31]

Mea mauruuru e te î maitai te oraraa maoti te peeraa i te aˈoraa Bibilia