Aamu

Tauturuhia ia haavî i to ˈu mamahu

FAATIAHIA E RUTH L. ULRICH

Ua topa roa to ˈu morare e ua taˈi au i te uputa fare o te ekalesiatiko. No parau noa maira oia i te mau pariraa haavare e rave rahi no nia ia Charles T. Russell, i riro na ei peretiteni matamua o te Watch Tower Bible and Tract Society. E faataa ˈtu vau nafea to ˈu, ei potii apî, haereraa e farerei i te taata.

UA FANAUHIA vau i roto i te hoê utuafare faaroo rahi i te hoê vahi faaapuraa i Nebraska, Hau Amui, i te matahiti 1910. E taio na matou, te utuafare taatoa, i te Bibilia i te mau poipoi e te mau po atoa ia paia matou. Na Papa e haapao na i te haapiiraa Sabati a te ekalesia Méthodiste i roto i te hoê oire iti, o Winside, fatata e 6 kilometera i te atea i ta matou vahi faaapuraa. E pereoo to matou e hutihia e te puaahorofenua ma te paruruhia te mau haamaramarama, no reira, noa ˈtu te huru o te mahana, e tae iho â matou i te pureraa i te poipoi Sabati.

I te 8raa o to ˈu matahiti, ua roohia to ˈu taeae aiû i te maˈi poliomyélite, e ua afai o Mama ia ˈna i te hoê fare utuuturaa maˈi i Iowa no te rapaau ia ˈna. Noa ˈtu ta ˈna mau tutavaraa e haapao ia ˈna, ua pohe to ˈu taeae i ǒ. Teie râ, i taua taime atoa ra, i Iowa, ua farerei o Mama i te hoê o te Feia haapii Bibilia, te iˈoa o te mau Ite no Iehova i tera ra tau. Mea rahi ta raua mau aparauraa, e ua apee atoa Mama i te vahine ra i te tahi mau putuputuraa a te Feia haapii Bibilia.

I to Mama hoˈiraa mai i te fare, ua taitai mai oia e rave rahi buka o te mau Études des Écritures, i neneihia e te Taiete Watch Tower. Aita i maoro, ua papu aˈera ia ˈna e te haapii ra te Feia haapii Bibilia i te parau mau e mea hape te mau haapiiraa e mea pohe ore te nephe taata e e haamauiuihia te feia iino e a muri noa ˈtu.—Genese 2:7; Koheleta 9:5, 10; Ezekiela 18:4.

 Ua inoino roa râ o Papa, e ua patoi oia i te mau tutavaraa a Mama e haere i te mau putuputuraa a te Feia haapii Bibilia. Ua afai noa oia ia mâua to ˈu taeae paari aˈe, o Clarence, i te pureraa na muri ia ˈna. Aita anaˈe râ o Papa i te fare, e haapii o Mama i te Bibilia ia mâua. I te pae hopea, ua nehenehe mâua, ei tamarii, e faaau i te mau haapiiraa a te Feia haapii Bibilia e ta ta matou ekalesia.

Ua haere tamau mâua o Clarence i te haapiiraa Sabati i te fare pure, e ua ui oia i te tahi mau uiraa i te orometua haapii, ta ˈna i ore i pahono. I to mâua hoˈiraa i te fare, ua faatia aˈera mâua i to mâua metua vahine, e ua tupu aˈera te tahi mau aparauraa roa i nia i teie mau tumu parau. I te pae hopea, ua faarue au i te ekalesia e ua haamata aˈera i te haere i te mau putuputuraa a te Feia haapii Bibilia e o Mama, e aita i maoro i muri aˈe, ua na reira atoa o Clarence.

Te haavîraa i te mamahu

I te avaˈe Setepa 1922, ua haere mâua Mama i te tairururaa faahiahia roa a te Feia haapii Bibilia i Cedar Point, Ohio. Te haamanaˈo noa ra vau i tera tiapai ahu e mahora noa ra a faaitoito ai o Joseph F. Rutherford, te peretiteni o te Taiete Watch Tower i taua tau ra, i na hau atu i te 18 000 feia i putuputu mai, na roto i te mau parau i papaihia i nia i te ahu: “A faaite i te Arii e te Basileia.” Ua putapû roa vau e ua taa aˈera ia ˈu e mea ru ia faaite ia vetahi ê i te parau apî maitai o te Basileia o te Atua.—Mataio 6:9, 10; 24:14.

