A faatura i te feia i haamanahia i nia ia outou
A faatura i te feia i haamanahia i nia ia outou
“E faaturatura ˈtu i te taata atoa. E aroha ˈtu i te hui taeae. E mǎtaˈu i te Atua. E faateitei i te arii.”—PETERO 1, 2:17.
1, 2. Nafea te taata e hiˈo ai i te mana i teie mahana? No te aha?
“E MAU tiaraa atoa to te mau tamarii. Eita roa ˈtu ratou e faatura i te mau metua,” ta te hoê ïa metua vahine e autâ ra. Te na ô ra te hoê parau tapiri e: “A patoi i te mana.” E piti noa ˈˈe manaˈo teie i te hoê tupuraa e rahi roa ra i teie mahana mai ta outou paha e ite ra. Ua parare roa te faatura ore i te mau metua, te mau orometua haapii, te mau paoti ohipa, e te feia toroa a te hau na te ao atoa nei.
2 E haapee noa paha te vetahi i to ratou tapono a na ô ai e: ‘Eita iho â e au i te feia e tiaraa mana to ratou ia faatura ˈtu vau.’ I te tahi mau taime, mea fifi paha ia patoi i te reira. E tae tamau noa mai hoi te mau parau apî e rave rahi no nia i te feia toroa a te hau haerea piˈo, te mau paoti ohipa nounou moni, te mau orometua haapii aravihi ore, e te mau metua hamani ino. Auaa râ, mea iti te mau Kerisetiano e hiˈo ra i tei haamanahia i roto i te amuiraa mai teie.—Mataio 24:45-47.
3, 4. No te aha e tia ˈi i te mau Kerisetiano ia faatura i te feia e tiaraa mana to ratou?
3 Ei Kerisetiano, mea “titau-taa-ê-hia” ia faatura tatou i te feia e faaohipa ra i te mana o teie nei ao. Ua aˈo te aposetolo Paulo i te mau Kerisetiano e “auraro maite . . . i te feia mana toroa ra. Aore roa hoi e mana maori râ no ǒ mai i te Atua ra; te feia mana e vai nei, ua haapaohia ïa e te Atua.” (Roma 13:1, 2, 5, MN; Petero 1, 2:13-15) Ua faaite atoa Paulo i te hoê tumu papu e auraro ai i te feia mana i roto i te utuafare: “E te mau vahine ra, e auraro maite outou i ta outou mau tane, o te mea au ïa i te Fatu nei. E te mau tamarii ra, e faaroo i to outou mau metua i te mau mea atoa nei, e mea mauruuru hoi te reira i te Fatu nei.” (Kolosa 3:18, 20) E au i te mau matahiapo o te amuiraa to tatou faatura no te mea ‘ua faarirohia ratou e te varua moˈa ei tiaau, ia faaamu ratou i te amuiraa a te Atua.’ (Ohipa 20:28) E faaturaraa ia Iehova ia faatura tatou i te mau taata haamanahia. Parau mau, tei te parahiraa matamua noa iho â i roto i to tatou oraraa te faaturaraa i te mana o Iehova.—Ohipa 5:29.
4 A haamanaˈo noa ˈi tatou i te mana teitei roa o Iehova, e rave anaˈe i te hiˈoraa o vetahi tei ore i faatura i tei haamanahia e o vetahi tei faatura.
E aratai te faatura ore i te farii-ore-raa
5. Eaha te haerea faatura ore o Mikala i nia ia Davida, e ua aratai te reira i te aha?
5 Maoti te aamu o te arii Davida, e ite tatou eaha te manaˈo o Iehova i te feia e vahavaha i te mana no ǒ mai i te Atua ra. I to Davida raveraa e ia hopoihia mai te afata o te faufaa i Ierusalema, “ite atura” ta ˈna vahine o Mikala “i taua arii ra ia Davida i te ouˈaraa e te oriraa i mua ia Iehova; vahavaha ˈtura oia ia ˈna i to ˈna ra aau.” I tia na ia Mikala e farii ia Davida eiaha noa ei upoo utuafare, ei arii o te fenua atoa râ. Ua parau roa râ oia i to ˈna manaˈo ma te tâhitohito e: “Auê te tura o te arii o Iseraela i nauanei e, o tei taratara i to ˈna ahu i nauanei, i mua mau i te mata o te mau tavini vahine no to ˈna ra mau tavini e, mai te hoê o te mau haapao-atâ e mataro i te taratara i to ˈna ra ahu e!” Te faahopearaa o te reira, oia hoi aita o Mikala i fanau aˈenei i te tamarii.—Samuela 2, 6:14-23.