I te mau tairururaa i tupu mai te matahiti 1922 i te matahiti 1928, e mau anairaa faaotiraa tei ravehia, e ua faaôhia te mau poroi i roto i te mau api parau iti ta te Feia haapii Bibilia i opere i na tau ahuru mirioni taata e ati aˈe te ao nei. Mea pararai e mea roa roa vau—e parau na ratou ia ˈu te lévrier—e e haere ru na vau i tera e tera fare e opere i teie mau poroi i neneihia. Ua au roa vau i teie ohipa. No te paraparau râ i te mau uputa, no te faaite roa ˈtu i te taata i te parau o te Basileia o te Atua, mea ê ïa.

Ua ite outou, i te mea e mea mamahu roa vau, e taiâ na vau ia titau manihini o Mama e rave rahi fetii i te fare i te mau matahiti atoa. E moe au i roto i to ˈu piha e e faaea vau i reira. I te hoê taime, ua hinaaro o Mama e ia patahia te utuafare taatoa  i te hohoˈa, e ua parau mai oia ia ˈu e haere mai i rapae. Aita vau i hinaaro e haere ia ratou ra, e ua tuô vau a huti ai oia ia ˈu i rapaeau i to ˈu piha.

Ua tae mai râ te mahana, i reira to ˈu faaotiraa e tuu i te tahi mau papai Bibilia i roto i te hoê pute. Ehia taime to ˈu parauraa e, “Eita e maraa ia ˈu,” i muri iho râ, ua na ô aˈera vau e, “E tia ia ˈu ia tamata.” I te pae hopea, ua poro atura vau. I muri iho, ua oaoa roa vau i te mea e ua faaitoito vau i te haere. To ˈu oaoa rahi roa ˈˈe, o to ˈu ïa raveraa i te ohipa pororaa, eiaha râ a rave mau ai au i te reira. I reira hoi to ˈu farereiraa i te ekalesiatiko ta ˈu i faahiti i te omuaraa e to ˈu haereraa ma te taˈi. A mairi noa ˈi te tau, ua noaa ia ˈu i te paraparau i te taata i to ratou uputa fare maoti te tauturu a Iehova, e ua rahi mai to ˈu oaoa. I muri aˈe, i te matahiti 1925, ua faataipe au i ta ˈu euhe ia Iehova na roto i te bapetizoraa i roto i te pape.

Te haamataraa i te taviniraa ma te taime taatoa

I te 18raa o to ˈu matahiti, ua hoo mai au i te hoê pereoo e te moni ta te hoê tatie i horoa mai e ua rave au i te taviniraa pionie, oia hoi te taviniraa ma te taime taatoa. E piti matahiti i muri aˈe, i te matahiti 1930, ua farii mâua te hoê tuahine pionie i te hoê tuhaa pororaa. I taua tau ra, ua haamata atoa o Clarence i te taviniraa pionie. Aita i maoro i muri aˈe, ua farii oia i te hoê aniraa e tavini i te Betela, te pu rahi a te mau Ite no Iehova i Brooklyn, New York.

I taua area taime ra, ua taa to mâua nau metua, no reira, ua hamanihia ˈtura to mâua Mama nohoraa tavere e ua haamata ˈtura mâua i te taviniraa pionie. Te tupu ra ïa te Topatariraa Rahi i te mau Hau Amui. Ua riro te tamauraa i te ohipa pionie ei tautooraa, ua faaoti râ mâua eiaha e tuu. Ei tauiraa i te mau papai Bibilia, e horoahia mai te moa, te huero moa e te mau maa tupu, tae noa ˈtu te mau pile tahito e te aluminium i faaruehia. E hoo atu mâua i te mau pile e te aluminium ia noaa mai te moni no te titô i te pereoo e no te aufau i te tahi atu mau haamâuˈaraa. Ua haapii atoa vau i te tahinu i te pereoo e i te taui i te hinu pereoo no te haaputu i te moni. Ua ite mâua i to Iehova horoaraa mai i te ravea ia faaruru mâua i te mau fifi, ia au i ta ˈna i tǎpǔ.—Mataio 6:33.