6. Eaha te manaˈo o Iehova i te faatura ore o Kora i Ta ˈna i faatahinu?
6 Te hoê hiˈoraa ino o te oreraa e faatura i te aratai teotaratia i nominohia e te Atua, o to Kora ïa. Ei tamarii a Kohata, e haamaitairaa mau ta ˈna i fanaˈo i te taviniraa ia Iehova i te sekene ra! Ua faahapa râ oia ia Mose e ia Aarona, na aratai o Iseraela i nominohia e te Atua. Ua tahoê Kora e te tahi atu mau raatira o Iseraela e ua parau atu ia Mose e ia Aarona ma te teoteo e: “Te moˈa atoa nei te taata atoa e ati noa ˈˈe te amuiraa atoa nei, e tei roto Iehova ia ratou ra: e tena na, eaha orua i faateitei ai ia orua iho e haehaa iho nei te amuiraa o Iehova nei?” Eaha te manaˈo o Iehova i te haerea o Kora e o te feia i paturu ia ˈna? Ua faariro Iehova i ta ratou raveraa ei faatura-ore-raa ia ˈna iho. I muri aˈe i to ratou mataitairaa i te horomiiraahia te feia i pihai iho ia ratou i roto i te fenua, ua haamouhia Kora e na raatira e 250 i te auahi no ǒ mai ia Iehova ra.—Numera 16:1-3, 28-35.
7. E tumu anei ta te mau “aposetolo rarahi” e faaino ai ratou i te mana o Paulo?
7 I roto i te amuiraa Kerisetiano o te senekele matamua, te vai ra te feia i vahavaha i te mana teotaratia. E haerea faatura ore to “te mau aposetolo rarahi” o te amuiraa no Korinetia i nia ia Paulo. Ua faaino ratou i ta ˈna huru paraparau, a na ô ai e: “To ˈna vai-tino-raa mai, mea paruparu ïa, e ta ˈna huru paraparau, mea au ore ïa.” (Korinetia 2, 10:10, MN; 11:5) E taata orero faahiahia anei Paulo aore ra eita, e au ia ˈna te faatura ei aposetolo. Mea au ore mau anei te huru paraparau a Paulo? Te faaite maitai ra ta ˈna mau oreroraa parau i mua i te taata i papaihia i roto i te Bibilia e mea ite oia i te haapapu i te manaˈo. Ei faahopearaa o te hoê tauaparauraa poto e o Heroda Ageripa II, te hoê taata ‘ite i te mau mârôraa atoa a te ati Iuda,’ ua aratai Paulo i te arii ia parau e: ‘Ua fatata vau i te riro ei Kerisetiano ia oe’! (Ohipa 13:15-43; 17:22-34; 26:1-28) E ua pari ïa te mau aposetolo rarahi no Korinetia e mea au ore ta ˈna huru paraparau! Eaha te manaˈo o Iehova i to ratou haerea? I roto i te hoê poroi i te mau tiaau o te amuiraa no Ephesia, e parau maitai ta Iesu Mesia i te feia i ore i vare i “te feia e parau ra e, e aposetolo ratou, e e ere.”—Apokalupo 2:2.
Te faatura noa ˈtu te tia-ore-raa
8. Nafea to Davida faaiteraa e ua faatura oia i te mana ta Iehova i horoa na Saula?
8 E rave rahi hiˈoraa i roto i te Bibilia o te feia tei faatura i te taata i haamanahia, noa ˈtu e ua faaohipa hua ratou i to ratou mana ma te hape. O Davida te hoê o taua mau hiˈoraa maitatai ra. Ua pohehae te arii Saula ta Davida e tavini ra, ia ˈna no ta ˈna mau ohipa i rave e ua imi oia i te taparahi pohe ia ˈna. (Samuela 1, 18:8-12; 19:9-11; 23:26) Noa ˈtu râ e e rave rahi taime maitai ta ˈna no te haapohe ia Saula, ua parau Davida e: “Eita ta ˈu e nehenehe, ia ua i te manaˈo o Iehova, e faatae atu i to ˈu rima i nia i tei faatahinuhia e Iehova!” (Samuela 1, 24:3-6; 26:7-13, MN) Ua ite Davida e ua hape Saula, ua vaiiho râ oia na Iehova e haava ˈtu ia ˈna. (Samuela 1, 24:12, 15; 26:22-24) Aita oia i faaino ia Saula.
9. (a) Eaha te huru o Davida a hamani-ino-hia oia e Saula? (b) No te aha tatou e parau ai e mea haavare ore te faatura o Davida ia Saula?
9 Ua peapea anei Davida a hamani-ino-hia ˈi oia? Ua pii hua ˈtu Davida ia Iehova e: “Ua tia mai . . . e te titau maira te feia hamani ino ra ia ˈu ia pohe.” (Salamo 54:3) Ua ninii oia i to ˈna mafatu i mua ia Iehova: “Ia ora vau, e tau Atua, i to ˈu nei mau enemi . . . Ua amui mai te feia mana ra ia ˈu; e ere râ no te hara, e Iehova, e no te ino na ˈu i rave. Ore noâ te hara te horo maira ratou, te faaineine ratou ia ratou iho; a ara na, e hiˈo mai, ei tauturu ia ˈu.” (Salamo 59:1-4) Ua farerei aˈena anei outou i teie huru tupuraa—oia hoi aita outou i rave i te ohipa ino i nia i te hoê taata mana, teie râ, ua tamau noa oia i te haafifi ia outou? Aita Davida i ape i te faatura ia Saula. I to Saula poheraa, aita Davida i ouˈauˈa ma te oaoa, ua hamani râ oia i te hoê himene otoraa: “O Saula raua o Ionatana! [na taata here e te au mau a ora ˈi raua] . . . E oioi rahi to raua i to te aeto! e puai rahi to raua i to te liona! E te mau tamahine a Iseraela, e oto outou ia Saula.” (Samuela 2, 1:23, 24; MN) E hiˈoraa maitai mau teie o te faatura haavare ore i tei faatahinuhia e Iehova, noa ˈtu e ua hamani-ino-hia Davida e Saula!
10. Eaha te hiˈoraa maitai ta Paulo i horoa mai i te faaturaraa i te mana o te tino aratai no ǒ mai i te Atua ra, e ua aratai te reira i te aha?
10 Te vai atoa ra te mau hiˈoraa faahiahia o te feia i faatura i te mana no ǒ mai i te Atua ra i te tau Kerisetiano. A hiˈo na ia Paulo. Ua faaite oia i te faatura i te mau faaotiraa a te tino aratai o te senekele matamua a te amuiraa Kerisetiano. I te tere hopea o Paulo i Ierusalema, ua ani te tino aratai ia ˈna e tamâ ia ˈna ia au i te peu faaroo ei faaiteraa ia vetahi ê e aita oia i riri i te Ture a Mose. E nehenehe Paulo e manaˈo e, ahiri i tia: ‘Na mua ˈˈe, ua parau mai taua mau taeae ra e faarue ia Ierusalema i to ˈu haamǎtaˈuraahia i te pohe. I teie nei, te hinaaro ra ratou ia faaite au i mua i te taata e te faatura ra vau i te Ture a Mose. Ua papai aˈena hoi au i te hoê rata i to Galatia e faaara ia ratou eiaha e haapao i te Ture. Ia haere au i te hiero, e nehenehe vetahi ê e manaˈo hape i ta ˈu ohipa, a na ô ai e te faaau ra vau e tei peritomehia.’ Teie râ, aita Paulo i na reira i te feruri. I te mea e aita e faaueraa tumu Kerisetiano e ofatihia ra, ua faatura oia e ua rave oia i te aniraa a te tino aratai o te senekele matamua. Te faahopearaa i tupu oioi mai, oia hoi ua faaorahia Paulo i te hoê nahoa ati Iuda, e ua faaea ˈtura oia e piti matahiti i roto i te fare tapearaa. I te pae hopea, ua tupu te hinaaro o te Atua. Ua poro Paulo i mua i te feia toroa teitei i Kaisarea e i muri iho, ua hopoihia oia i Roma, na te hau hoi te haamâuˈaraa e aufau, e poro i mua ia Kaisara iho.—Ohipa 9:26-30; 21:20-26; 23:11; 24:27; Galatia 2:12; 4:9, 10.