I roto i te mau tuhaa taviniraa mitionare

I te matahiti 1946, ua titau-manihini-hia vau i te 7raa o te pǔpǔ o te Haapiiraa Bibilia no Gileada a te Taiete Watchtower, i pihai iho ia South Lansing, New York. E tae roa mai i reira, ua tavini na mâua Mama ei pionie hau atu i te 15 matahiti i te maoro, tera râ, aita oia i hinaaro e haafifi i ta ˈu ravea maitai e fanaˈo i te hoê haapiiraa no te taviniraa mitionare. No reira, ua faaitoito mai oia ia ˈu ia farii i te haamaitairaa taa ê e haere i te Haapiiraa no Gileada. I muri aˈe i te faatuiteraa, o Martha Hess no Peoria, Illinois, to ˈu hoa mitionare. Ua tonohia mâua, e e piti tuahine ê atu, i Cleveland, Ohio, hoê matahiti a tiai noa ˈi matou i te hoê tuhaa taviniraa i te ara.

Ua tupu taua taviniraa ra i te matahiti 1947, ua tonohia mâua Martha i Hawaii. I te mea e mea ohie ia haere i reira, ua haere mai o Mama e faaea i pihai iho ia mâua i te oire o Honolulu. Te ino ra to ˈna ea, no reira ua tauturu vau ia Mama a rave noa ˈi i ta ˈu mau ohipa mitionare. Ua nehenehe au e haapao ia ˈna e tae noa ˈtu i to ˈna poheraa i Hawaii i te matahiti 1956, i te 77raa o to ˈna matahiti. I to mâua taeraa ˈtu i ǒ, fatata 130 Ite to Hawaii, i te poheraa râ o Mama, ua hau atu ïa i te hoê tausani, e aita i hinaaro-faahou-hia te mau mitionare.

I muri iho, ua tae mai ta mâua Martha rata a te Taiete Watch Tower e pûpû maira i te hoê tuhaa taviniraa i Tapone. Ta mâua tapitapiraa matamua, oia ïa e nehenehe anei ta mâua e haapii i te reo Tapone ia au i to mâua faito matahiti. I taua taime ra, e 48 matahiti to ˈu, e e 44 matahiti noa to Martha. Ua vaiiho râ mâua i te mau mea i roto  i te rima o Iehova e ua farii mâua i te tuhaa taviniraa.

I muri aˈe noa i te tairururaa o te mau nunaa atoa i tupu i te Yankee Stadium e te Polo Grounds, New York City, i te matahiti 1958, ua reva mâua i Tokyo na nia i te pahi. Ua tahurihuri noa matou i te hoê mataˈi rorofai a tapiri atu ai matou i te uahu i Yokohama, i reira to mâua farereiraa ia Don raua o Mabel Haslett, ia Lloyd raua o Melba Barry, e te tahi atu mau mitionare. I taua tau ra, 1 124 noa Ite i Tapone.

Ua haamata oioi aˈera mâua i te haapii i te reo Tapone e i te apiti i roto i te taviniraa na te mau fare. Ma te faaohipa i te piapa Beretane, e papai mâua i ta mâua mau faaiteraa Tapone, ta mâua e taio. E pahono mai te mau fatu fare mai teie, “Yoroshii desu” aore ra, “Kekko desu,” te auraa ra, “Mea maitai roa” aore ra, “Mea maitai,” ia au i ta mâua i haapii. Aita noa râ mâua i taa e te anaanatae ra anei te fatu fare aore ra aita, no te mea e faaohipa-atoa-hia taua mau parau ra no te faaite i te hoê patoiraa. Tei te huru noa ïa o te taˈiraa reo aore ra te hohoˈa mata o te taata. Ua titauhia te taime ia taa ia mâua teie mau mea.