E faaite anei outou i te faatura?
11. Nafea tatou e faaite ai i te faatura i te mana o teie nei ao?
11 E faaite anei outou i te faatura e au i tei haamanahia? Ua faauehia te mau Kerisetiano “e tuu atu i te mea e au i te taata atoa ra, . . . o tei [titau i te faatura] ra, e [faatura] atu â ïa.” Oia mau, to tatou auraroraa i te “feia mana toroa,” e ere noa ïa te aufauraa i ta tatou mau tute, te faaturaraa atoa râ i te feia mana na roto i to tatou haerea e ta tatou huru paraparau. (Roma 13:1-7; MN) I mua i te feia toroa a te hau o te riro paha ei mea iino, e nafea tatou? I te tuhaa fenua o Chiapas, i Mexique, ua haru te feia mana o te hoê oire iti i te fenua faaapu o na 57 utuafare Ite no Iehova no te mea aita na Kerisetiano e toru i apiti atu i roto i te tahi mau oroa faaroo. I te apooraa i faatupuhia no te faatitiaifaro i te tumu parau, ua paraparau noa te mau Ite no Iehova, tei ahu i te ahu mâ e te paohe, ma te tura e te faatura. Hau atu i te hoê matahiti i muri aˈe, ua ravehia te faaotiraa maitai no ratou. Maoti to ratou haerea i faatura ˈi te tahi feia mataitai ia ratou a hinaaro atoa ˈi e riro ei Ite no Iehova!
12. No te aha e mea faufaa ia “faatura hohonu” i ta ˈna tane faaroo ore?
12 Nafea outou e nehenehe ai e faatura i te mana no ǒ mai i te Atua ra i roto i te utuafare? I muri aˈe i to ˈna tauaparauraa i te hiˈoraa o Iesu tei faaoromai i te ino, ua parau te aposetolo Paulo e: “O outou atoa hoi, e te mau vahine, e auraro maite i ta outou mau tane ra; e aore te tahi pae i faaroo i te parau ra, ia noaa mai ratou i te haapao maitai o ta ratou mau vahine, eiaha ˈtu â te parau; i te hiˈoraa mai ratou i ta outou haapaoraa viivii ore i apiti-atoa-hia i te [faatura hohonu].” (Petero 1, 3:1, 2; MN; Ephesia 5:22-24) Te haamatara ra Petero i ǒ nei i te faufaaraa ia auraro te hoê vahine i ta ˈna tane ma te “faatura hohonu,” noa ˈtu e aita e au rahi ra i te tahi mau tane ia faaturahia ˈtu. E noaa mai paha te mafatu o ta ˈna tane faaroo ore maoti te haerea faatura o te vahine.
13. Nafea te mau vahine e nehenehe ai e faatura i ta ratou mau tane?
13 I roto i te mau irava tapiri, te huti ra Petero i to tatou ara-maite-raa i nia i te hiˈoraa o Sara, e hiˈoraa faahiahia hoi ta ˈna tane o Aberahama i te pae faaroo. (Roma 4:16, 17; Galatia 3:6-9; Petero 1, 3:6) E tia anei ia iti aˈe te faatura o te mau vahine e tane faaroo ta ratou i te mau vahine e tane faaroo ore ta ratou? Nafea ïa ia ore to outou manaˈo e tuati e to ta outou tane i nia i te tahi tumu parau? Ua horoa Iesu i te tahi aˈoraa o te nehenehe e faaohipahia i roto i te hoê auraa rahi: “O te faaue mai ia oe e haere i te hoê maile, e haere atoa orua e ia piti noa ˈtu.” (Mataio 5:41) E faatura anei outou i ta outou tane na roto i te fariiraa i to ˈna mau hinaaro? Mai te peu e mea fifi roa te reira, a faaite atu i to outou manaˈo hohonu no nia i taua tumu parau ra. Eiaha e manaˈo noa e ua ite oia eaha to outou huru. Ia faaite atu râ outou i to outou mau hinaaro, a paraparau atu ma te faatura. Te aˈo maira te Bibilia e: “Ei parau mǎrû maitai anaˈe â ta outou, ia rapaauhia i te miti ra i te ite, ia ite outou i te mea tia ia parau atu i te taata atoa ra.”—Kolosa 4:6.