E mau tupuraa i tamahanahana i to ˈu mafatu

I te hoê mahana, a faaruru noa ˈi i te fifi o te reo, ua haere au i te hoê Taiete Mitsubishi no te piha taotoraa e ua farerei au i te hoê vahine e 20 matahiti. Ua haere maitai oia i mua i roto i te ite i te Bibilia e ua bapetizohia oia i te matahiti 1966. Hoê matahiti i muri aˈe, ua haamata oia i te taviniraa pionie e aita i maoro roa, ua nominohia oia ei pionie taa ê. Aita ta ˈna taviniraa i taui mai reira mai. Ua riro noa ei faaitoitoraa no ˈu ia ite au e ua faaohipa oia i to ˈna taime e to ˈna puai mai to ˈna apîraa mai i roto i te taviniraa ma te taime taatoa.

Mea fifi roa no te feia iho â râ e ora ra i roto i te  hoê totaiete e ere i te Kerisetiano, ia turu i te parau mau Bibilia. Tera râ, e rave rahi tausani taata i farerei i teie fifi, tae noa ˈtu e rave rahi o ta ˈu i haapii i te Bibilia. Ua faarue ratou i te mau fata bouddhiste e te mau paˈepaˈe shinto e itehia na i roto i te mau fare Tapone. I te mea e e parau na te mau fetii i te tahi taime e mau ohipa faatura ore te reira i te mau tupuna i pohe, e tia ïa i te feia i anaanatae apî ia faaitoito i te na reira. Te haamanaˈo ra ta ratou mau ohipa itoito i ta te mau Kerisetiano matamua o tei tanina i te mau buka i taaihia i te haamoriraa hape i te auahi.—Ohipa 19:18-20.

Te haamanaˈo ra vau i te hoê taata haapii i te Bibilia, te hoê metua vahine, e opua ra e haere e faaea i Tokyo e to ˈna utuafare. Ua hinaaro oia i te fare aita e taoˈa i taaihia i te haamoriraa etene to roto. Ua faaite atura oia i to ˈna mau hinaaro i ta ˈna tane, e ua farii oia ma te aau tae. Ua parau maira oia ia ˈu i te reira ma te oaoa, ua haamanaˈo râ oia i muri iho e ua puohu na oia i te hoê farii rahi maremora moni rahi, ta ˈna i hoo mai no te mea ua parauhia e na te reira e faatupu i te oaoa i roto i te fare. I te mea e ua manaˈo oia e ua taaihia teie farii i te haamoriraa hape, ua vavahi aˈera oia i te reira e te hamara e faarue atura.

Te iteraa i teie vahine e vetahi ê atu i te faarueraa ma te aau tae i te mau taoˈa moni rahi i taaihia i te haamoriraa hape e te haamataraa ma te itoito i te hoê oraraa apî i roto i te taviniraa a Iehova, e tupuraa faahiahia e te oaoa roa ïa teie no ˈu. Ua haamauruuru pinepine au ia Iehova i to ˈu fanaˈoraa i na hau atu i te 40 matahiti i roto i te taviniraa mitionare i Tapone.

“E mau semeio” i teie nei tau

Ia haamanaˈo vau i ta ˈu na hau atu i te 70 matahiti i roto i te taviniraa ma te taime taatoa, e faahiahia vau i te mea ta ˈu e parau e mau semeio i teie nei tau. Ei potii mamahu, aita roa ˈtu vau i manaˈo e e nehenehe au e horoa i to ˈu oraraa taatoa no te paraparau roa ˈtu i te taata no nia i te hoê Basileia ta te rahiraa e ore e hinaaro e faaroo. Tera râ, ua noaa ia ˈu i te na reira e ua ite au e mau hanere, aore ra e mau tausani, taata ê atu i na reira. E ua na reira ratou ma te aravihi roa, inaha, ua maraa  na hau atu i te hoê tausani Ite i Tapone i to ˈu taeraa ˈtu i reira i te matahiti 1958, i nia hau atu i te 222 000 i teie mahana!