14. Eaha ˈtu â te titauhia no te faatura i te mau metua?
14 E o outou te mau tamarii? Te faaue mai ra te Parau a te Atua e: “E te mau tamarii ra, e faaroo i to outou mau metua i te Fatu ra, e parau-tia hoi te reira. E faatura ˈtu i to metua tane e to metua vahine; (o te ture matamua ïa i pahonohia i te maitai i faaitehia mai).” (Ephesia 6:1-3) A tapao na e te faatueahia ra te faarooraa i to outou mau metua i te ‘faaturaraa i to outou metua tane e to outou metua vahine.’ I roto i te taˈo Heleni i hurihia ei “faatura,” te vai ra te auraa e “haafaufaa” aore ra e “horoa i te hoê faufaa.” No reira, no te faaroo, e titauhia hau atu i te haapaoraa ma te amuamu i te mau ture a te mau metua e au ra e mea teimaha ia outou. Te ani maira te Atua ia outou e haafaufaa rahi i to outou mau metua e ta ratou aratairaa.—Maseli 15:5.
15. Nafea te mau tamarii e faatura noa ˈi noa ˈtu e te manaˈo ra ratou e ua hape to ratou mau metua?
15 Ia rave to outou mau metua i te hoê mea o te faaiti i to outou faatura ia raua, nafea ïa? A tamata i te hiˈo i te tumu parau mai ia raua. Aita anei raua i ‘fanau ia outou’ e i aupuru ia outou? (Maseli 23:22) Aita anei raua e turaihia ra e te here no outou? (Hebera 12:7-11) A paraparau i to outou mau metua ma te faatura, a faataa ˈi ma te aau mǎrû i to outou manaˈo. Noa ˈtu e e pahono mai raua ia au i te hoê huru eita outou e au, eiaha roa ˈtu e paraparau atu ma te faatura ore. (Maseli 24:29) A haamanaˈo nafea to Davida tapearaa i to ˈna faatura ia Saula noa ˈtu e aita roa ˈtu te arii e pee faahou ra i te aˈoraa a te Atua. A ani ia Iehova e tauturu mai ia outou e faaruru i to outou mau manaˈo hohonu. Ua na ô Davida e: “E ninii hua i to outou aau i mua ia ˈna! o te Atua anaˈe ra to tatou haapuraa.”—Salamo 62:8; Oto o Ieremia 3:25-27.
A faatura i te feia e aratai ra
16. Eaha te haapiiraa ta tatou e huti mai i roto i te hiˈoraa o te mau orometua haapii haavare e te mau melahi?
16 Mea nominohia te mau matahiapo o te amuiraa e te varua moˈa, noa ˈtu e mea tia ore ratou e e hape ratou. (Salamo 130:3; Koheleta 7:20; Ohipa 20:28; Iakobo 3:2) Ei faahopearaa, e nehenehe te vetahi i roto i te amuiraa e ite i te mauruuru ore i te mau matahiapo. Nafea ïa tatou ia manaˈo tatou e aita te hoê ohipa i roto i te amuiraa e haapaohia ra ma te tia, aore ra e au ra e aita? A tapao na i te taa-ê-raa i rotopu i te mau orometua haapii haavare o te senekele matamua e te mau melahi: “E mǎtaˈu ore, e te mârô i to ratou iho hinaaro, aore ratou [te mau orometua haapii haavare] e mǎtaˈu ia faaino i te feia teitei. Area te mau melahi o tei hau ê atu i te mana e te puai ra, e ore roa ïa e pari faaino ia ratou [ei faaturaraa ia Iehova].” (Petero 2, 2:10-13; MN) A faaino ai te mau orometua haapii haavare i te “feia teitei”—te mau matahiapo i haamanahia i roto i te amuiraa Kerisetiano o te senekele matamua—aita te mau melahi i faaino i te mau orometua haapii haavare e faatupu ra i te amahamaharaa i roto i te mau taeae. Ua ite maite te mau melahi, no to ratou tiaraa teitei aˈe e no to ratou manaˈo maitai aˈe i te parau-tia i to te taata, eaha te tupu ra i roto i te amuiraa. Ua vaiiho râ ratou e na te Atua e haava, “ei faaturaraa ia Iehova.”—Hebera 2:6, 7; Iuda 9.