I to mâua Martha tae-matamua-raa ˈtu i Tapone, ua noho mâua i te amaa i Tokyo. I te matahiti 1963, ua patuhia te tahi mau fare e ono tahua a te amaa i taua vahi ra, e mai reira mai ua noho mâua i reira. I te avaˈe Novema 1963, tei rotopu mâua i na 163 taata i tae i te oreroraa parau avariraa a Lloyd Barry, ta matou tiaau o te amaa. Mai reira mai, ua naeahia e 3 000 Ite i Tapone.

Mea oaoa roa ia ite i te maraaraa rahi o te ohipa pororaa i te Basileia, ua naeahia hau atu i te 14 000 Ite i te matahiti 1972, a faaotihia ˈi te hoê amaa apî faaaanohia i te oire o Numazu. I te matahiti 1982 râ, ua hau atu i te 68 000 taata poro i te Basileia i Tapone, e ua hamanihia te tahi mau fare rahi atu â a te amaa i te oire o Ebina, fatata e 80 kilometera i te atea i Tokyo.

I taua taime atoa ra, ua faaapîhia te amaa tahito i ropu ia Tokyo. I muri iho, ua riro te reira ei fare mitionare no na hau atu i te 20 mitionare i tavini i Tapone e 40, aore ra e 50 matahiti, aore ra mea maoro, tae noa ˈtu ia mâua Martha Hess, to ˈu hoa mitionare maoro. Te faaea atoa ra te hoê taote e ta ˈna vahine tuati, i to mâua fare. Na raua e haapao ra ma te here i to mâua mau hinaaro i te pae ea. Aita i maoro aˈenei, ua apiti atoa mai te tahi atu tuati vahine, e e haere mai te mau tuahine Kerisetiano ei tauturu i te mau tuati i te roaraa o te mahana. E piti melo o te fetii o te Betela i Ebina te haere mai, te tahi i muri i te tahi, no te faaineine i te maa e te tamâ i to mâua fare. Ua hamani maitai mau â o Iehova ia mâua.—Salamo 34:8, 10.

Ua tupu te hoê ohipa faufaa roa i roto i to ˈu oraraa mitionare i te avaˈe Novema i mairi, e 36 matahiti i muri aˈe i te avariraahia te fare e nohohia ra i teie nei e e rave rahi o matou mea maoro to matou taviniraa ei mitionare. I te 13 no Novema 1999, tei rotopu vau i na hau atu i te 4 486, tae noa ˈtu e mau hanere Ite mea maoro i roto i te parau mau no ǒ mai e 37 fenua, i tae i te avariraa o te mau fare faarahihia i te amaa Tapone a te Watch Tower Bible and Tract Society i Ebina. I teie nei, fatata ratou i te 650 melo o te fetii o te amaa.

I te roaraa fatata e 80 matahiti mai to ˈu haamataraa ma te haama i te haere na tera e tera fare e faaite i te mau poroi Bibilia, ua riro mau â o Iehova ei tauturu puai no ˈu. Ua tauturu mai oia ia haavî au i to ˈu mamahu. Te tiaturi papu nei au e e nehenehe Iehova e faaohipa i te taata atoa e tiaturi ia ˈna, tae noa ˈtu te feia mamahu roa mai ia ˈu. E e oraraa anaanatae mau â to ˈu i to ˈu paraparauraa i te feia ěê no nia i to tatou Atua, o Iehova!

[Hohoˈa i te api 21]

E o Mama e o Clarence, e haere maira e hiˈo ia mâua mai te Betela mai

[Hohoˈa i te api 23]

Te mau melo o ta mâua pǔpǔ e haapii ra i rapaeau i te Haapiiraa no Gileada i South Lansing, New York

[Hohoˈa i te api 23]

Pae aui: O vau, o Martha Hess, e o Mama i Hawaii

[Hohoˈa i te api 24]

Pae atau: E mau melo o to matou fare mitionare i Tokyo

[Hohoˈa i te api 24]

I raro: E to ˈu hoa mitionare mea maoro, o Martha Hess

[Hohoˈa i te api 25]

Ua avarihia ta matou mau fare faarahihia a te amaa i Ebina i te avaˈe Novema i mairi