17. Eaha te faufaaraa o to outou faaroo ia faaruru outou i te mau fifi i reira outou e manaˈo ai e ua hape te mau matahiapo?
17 Noa ˈtu e aita te hoê ohipa e haapaohia ra ia au i te mea tia, eiaha anei tatou e faaroo ia Iesu Mesia mai te Upoo oraora o te amuiraa Kerisetiano? Aita anei oia e ite maite ra eaha te tupu ra i roto i ta ˈna iho amuiraa na te ao atoa nei? Eiaha anei tatou e faatura i ta ˈna huru haapaoraa i te hoê ohipa e e farii i to ˈna aravihi i te aratai i te mau mea? Oia mau, ‘o vai hoi tatou a faahapa ˈi ia vetahi ê?’ (Iakobo 4:12; Korinetia 1, 11:3; Kolosa 1:18) No te aha e ore ai e tuu atu i to outou mau haapeapearaa i mua ia Iehova na roto i ta outou mau pure?
18, 19. Eaha ta outou e nehenehe e rave ia manaˈo outou e ua hara te hoê matahiapo?
18 No te huru tia ore o te taata, e nehenehe te mau fifi e tupu mai. I te tahi mau taime, e nehenehe atoa te hoê matahiapo e harahia a haapeapea ˈi i te tahi pae. Eita te mau mea e taui ia oioi tatou i te ohipa i roto i taua huru tupuraa ra. E ino roa ˈtu â paha te fifi, atira ˈtu ai. E tiai te feia haroaroa i te pae varua e na Iehova e faatitiaifaro i te mau mea e e tuu mai i te aˈo atoa e hinaarohia i to ˈna iho taime mau e ia au i ta ˈna iho ravea.—Timoteo 2, 3:16; Hebera 12:7-11.
19 Nafea ïa ia haapeapea outou no te hoê ohipa? Maoti i te paraparau ia vetahi ê i roto i te amuiraa, no te aha e ore ai e imi i te tauturu ma te faatura i pihai iho i te mau matahiapo? Ma te ore e faahapa, a faataa nafea to outou huru-ê-raahia. Ei “aroha-atoa-raa” noa to outou ia ratou, e a faatura noa a paraparau atu ai outou ia ratou. (Petero 1, 3:8) Eiaha e faaohipa i te parau tâhitohito, a tiaturi râ i to ratou paari Kerisetiano. A mauruuru atu i te mau faaitoitoraa atoa a te mau Papai ta ratou paha e pǔpǔ mai ma te maitai. E mai te peu e e itehia e te hinaarohia ra te tahi atu â ravea faatitiaifaroraa, a tiaturi e e aratai Iehova i te mau matahiapo ia rave i te mea maitai e te tano.—Galatia 6:10; Tesalonia 2, 3:13.
20. Eaha ta tatou e hiˈopoa i roto i te tumu parau i muri nei?
20 Te vai ra râ te tahi atu â tuhaa e tia ia hiˈopoahia no nia i te faaturaraa i tei haamanahia. Eiaha anei te feia e tiaraa mana to ratou e faatura i tei horoahia e na ratou e haapao? E hiˈopoa anaˈe i te reira i roto i te tumu parau i muri nei.
Nafea outou e pahono ai?
• Eaha ta tatou tumu maitai e faatura ˈi i tei haamanahia?
• Eaha te manaˈo o Iehova e o Iesu i te feia e ore e faatura i te mana no ǒ mai i te Atua ra?
• Eaha te mau hiˈoraa maitai o te feia i faatura i tei haamanahia?
• Eaha ta tatou e nehenehe e rave mai te peu e e au ra e ua hara hoê tei haamanahia i nia ia tatou?
[Uiraa haapiiraa]
[Hohoˈa i te api 12]
Ua faatura hohonu Sara i te mana o Aberahama e ua oaoa oia
[Hohoˈa i te api 13]
Aita Mikala i faatura i te mana o Davida ei upoo utuafare e ei arii
[Hohoˈa i te api 15]
“Eita ta ˈu e nehenehe . . . e faatae atu i to ˈu rima i nia i tei faatahinuhia e Iehova!”
[Hohoˈa i te api 16]
No te aha e ore ai e tuu atu i to outou mau haapeapearaa i mua ia Iehova na roto i ta outou mau pure?